ކައިވެންޏަކީ ދެމަފިރިން އެކަކު އަނެކަކަށް އަޅާލައި، އޯގާތެރިކަމާއި އިހުތިރާމާއެކު ދިރިއުޅުމަށް އޮންނަ މާތް ގުޅުމެކެވެ. ނަމަވެސް، ބައެއް ފަހަރު މި ގުޅުމުގެ ތެރެއަށް ނޭދެވޭ ސިފަތައް ވަދެ، ދިރިއުޅުން ބުރަޔަކަށް ވެގެންދެއެވެ. ތިމާގެ ނަފްސާނީ އަދި ޖިސްމާނީ ދުޅަހެޔޮކަމަށްޓަކައި، “ވިހަ” ނުވަތަ ނުރަނގަޅު ގުޅުމެއް ދެނެގަތުމަކީ ވަރަށް މުހިންމު ކަމެކެވެ. ފިރިއެއްގެ ކިބައިން ފެނިދާނެ ނުރަނގަޅު ނުވަތަ ކަންބޮޑުވާންޖެހޭ 9 ނިޝާނެއް ތިރީގައި އެވަނީއެވެ.
1. މާބޮޑަށް ފާޑުކިޔުން
ނުރަނގަޅު ސިފަތައް ހުންނަ ފިރިއަކު އަބަދުވެސް އުޅޭނީ އަނބިމީހާގެ ކިބައިން އައިބު ހޯދާށެވެ. މިސާލަކަށް، “ކަލެއަށް ކުޑަކުޑަ ކަމެއްވެސް ރަނގަޅަކަށް ނުކުރެވޭނެ،” ފަދަ ބަސްތައް ބޭނުންކޮށްގެން، ތިމާއަކީ އެއްވެސް ގާބިލިއްޔަތެއް ނެތް މީހެއް ކަމުގެ އިހުސާސް އަބަދު ކުރުވާނެއެވެ.
ޑރ. ޝުލްޒް ބަޔާންކުރައްވާ ގޮތުގައި:-
މެދުނުކެނޑި މީހަކަށް ފާޑުކިޔުމަކީ ހަމައެކަނި ނަފްސާނީ ގޮތުން ދެވޭ އަނިޔާއެއް ނޫން. އޭގެ އިތުރުން، އެއީ އިންސާނީ ގުޅުންތަކަށް ނުހަނު ބޮޑަށް ގެއްލުންދީ، އެ ގުޅުންތައް ހަލާކުކޮށްލާ ކަމެއް.
2. ހަގީގަތް އޮޅުވާލުން (ގޭސްލައިޓިންގ)
މިއީ ނަފްސާނީ ގޮތުން މީހާ ބަލިކޮށްލުމަށް ބޭނުންކުރާ އުކުޅެކެވެ. ކަން ހިނގާފައިވާ ގޮތް ނޫން ގޮތަކަށް ވާހަކަ ދައްކައި، ތިމާގެ އަމިއްލަ ހަނދާނާއި ވިސްނުމާ މެދު ޝައްކު އުފެދޭ ހިސާބަށް ކަންކަން ގެންދާނެއެވެ.
3. ކޮންޓްރޯލް ކުރަން އުޅުން
އިސްލާމްދީނުގައި ފިރިމީހާއަށް ދީފައިވާ މަގާމުގެ ނާޖާއިޒު ފައިދާ ނަގައި، ދިރިއުޅުމުގެ ހުރިހާ ކަމެއް (މިސާލަކަށް: ދާ ތަންތަނާއި، ބައްދަލުކުރާ މީހުން) އޭނާ ބޭނުންވާ ގޮތަށް މުށްބާރުކޮށްގެން ކޮންޓްރޯލް ކުރަން މަސައްކަތް ކުރުމަކީ ނުރަނގަޅު ސިފައެކެވެ.
4. އިންތަކަށް އިހުތިރާމް ނުކުރުން
ކޮންމެ މީހަކަށްވެސް އަމިއްލަ މިނިވަންކަމާއި، ވަގުތާއި، ސިއްރުތަކެއް ހުންނާނެއެވެ. ނުރަނގަޅު ފިރިއަކު މިފަދަ އެއްވެސް އިންތަކަށް އިހުތިރާމެއް ނުކުރާނެއެވެ. ތިމާ ނުރުހޭ ކަންކަން ކުރުމަށް ތަކުރާރުކޮށް ބާރު އަޅާނެއެވެ.
5. ވާހަކަ ނުދައްކާ ހުރުން (ސައިލެންޓް ޓްރީޓްމަންޓް)
މައްސަލައެއް ދިމާވުމުން އެކަމާ ވާހަކަދައްކައިގެން ހައްލުކުރުމުގެ ބަދަލުގައި، އަދަބެއް ދިނުމުގެ ގޮތުން އެތައް ދުވަހަކު ވާހަކަ ނުދައްކާ ހުރުމަކީ ނަފްސާނީ ގޮތުން ދެވޭ އަނިޔާއެކެވެ. މީގެ ސަބަބުން ގުޅުން އިތުރަށް ގޯސްވެއެވެ.
6. އަބަދު އެހެން މީހުންގެ ބޮލުގައި އިލްޒާމް އެޅުވުން
އޭނާގެ ފަރާތުން ދިމާވާ އެއްވެސް ކަމެއްގައި އޭނާގެ ކުށެއް އޮތްކަމަކަށް ގަބޫލެއް ނުކުރާނެއެވެ. ކޮންމެ ކަމެއް ގޯސްވިޔަސް، އޭގެ ޒިންމާ އަޅުވާނީ އަނބިމީހާގެ ބޮލުގައެވެ. އަމިއްލަ ގޯސް ގަބޫލުކުރުމުގެ ސިފަ އޭނާގެ ކިބައިގައި ނުހުންނާނެއެވެ.
