ފުޓްބޯޅަ އެސޯސިއޭޝަން އޮފް މޯލްޑިވްސް އިން އިންތިޒާމްކޮށްގެން ބާއްވާ ދިވެހި ޕްރިމިއާ ލީގް 2025-2026 ގެ 17 ވަނަ ހަފްތާގެ ކުޅުން މިއަދު ނިމިއްޖެއެވެ. މިހަފްތާގައި ކުޅުން މިއަދު ނިމުނުއިރު ޓީމުތަކުން ހޯދާފައިވާ ނަތީޖާތަކާއި ޕޮއިންޓް ޓޭބަލަށް ބަލައިލާނަމެވެ.

ފުރަތަމަ މެޗް: ބުރާއި އޮޑި އެއްވަރުވެ މާޒިޔާއަށް ޗެމްޕިއަންކަން ލިބިއްޖެ

މިހަފްތާގެ މެޗްތަކަށް ބަލައިލާއިރު ފުރަތަމަ މެޗްގައި 28 ޖަނަވަރީ 2026 ދުވަހު ހަވީރު ބައްދަލުކުރީ ބުރު ސްޕޯރޓްސް އާއި އޮޑި ސްޕޯރޓްސް އެވެ. ބުރާއި އޮޑި ވާދަކުރި މި މެޗް އެއްވަރުވެ މާޒިޔާއަށް ވަނީ ޗެމްޕިއަންކަން ލިބިފައެވެ.

ބުރު ސްޕޯރޓްސް އާއި އޮޑި ސްޕޯރޓްސް ވާދަކުރި މި މެޗް ނިމުނީ 1-1 އިން އެއްވަރު ވެގެންނެވެ. މެޗްގެ ހަވަނަ މިނިޓްގައި ޝަމްވީލް މުހައްމަދު ޖަހައިދިން ލަނޑުން ބުރު ލީޑު ނެގިއިރު، އޮޑިން ނަތީޖާ ހަމަހަމަކުރީ ފަހު ހާފުގައެވެ. މި ލަނޑު ޖަހައިދިނީ 57 ވަނަ މިނިޓްގައި ކިއާނޫ މާސް ބުރައުން އެވެ.

މި މެޗުން ލިބުނު އެއް ޕޮއިންޓާއެކު 17 މެޗުން އޮޑިއަށް ހަމަކުރެވުނީ 39 ޕޮއިންޓެވެ. ކުރިއަށް ދެ މެޗް އޮއްވައި 16 މެޗުން މާޒިޔާ ވަނީ 44 ޕޮއިންޓް ހޯދާފައެވެ. އޮޑީގެ ފަހު މެޗުގައި މާޒިޔާއާ ވާދަކުރަން ޖެހޭއިރު އެ މެޗުން މޮޅުވެގެން ވެސް އޮޑިއަށް ހަމަ ކުރެވޭނީ 42 ޕޮއިންޓެވެ.

މި މެޗްގެ މޮޅު ކުޅުންތެރިއަކަށް ހޮވުނީ އޮޑި ސްޕޯޓްރސްގެ މުޒުދާން ހަސަންއެވެ.

ދެވަނަ މެޗް: މާޒިޔާ މެޗުން މޮޅު ނުވެވުމުން ނިއުއަށް ދެވަނައަށް އެރުމުގެ ފުރުސަތު ގެއްލިއްޖެ

މި ހަފްތާގެ ދެވަނަ މެޗްގައި ވާދަކުރީ ލީގު ޗެމްޕިއަންކަން ކަށަވަރުވެފައިވާ މާޒިޔާ އާއި ނިއުރޭޑިއަންޓްއެވެ. މި މެޗުން މޮޅެއް ހޯދައިގެން ދެވަނައަށް އެރުމުގެ ފުރުސަތު ނިއުއަށް އޮތްނަމަވެސް، މި މެޗް އެއްވަރުވުމުން ނިއުއަށް ވަނީ އެ ފުރުސަތު ގެއްލިފައެވެ. މި މެޗުގެ ނަތީޖާއާއެކު އޮޑި ސްޕޯރޓްސްއަށް ވަނީ ދެވަނަ ޔަގީންވެފައެވެ. މި މެޗްގެ ކުރިން ވެސް ނިއުއަށް ވަނީ ތިންވަނަ ޔަގީންވެފައެވެ.

