ދުވާލަކު އާފަލެއް ކެއުމުން ޑޮކްޓަރާ ދުރަށްދެވޭނެ ކަމަށް ބުނާ މުސްކުޅި ބަހުގެ ހަގީގަތް ބެލުމަށްޓަކައި، 40 މީހުން ބައިވެރިކޮށްގެން ދިރާސާއެއް ވަނީ ކުރިއަށް ގެންގޮސްފައެވެ.
ކުޑައިރުން ފެށިގެން އަޅުގަނޑުމެންގެ ތެރެއިން ގިނަ ބަޔަކު އަޑުއަހާފައިވާ މި ބުނުމަކީ ކިހާވަރެއްގެ ހަގީގަތެއް އެކުލެވިގެންވާ ވާހަކައެއްކަން ކަށަވަރުކުރުމަކީ ހީކުރާ ވަރަށްވުރެ އުނދަގޫ ކަމެކެވެ.
“އެމެރިކަން ޖާނަލް އޮފް ކްލިނިކަލް ނިއުޓްރިޝަން” ގައި ޝާއިޢުކޮށްފައިވާ ދިރާސާއަކުން ދައްކާ ގޮތުގައި، އަށް ހަފުތާ ވަންދެން ދުވާލަކު ދެ އާފަލު ކޭ މީހުންގެ ހަށިގަނޑުގައި ހުންނަ “އެލް.ޑީ.އެލް” ނުވަތަ ނުރައްކާތެރި ކޮލެސްޓްރޯލް ވަނީ ދަށްވެފައެވެ.
މި ދިރާސާގައި ބައިވެރިވި 40 މީހުން، އިތުރު އަށް ހަފުތާ ވަންދެން އާފަލުގައި ހުންނަ މިންވަރަށް ހަކުރު އެކުލެވޭ ބުއިމެއް ބޭނުންކުރިއެވެ. ނަމަވެސް ކޮލެސްޓްރޯލް ދަށްވީ ހަމައެކަނި އާފަލު ކޭ މުއްދަތުގައެވެ.
މި ދިރާސާގައި ބައިވެރިވީ ކޮލެސްޓްރޯލް ކުޑަކޮށް މަތިކޮށް ހުރި މެދުއުމުރުގެ މީހުންނެވެ. އެމީހުންގެ އެވްރެޖް އުމުރަކީ 51 އަހަރެވެ. އަދި އޭގެ ތެރޭގައި އަންހެނުންނާއި ފިރިހެނުން ހިމެނެނީ ދާދި އެއްވަރަކަށެވެ.
ދިރާސާގެ ނަތީޖާ
އެލް.ޑީ.އެލް ކޮލެސްޓްރޯލް ދަށްވީ ކުޑަ މިންވަރަކަށް ނަމަވެސް، އެއީ ސިއްހީ ގޮތުން ފާހަގަކޮށްލެވޭ ފަދަ ބަދަލެކެވެ. މީގެ އިތުރުން ޖުމްލަ ކޮލެސްޓްރޯލާއި، ލޭގައި ހުންނަ އެހެނިހެން ސަރުބީގެ ބާވަތްތައް (ޓްރައިގްލިސަރައިޑްސް) ވެސް ވަނީ ދަށްވެފައެވެ.
ސައިންސްވެރިން ވަނީ ލޭހޮޅިތަކަށް މައްސަލައެއް ދިމާވުމުން އިތުރުވާ މާއްދާއެއް ކަމަށްވާ އައިކެމް-1 (ICAM-1)ގެ މިންވަރުވެސް ބަލާފައެވެ. އާފަލު ކެއުމުން މި މާއްދާގެ މިންވަރު ވެސް ދަށްވިކަން ފާހަގަކުރެވުނެވެ.
އަދި ހަމައެހެންމެ، ކުދި ލޭހޮޅިތަކުގެ މަސައްކަތް ރަނގަޅުވެ، ލޭ ދައުރުވުމަށް ހެޔޮ ބަދަލުތަކެއް އައިސްފައިވާކަން ވެސް މި ދިރާސާއިން ދެއްކިއެވެ.
ދުވާލަކު ދެ އާފަލު ކެއުމަކީ ކޮލެސްޓްރޯލް ބޭހެއްގެ ބަދަލުގައި ކުރެވޭނެ ކަމެއް ނޫން ނަމަވެސް، ހަމައެކަނި މޭވާއެއް ބޭނުންކޮށްގެން މިފަދަ ފާހަގަކޮށްލެވޭ ބަދަލެއް އައުމަކީ ކާނާއާ ބެހޭ ދިރާސާތަކުގައި މަދުން ނޫނީ ނުފެންނަ ކަމެކެވެ.