ދިމާވާ ކޮންމެ މައްސަލައެއް ނުވަތަ ހިޔާލުތަފާތުވުމެއްގެ ޒިންމާ އަޅުވަނީ އަނބިމީހާގެ ބޮލުގައެވެ. މިގޮތަށް ކަންކަމުގައި އަބަދުވެސް އަނބިމީހާ ކުށްވެރިކުރުމުގެ ސަބަބުން، އޭނާގެ ރުޅިވެރިކަމުން ސަލާމަތްވުމަށްޓަކައި، ކޮންމެ ފިޔަވަޅެއްވެސް އަޅަންޖެހެނީ ވަރަށް ބިރުގަނެފައި ހުރެގެންނެވެ. “މިއީ ހުސް ކަލޭގެ ސަބަބުން ވީކަމެއް” ފަދަ ބަސްތައް ތަކުރާރުކޮށް ބުނުމުގެ ސަބަބުން، އަނބިމީހާގެ ހިތުގައި ކުށްވެރިކަމުގެ އިހުސާސް އުފެދި، އެކަން ނަފްސާނީ ބޮޑު ބުރައަކަށް ވެގެންދެއެވެ.
7. އެކަހެރިކުރުން ނުވަތަ ކަންކަމަށް ހުރަސްއެޅުން
ތިމާގެ އާއިލާއާއި ރަހުމަތްތެރިންނާ އޮންނަ ގުޅުން ކަނޑުވާލަން މަސައްކަތް ކުރުމަކީ ނުރަނގަޅު ފިރިއެއްގެ ސިފައެކެވެ. މީގެ ބޭނުމަކީ ތިމާ އެކަހެރިކޮށް، އެހެން މީހެއްގެ އެހީތެރިކަން ނުލިބޭނެ ގޮތް ހެދުމެވެ.
މިސާލަކަށް، “ތިބާގެ ރަހުމަތްތެރިންނަށް އަހަރެންހާ ބޮޑަށް ތިބާގެ މުހިންމުކަމެއް ނޯންނާނެ” ފަދަ ވާހަކަތައް އޭނާ ބުނެފާނެއެވެ. މިކަމުގެ ސަބަބުން ތިބާގެ ހިތުގައި ޝައްކު އުފައްދައި، ތިބާއަށް އެހީތެރިވެދޭނެ ގާތް ރަހުމަތްތެރިންނާއި އާއިލާއާ ތިބާ ދުރުކުރުވައެވެ.
8. ނަފްސާނީ ގޮތުން ނުތަނަވަސްކުރުން
އެއް ވަގުތެއްގައި އިންތިހާއަށް ލޯތްބާއި އަޅާލުން ދީފައި، ކުއްލިއަކަށް އެއްވެސް ސަބަބަކާ ނުލައި ފިނިކޮށް މުޢާމަލާތްކޮށް، ރުޅިވެރިކަން ދައްކާނެއެވެ. މިފަދަ “އޮޅުންބޮޅުން ބޮޑު” ގުޅުމެއްގެ ސަބަބުން އަނބިމީހާ އަބަދު ހުންނަންޖެހޭނީ ބިރުވެރިކަމެއްގެ ތެރޭގައެވެ.
9. ބިރުދެއްކުން
ބާރުގެ ބޭނުންކޮށްގެން ނުވަތަ ބަހުގެ ހަމަލާތަކުން ބިރުދައްކައިގެން ކަންކަން ކުރުވުމަކީ “ޓޮކްސިކް” ގުޅުމެއްގެ އެންމެ ސާފު ނިޝާނެވެ. މިއީ އެއްވެސް ހާލެއްގައި ބަލައިގަނެވޭނެ ކަމެއް ނޫނެވެ.
ހަމައެއާއެކު، “އަހަރެން ދޫކޮށްލާފައި ގޮސްފިނަމަ، ކަލޭ ދެރަވާނެ” ފަދަ އިންޒާރުތައް ދީފާނެއެވެ. މިއީ ތިބާގެ ހިތުގައި ބިރުވެރިކަމާއި ނިކަމެތިކަން އުފައްދައި، އެ ގުޅުމުގެ ތެރޭގައި ތިބާ ބަންދުކޮށް، ސަލާމަތްނުވެވޭނެ ފަދަ މަޖުބޫރު ހާލަތަކަށް ވައްޓާލުމަށް ކުރާ ކަމެކެވެ.
މިފަދަ ގުޅުންތައް ދެމެހެއްޓިދާނެތަ؟
ދިގު މުއްދަތަކަށް ބަލާއިރު، މިފަދަ “ވިހަ” ގުޅުންތައް ކާމިޔާބުވުމަކީ ވަރަށް ނާދިރު ކަމެކެވެ. އިސްލާމްދީން ބާރުއަޅަނީ ދެމަފިރިންގެ މެދުގައި އޯގާތެރިކަމާއި ކުލުނު އޮތުމަށެވެ. އެކަކު އަނެކަކަށް އިހުތިރާމް ނުކުރާ، އަދި އަބަދު ހިތްދަތިކަން ލިބޭ ގުޅުމެއްގައި ދެމިހުރުމަކީ އިންސާނާގެ ދީނީ އަދި ދުނިޔަވީ މަސްލަހަތަށް އޮތް ނުރައްކަލެކެވެ. އެހެންކަމުން، މިފަދަ ސިފަތައް ފެންނަނަމަ، ކަމާބެހޭ މާހިރުންގެ ނުވަތަ އިތުބާރު ހުރި މީހެއްގެ އެހީތެރިކަން ހޯދުމަކީ މުހިންމު ކަމެކެވެ.
މަސްދަރު: މެރިޖް ޑޮޓް ކޮމް
