ދީބާޖާ
14 ޖުލައި 2013 – ހުޅުމާލެ (04 އަހަރު ކުރި)
ބެލްކަންޏަށް ވަންނަން ހުންނަ ދޮރު ލައްޕައިލި ވަގުތު ދޮރާއިދިމާ މަތީގައި އެލުވާފައިއޮތް ވިންޑްޗައިމްގެ ބޮލިތައް އަހަރެންގެ ބޮލުގައި ހޭކިގެން ދިޔައެވެ. ޖުލައި މަހަކީ އަހަރުގެ މަސްތަކުން އަހަންނަށް ވަރަށް ކަމުދާ މަހެކެވެ. ވިއްސާރަ މޫސުމަށް ވާތީއެވެ. ވޭތިވެދިޔަ ހައެއްކަ ދުވަހުވެސް މުޅި މާހައުލަށް އޮތީ ފިނިކަމާއި ތެތްކަން ގެނެސްދީފައެވެ.
“ހޭ އިވްރީ.” އަހަރެންގެ ފުރަގަހުން އެ އިވުނީ އޭނާ ސިއްރުސިއްރުން އަހަންނަށް ގޮވައިލި އަޑެވެ. އެވަގުތު އަހަރެންގެ ކަރުދޮށުގައި ހުރި ހުރިހައި ލޯލިތައް ކޮޅަށް ޖެހިގެންދިޔައެވެ.
އޭނާގެ ފިރިހެންވަންތަ ދެ އަތުން އަހަރެންގެ އުނަގަނޑުގެ ވަށައިގެން ހިފަހައްޓައިލަމުން ފުރަގަހުން އަހަރެންގެ ބަނޑުގައި ބައްދާލިއެވެ. އަހަރެންގެ ނޭވާ އަވަސްވިއެވެ. އަހަރެންވެސް އަހަރެންގެ ފިރިމީހާގެ ގަޔާއި ބޮޑަށް ތަތްވެލީމެވެ.
“ކީއްކޮށްލަނީ މިތާނގަ؟” އަހަރެންގެ ކަންފަތު ފޫޅަށް ދޮނެއް ދެމުން އަހައިލި އެވެ.
“ހޫމް….” ވައި އަޑެއް ބޭރުކޮށްލަމުން ފިރިމީހާއާއި ދިމާއަށް އެނބުރުނީމެވެ. ފައިގެ އިނގިލިތަކުގެ ކުރި މުށިގަނޑުގައި ޖައްސައިގެން ކޮރާލަމުން އަހަރެންގެ ދެއަތުން ފިރިމީހާގެ ގައިގައި ވަށާލީމެވެ.
“ބެލްކަނީގެ ދޮރުލައްޕަން އަހަރެން އުޅުނީ. ފުދޭވަރަކަށް ފިނިވައި ޖެހޭތީ.” އަހަރެން އޮޅުންފިލުވައިދެމުން، ފިރިމީހާގެ ނިތްކުރިމައްޗަށް ވެއްޓިފައިހުރި އިސްތަށިތައް ރަނގަޅުކޮށްލީމެވެ.
“އެހެންދޯ… ހޫމް ތިއެއްނޫނޭ. އަހަރެން މިއައީ އަހަރުންގެ ރާނީ ކަމަނާ ހޭލިވާހަކަ ބުނަންށޭ. މައިކަމަނާ ޔޯ ބޭނުންވަނީ ކިޔާތީ މިއައީ.” ސިއްރު ސިއްރުން އަހަރެންގެ ކަންފަތްދޮޑުގައި ފިރިމީހާ ބުންޏެވެ. މަޑުމަޑުން އޭނާގެ މޫނު އަހަރެންގެ މޫނާއި ކައިރިއަށް ގެންނަމުންނެވެ.
އަހަރެންގެ ހިތުގެ ތެޅުން އަވަސްވާންފެށިއެވެ. އަވަގުތު އަހަންނަށް ލޯމަރައިލެވުނެވެ. ފިރިމީހާގެ ފިރިހެންވަންތަ މީރުވަސް އަހަރެންގެ ހިނދުރީގެ ތެރެއަށް މަރުހަބާ ކިޔަމުންނެވެ.
“އަހަރެން ހާދަ ލޯތްބެއްވަމޭ.” ފިރިމީހާގެ ކަންފަތްދޮށުގައި ސިއްރުސިއްރުން އަހަރެން ބުނީމެވެ. “އަދިވެސް އަހަންނަށް ޤަބޫލުކުރަން ދަތި ތީ އަހަރެންގެ މީހެއްކަން. އަދި އަހަރުންގެ ލޯބިލޯބި ބޭބީއެއް އޮތްކަންވެސް.”
