މިއަދުގެ ހަލަބޮލި ޑިޖިޓަލް ދުނިޔޭގައި، ދީނީ ކަންކަމާއި އަޅުކަންތަކަށް ވަގުތު ހުސްކޮށް، އެކަންކަމުގެ މަތީގައި ދެމިހުރުމަކީ ގިނަ ފަހަރަށް ގޮންޖެހުންތަކެއް ކުރިމަތިވާ ކަމެކެވެ. ނަމަވެސް، ‘ޤުރުއާންލީ’ (Quranly) އެޕްލިކޭޝަނަކީ މިކަމަށް އިންގިލާބީ ބަދަލެއް ގެނުވި ވަސީލަތެކެވެ. މިއީ މުޅި ދުނިޔޭގެ މުސްލިމުން ކީރިތި ޤުރުއާނާ އޮންނަ ގުޅުން ބަދަހިކުރުމަށް އެހީތެރިވެދޭ، އާދަޔާޚިލާފު ފަރުމާއަކަށް ތައްޔާރުކޮށްފައިވާ އެޕްލިކޭޝަނެކެވެ.
ދީނީ އެތައް އެޕްލިކޭޝަންތަކެއްގެ ތެރެއިން ޤުރުއާންލީ ފާހަގަކޮށްލެވެނީ އޭގައި ހިމެނޭ ތަފާތު އަދި ބޭނުންތެރި ފީޗަރތަކުގެ ސަބަބުންނެވެ.
ޤުރުއާންލީ އަކީ މައިގަނޑު ގޮތެއްގައި ކީރިތި ޤުރުއާން ކިޔެވުމުގެ އާދަ އަށަގަންނުވައި، އެކަމުގައި ދެމިހުރުމަށް ހިތްވަރުދޭ ވަސީލަތެކެވެ. މި އެޕްލިކޭޝަންގެ އެންމެ ފާހަގަކޮށްލެވޭ އެއް ބަޔަކީ ‘ޑެއިލީ ޓްރެކިންގް’ ނުވަތަ ދުވަހުން ދުވަހަށް ކުރިއަށްދާ މިންވަރު ބެލޭނެ ނިޒާމެވެ. މީގެ އެހީގައި ކިޔަވާ އާޔަތްތަކާއި، ކިޔެވުމަށް ހޭދަވާ ވަގުތާއި، އަދި އެކަމުން ލިބޭ ހަސަނާތު ނުވަތަ ދަރުމަ އަންދާޒާކޮށް ބަލައިލެވެއެވެ. މިކަމުގެ ސަބަބުން ކިޔަވާ މީހާއަށް އޭނާގެ ކުރިއެރުން ވަޒަންކުރަން ފަސޭހަވެގެންދެއެވެ.
މީގެ އިތުރުން، އެޕްލިކޭޝަންގެ ވިޝުއަލް ރެޕްރެޒެންޓޭޝަން ނުވަތަ މަންޒަރުތަކުން ފެންނަން ހުންނަ ކުރިއެރުންތަކަކީ ބޭނުންކުރާ ފަރާތްތަކަށް ލިބޭ ބޮޑު ހިތްވަރެކެވެ. ތިމާ ކިޔަވަމުންދާ މިންވަރު ޗާޓުތަކުންނާއި ކުރެހުންތަކުން ފެންނަން ހުރުމުން، އިތުރަށް ކިޔެވުމަށް ޝައުޤުވެރިކަން އުފެދެއެވެ. އަދި ‘ކޮމިއުނިޓީ އިންޓަރެކްޝަން’ ފީޗަރ މެދުވެރިކޮށް ރަހުމަތްތެރިންނާއި އާއިލާގެ މެންބަރުން އެޕަށް އިތުރުކޮށް، ހެޔޮކަންތަކުގައި ވާދަވެރިކަން އުފެއްދުމުގެ ފުރުސަތު ލިބެއެވެ. މީގެ އިތުރުން ދީނީ އެކި މައުޟޫޢުތަކަށް މަޝްވަރާކުރުމުގެ ފުރުސަތުވެސް މި އެޕްލިކޭޝަންގައި ފަހިކޮށްދީފައިވެއެވެ.
ޤުރުއާންލީގެ އެންމެ ބޮޑު އެއް ހިތްހަމަޖެހުމަކީ އެއްވެސް އިޝްތިހާރެއް (Ads) ނުހިމެނޭ ގޮތަށް މި އެޕްލިކޭޝަން ފަރުމާކޮށްފައިވުމެވެ. މީގެ ސަބަބުން ކިޔަވާ މީހާގެ ސަމާލުކަން އެހެން ދިމަދިމާއަށް ނުގޮސް، ފުރިހަމަ ޚުޝޫޢަތްތެރިކަމާއެކު ކިޔެވުމުގައި ދެމިހުރެވެއެވެ.
ޤުރުއާންލީގައި ހިމެނޭ ފީޗާތައް ވަަރަށްވެސް ގިނަގުނަ އެވެ. އޭގެ ތެރޭގައި ތިމާގެ ބަހުން ޤުރުއާނުގެ ތަރުޖަމާވެސް ކިޔައިލެވެން ހުރެއެވެ. ދިވެހިބަހުން ތަރުޖަމާގެ ދެ ވާޝަނެއް ބޭނުންކުރެވެއެވެ. އެގޮތުން ދިވެހި ބަކުރުބެ ވާޝަން އަދި ދިވެހި ޕްރެސިޑެންޓްސް އޮފީސް ވާޝަންވެސް ބޭނުންކޮށްލެވެއެވެ.
މި އެޕްލިކޭޝަން ބޭނުންކުރާ ފަރާތްތަކުގެ މެދުގައި މިއީ ވަރަށް މަޤްބޫލު އެޕެކެވެ. އެޕް ސްޓޯރުތަކުގައި މި އެޕަށް 4.7 ގެ މަތީ ރޭޓިންގްއެއް ލިބިފައިވުމީ، މީގެ ފައިދާ ކުރާ މިންވަރު ހާމަކޮށްދޭ އަލިގަދަ ހެކިބަހެކެވެ. ޚުލާޞާކޮށް ދަންނަވާނަމަ، ޤުރުއާންލީ އަކީ ކޮންމެ މުސްލިމެއްގެ ފޯނުގައިވެސް އޮތުން މުހިންމު، ޒަމާނީ ފަސޭހަތަކާއެކު ޤުރުއާނަށް ލޯބިޖައްސުވައިދޭނެ ފުރިހަމަ އެކުވެރިއެކެވެ.