ފާހަގަކޮށްލެވޭ ދެ ކަމެއް
އާފަލުގައި ހިމެނޭ ދެ މާއްދާއެއް ސައިންސްވެރިން ފާހަގަކުރެއެވެ. އެއީ “ޕެކްޓިން” ކިޔާ ފައިބަރުގެ ބާވަތަކާއި، އާފަލުގެ ތޮށީގައި ގިނައިން ހުންނަ “ޕޮލީފީނޯލްސް” ކިޔާ ގަސްގަހާގެހިން ލިބޭ މާއްދާތަކެކެވެ.
ހާވާޑް ޓީ.އެޗް. ޗޭން ސްކޫލް އޮފް ޕަބްލިކް ހެލްތުން ހާމަކުރާ ގޮތުގައި، މި ފައިބަރުގެ ބާވަތް ގޮހޮރުގައި ހުންނަ ބައިލް އެސިޑްތަކާ ގުޅިގެން ހަށިގަނޑުން ބޭރުވެއެވެ. އޭގެ ނަތީޖާއެއްގެ ގޮތުން، ފުރަމޭއިން އަލުން ބައިލް އެސިޑް އުފެއްދުމަށްޓަކައި ލޭގައި ހުންނަ ކޮލެސްޓްރޯލް ބޭނުންކުރަން ޖެހުމުން، ލޭގައި ހުންނަ ކޮލެސްޓްރޯލްގެ މިންވަރު ދަށްވެއެވެ.
މި ދިރާސާގައި ބޭނުންކުރި މިންވަރަށް އާފަލު ކެއުމުން ގާތްގަނޑަކަށް އެއް ގްރާމްގެ ޕޮލީފީނޯލްސް ލިބެއެވެ. މިއީ ހަށިގަނޑުގެ ދުޅަހެޔޮކަން އިތުރުކޮށްދީ ލޭހޮޅިތަކުގެ މަސައްކަތް ހަރުދަނާކޮށްދޭ މާއްދާތަކެކެވެ.
ހާވާޑް ހެލްތުން ވެސް މިކަމަށް ތާއީދުކުރެއެވެ. އެ ތަނުން ފާހަގަކުރާ ގޮތުގައި، ދުވާލަކު އާފަލެއް ކެއުމުން ލޭގެ ޕްރެޝަރާއި، ކޮލެސްޓްރޯލް އަދި ހަށިގަނޑުގެ ދުޅަވުން (އިންފްލެމޭޝަން) ކުޑަކޮށްދިނުމަށް އެހީތެރިވެދެއެވެ.
އެންމެ ފުރިހަމަ ފައިދާ ހޯދާނީ ކިހިނެއް؟
އާފަލުގައި ހިމެނޭ މުހިންމު މާއްދާތައް ހުންނަނީ އޭގެ ތޮށީގައާއި ތޮށީގެ ދަށުގައެވެ. އެހެންކަމުން، ތޮށި މަށާލުމުން އޭގައި ހިމެނޭ ގިނަ ފައިދާތަކެއް އުނިވެގެންދެއެވެ. އެންމެ ރަނގަޅު ގޮތަކީ ތޮއްޓާއެކު މުޅި އާފަލު ކެއުމެވެ.
ކޮލެސްޓްރޯލް ދަށްކުރުމަށް އެހީތެރިވެދޭ ހަމައެކަނި ކާނާއަކީ އާފަލެއް ނޫނެވެ. އޯޓްސް، އަވަކާޑޯ، ތޮޅީގެ ބާވަތްތައް އަދި ބާލީއަކީ ވެސް މިފަދަ ފައިދާތަކެއް ލިބޭ ތަކެތި ކަމަށް ދިރާސާތަކުން ދައްކައެވެ.
މިހާރުވެސް ކޮލެސްޓްރޯލް މަތިވެގެން ބޭސް ބޭނުންކުރާ ފަރާތެއް ނަމަ، އާފަލު ކެއުމަކީ ބޭހުގެ ބަދަލުގައި ކުރެވޭނެ ކަމެއް ނޫނެވެ. ނަމަވެސް ބޭހާއެކު އިތުރު އެހީއެއްގެ ގޮތުގައި މިއީ ބޭނުންކުރެވިދާނެ އެއްޗެކެވެ.
ކާނާއަށް ބޮޑެތި ބަދަލުތަކެއް ގެންނަން ގަސްތުކުރާނަމަ، އަބަދުވެސް ޑޮކްޓަރެއްގެ ލަފާ ހޯދުން މުހިންމެވެ.
