ބައެއް ވާހަކަތަކަކީ ހަމައެކަނި އޭގައި ހުރި ހައިރާންކުރުވަނިވި ކަންތައްތަކުގެ ސަބަބުން މަޝްހޫރުވާ ވާހަކަތަކެއް ނޫނެވެ. އެއީ އޭގައި ހަގީގީ އިހުސާސްތަކެއް ހުރުމުން މަޝްހޫރުވާ ވާހަކަތަކެކެވެ. ވޭތުވެދިޔަ މަދު ދުވަސްކޮޅެއްގެ ތެރޭގައި ސޯޝަލް މީޑިއާގައި މިފަދަ ވާހަކައެއް ވަނީ ވަރަށް ބޮޑަށް ފެތުރިފައެވެ. މިއީ ހޮސްޕިޓަލެއްގެ ހިމޭން ކޮޓަރިއެއްގައި އޮތް އަށް އަހަރުގެ ކުޑަކުއްޖަކާއި އޭނާގެ ކަންފަތްދަށުން އިވުނު އުންމީދީ އަޑުތަކެއްގެ ވާހަކައެކެވެ. މީގެ ސަބަބުން ދުރުގައި ތިބެ މި މަންޒަރު ބަލަމުންދިޔަ އެތައް އާއިލާއަކަށް ވަނީ އުންމީދެއް ލިބިފައެވެ.
އެންމެ ވަގުތުކޮޅަކުން މުޅި ދިރިއުޅުން ބަދަލުވެގެންދިޔަ!
ޗައިނާގެ ހޫނާން ޕްރޮވިންސްގެ ދަރިވަރެއް ކަމަށްވާ ލިއު ޗޫޝީ މިދިޔަ އަހަރުގެ ނޮވެމްބަރު މަހު ހިނގި ކާރު އެކްސިޑެންޓެއްގައި ވަނީ ވަރަށް ބޮޑަށް އަނިޔާވެފައެވެ. އޭނާގެ ސިކުނޑިއަށާއި ފުއްޕާމެއަށް ބޮޑެތި ގެއްލުންތަކެއް ލިބުނެވެ. އެކްސިޑެންޓަށްފަހު މާގިނަ އިރުތަކެއްނުވެ އޭނާ ކޯމާއަކަށް ދިޔަ ކަމަށް ޚަބަރުތަކުން ބުނެއެވެ. އޭނާ ހޭއެރުމުގެ ފުރުސަތު ވަރަށް ކުޑަ ކަމަށް ޑޮކްޓަރުން އާއިލާއަށް އެންގިއެވެ. ހަފުތާތަކެއް ފާއިތުވެގެންދިޔައިރުވެސް އެއްވެސް ކުރިއެރުމެއް ނުފެނި އާއިލާއަށް ކުރިމަތިވީ ވަރަށް ހިތްދަތި ދުވަސްތަކެކެވެ.
އުންމީދު ދޫކޮށްނުލަން މަންމަ ނިންމި ނިންމުން!
ޑޮކްޓަރުންގެ ވާހަކަތަކާއެކުވެސް ލިއުގެ މަންމަ އުންމީދު ދޫކޮށްނުލައެވެ. އޭނާގެ ދަރިފުޅަށް ފަރުވާ ހޯދުމަށް އެކި ހޮސްޕިޓަލްތަކަށް ދިޔައެވެ. އެ ދުވަސްވަރު ޑޮކްޓަރަކު ދިން ޚިޔާލަކީ އޭނާއަށް ކުރިން އިވޭ އަޑުތައް ނުވަތަ އޭނާ އެންމެ ގަޔާވާ މިއުޒިކް އިއްވުމުން ސިކުނޑީގެ ބައެއް ބައިތަކަށް ބަދަލު އަތުވެދާނެ ކަމަށެވެ. މިއީ ޔަގީންކަމެއް އޮތް ކަމެއް ނޫން ނަމަވެސް މަންމަ ބޭނުންވީ އެ ފުރުސަތުގެ ބޭނުން ހިފާށެވެ.
ހޮސްޕިޓަލް ކޮޓަރި ކްލާސްރޫމަކަށް ބަދަލުކޮށްލުން
ކޮންމެ ދުވަހަކުވެސް ލިއުގެ މަންމަ އޭނާގެ އެނދު ކައިރީގައި ސްކޫލްގެ “ވޭކް-އަޕް” މިއުޒިކާއި ހެނދުނުގެ ކަސްރަތު މިއުޒިކް ޖަހަމުންދިޔައެވެ. މިއީ އެކްސިޑެންޓްގެ ކުރިން ލިއުއަށް އާންމުކޮށް އިވޭ އަޑުތަކެވެ. މީގެ އިތުރުން ޓީޗަރުގެ އެހީތެރިކަމާއެކު ކްލާސް ކުދިން ވަނީ ލިއުއަށް ވީޑިއޯ މެސެޖުތަކެއް ރެކޯޑުކޮށްފައެވެ. އެއް ވީޑިއޯއެއްގައި ކުއްޖަކު ބުނި “ޗޫޝީ އަވަހަށް ހޭލާ…. އަހަރެމެން އެކުގައި ފުޓްބޯޅަ ކުޅެން ދާންވާނެ.” އަދި އެހެން ކުއްޖަކު ބުނި “އަހަރެމެން އެންމެން ޗޫޝީ މަތިން ހަނދާންވޭ. އަޑު އިވޭނަމަ ލޯ ހުޅުވާލަބަލަ. އިމްތިހާން ކައިރިވަނީ އަހަރެމެން މި އިންތިޒާރު ކުރަނީ ޗޫޝީ އައިސް އަހަރެމެންނާއެކު ކިޔަވަން ފަށާނެ ވަގުތަކަށް.” އަދި ޓީޗަރު ވަނީ ހިސާބު ފިލާވަޅުތައްވެސް ރެކޯޑުކޮށްފައެވެ. މި ހުރިހާ އަޑުތަކެއް ކޮންމެ ދުވަހަކުވެސް އޭނާގެ އެނދު ކައިރީގައި ޖަހަމުންދިޔައެވެ.
