އަހަރެމެން ކާބޯތަކެއްޗަކީ ހަޖަމުކުރުމުގެ ނިޒާމު ހިނގާ ގޮތަށް ވަރަށް ބޮޑު އަސަރެއް ކުރާ އެއްޗެކެވެ. ނަސީބަކުން ބަނޑުހިކުމުގެ މައްސަލައަކީ އާންމުކޮށް އުޅޭ ގޮތުން ނުވަތަ ކެއުމުގެ އާދަތަކުގެ ސަބަބުން ދިމާވާ ކަމެކެވެ. އެހެންކަމުން ބޭހާ ނުލައި މިކަމަށް ހައްލު ހޯދިދާނެއެވެ. ބައެއް ކަހަލަ ކާނާތަކަކީ ގޮހޮރުގެ މަސައްކަތް ރަނގަޅުކޮށްދީ ބޮޑުކަމުދާ ތަކެތި މަޑުކޮށްދިނުމަށް އެހީތެރިވެދޭ ތަކެއްޗެވެ. ބަދިގޭގައި ހުންނަ އާދައިގެ ތަކެތިން ފެށިގެން ފައިބަރު ގިނަ މޭވާތަކާ ހަމައަށް ބަނޑުހިކުމަށް ފައިދާހުރިކަން ދިރާސާތަކުން ސާބިތުވެފައިވާ 7 އެއްޗަކާ ބެހޭ މަޢުލޫމާތުކޮޅެއް ހިއްސާކޮށްލާނަމެވެ.
* ލުނބޯ ފެން
ދިރާސާތަކުން ދައްކާ ގޮތުގައި ލުނބޯ ހުތަކީ ހަޖަމުކުރުމުގެ ނިޒާމު މާ ފުރިހަމައަށް މަސައްކަތް ކުރަން އެހީތެރިވެދޭ އެއްޗެކެވެ. މީގެ ސަބަބުން ހަށިގަނޑަށް ބޭނުންވާ މާއްދާތައް ހަމަޔަށް ދަމައިގަތުމަށް މަގުފަހިވެދޭނެ އެވެ. ބަނޑުހިކުމުގެ މައްސަލައަށް ހައްލެއް ހޯދުމަށް ހެނދުނު ހޭލައިގެން ލުނބޯ ފެން ބުއިމަކީ ވަރަށް ރަނގަޅު ކަމެކެވެ. މީގެ އިތުރުން ހާބަލް ސައިގެ ތެރެއަށް ވެސް ލުނބޯހުތް އަޅައިގެން ބޭނުންކުރެވިދާނެއެވެ.
* ޒައިތޫނި ތެޔޮ
ޒައިތޫނި ތެލުގައި ހުންނަ ސަރުބީގެ ބާވަތްތަކާއި މާއްދާތަކުގެ ސަބަބުން ގޮހޮރުގެ ސިއްހަތު ރަނގަޅުކޮށްދީ ބޮޑުކަމުދާ ތަކެތި ދައުރުވުމަށް ފަސޭހަކޮށްދޭނެއެވެ. ދިރާސާއަކުން ދައްކާ ގޮތުގައި ޒައިތޫނި ތެޔޮ ބޭނުންކޮށްގެން ބަނޑު މަސާޖު ކުރުމަކީ ވެސް ބަނޑުހިކުމަށް ވަރަށް ބޮޑު ލުޔެއް ލިބޭ ކަމެކެވެ.
ބޭނުންކުރާނެ ގޮތް:
– ހެނދުނު ހުސްބަނޑާ ސައިސަމުސަލަކުން އެއް ސަމުސާ ޒައިތޫނި ތެޔޮ ބުއިން.
– ސަލަޑް ނުވަތަ ކައްކާފައި ހުންނަ ތަރުކާރީގެ މައްޗަށް ޒައިތޫނި ތެޔޮ އަޅައިގެން ކެއުން.
– 15 މިނެޓު ވަންދެން މަޑުމަޑުން ބަނޑު މަސާޖު ކުރުން.
* އިނގުރު
އިނގުރަކީ ކާނާ ހަޖަމުކުރުން އަވަސްކޮށްދޭ އެއްޗެކެވެ. ދިރާސާތަކުން ދައްކާ ގޮތުގައި އިނގުރު ބޭނުންކުރުމުން ބަނޑުހިކުމުގެ އުނދަގޫ ކުޑަވެ ބޮޑުކަމުދެވޭ މިންވަރު އިތުރުވެއެވެ.
