ފުރަތަމަ ބޮޑު ހަނގުރާމަ ނިމުމަކާ ގާތްވަމުންދަނިކޮށް، 1918 ވަނަ އަހަރުގެ ޖޫން މަހުގެ 28 ވަނަ ދުވަހު، އިނގިރޭސިވިލާތުގެ ހަދްވެއިޓްގެ ބާކާ ފްރީޓްގައި ހުރި އާދައިގެ ކުޑަ ގެއެއްގެ މަތީބުރީގެ ކޮޓަރިއަކަށް އެލްސީ އޯލްކޮކް އުފަންވިއެވެ. އޭގެ ގަރުނަކަށްވުރެ ގިނަ ދުވަސް ފަހުން ވެސް، އޭނާ މިއަދު ދިރިއުޅެމުންދަނީ ހަމަ އެ ގޭގައެވެ.

ކާބޯތަކެތި ހޯދުމަށްޓަކައި ބޮޑު ދަގަނޑު ކޮނުމުގެ މަސައްކަތްކުރި އެލްސީގެ ބައްޕަ، މި ގެ ކުއްޔަށް ހިފީ 1902 ވަނަ އަހަރު، ހަފުތާއަކު ހަތް ޝިލިންގާއި ހަ ޕެންސަށެވެ. އެލްސީ އަކީ އާއިލާގެ ފަސް ކުދިންގެ ތެރެއިން އެންމެ ހަގު ކުއްޖާއެވެ. އޭނާގެ އުމުރުން އެންމެ 14 އަހަރުގައި، މަންމަ އެލައިޒާ ނިއުމޯނިއާ ބަލީގައި މަރުވުމާ ގުޅިގެން، ބައްޕަ ބެލެހެއްޓުމަށްޓަކައި އެލްސީ ކިޔެވުން ދޫކޮށްލިއެވެ.

ދެވަނަ ބޮޑު ހަނގުރާމައިގެ ދުވަސްވަރު، 1941 ވަނަ އަހަރު އޭނާ ބިލްއާ ކައިވެނިކުރިއެވެ. އެ ދެމަފިރިން ދުވަހަކުވެސް އާ ގެއެއް ހޯދާކަށް ނޫޅެއެވެ.

“މަންމަ ނިޔާވުމުން ބައްޕަ ބެލެހެއްޓުމަށްޓަކައި އަހަރެން މިގޭގައި މަޑުކުރީ. ބިލްއާ ކައިވެނިކުރުމަށްފަހުވެސް އަހަރެމެން މިގޭގައި ދިރިއުޅެން ފެށީ، އޭގެ ފަހުން ދުވަހަކުވެސް މިގެއިން ނުދަން،”

އެލްސީ ކިޔައިދިނެވެ.

1949 ވަނަ އަހަރު ބައްޕަ ނިޔާވުމުން، އެލްސީ ކައުންސިލް ލޯނެއްގެ އެހީގައި 1960 ވަނަ އަހަރު 250 ޕައުންޑަށް އެ ގެ ގަތެވެ. މިއަދު އެ ގޭގެ އަގު ގާތްގަނޑަކަށް 75،000 ޕައުންޑަށް އަރާނެ ކަމަށް ލަފާކުރެވެއެވެ. 55 އަހަރުވީ ކައިވެންޏަށްފަހު 1995 ވަނަ އަހަރު ފިރިމީހާ ބިލް ނިޔާވުމުންވެސް، އެލްސީ އެ ގޭގައި ދިރިއުޅުން ކުރިއަށް ގެންދިޔައެވެ.

އެލްސީ ވަނީ އެއް ގެއެއްގައި ހުރެ، ދުނިޔޭގެ ދެ ބޮޑު ހަނގުރާމައާއި، 1969 ވަނަ އަހަރު ހަނދަށް އިންސާނުން ދިޔަ ތާރީޚީ ދުވަހާއި، ސޯވިއެޓް ޔޫނިއަން އުފެދި އުވިގެން ދިޔަ މަންޒަރާއި، އެތައް ބަލިމަޑުކަމެއްގެ އިތުރުން އިނގިރޭސިވިލާތުގެ 22 ބޮޑުވަޒީރުންނާއި 5 ރަސްކަލުންގެ ޒަމާން ދެކެފައެވެ.

ގޭގެ އެތެރެއަށް މިއަދުވެސް މާބޮޑު ބަދަލެއް އައިސްފައެއް ނުވެއެވެ. ގޭގެ ގޯތިތެރޭގައި ހުންނަ އާދައިގެ ފާޚާނާ އަދިވެސް ބޭނުންކުރެވެއެވެ. އެލްސީ ބުނި ގޮތުގައި، އެހެން އެއްވެސް ތަނެއްގައި އުޅޭކަށް އޭނާ ބޭނުމެއް ނުވެއެވެ.

އެލްސީގެ ދަރިފުޅު ރޭ އުފަންވީވެސް ހަމަ އެ ގޭގައެވެ. މިހާރު އުމުރުން 70 ގެ އަހަރުތައް ގުނަމުންދާ ރޭ އަދިވެސް ދިރިއުޅެނީ މަންމައާއެކުގައެވެ. އޭނާ ބުނާގޮތުގައި އޭނާގެ މަންމައަކީ އަބަދުވެސް ކޮންމެވެސް މަސައްކަތެއްގައި އުޅޭ ހީވާގީ މީހެކެވެ.

އެލްސީގެ 2 ދަރިންނާއި، 6 މާމަ ދަރިންގެ އިތުރުން 36 މުނިމާމަ ދަރިން ތިބެއެވެ. މި ހުރިހާ ޖީލުތަކަކަށްވެސް އެލްސީ ފެންނާނެ ތަނަކީ ކޮބައިކަން އަބަދުވެސް އެނގެއެވެ.

2025 ވަނަ އަހަރު، އުމުރުން 106 އަހަރުގައި ކަކުލަށް ލިބުނު އަނިޔާއަކާ ގުޅިގެން ކުޑަ ދުވަސްކޮޅަކު އެލްސީ ހޮސްޕިޓަލުގައި އޮންނަން ޖެހުނެވެ. ނަމަވެސް ބަލިން ފަސޭހަވުމާއެކު އޭނާ އެނބުރި ދިޔައީ ބާކާ ސްޓްރީޓަށެވެ. އެއީ އޭނާގެ މުޅި އުމުރުގައިވެސް އޭނާއަށް އެނގޭ ހަމައެކަނި މަންޒިލެވެ.