“ޓު އޯލް ދަ ބޯއީސް އައިވް ލަވްޑް ބިފޯ” ފިލްމުގެ ސީރީޒްއިން ގިނަ ބައެއްގެ މަޤުބޫލުކަން ހޯދި އަދި މަޝްހޫރު ތަރި ލާނާ ކޮންޑޯ، އޭނާގެ “އޮންސްކްރީން” ކޮއްކޮ އެނާ ކެތުކާޓާއެކު އަނެއްކާވެސް ސްކްރީނުން ފެނިގެންދާނެކަން ކަށަވަރުވެއްޖެއެވެ.
މި އާއިލީ ބައްދަލުވުން ފެނިގެންދާނީ “އެކްސް.އޯ، ކިޓީ”ގެ ތިންވަނަ ސީޒަނުންނެވެ. “ޓު އޯލް ދަ ބޯއީސް” ފިލްމުތަކުގައި ލާރާ ޖީން ކޯވީގެ ކެރެކްޓާއިން މަގުބޫލުކަން ހޯދި ލާނާ، މި ސީރީޒްގެ އާ ސީޒަނުން ފެނިގެންދާއިރު، މި ސީރީޒް ބިނާވެފައިވަނީ ލާރާ ޖީންގެ ކޮއްކޮ، ކިޓީ ކޯވީ (އޭނާ ކެތުކާޓް)ގެ ދިރިއުޅުމުގެ މައްޗަށެވެ. ކިޓީއަކީ މީހުން ގުޅުވައިދިނުމުގެ ކަންކަމަށް ލޯބިކުރާ، ފޯރިގަދަ ކެރެކްޓާއެކެވެ.
“އަނެއްކާވެސް އެނބުރި އައިސް އޭނާއާއެކު މަސައްކަތް ކުރަން ލިބުމަކީ ވަރަށް ބޮޑު އުފަލެއް، އޭނާ ވަނީ ‘އެކްސް.އޯ، ކިޓީ’ ގެ ދުނިޔެ ބިނާކުރުމުގައި ވަރަށް ފުރިހަމަ މަސައްކަތެއް ކޮށްފަ. އޭނާއާއެކު އަލުން މަސައްކަތް ކުރުމަކީ ހުވަފެނެއް ހަގީގަތަކަށް ވުން ފަދަ ކަމެއް. އަލުން މި މަސައްކަތަށް އެނބުރި އާދެވުމުން އަހަރެން ހުރީ ވަރަށް ފަޚުރުވެރިވެ، އުފާވެފަ.”
އަދި “އެކްސް.އޯ، ކިޓީ”ގެ ދުނިޔެ ބިނާކުރުމުގައި އެނާ ކޮށްފައިވަނީ ވަރަށް ފުރިހަމަ މަސައްކަތެއް ކަމަށާއި، އޭނާއާއެކު އަލުން މަސައްކަތް ކުރުމަކީ ހުވަފެނެއް ހަގީގަތަކަށް ވުން ފަދަ ކަމެއްގެ ގޮތުގައި ލާނާ ސިފަކުރިއެވެ.
ކޯވީ އާއިލާގެ ދެބެން އެކުގައި ފެންނަ މަންޒަރުތައް ހިމެނޭ ކްލިޕެއް މިހާރު ވަނީ އާންމުކޮށްފައެވެ. ހަމައެއާއެކު މާރިޗު 9 ވާ ހޯމަ ދުވަހު ނެރޭ ފުރިހަމަ ޓްރެއިލާގައި ލާނާގެ ރޯލުގެ އިތުރު ތަފުސީލުތައް ފެނިގެންދާނެއެވެ.
މި ސީޒަނުގައި ކިޓީ ސޮންގް ކޯވީ ‘ކޮރެއަން އިންޓަރނޭޝަނަލް ސްކޫލް އޮފް ސިއޯލް’ (KISS) ގައި އޭނާގެ ފަހު އަހަރު ހޭދަކުރާނީ މުހިންމު ރޭވުންތަކަކާއެކުގައެވެ. އޭނާގެ މަގުސަދަކީ އެކުވެރިންނާއެކު ފޮނި ހަނދާންތަކެއް އާކުރުމާއި، ކޮރެއާގައި ތިބި އާއިލީ މީހުންނާ ގުޅުން ބަދަހިކުރުމުގެ އިތުރުން، އޭނާގެ މުސްތަގުބަލާ މެދު ސީރިއަސް ނިންމުންތަކެއް ނިންމުމެވެ. ނަމަވެސް، ކުއްލިއަކަށް ފެންމަތިވާ ބައެއް ކަންތައްތަކުގެ ސަބަބުން އޭނާގެ ރޭވުންތަކަށް ބަދަލު އައިސް، ހީނުކުރާ ފަދަ ގޮންޖެހުންތަކާ ކުރިމަތިލާން ޖެހޭނެއެވެ.
މީގެ ކުރީގެ ސީޒަންތަކުގައިވެސް “ޓު އޯލް ދަ ބޯއީސް”ގެ ބައެއް ތަރިން ފެނިފައިވެއެވެ. އޭގެ ތެރޭގައި ޕީޓާ ކަވިންސްކީގެ ރޯލުން ފެނުނު ނޯހް ސެންޓިނެއޯ އާއި، ދޮށީ ދައްތަ މާގޯޓްގެ ރޯލުން ފެނުނު ޖަނެލް ޕެރިޝް ހިމެނެއެވެ. އަދި ފުރަތަމަ ސީޒަނުގައި ކިޓީގެ ބައްޕަ އާއި ދޮންމަންމަގެ ރޯލުން ޖޯން ކޯބެޓް އާއި ސަރަޔޫ ބްލޫ ވެސް ވަނީ ފެނިގެންގޮސްފައެވެ.
“އެކްސް.އޯ، ކިޓީ”ގެ ތިންވަނަ ސީޒަން ނެޓްފްލިކްސް މެދުވެރިކޮށް ރިލީޒްކުރުމަށް ހަމަޖެހިފައިވަނީ އޭޕްރީލް މަހުގެ 2 ވަނަ ދުވަހުއެވެ.
