މެންދުރުފަހުން ފެށިގެން މާލެއަށް ވެހެމުންދިޔަ ބޯ ވާރޭގެ ސަބަބުން، ޕޮލިސް ސްޓޭޝަނުގެ ބޭރުގައިވާ ހަނި މަގުތައް ވަނީ ފެންބޮޑުވެ، އަލިތައް ދުރަށް ފެތުރިފައެވެ. މަގުމަތީގެ ފެންގަނޑުތަކުގެ ތެރެއިން ސައިކަލުތައް އަޑުލައްވަމުން ދުއްވަމުން ދިޔައެވެ. ބަނދަރުގެ ކޮންމެވެސް ހިސާބަކުން ފެރީގެ އިންޖީނު އަޑު އިވެމުންދިޔައިރު، ހުޅުވާފައިވާ ކުޑަދޮރުން ކަނޑުގެ ލޮނުވަސް އެތެރެއަށް ވަންނަމުން ދިޔައެވެ.

އިންސްޕެކްޓަރ ޒިބާން ރަޝީދު އިނީ އޭނާގެ އޮފީހުގައި އެކަންޏެވެ. އޭނާގެ މޭޒުމަތީގައި ބާއްވަން ނުޖެހޭ ފޮޓޯގަނޑަކަށް އޭނާ ބަލަހައްޓައިގެން އިނެވެ. އެއީ ރާނިޔާ ޙަސަންގެ ފޮޓޯއެކެވެ. އެ ފޮޓޯގައި އޭނާ އިނީ ހިނިތުންވެލައިގެންނެވެ. އެއީ އިތުބާރާއި، ހަމަޖެހުމުން ފުރިގެންވި، ނަމަވެސް މިހާރު ވާސިލުނުވެވޭހާ ދުރު ހިނިތުންވުމެކެވެ.

އެއް އިރެއްގައި އެ ހިނިތުންވުން ޚާއްސަވެފައިވަނީ އޭނާއަށެވެ. ނަމަވެސް މިހާރު ރާނިޔާއަކީ މޯލްޑިވްސް ޕޮލިސް ސަރވިސްގެ ސްޕެޝަލިސްޓް ޔުނިޓުގެ ސީނިއަރ އޮފިސަރެކެވެ. އޭނާގެ ހަރުދަނާކަމާއި، ބިރުކުޑަ ތަހުޤީޤުތަކުގެ ސަބަބުން އެންމެންގެ އިޙުތިރާމް އޭނާއަށް ލިބިފައިވެއެވެ. އޭގެ ބަދަލުގައި ޒިބާނަކީ އައްޑޫ ސިޓީގެ ކުޑަ ޕޮލިސް ސްޓޭޝަނެއްގެ ޗީފް އިންސްޕެކްޓަރެވެ. އެއީ ފުލުހުންނަށް ކަމެއް އެނގުމުގެ ކުރިން އެންމެންނަށް އެންމެންގެ ކަންކަން އެނގޭ ފަދަ މާހައުލެކެވެ.

އެ ދެމީހުންގެ ކައިވެނި ރޫޅިގެން ދިޔައީ މަޑުމަޑުންނެވެ. އޭގައި އެއްވެސް ބޭވަފާތެރިކަމެއް ނުވަތަ ބޮޑު ގޮވުމެއް ނެތެވެ. އޮތީ ހަމައެކަނި ދުރުމިނެވެ.

ޒިބާންގެ ވަޒީފާ އާދައިގެ ރަށެއްގެ ސްޓޭޝަނުގައި ތާށިވެފައި ވަނިކޮށް، ރާނިޔާގެ ކެރިއަރު ދިޔައީ ހަލުވިކަމާއެކު ކުރިއަރަމުންނެވެ. އޭނާއާމެދު ފަޚުރުވެރިވާކަމަށް ޒިބާން އަމިއްލަ ނަފްސަށް ވިސްނައިދިނެވެ. އެހެންނަމަވެސް އެ ފަޚުރުވެރިކަމުގެ އަޑީގައި އޭނާ ޤަބޫލުކުރަން ބޭނުންނުވާ ފަދަ ނުތަނަވަސްކަމެއް ފޮރުވިފައި އޮތެވެ.

ދެން އައީ ޝީލާ މޫސާއެވެ. ޝީލާ ކައިވެނިކޮށްގެން އުޅުނީ ނާހިދު ޝަރީފާއެވެ. ނާހިދަކީ މީހުންގެ ކުރިމަތީގައި ކިތަންމެ ހިތްހެޔޮ މީހެއްގެ ގޮތުގައި ދެއްކުނު ނަމަވެސް، ގޭތެރޭގައި އަނިޔާވެރި މީހެކެވެ. ޝީލާ އެންމެ ފުރަތަމަ ސްޓޭޝަނަށް އަންނަން ފެށީ ގެވެށި އަނިޔާއާއި އިންޒާރުތަކުގެ ޝަކުވާއާއިގެންނެވެ.