އަހަރެން އޭނާގެ ގަދަމުށި ކުލައިގެ ދެލޮލުގެ ތެރެއަށް ގެނބިގަތީމެވެ. އެއީ ކޮންފަދަ ޖާދޫއެއްވާ ދެލޮލެއް ހެއްޔެވެ؟ އެ ދެލޮލުގެ މަސްތީ ކަނޑުގައި އަހަރެން ގެނބިގެންދާންވެސް ފަހެއް ނުޖެހެމެވެ.
“އަހަރެން މާބޮޑަށްވެސް ލޯބިވަން.
♩ ♪ ♫ ♬ ހާދަ ލޯތްބެއް ވެޔޭ އިވްރިޝާ…
އާދެ މަސްތޭ ވަނީ އިވްރިޝާ….
ބޭނުމީވެސް ކަލާ.. ހޯދެނީވެސް ކަލާ…
ރޭދުވާ ދައުރުވާ ހިނދަކުގާ……
ހާދަ ލޯތްބެއް ވެޔޭ އިވްރިޝާ…. ♩ ♪ ♫ ♬”
“ހޫމް އެއްކަލަ ލަވަ ފޮށި!” ފިރިމީހާގެ ސަކަ މިޒާޖުން ކޮށްލި ތަޢުރީފު އަހަންނަށް މާބޮޑަށްވެސް ކަމުދިޔައެވެ.
“ނޫނޭ ލޯބީ. އަހަރެންގެ ދިރުމަކީ ތީ. އަހަރެންގެ ހުރިހައިވެސް މީހަކީ ތީ. އިވްރީ ފަދަ ކުއްޖެއް އަހަރެންގެ ހަޔާތަށް ލިބުނީތީ ކޮންމެ ދުވަހަކު އަހަރެން މާތްﷲ އަށް ފަށްފަށުން ޝުކުރު ދަންނަވަން.”
“އޯހް ލޯބީ.” މަޑުމަޑުން އަހަންނަށް ބުނެލެވުނެވެ. ލޯ މަރައިލަމުން ފިރިމީހާގެ ތުނިޔަ ތުންފަތުގެ ތެތްކަމުގެ މަސްތުގައި ޖެހުނީމެވެ. ދެ ހަށިގަނޑު އެއް ހަށިގަނޑަކަށް ވުމުގެ ފުރަތަމަ މަރުހަލާ ފެށުމާއެކު އޭނާގެ ކޮނޑުގައި އަހަރެންގެ ދެއަތުން ބާރަށް ހިފަހައްޓާލައި އަހަންނާއި ކައިރިކޮށްލީމެވެ.
ފިރިމީހާގެ ދެއަތުން އަހަރެންގެ އުނަގަނޑުގައި ބާރަށް ހިފައި ފިތާލިއެވެ.
“ހޫމް ދެން މިތާނގަ ނޫޅެން.” ފިރިމީހާގެ ކޮނޑުގައި ވަރަށް ލޯބިން ޖަހައިލަމުން އަހަރެން ބުނީމެވެ. ލަދުރަކި އެހެނަސް ލާނެތް ހިނިގަނޑަކާވެސް އެކުގައެވެ.
“ޔެވްރީ ފެންނަފަށުގަ ހުރެގެން ކިހިނެއް އަހަންނަށް މަޑުން ހުރެވޭނީ.” އަހަރެންގެ ކަންފަތްދޮށުގައި ހަމަ އެހާމެ ސިއްރުން ފިރިމީހާ ބުންޏެވެ. ހަމައެއާއެކު މަސްތުން ފުރިފައިވާ އަޑަކުން އަނެއްކާވެސް ލަވައެއް އަޅުވައިލި އެވެ.
“♩ ♪ ♫ ♬ ކީއްވެބާއޭ ޚިޔާލާތު ފެންނަވަރުވޭ
ފެންނަފަށުގާ ހިނގާއިރު ނުފެންނަ ވަރުވޭ…….
ފެންނަފަށުގާ ހިނގާއިރު ނުފެންނަވަރުވޭ…. ♩ ♪ ♫ ♬”
“ދެން އަޅެ މަށަށް ޔެވްރީ ނުކިޔަބަލަ މިހިރަ ނާނު ގަނޑާ.” އަހަރެންގެ ދޫ ނެރެ ވައްތަރު ޖައްސާލަމުން ޝަކުވާކުރީމެވެ. ނާނު ކިޔުމުން ފިރިމީހާ ރުޅިއަންނަކަން އެނގިހުރެ އެ ނަމުން މުޚާޠަބު ކުރަމުންނެވެ. ފިރިމީހާ އަހަންނަށް ޔެވްރީ ކިޔަން ފެށީވެސް އަހަރެން އޭނައަށް ނާނު ކިޔާތީ އެވެ.