28 ވަނަ ދުވަހުގެރޭ ކުޅެވުނު މި މެޗްގެ ފުރަތަމަ ލަނޑު ދެވަނަ ހާފުގެ ދެވަނަ މިނިޓްގައި މާޒިޔާއަށް ޖަހައިދިނީ ހަސަން ނަޒީމް (ޗޯޓު) އެވެ. ކެޕްޓަން ސަމޫހް އަލީ (ސަމުއްޓޭ) ގެ ގޯލުން މާޒިޔާ ލީޑު ފުޅާކުރިއިރު، މި ލަނޑު އޭނާ ޖަހައިދިނީ 10 ވަނަ މިނިޓްގައި މާޒިޔާއަށް ލިބުނު ކޯނަރުން ގޯލް ކުރިމައްޗަށް ހުރަސްކޮށްލި ބޯޅަ ގޯލް ތެރެއަށް ފޮނުވާލައިގެންނެވެ.

މި މެޗްގައި ނިއުއިން ޖެހި ފުރަތަމަ ލަނޑު ޖަހައިދިނީ އަލްހާޖީ ގެރޫ އެވެ. 14 ވަނަ މިނިޓްގައި ނިއުއަށް ލިބުނު ކޯނަރުން ގޯލް ކުރިމައްޗަށް ހުރަސްކޮށްލި ބޯޅަ ގޯލް ތެރެއަށް އަލްހާޖީ ގެރޫ ފޮނުވާލީ ބޮލުންނެވެ. އިތުރު ވަގުތުގެ ގޮތުގައި ދެއްކި ދިހަ މިނިޓްގެ ތެރެއިން ފަހު މިނިޓްގައި ނިއުއަށް ލިބުނު ޕެނަލްޓީ ގޯލްގެ ތެރެއަށް ފޮނުވާލައިގެން ނިއުއަށް ނަތީޖާ ހަމަހަމަކޮށްދިނީ އަލީ އަޝްފާގު (ދަގަނޑޭ) އެވެ.

މި މެޗްގެ މޮޅު ކުޅުންތެރިއަކަށް ހޮވުނީ މާޒިޔާގެ ދެވަނަ ލަނޑު ޖަހައިދިން ސަމޫހް އަލީއެވެ.

ތިންވަނަ މެޗް: ވިކްޓްރީ ބަލިކޮށް ޓީސީ އޮޓަމެޓިކް ރެލިގޭޝަނުން ސަލާމަތްވެއްޖެ

ހަފްތާގެ ތިންވަނަ މެޗްގައި ވާދަކުރީ ވިކްޓްރީ ސްޕޯރޓްސް ކުލަބާއި ޓީސީ ސްޕޯރޓްސް ކުލަބެވެ.

ދެވަނަ ބުރު ވަރުގަދަކޮށް ފެށި ނަމަވެސް މިހާރު ފޯމް ގެއްލިފައިވާ ވިކްޓްރީ އާއި ޓީސީގެ ކުރިމަތިލުން 1-0 އިން ކާމިޔާބު ކުރީ ޓީސީއެވެ. ފަހު ދެ މެޗްގައި ވެސް ރަނގަޅުކުޅުމެއް ދެއްކި ޓީސީ ވަނީ މި މެޗްގައި ވެސް ރަނގަޅު ކުޅުމެއް ދައްކާފައެވެ. ރެލިގޭޝަނުން ސަލާމަތްވުމަށް މޮޅެއް މުހިންމުވެފައިވާ ޓީސީއަށް ލަނޑު ޖަހައިދިނީ ޕްރިންސްއެވެ. މި ލަނޑަކީ ވިކްޓްރީގެ އޭރިޔާ ތެރެއަށް ވިކްޓްރީ ކުޅުންތެރިއަކު ކުރި ފައުލްއަކާ ގުޅިގެން ޓީސީއަށް ލިބުނު ޕެނަލްޓީއަކުން 69 ވަނަ މިނިޓްގައި ބޯޑޫ ޕްރިންސް ޖަހައިދިން ލަނޑެކެވެ. މި މެޗުން ހޯދި ތިން ޕޮއިންޓާއެކު 18 ޕޮއިންޓް ހަމަކޮށް ޓީސީ ވަނީ ހަތްވަނައިގައި ހަމަޖެހިލާފައެވެ. އެއާއެކު އެ ޓީމް ވަނީ އޮޓަމެޓިކް ރެލިގޭޝަނުން ސަލާމަތްވެފައެވެ.

މި މެޗްގެ މޮޅު ކުޅުންތެރިއަކަށް ހޮވުނީ ޓީސީއަށް ލަނޑު ޖަހައިދިން ބޯޑޫ ޕްރިންސްއެވެ.