ޒިބާން އޭނާގެ ވާހަކަތައް އެހިއެވެ. ދެން އޭނާއަށް އަޅާލަން ފެށިއެވެ. އަދި އެންމެ ފަހުން، އޭނާ ހައްދު ފަހަނައަޅައި ދިޔައެވެ. އެ ދެމީހުންގެ ގުޅުން އޮތީ ސިއްރެއްގެ ގޮތުގައެވެ. ދަންވަރުގެ ފޯނު ކޯލްތަކާއި، އަވަށްޓެރިންގެ ލޯތަކަށް ސިއްރުން ބާއްވާ ބައްދަލުވުންތަކުގެ ތެރޭގައެވެ. އެހެންނަމަވެސް ޝީލާއާއެކު ހުންނައިރުވެސް، ޒިބާނަށް ރާނިޔާގެ މަތިން ހަނދާން ނައްތައެއް ނުލެވުނެވެ.

އެއްރޭ ހިތަދޫގެ ހިމޭން ކެފޭއެއްގެ ތެރޭގައި އިނދެ، ޝީލާ އޭނާއާ ދިމާއަށް ބަލައިލަމުން މަޑުމައިތިރިކަމާއެކު ބުންޏެވެ. “ކަލޭ އަދިވެސް އޭނާދެކެ ލޯބިވޭ.”

ޒިބާން މޫނު އަނބުރާލިއެވެ. “ތިހެން ނުބުނޭ.”

“ކީއްވެ؟ އެއީ ތެދަކަށް ވާތީތަ؟” ޝީލާ އެހިއެވެ.

“ކަލެއަކަށް ނުވިސްނޭނެ.” ޒިބާން މަޑުމަޑުން ބުނެލިއެވެ.

“ކަލެއަށް ހީވާ ވަރަށްވުރެ ބޮޑަށް އަހަންނަށް ވިސްނޭ.”

ޝީލާގެ އަޑުގައިވަނީ އާދަޔާ ޚިލާފު މަޑުމައިތިރިކަމެކެވެ. ދެން އޭނާ މޭޒުމަތީގައި މެޑިކަލް ރިޕޯޓެއް ބޭއްވިއެވެ. ޒިބާން އެއަށް ބަލައިލިއެވެ. ކެންސަރު ބަލީގެ ފަހު މަރުހަލާއެވެ.

ހިނދުކޮޅަކަށް، ތަށިތަކުގެ އަޑާއި، ވާހަކަތަކުގެ އަޑާއި، ދުއްވާ އެއްޗެހީގެ އަޑުތައް ކެނޑިގެން ދިޔަ ކަހަލައެވެ.

“ކިހާ ދުވަހެއް؟” އޭނާ އެހިއެވެ.

“ޑޮކްޓަރު ބުނާކަށް ބޭނުމެއް ނުވި.” ޝީލާ ބުންޏެވެ.

ޒިބާން އޭނާއަށް ބަލައިލިއެވެ. “ނާހިދަށް އެނގޭތަ؟”

ޝީލާގެ މޫނުމަތިން ހިތި ހިނިތުންވުމެއް ފެނިގެންދިޔައެވެ.

“ނާހިދަށް ފައިދާވާ ހުރިހާ ކަމެއް އޭނާއަށް އެނގޭ.”

އެރޭ ޒިބާން ޝީލާ ގެއަށް ގެންގޮސްދިނެވެ. ކާރުން ފޭބުމުގެ ކުރިން ޝީލާ އޭނާގެ އަތުގައި ހިފެހެއްޓިއެވެ.

“އަހަރެން އެކަނި ދޫކޮށްނުލާތި.”

ޒިބާން ޖަވާބެއް ނުދިނެވެ. އޭނާއަކަށް ޖަވާބެއް ނުދެވުނެވެ.

*****

ތިން ހަފުތާ ފަހުން، ފަޅުތެރެއަށް ވަން ލޯންޗެއް ރެއިޑްކޮށް، ޒިބާންގެ ސްޓޭޝަނުން ގިނަ އަދަދެއްގެ މަސްތުވާތަކެތި އަތުލައިގަތެވެ. އެ އޮޕަރޭޝަން ރޭވިފައިވަނީ ވަރަށް ފުރިހަމަކޮށެވެ. ތުހުމަތުކުރެވޭ މީހުން ހައްޔަރުކޮށް، މަސްތުވާތަކެތި ރައްކާތެރިކޮށް، ގިނަ އަދަދެއްގެ ފައިސާ ފެނުނެވެ. ޤަވާއިދާ އެއްގޮތަށް އެ ފައިސާ ބެހެއްޓުނީ ހެކީގެ ގޮތުގައެވެ. ނަމަވެސް އެރޭ ޒިބާނަށް އައީ ނާއުންމީދުން ފުރިގެންވާ ފޯނު ކޯލެކެވެ.