“ދެން މަށަށް ތިހެން ކިޔައިފިއްޔާ ކުޅިދައްކާލާނަން އިނގޭ.” މަސްތީ ރާގެއްގައި އޭނަގެ ތުންފަތް ހަފައިލަމުން ބުންޏެވެ.
“އެހެންތަ! އަޅޭ މަންމާ އަހަރެން ބިރުގަނެއްޖެ. އެކަމަކު ބުނަން، އަހަރެން ބޭނުންވަނީވެސް ތި ދައްކަން އުޅޭ ކުޅިއެއް ބަލަން!” ކުރަކި އަޑަކުން މިހެން ބުނަމުން އަހަރުމެންގެ ދަރިފުޅު އޮތް ކޮޓަރިއާއި ދިމާއަށް އަހަރެން ދުއްވައިގަތީމެވެ.
“ހޭ…. ނާރާ ބޭބީ.” ޅަ އަޑެއް ކަރުތެރޭން ނެރެމުން އަހަރެމެންގެ ނާއިރާ އޮތް އެނދުން ނަގައި އަހަރެންގެ އުނގުގައި ބޭއްވީމެވެ. ނާރާ އަށް ހަތް މަސް ފުރިއްޖެއޭ އަހަންނަށް ހީވެސް ނުވާހަކަހަލަ އެވެ.
އަހަރެންގެ ނާރާ އަކީ ހަމަ ސީދާ އަހަރެންގެ ތައްގަނޑެކެވެ. އަހަރުމެން ދެމައިންގެ ހުރިހައި ކަމެއް މުޅީންވެސް އެއްގޮތެވެ. ލޮލާއި އަނގައާއި މުޅި މޫނުވެސް ހަމަ އެއްގޮތެވެ. ނާރާ ގެ ބައްޕައާއި ހަމަ އެކަނި ވައްތަރީ ނާރާ ގެ ނޭފަތެވެ.
“ނާރާ ބޭބީގެ ނެޕީ ހުރީ ހުސްވެފަ. އަހަރެން އަންނާނަން ނެޕީ ގަނެގެން އޯކޭ؟” ނާރާ ގެ ބައްޕަ، އަހަރެންގެ ފިރިމީހާ ބުންޏެވެ.
“ދެން އަޅެ ނޫން. އަހަރެންވެސް ބޭނުން ދާން.” ކޮޅަށް ތެދުވެ ނާރާ އަހަރެންގެ ކޮނޑުމަތީގައި ބާއްވަމުން ބޮޑާހާކާލީމެވެ.
“ނޫން” ފިރިމީހާ ދެފަރާތަށް ބޯހޫރާލަމުން ބުންޏެވެ. “އަހަރެންގެ ނާރާ ކައިރީގަ މަޑުކޮށްލައިގެން އިނދެބަ. އަހަރެން ނިކަން އަވަހަށް އެބަ އަންނަމޭ ގަނެގެން.”
ގޭގެ ދޮރާއި ދިމާއަށް ފިރިމީހާ ހިނގައިގަތުމުން އަހަރެންވެސް ފަހަތުން ހިނގައިގަތީމެވެ. “ދެން އަޅެ ތިހާ ކަޓުކޮށް ނުވިސްނަބަ. އަހަރެން ތަނަކަށް ނުދާތާ ކިހާ ދުވަހެއްވެއްޖެތަ މިހާރު.”
ފިރިމީހާ ފުން ނޭވާއެއް ދޫކޮށްލަމުން އާނބަސް ބުންޏެވެ. “އޯކޭ، ދެންވެސް އަވަހަށް ދޭބަ ބުރުގާއަޅަން. ނާރާ ދީ މަންމަ އަތަށް.”
އޭނާ ބުނިގޮތަށް އަހަރެން ނިކަން އަވަހަށް ތައްޔާރުވެލީމެވެ.
