އެފްއޭއެމް ވެޓެރަންސް ކަޕް 2026 ފުޓްބޯޅަ މުބާރާތުގައި ޕޮލިސް ކުލަބާއި ހުޅުމާލޭ ވެޓަރަންސް ބައްދަލުކުރި މެޗު އެއްވަރު ވެގެން ނިމިއްޖެއެވެ.

ގުރޫޕް ބީ ގައި ހިމެނޭ ހުޅުމާލޭ ވެޓަރަންސް އާއި ޕޮލިސް ކުލަބު އިއްޔެ ހަވީރު ވާދަކުރި މެޗު އެއްވަރުވީ 2-2 އިންނެވެ.

ކުޅުނު ދެމެޗުން މޮޅުވެ ހަ ޕޮއިންޓާއިއެކު ގުރޫޕްގެ އެއްވަނައިގައި އޮތް ހުޅުމާލޭ ވެޓަރަންސް އާއި، ކުޅުނު އެއް މެޗުން މޮޅުވެ 3 ޕޮއިންޓާއިއެކު ގުރޫޕްގެ ދެ ވަނައިގައި އޮތް ޕޮލިސް ކުލަބު ކުޅުނު މެޗްގެ ފުރަތަމަ ލަނޑު ޖެހީ ޕޮލިސް ކުލަބުންނެވެ. ޕޮލިސް ކުލަބަށް ލިބުނު ޕެނަލްޓީ ގޯލްގެ ތެރެއަށް ފޮނުވާލައިގެން 24 ވަނަ މިނެޓުގައި މިލަނޑު ކާމިޔާބު ކޮށްދިނީ ނަސްވާންއެވެ.

ފުރަތަމަ ލަނޑު ޖެހިތާ މާގިނައިރެއް ނުވެ ޕޮލިސް ކުލަބުން ވަނީ އެޓީމުގެ ދެވަނަ ލަނޑު ޖަހައިފައެވެ. މިލަނޑު ޖަހައިދިނީ ސާމް އެވެ. އޭރިޔާ ލައިން ކައިރިން ސާމް ލިބުނު ބޯޅަ ގޯލުގެ ތެރެއަށް އޭނާ ފޮނުވާލި ކީޕަރު ބޯމަތިންނެވެ.

ހުޅުމާލޭ ވެޓަރަންސް އިން އެޓީމުގެ ފުރަތަމަ ލަނޑު ޖެހީ ފުރަތަމަ ހާފުގެ އިތުރު ވަގުތުއެވެ. ހުޅުމާލޭ ވެޓަރަންސްގެ ކުޅުންތެރިއަކު ގޯލު ކުރިމައްޗަށް ހުރަސްކޮށްލި ބޯޅަ، ގޯލުގެ ތެރެއަށް ސިމާޒް ފޮނުވާލީ ބޮލުންނެވެ.

ކުރިން ކުޅުނު ދެމެޗުން ފަސޭހަކަމާއިއެކު މޮޅުވި ހުޅުމާލޭ ވެޓަރަންސްއިން މިމެޗް އެއްވަރު ކުރީ ފަހު ވަގުތުއެވެ. ދެވަނަ ހާފުގެ އިތުރު ވަގުތުގައި ހުޅުމާލޭ ވެޓަރަންސްއަށް ލިބުނު ޕެނަލްޓީ ގޯލުގެ ތެރެއަށް ފޮނުވާލީ، ފުރަތަމަ ލަނޑު ވެސް ޖަހައިދިން ސިމާޒް އެވެ.

މިމުބާރާތުގެ މެޗެއް މިއަދު ވެސް އޮންނާނެއެވެ. މިއަދުގެ މެޗުގައި ބައްދަލުކުރާނީ ޔުނައިޓެޑް ވިކްޓަރީ އާއި ހުއްރިއްޔާ ސްޕޯޓްސް ކްލަބެވެ.