ބޭނުންކުރާނެ ގޮތް:
– ދުވާލަކު އެއް ފަހަރު ނުވަތަ ދެ ފަހަރު އިނގުރު ސައި ބުއިން.
– ކާނާގެ ތެރެއަށް (މިސާލަކަށް ސޫޕް ފަދަ ތަކެތި) އިނގުރު އެޅުން.
* ޕްރޫންސް
ޕްރޫންސްގައި ފައިބަރުގެ އިތުރުން ‘ސޯބިޓޯލް’ ކިޔާ މާއްދާއެއް ހުރެއެވެ. މީގެ ސަބަބުން ގޮހޮރަށް ފެން ދަމައިގަނެ ބޮޑުކަމުދާ ތަކެތި މަޑުކޮށްދީ ފަސޭހައިން ބޮޑުކަމުދެވޭ ގޮތްވެއެވެ. މިއީ ހެނދުނު ނާސްތާގެ ގޮތުގައި ނުވަތަ ޖޫސް ގޮތަށް ވެސް ބޭނުންކުރެވިދާނެ އެއްޗެއް. ރޭގަނޑު ފެނަށް އަޅާފައި ބެހެއްޓުމަށްފަހު ބޭނުންކުރުމުން މީގެ ފައިދާ ބޮޑުވާނެއެވެ.
* ފަޅޯ
ފަޅޮލަކީ ހަޖަމުކުރުމަށް ވަރަށް ބޮޑަށް އެހީތެރިވެދޭ މޭވާއެކެވެ. މީގައި ހުންނަ އެންޒައިމްތަކާއި ފެނުގެ ބައިގެ ސަބަބުން ބަނޑު ފުއްޕުމާއި ބޮޑުކަމުދާއިރު ކުރިމަތިވާ ތަދު ކުޑަކޮށްދޭނެއެވެ. ދުވާލަކު ފަޅޯ ކޮޅެއް ކެއުމަކީ ބަނޑުހިކުމަށް އޮތް ވަރަށް ރަނގަޅު ހައްލެކެވެ.
* ކައްޓަލަ
ކައްޓަލައިގައި ހުންނަ ފައިބަރަކީ ގޮހޮރުގައި ހުންނަ ފައިދާހުރި ބެކްޓީރިއާތަކަށް ކާނާ ފޯރުކޮށްދީ ހަޖަމުކުރުން ރަނގަޅުކޮށްދޭ އެއްޗެކެވެ. އެންމެ ރަނގަޅު ނަތީޖާއެއް ލިބޭނީ ކައްޓަލަ ފިހެގެން ނުވަތަ ފެނު ކައްކައިގެން ކެއުމުންނެވެ. ޚާއްސަކޮށް ތޮށްޓާއެކު ކެއުމުން ފައިބަރު ލިބޭ މިންވަރު އިތުރުވާނެއެވެ.
* ޗިއާ ސީޑްސް
ޗިއާ ސީޑްސް ފެނަށް އެޅުމުން އޭގައި ހުންނަ ފައިބަރުގެ ސަބަބުން އޮލަވެ ޖެލް ކަހަލަ ގޮތަކަށް ބަދަލުވެއެވެ. މީގެ ސަބަބުން ބޮޑުކަމުދާ ތަކެތި މަޑުކޮށްދީ ފަސޭހައިން ބޮޑުކަމުދެވޭ ގޮތްވާނެއެވެ.
ބޭނުންކުރާނެ ގޮތް:
– ފެނަށް ނުވަތަ ކިރަށް އަޅައިގެން 20 މިނެޓު ވަންދެން ބެހެއްޓުމަށްފަހު ބުއިން.
– ޔޯގަޓް ނުވަތަ ސަލަޑް ފަދަ ތަކެތީގެ މައްޗަށް އަޅައިގެން ކެއުން.
ނޯޓު: މިއީ ހަމައެކަނި މައުލޫމާތު ފޯރުކޮށްދިނުމަށް ލިޔެފައިވާ ލިޔުމެކެވެ. ސިއްހީ ބޮޑު މައްސަލައެއް ނަމަ ޑޮކްޓަރެއްގެ ލަފާ ހޯދުން މުހިއްމެވެ.