ހަތަރުވަނަ މެޗް: އީގަލްސް އާއި އެއްވަރުވެ ގްރީން ކަރުތާފެނަށް

ހަފްތާގެ ހަތަރުވަނަ މެޗްގައި ވާދަކުރީ ކުލަބް އީގަލްސް އާއި ގްރީން ސްޓްރީޓްސްއެވެ. އޮޓަމެޓިކް ރެލިގޭޝަނުން ސަލާމަތްވުމަށްޓަކައި މޮޅެއް ހޯދުން ނޫން ގޮތެއް ނެތް ގްރީން އާއި އީގަލްސް ވާދަކުރި މެޗް އެއްވަރުވެ ގްރީން ވަނީ ކަރުތާފެނަށް ވެއްޓިފައެވެ. އީގަލްސް އާއި ގްރީން ވާދަކުރި މެޗް 1-1 އިން އެއްވަރުވިއިރު، މި މެޗްގައި ފެނުނު ދެލަނޑު ވެސް ޖަހާފައިވަނީ ދެވަނަ ހާފުގެ އިތުރު ވަގުތުގެ ތެރޭގައެވެ. ގްރީންއިން އިތުރު ވަގުތުގެ ފުރަތަމަ މިނިޓްގައި ލަނޑު ޖެހިއިރު، މި ލަނޑު އެ ޓީމަށް ޖަހައިދިނީ ޝުކްރާލީ ޕުލާޓޯވް އެވެ. 1-0 އިން ގްރީން މޮޅުވެދާނެކަމަށް ހީކުރެވުނު މި މެޗް އީގަލްސްއިން އެއްވަރުކުރީ އިތުރު ވަގުތުގެ ފަހު މިނިޓްގައެވެ. އީގަލްސްއަށް މި ލަނޑު ޖަހައިދިނީ އިސްމާއިލް އީސަ ތަނަވަސްކޮށްދިން ފުރުސަތަކުން ހިސާމް ސަލީމް އެވެ.

މި މެޗްގެ މޮޅު ކުޅުންތެރިއަކަށް ހޮވުނީ އީގަލްސްގެ އިސްމާއިލް އީސަ އެވެ.

ފަސްވަނަ މެޗް: ވެލެންސިޔާއާ އެއްވަރުގެ ޔޫވީ ރެލިގޭޓް ވެއްޖެ

ފަސްވަނަ މެޗްގައި ވާދަކުރީ ޔުނައިޓެޑް ވިކްޓްރީ (ޔޫވީ) އާއި ކުލަބް ވެލެންސިޔާއެވެ. ލީގުގެ ދިހަވަނައިގައި އޮތް ޔޫވީ އާއި ނުވަވަނައިގައި އޮތް ވެލެންސިޔާ ބައްދަލުކުރި މެޗް 0-0 އިން އެއްވަރުވެ ޔޫވީ ވަނީ ރެލިގޭޓް ވެފައެވެ. 17 މެޗުން ޔޫވީއަށް 8 ޕޮއިންޓް ހަމަކުރެވުނުއިރު، ކުރިއަށް އޮތް މެޗް ކާމިޔާބުކޮށްގެން ވެސް 8 ވަނައަށް އެރުމުގެ ފުރުސަތެއް އެ ޓީމަކަށް ނެތެވެ. ލީގު ރޭވިފައިވާގޮތުން ނުވަވަނަ ޓީމާއި ދިހަވަނަ ޓީމް ދެވަނަ ޑިވިޝަނަށް ރެލިގޭޓް ވާނެއެވެ.

މި މެޗްގެ މޮޅު ކުޅުންތެރިއަކަށް ހޮވުނީ ކުލަބް ވެލެންސިޔާގެ މާޓިނޭޒް އެވެ.

17 ވަނަ ހަފްތާގެ ކުޅުން ނިމުނުއިރު ޕޮއިންޓް ޓޭބަލް އޮތްގޮތަށް ބަލާލާއިރު، އެއްވަނައިގައި އޮތް މާޒިޔާއަށް 45 ޕޮއިންޓް، ދެވަނައިގައި އޮތް އޮޑިއަށް 39 ޕޮއިންޓް، ތިންވަނަ ނިއުރޭޑިއަންޓަށް 34 ޕޮއިންޓް، ހަތަރުވަނަ ބުރަށް 29 ޕޮއިންޓް، ފަސްވަނަ އީގަލްސްއަށް 23 ޕޮއިންޓް، ހަވަނަ ވިކްޓްރީއަށް 21 ޕޮއިންޓް، ހަތްވަނަ ޓީސީއަށް 18 ޕޮއިންޓް، އަށްވަނަ ގްރީންއަށް 12 ޕޮއިންޓް، ނުވަވަނަ ވެލެންސިޔާއަށް 9 ޕޮއިންޓް، ދިހަވަނަ ޔޫވީއަށް ލިބުނީ 8 ޕޮއިންޓެވެ.