ދެމީހުން ގެއިން ނުކުތީ އެކުއެކީގައެވެ. އަތާއި އަތް ޖޯޑުކޮށްލައިގެން ތިބެއެވެ. ބޭރަށް ނުކުތުމާއެކު އަހަންނަށް ޖެއްސުންކުރަން ފެށީ ޖެހެމުން ދިޔަ ގަދަ ރޯޅިވައެވެ. އަހަރެން އެހާވަރުން އެޅި ބުރުގާ ނަގައި ހޫރައިލަން އުޅޭ ވައިރޯޅިތަކަށް އަހަރެންގެ ހިތާއިހިތުން ކުދިކިޔައިލީމެވެ.
“ތި ބުރުގާ ތަންކޮޅެއް ރަނގަޅަށް އަޅަން އާދަކޮށްބަލަ! އަހަރެން ބޭނުމެއް ނޫން އަހަރެންގެ މިލްކަކާ ދިމާއަށް އެހެން މީހެއްގެ ލޮލުގެ ހިމަކޮޅުން ބަލައިލަންވެސް.” އަމުރުވެރި ރާގަކަށް، އެހެނަސް ލޯބިން އޭނާ އަހަންނަށް އަމުރުކުރި އެވެ.
އަހަރެން ބޯޖަހައިލަމުން ބުރުގާ ރަނގަޅުކޮށްލައި ކާރަށް އެރީމެވެ. އަހަންނަށް ރަނގަޅަށް ހަމަޖެހިވެސް ނުލެވި އުޅެނިކޮށް ދުމެއް ޖަހާހާ ބާރަށް އޭނާ ކާރު ދުއްވައިލިއެވެ.
********
ފިހާރައަށް ގޮސް ނެޕީ ބޮނޑިއަކާ އިތުރު ސާމާނު ގަނެގެން ކާރާއި ދިމާއަށް އަހަރުމެން މިސްރާބުޖެހީމެވެ.
“ލޯބީ…. އަޅެ ދީ އަހަރެން ދުއްވާލަން.” ފިރިމީހާގެ ގަމީހުގައި ހިފަހައްޓައިގެން ހުރެ އާދޭހާއެކު އަހަރެން ބުނީމެވެ.
“ނޫން! އިވްރީ–” އޭނާ ބުނަން އުޅުނު ޖުމުލަ މެދުކަނޑާލިއެވެ. “އިވްރީ، އަހަރެން ޒުވާބު ކުރާކަށް ބޭނުމެއް ނޫން. ކާރު ދުއްވާނީ އަހަރެން.”
އަހަރެން ތުންފަތް އޫކޮށްލުމަށްފަހު އޭނާއާ ދިމާލަށް ރުޅިވެރިކަމާއެކު ބަލާލީމެވެ. “އެންމެ ރަނގަޅު! އެހެންވިއްޔާ އަހަރެން ނުދާނަން!” މިހެން ބުނެ، ހަށަން ބަނދެލައިގެން ގަހެއްގައި ލެނގިލައިފީމެވެ.
އޭނާ އަހަރެންގެ ބުރުގާ ރަނގަޅުކޮށްލަމުން، ހިތްހަމަނުޖެހުމާއެކު އަހަރެންނާ ދިމާލަށް ބަލާލިއެވެ. “ތިޔައީ ކީއްވެގެން ހާކާހާ ބޮޑައެއްތަ؟!”
“އަހަރެން ބޮޑައެއް ނުހާކަން!! އެއީ ނާންގެ މައްސަލަ. އަބަދުވެސް އަހަރެންނާ ދޭތެރޭ ކަންތައް ކުރަނީ ތުއްތު ކުއްޖަކާ ދޭތެރޭ ކަންތައް ކުރާހެން. މާތްކަލާކޯ! އަހަރެންގެ އުމުރުން މިހާރު 20 އަހަރު ފުރިއްޖެ!”
އޭނާގެ އިސްތަށިގަނޑަށް ދަމައިގަންނަމުން، ފޫހިވެފައި ހުރެ ގޮވާލިއެވެ. “ﷲ ގަންދީ ބުނަން، ތިޔައީ ވަރަށް އުނދަގޫ ބޮޑު ކުއްޖެއް! އެންމެ ރަނގަޅު، ދުއްވަން ބޭނުމިއްޔާ މިއޮތީ ތަޅުދަނޑި!” އޭނާ ތަޅުދަނޑި އެއްލުމުން، ނަސީބަކުން އަހަންނަށް ތަޅުދަނޑީގައި ހިފުނެވެ.
