ވައިރަހެއް ފެތުރޭ ބީދައިން، ނޭދެވޭ ޝުޢޫރުތަކަކީވެސް އެކަކު އަނެކަކާ ބައްދަލުވެ އުޅުމުގެ ތެރެއިން އެކަކުގެ ކިބައިން އަނެކަކުގެ ގަޔަށް ފެތުރިގެންދާ އެއްޗެކެވެ. ނަފުސާނީ ޢިލްމާއި ސިކުނޑީގެ ޢިލްމީ ދިރާސާތަކުން ދައްކާ ގޮތުގައި، އަބަދު ނޭދެވޭ ވިސްނުން ގެންގުޅޭ ނުވަތަ ޝަކުވާގެ ރޫޙު ހުންނަ މީހުންނާއެކު ވަގުތު ހޭދަކުރުމުން، އަޅުގަނޑުމެންގެ ސިކުނޑީގައި ހުންނަ “މިރަރ ނިއުރޯން” ތަކުގެ ސަބަބުން، އިޚްތިޔާރަކާ ނުލައި އެމީހުންގެ މޫނުމަތީގެ ކުލަވަރާއި، ވާހަކަދައްކާ ރާގާއި، ނަފުސާނީ ހާލަތު އަޅުގަނޑުމެންނަށް ނަކަލު ކުރެވެން ފަށައެވެ.
އިޙުސާސްތައް މިގޮތަށް ބަދަލުވުމުގެ ސަބަބުން އަމިއްލަ ނަފުސަށް ސްޓްރެސް ކުރިމަތިވެ، ހާސްކަން އިތުރުވެ، ނޭދެވޭ ކަންކަމަށް ވިސްނޭ މިންވަރު އިތުރުވެގެންދެއެވެ. އަދި ގިނަ ދުވަސްވުމުން، މީހާގެ ހަށިގަނޑުގެ ބަލިމަޑުކަމުން ދިފާޢުވުމުގެ ބާރުވެސް ދަށްވެގެންދެއެވެ.
ނޭދެވޭ މުޢާމަލާތްތަކުން ކުރިމަތިވާ އެންމެ ހާދިސާއަކުންވެސް އެތައް ގަޑިއިރަކަށް މީހާގެ މޫޑު ގޯސްކޮށްލައެވެ. އަދި ތަކުރާރުކޮށް މިފަދަ މާހައުލެއްގައި އުޅެންޖެހުމަކީ އިންސާނާގެ އަސްލު ނަފުސާނީ ހަމަޖެހުން މުޅިން ބަދަލުކޮށްލާ ކަމެކެވެ. އެހެންކަމުން، އަމިއްލަ ނަފުސުގެ ހަމަޖެހުމަށްޓަކައި މިފަދަ މާހައުލުތަކުން ދުރުހެލިވުމަކީ މާބޮޑު ކަމަކަށް ހަދައިގެން އުޅުމެއް ނޫނެވެ. އެއީ ނަފުސާނީ ދުޅަހެޔޮކަން ދެމެހެއްޓުމަށްޓަކައި ކޮންމެހެން ކުރަންޖެހޭ “ސާފުތާހިރުކަމުގެ” އާދައެކެވެ.
ނޭދެވޭ ވިސްނުން ގެންގުޅޭ މީހުންގެ ތެރޭގައި އުޅުމަކީ ހަޤީޤަތުގައިވެސް އިންސާނާއަށް އޭގެ ނޭދެވޭ އަސަރު ސީދާ ގޮތެއްގައި ކުރާ ކަމެކެވެ.