“ޕްލީޒް.” ޝީލާ ގިސްލަމުން ބުންޏެވެ. “އަހަންނަށް ބޭސް ބޭނުންވޭ.”

“އަހަރެން އެހެން ގޮތެއް ހޯދާނަން.” ޒިބާން ބުންޏެވެ.

“އެހެން އެއްވެސް ގޮތެއް ނެތް.” ޝީލާ ގިސްލަމުން ބުންޏެވެ.

“ޝީލާ. އެއީ ފުލުހުންގެ ބެލުމުގެ ދަށުގައިވާ ފައިސާ.” ޒިބާން ޝީލާއަށް ވިސްނައިދޭ ފަދަ ރާގެއްގައި ބުންޏެވެ.

“ދެން އަހަރެން ހަދަންވީ ކިހިނެއް؟ މަރުވާންވީތަ؟” ޝީލާގެ ގިސްލެވިފައިވާ އަޑު ތަންކޮޅެއް ބާރުވިއެވެ.

ޒިބާން ލޯ މަރާލިއެވެ. އޭނާ ކުރަން އުޅޭ ކަންތައް އޭނާއަށް ސާފުކޮށް އެނގެއެވެ. އެއީ ގޯހެކެވެ. ކުށެކެވެ. ނަމަވެސް އޭނާއަށް ހަނދާންވީ ޝީލާގެ ތުރުތުރުއަޅާ އަތްތަކެވެ. އޭނާގެ ހޮސްޕިޓަލް ރިޕޯޓްތަކެވެ. ހެދުމުގެ އެތެރޭގައި ފޮރުވާފައިވާ އަނިޔާގެ ލަކުނުތަކެވެ. އަދި ކޮންމެވެސް މީހަކު ސަލާމަތް ކުރެވިދާނެކަމަށް އަދިވެސް ޤަބޫލުކުރަން ބޭނުންވި އޭނާގެ ހިތުގެ އެދުން އެ ނިންމުން ނިންމައިދިނެވެ.

އޭނާ އެ ފައިސާ ނެގިއެވެ. އެރޭ އޭނާ އެ ފައިސާ ޝީލާއާ ހަވާލުކުރިއެވެ.

“މި ފައިސާ ފަރުވާއަށް ބޭނުންކުރޭ.” އޭނާ ބުންޏެވެ.

ޝީލާ އެ ދަބަހަށް ބަލައިލިއެވެ. “ކަލޭ މިހެން ހަދައިގެން ނުވާނެ.”

“އަހަންނަށް އެނގޭ.”

“ކަލޭގެ ހުރިހާ އެއްޗެއް ގެއްލިދާނެ.”

ޒިބާން އޭނާއަށް ބަލައިލިއެވެ. “އަހަރެންގެ ހުރިހާ އެއްޗެއް މިހާރުވެސް ގެއްލިއްޖެ.”

ޝީލާ އޭނާގެ އަތުގައި ހިފިއެވެ. “ނޫން ޒިބާން. ހުރިހާ އެއްޗެއް ނޫން.”

އޭނާ ދިރިހުއްޓާ ޒިބާނަށް ފެނުނު އެންމެ ފަހު ފަހަރަކީ އެއީއެވެ. އެންމެންވެސް ޤަބޫލުކުރި ގޮތަކީ އެއީއެވެ.

*****

ޖެހިގެން އައި ދުވަހުގެ ފަތިހު 2:17 ގައި، ނާހިދާއި ޝީލާގެ ގޭގައި ވަރުގަދަ އަލިފާނުގެ ހާދިސާއެއް ހިނގިއެވެ. އަވަށްޓެރިން ހޭލީ ދުމުގެ ވަހަށެވެ. ކޮންމެވެސް މީހަކު ހަޅޭއްލަވައިގަތެވެ. ސިފައިން އައުމާ ހަމައަށް މީހުން ބާލިދީތަކުން ފެންޖަހަމުން ދިޔަ ނަމަވެސް، އަލިފާންގަނޑު ވަނީ މުޅި އިމާރާތް އަނދާ އަޅިއަށް ހަދާލާފައެވެ.