އަހަރެން ކާރުގެ ދޮރު ހުޅުވައި، އެތެރެއަށް ވަދެ ކާރު ސްޓާޓް ކޮށްލީމެވެ. އިންޖީނުގެ އަޑާއެކު، މަޑުމަޑުން ކާރު ދުއްވާލީމެވެ. ހުޅުމާލޭގެ ހަމަހިމޭން މަގުތަކުން ދަތުރުކުރަމުން ދިޔައިރު، ކާރުގެ ތެރެއަށް އޮތީ ބަރުދާސްތު ކުރަން އުނދަގޫ ހިމޭންކަމެއް ވެރިވެފައެވެ. އޭރު ބޯކޮށް ވާރޭ ވެސް ވެހެން ފަށައިފިއެވެ.
“ނާން؟” އަރިމައްޗަށް ބަލާލަމުން އަހަރެން ގޮވާލީމެވެ. އޭނާ އިނީ ދަތްކުނޑިވިކައިގެން، ވަރަށް ހިތްހަމަނުޖެހިފައެވެ.
“ކީކޭ؟” އޭނާ ސުވާލު ކުރިއެވެ.
“ރުޅި އައިސްފައިތަ؟” އަހަރެން މަޑުމަޑުން އަހާލީމެވެ.
“ނޫނޭ، ވަރަށް އުފަލުން މި އިނީ،” މަލާމާތުގެ ރާގަކަށް އޭނާ ޖަވާބު ދިނެވެ.
އޭގެ ފަހުން އަހަރެން އަނގަ މަޑުންލައިގެން އިނީމެވެ. އިތުރަށް ވާހަކަ ދައްކައިފިނަމަ، ބޮޑު ޒުވާބަކަށް ބަދަލުވެދާނެތީއެވެ. މަގުމަތީގައި އެހެން އުޅަނދެއް ނެތުމުން، އަހަރެން ކާރުގެ ދުވެލި ބާރުކޮށްލީމެވެ.
“ބާރަށް ނުދުއްވާ! އިވްރީ، އަހަރެން ރުޅިއައިމަ ތިޔަހާ އުފާވަނީ ކީއްވެ؟” ނާން ހަޅޭއްލަވައިގަތް އަޑަށް އަހަރެން ސިހިފައި ގޮނޑިން ހިއްލިގެން ދިޔައެވެ.
“ލޯބިވާ، އަހަރެން ގަސްތުގައި ނާން ރުޅިއަރުވާކަށް ނޫޅެން!” އޭނާގެ މޫނަށް ބަލާލަމުން އަހަރެން ވެސް ބާރަށް ބުނީމެވެ. އޭނާ އިނީ ގޮނޑީގައި ބާރަށް ހިފަހައްޓައިގެން، އަމިއްލަ އިސްތަށިގަނޑަށް ދަމާށެވެ.
“އަހަރެންގެ މޫނަށް ނުބަލައި، މަގަށް ބަލައިގެން ދުއްވާ،” އޭނާ އަމުރު ކުރިއެވެ.
“އެއްވެސް މީހަކު ނެތޭ–” އަހަރެންގެ ޖުމުލަ ފުރިހަމަ ނުވަނީސް، ކާރުގެ ފަހަތުން އިވުނު ބާރު އަޑަކާއެކު، އަހަރެންގެ ބޯ ގޮސް ކާރުގެ ހުންގާނުގައި ޖެހިއްޖެއެވެ. ކާރުގެ ބިއްލޫރިތައް އަހަރެންގެ ހަށިގަނޑަށް ވަންނަމުން ދިޔައިރު، އަހަރެން ވިއްސައިގެން ގޮސް ވެއްޓުނީ ކުރިމަތީގައި އޮތް ވިނަގަނޑު މައްޗަށެވެ.
މުޅި ހަށިގަނޑަށް އިހުސާސްވަމުން ދިޔައީ ނުހަނު ވަރުގަދަ ތަދެކެވެ. ބޮލާއި، މޫނާއި، މުޅި ހަށިގަނޑު ރިހެމުން ދިޔައެވެ.
ލޯ ހުޅުވަން މަސައްކަތް ކުރި ނަމަވެސް، ލޮލެއް ނުހުޅުވުނެވެ. ނާންގެ ނަމުން ގޮވާލަން އުޅުނު ނަމަވެސް، އަނގައިން ބަހެއް ބޭރެއް ނުވިއެވެ. އެތައް މަސައްކަތެއް ކުރުމަށްފަހު، އެންމެ ފަހުން ހަށިގަނޑަށް ވެރިވަމުން ދިޔަ ކަނު އަނދިރިކަމުގެ ތެރެއަށް އަހަރެން ޣަރަގުވެއްޖެއެވެ. މުޅި ދުނިޔެ ހިމޭންވެއްޖެއެވެ…
(ނުނިމޭ)