ހަފުތާތަކެއްގެ އިންތިޒާރަށްފަހު ފެނުނު ފުރަތަމަ ނިޝާންތައް
45 ދުވަހު ކޯމާގައި އޮތުމަށްފަހު ލިއުގެ ފަރާތުން ކުޑަކުޑަ ހަރަކާތެއް ފެނުނެއެވެ. އޭނާގެ އެސްފިޔަތައް ތަޅުވާލިއެވެ. އޭގެ ދުވަސްކޮޅެއް ފަހުން ޓީޗަރުގެ އަޑު އިވުމުން އޭނާ ހިނިތުންވެލިއެވެ. ޚަބަރުތަކުން ބުނާ ގޮތުގައި 55 ވަނަ ދުވަހު ލިއު ފުރިހަމައަށް ހޭއެރިއެވެ. އަދި އޭނާގެ ވާތް ހަރަކާތްކޮށްލިއެވެ. މިއީ އާއިލާއަށް ލިބުނު ވަރަށް ބޮޑު އުފަލެކެވެ.
އެންމެ މުހިއްމުވީ ރައްޓެހިންގެ ޒިޔާރަތް
ލިއު ހޭއެރުމާއެކު ޓީޗަރާއި ކްލާސް ކުދިން އޭނާއަށް ޒިޔާރަތްކުރިއެވެ. އެކުދިން އޭނާއަށް ކުޅޭ އެއްޗެއްސާއި ކާޑުތައް ގެނައެވެ. ޓީޗަރު މަޖާކޮށްލާފައި ލިއުއަށް ހޯމްވޯކް ހަދަން ނުޖެހޭނެ ކަމަށް ބުނުމުން އޭނާ އުފަލުން ލޯ ހުޅުވާލައި އަތުން ހަނާ އަޅަން މަސައްކަތްކުރިއެވެ.
“ވިލާތަކުގެ ފުރަގަހުން އިރު ފެނިއްޖެ!”
ލިއުގެ މަންމަ ފަހުން މީޑިއާއަށް ބުނީ “އަހަރެންނަށް މިހާރު ވިލާތަކުގެ ފުރަގަހުން އިރު ފެނިއްޖެ. ހަގީގަތުގައިވެސް މުޢުޒިޒާތެއް ހިނގައިފި.” އޭނާ ވަނީ ޑޮކްޓަރުންނާއި ޓީޗަރުން އަދި ދަރިވަރުންނަށް ޝުކުރު އަދާކޮށްފައެވެ. އަދި އޭނާގެ ދަރިފުޅުގެ މި ވާހަކައިން އެހެން އާއިލާތަކަށް އުންމީދެއް ލިބޭނެ ކަމަށް އުންމީދުކުރާ ކަމަށްވެސް ބުންޏެވެ. ލިއުގެ ހާލަތު މިހާރު އަންނަނީ މަޑުމަޑުން ރަނގަޅުވަމުންނެވެ.
މި ވާހަކަ ސޯޝަލް މީޑިއާގައި މަޝްހޫރުވި ސަބަބު
ލިއުގެ މި ވާހަކައިން ވަނީ އެތައް މިލިއަން ބަޔަކަށް ހިތްވަރު ލިބިފައެވެ. އޭނާގެ ވީޑިއޯތަކަށް 10 މިލިއަނަށްވުރެ ގިނަ ވިއުސް ލިބިފައިވެއެވެ. މީހަކު ކޮމެންޓްކޮށްފައިވާ ގޮތުގައި “މި ކުޑަކުއްޖާ ހިނިތުންވެލި މަންޒަރު ފެނުމުން ލޮލުން ކަރުނަ އަތުވެއްޖެ. އޭނާގެ މަންމަގެ ހިތްވަރަށް ސާބަސް ދެން.” އަދި އެހެން މީހަކު ބުނި ގޮތުގައި ބައެއް ކަންކަމަކީ ބޭސްވެރިކަމުން ކިޔައިދެވޭނެ ކަންކަމެއް ނޫން އެއީ ލޯތްބާއި ޖަޒުބާތާ ގުޅިފައިވާކަމެކެވެ. އުންމީދަކީ ޗޫޝީ އަވަހަށް ސްކޫލަށް އެނބުރި ދިއުމެވެ.