ހެނދުނު ވީއިރު، ޝީލާ މަރުވެފައިވާ ކަމަށް އިޢުލާން ކުރެވުނެވެ. އަނދާފައިވާ ގޭގެ ބޭރުގައި ނާހިދު ކެއްސަމުން، ރޯން ހުއްޓެވެ. ޔުނީފޯމުގައި ޒިބާން އެތަނަށް ދިޔައެވެ. ހަށިގަނޑު ނެރެގެން ގެންދިޔަ މަންޒަރު ފެނުމުން އޭނާގެ ހިތް ހުއްޓުނު ފަދައެވެ.

ދެން ފުލުހަކު އޭނާގެ ގާތަށް އައެވެ. “ސަރ.”

“ކީކޭ؟” ޒިބާން އަމިއްލަ އިޙުސާސްތަކުގެ މައްޗަށް ބާރު ފޯރުވަމުން އެހިއެވެ.

“އަހަރެމެންނަށް އެއްޗެއް ފެނިއްޖެ.”

އަނދާފައިވާ ކޮޓަރީގެ ކުނިބުނީގެ ތެރެއިން ފެނުނީ އެއްބައި އަނދާފައިވާ ދަބަހެކެވެ. މަސްތުވާތަކެތީގެ އޮޕަރޭޝަނުން އަތުލައިގަތް ފައިސާތައް އޮތީ ގެއްލިފައެވެ. އަދި އަނދާފައިވާ ބައެއް ނޫޓުތަކުގެ ސީރިއަލް ނަންބަރުތައް، ޒިބާންގެ ރެއިޑުން ހޯދި ފައިސާތަކުގެ ނަންބަރުތަކާ ދިމާވެއެވެ. ކުއްލިއަކަށް އެންމެންގެ ލޯތައް އަމާޒުވީ ޒިބާނަށެވެ.

*****

މައްސަލައިގެ ތަހުޤީޤު މާލެއަށް ބަދަލުކުރެވުނެވެ. އަދި އެ ތަހުޤީޤު އިސްވެ ކުރިއަށް ގެންދަން ހަވާލުކުރީ ކާކާކަން އެނގުމުން، ޒިބާންގެ މޭތެރެ ފިނިވެގެން ދިޔައެވެ. އެއީ ރާނިޔާއެވެ.

ޖެހިގެން އައި ދުވަހުގެ ހެނދުނު، ނޫކުލައިގެ ފުލުހުންގެ ޔުނީފޯމުގައި އޭނާ ސުވާލުކުރާ ކޮޓަރިއަށް ވަނެވެ. އިރުކޮޅެއް ވަންދެން ދެމީހުންކުރެ އެކަކުވެސް ވާހަކައެއް ނުދައްކައެވެ.

“ކަލެއަށް ޝީލާ އެނގޭ؟” ރާނިޔާ ބުންޏެވެ.

ޒިބާން މޭޒަށް ބަލަހައްޓައިގެން އިނެވެ. “އާނ.”

“ކަލޭ އޭނާއާ ބައްދަލުކުރަމުން ދިޔައިން؟”

ރާނިޔާގެ އެ ސުވާލުން ތަނަށް ހިމޭންކަން ވެރިވިއެވެ.

“ޖަވާބުދީ!” ރާނިޔާގެ އަޑު ބާރުވިއެވެ.

“އާނ.”

ރާނިޔާ ދަތްކުނޑި ވިކައިލިއެވެ. “އަދި ކަލޭ އަމިއްލަ ސްޓޭޝަނުން ހެކި ވަގަށް ނެގީ.”

ޒިބާން އިސްއުފުލައި ބަލައިލިއެވެ. “އަހަރެން އެ ފައިސާ ނެގިން.”

“ކީއްވެ؟” ރާނިޔާ އެހިއެވެ.

“އޭނާ އުޅުނީ ވަރަށް ބަލިވެ.” ޒިބާން މަޑުމަޑުން ބުނެލިއެވެ.

“ތީ އަހަރެން އެހި ސުވާލުގެ ޖަވާބެއް ނޫން.” ރާނިޔާ އެހިއެވެ.

“އަހަރެން ބޭނުންވީ އޭނާ ސަލާމަތްކުރަން.” ޒިބާން ޖަވާބުދިނީ ތެދަށެވެ.

ރާނިޔާ އިރުކޮޅަކު އޭނާއަށް ބަލަހައްޓައިގެން ހުއްޓެވެ.

“ކަލޭ އަބަދުވެސް ބޭނުންވީ އެންމެން ސަލާމަތްކުރަން، ޒިބާން.” ރާނިޔާގެ އަޑުގައިވި ހަރުކަށިކަން މަޑުވިއެވެ. “އެކަމަކު އަމިއްލަ ނަފްސު ސަލާމަތްކުރާނެ ގޮތެއް ކަލެއަކަށް ދުވަހަކުވެސް ނޭނގުނު.”

(ނުނިމޭ)