ބޮލީވުޑްގެ މަޝްހޫރު ތަރިން ކަމަށްވާ ހުމާ ޤުރޭޝީ އަދި މުރުނާލް ޓާކޫރާއެކު، އެކްޓަރު ވިކްރަމް ސިންގް ޗޯހާން މައިގަނޑު ރޯލަކުން ފެނިގެންދާ ފިލްމު “ޕޫޖާ މޭރީ ޖާން” އަންނަ އޮކްޓޯބަރު މަހުގެ 2 ވަނަ ދުވަހު ޒީ5 މެދުވެރިކޮށް ޕްރީމިއާކުރަން ނިންމައިފިއެވެ.
މެޑޮކް ފިލްމްސްއިން ޕްރޮޑިއުސްކޮށް، ނަވްޖޯތު ގުލާޓީ ޑައިރެކްޓްކޮށްފައިވާ މި ފިލްމަކީ ޓީވީއެފްގެ “ސޭނާ” އިން ފާހަގަކޮށްލެވުނު ވިކްރަމް މެއިންސްޓްރީމް ސިނަމާއަށް ލީޑް އެކްޓަރެއްގެ ގޮތުގައި ތައާރަފުވާ ފުރަތަމަ ފިލްމެވެ. މި ފިލްމުގެ މަންޒަރުތައް ނަގާފައިވަނީ 2022 ވަނަ އަހަރުގައެވެ.
މި ފިލްމުގައި ވިކްރަމް ކުޅެނީ އަނިކެތު ސްރީވާސްތަވާ ކިޔާ މީހެއްގެ ރޯލެވެ. މިއީ މުރުނާލް ކުޅޭ ކެރެކްޓާ ކަމަށްވާ “ޕޫޖާ” ދެކެ އިންތިހާއަށް ލޯބިވެ، ފަހުން އެ ލޯބި ބިރުވެރި “އޮބްސެޝަން” އަކަށް ބަދަލުވެގެންދާ މީހެކެވެ.
ފިލްމާ ގުޅޭގޮތުން ވާހަކަދައްކަމުން ވިކްރަމް ބުނީ، މި ފިލްމު ރިލީޒްވާނެ ދުވަހަކަށް ވަރަށް ކެތްމަދުވެފައި ހުރިކަމަށާއި، ބެލުންތެރިންނަށް އޭނާ މުޅިން ތަފާތު މިޒާޖެއްގެ ރޯލަކުން ފެނިގެންދާތީ އުފާކުރާ ކަމަށެވެ. އަދި އަނިކެތުގެ ކެރެކްޓާއަކީ ވަރަށް ގިނަ ފަށަލަތަކެއް އެކުލެވޭ، ކުޅެން ވަރަށް ޝައުޤުވެރި ރޯލެއް ކަމަށް އޭނާ ފާހަގަކުރިއެވެ.
މީގެ އިތުރުން، ފިލްމުގެ ޕްރޮޑަކްޝަން ޓީމަށާއި، ޑައިރެކްޓަރަށް ޝުކުރު އަދާކުރަމުން ވިކްރަމް ބުނީ، މުރުނާލް، ހުމާ އަދި ވިޖޭ ރާޒް ފަދަ މޮޅެތި ތަރިންނާއެކު ފުރަތަމަ ފިލްމުގައި މަސައްކަތް ކޮށްލަން ލިބުމަކީ ކެރިއަރަށް ލިބުނު ވަރަށް ބޮޑު ކުރިއެރުމެއް ކަމަށެވެ. މުރުނާލްއާއެކު މަސައްކަތް ކުރުމަކީ ވަރަށް ފަސޭހަ ކަމެއް ކަމަށާއި، ދެމީހުންގެ ކެރިއަރުގެ ފެށުމުގައި އެއްގޮތް ކަންތައްތަކެއް ހުރުމުން މިހާރު ދެމީހުންނަކީ ގާތް ދެ އެކުވެރިން ކަމަށްވެސް އޭނާ ބުންޏެވެ.
ވިކްރަމް އިތުރަށް ބުނީ އޭނާއަކީ އަބަދުވެސް އެއްވައްތަރެއްގެ ރޯލުތައް ކުޅުމާ ދުރުހެލިވާ މީހެއް ކަމަށާއި، އެކްޓަރެއްގެ ގޮތުގައި އެކި ކަހަލަ ތަފާތު ތަޖުރިބާތައް ކުރަން ބޭނުންވާ ކަމަށެވެ. އަދި މި ފިލްމަށް އިންތިޒާރު ކުރަން ޖެހުނު ނަމަވެސް، މި ފިލްމުން ބެލުންތެރިންނަށް ފުރިހަމަ ތަޖުރިބާއެއް ލިބިގެންދާނެ ކަމަށް އޭނާ ޔަޤީންކަން ދިނެވެ.
ވިކްރަމްއަކީ 2013 ވަނަ އަހަރު ޒީ ޓީވީގެ “ޤުބޫލް ހޭ” ޑްރާމާއިން ތައާރަފުވެ، “ޖާނާ ނާ ދިލް ސޭ ދޫރް” ގައި ކުޅުނު އަތަރްވްގެ ރޯލުން ބޮޑު މަޤުބޫލުކަމެއް ހޯދި ތަރިއެކެވެ. މީގެ އިތުރުން އޭނާގެ ފާހަގަކޮށްލެވޭ މަސައްކަތްތަކުގެ ތެރޭގައި “އޭކް ދީވާނާ ތާ” އަދި “ޔޭ ޖާދޫ ހޭ ޖިން ކާ” ގެ އިތުރުން 2014 ވަނަ އަހަރުގެ ބޮލީވުޑް ފިލްމު “މަރްދާނީ 2” ހިމެނެއެވެ.
