90ގެ އަހަރުތަކާއި 2000ގެ ކުރީކޮޅު މަޤުބޫލު ތުރިލާ ފިލްމުތައް ގެނެސްދީގެން މަޝްހޫރުކަން ހޯދާފައިވާ ޑައިރެކްޓަރުން ކަމަށްވާ އައްބާސް-މުސްތާންގެ އާ ފިލްމު “3 މަންކީސް” ރިލީޒްކުރާ ތާރީޚު އިއުލާނުކޮށް، ފިލްމުގެ ފުރަތަމަ ޕޯސްޓަރު އާންމުކޮށްފިއެވެ.
ވެރައިޓީން ރިޕޯޓްކޮށްފައިވާ ގޮތުގައި އެކްޝަން-ހައިސްޓް ޑްރާމާއެއްގެ ގޮތުގައި ގެނެސްދޭ މި ފިލްމު ސިނަމާތަކަށް ގެނައުމަށް ހަމަޖެހިފައިވަނީ މިއަހަރުގެ ޑިސެމްބަރު މަހުގެ 4 ވަނަ ދުވަހުއެވެ. ގާންދީ ޖަޔަންތީއާ ދިމާކޮށް މިއަދު (ހުކުރު ދުވަހު) ނެރުނު މި ފިލްމުގެ ފުރަތަމަ ޕޯސްޓަރުން ފެންނަނީ، ބަޑިއެއް ހިފައިގެން ހުރި އަރްޖުން ރާމްޕާލްގެ އިތުރުން މޫނުމަތި ނިވާކޮށްގެން ތިބި ފޭރޭ މީހުން ކަމަށް ބެލެވޭ ތިން މީހެކެވެ.
މި ފިލްމުގައި ހިމެނޭ ތަރިންގެ ތެރޭގައި އަރްޖުން ރާމްޕާލްގެ އިތުރުން މުސްތަފާ ބުރްމާވާލާ، ޕްރިޔާ ޕްރަކާޝް ވާރިއާ، ވިޝާލް ޖެތުވާ، އަނިލް ބިޝްނޯއީ އަދި 2022 ވަނަ އަހަރުގެ ޑިސެމްބަރު މަހު މަރުވި ޒުވާން ބަތަލާ ތުނީޝާ ޝަރުމާ ހިމެނެއެވެ. “ޗަކްރަވަރްތިން އަޝޯކް ސަމްރާޓް” އަދި “އިޝްގް ސުބްހާނަﷲ” ފަދަ މަޝްހޫރު ޑްރާމާތަކުން ފެނިގެންދިޔަ ތުނީޝާ މަރުވުމުގެ ކުރިން މަސައްކަތްކުރި އެންމެ ފަހު ޕްރޮޖެކްޓަކީ ވެސް މިއީއެވެ.
ޚަބަރުތައް ބުނާގޮތުގައި، މި ފިލްމުގައި އަރުޖުން ރާމްޕާލް އަދާކުރާ ކެރެކްޓަރަކީ މަޝްހޫރު ވެބް ސީރީޒް “މަނީ ހައިސްޓް” ގެ ޕްރޮފެސަރ (ސާޖިއޯ މަރްކީނާ)ގެ ކެރެކްޓާއާ އެއްގޮތް ސިފަތަކެއް އެކުލެވޭ ރޯލެކެވެ.
ޑައިރެކްޓަރު ޖޯޑު އައްބާސް-މުސްތާނަކީ މީގެ ކުރިންވެސް ކާމިޔާބު ވައްކަމާއި ފޭރުމުގެ ފިލްމުތައް އުފައްދާފައިވާ ބައެކެވެ. އެގޮތުން 2012 ވަނަ އަހަރު ނުކުތް ހޮލީވުޑް ފިލްމު “ދަ އިޓާލިއަން ޖޮބް” ގެ ރީމޭކް “ޕްލޭޔާސް” އަދި 2013 ގައި ރިލީޒްކުރި “ރޭސް 2” އަކީ ފާހަގަކޮށްލެވޭ މިފަދަ ދެ ފިލްމެވެ. އަބީޝެކް ބައްޗަން، ބޮބީ ޑިއޯލް އަދި ބިޕާޝާ ބާސޫ ފަދަ ތަރިން ފެނިގެންދިޔަ “ޕްލޭޔާސް” ގެ އިތުރުން “ރޭސް 2” ގައި ސައިފް އަލީ ޚާންގެ ކެރެކްޓާއިން ހިންގާ ބޮޑު ވައްކަމަކީ ބެލުންތެރިންގެ މެދުގައި ބޮޑު މަޤުބޫލުކަމެއް ލިބުނު ކަންކަމެވެ.
އައްބާސް-މުސްތާން އެންމެ ފަހުން ގެނެސްދީފައިވަނީ ކަޕިލް ޝަރުމާ ލީޑް ރޯލު ކުޅުނު “ކިސް ކިސް ކޯ ޕިޔާރު ކަރޫން 2” އެވެ. “3 މަންކީސް” ވެގެންދާނީ މި ޑައިރެކްޓަރުންގެ ފަރާތުން އަނެއްކާވެސް ފެނިގެންދާނެ ވަރުގަދަ ތުރިލާ އެކްޝަން ފިލްމަކަށެވެ.
