ދަރަނިވެރި ހިތެއް
ނަމަވެސް ޒިމާންއަށް ނޭނގި އޭނާގެ ހިތް ބަދަލުވަމުން ދިޔައިރު، އެހެން މީހަކު ދިޔައީ މި މަންޒަރު ބަލަމުންނެވެ. އޭނާގެ ނަމަކީ އިބްރާހީމެވެ. ޒިމާންގެ އާއިލާއާ އޭނާއާ އޮތް ގުޅުމުގެ ފުންމިން އެނގެނީ ވަރަށް މަދު ބަޔަކަށެވެ. ޒިމާންއަކީ މާލެ ބިރުގަންނަ ފަދަ ނުރައްކާތެރި މީހަކަށް ވުމުގެ މާ ކުރިން، އިބްރާހީމް އޭނާގެ ބައްޕަ ދަނެއެވެ. އާއިލާއަށް ދިމާވި ދަތި ދުވަސްތަކުގައި އޭނާ ހުއްޓެވެ. ޒިމާން ކުޑަކުއްޖަކުން ބޮޑުވެ، ހަރުކަށި އަދި ނުރައްކާތެރި މީހަކަށް ބަދަލުވިތަން އޭނާ ދުށްޓެވެ. ޒިމާންގެ ބައްޕަ ނިޔާވުމުން އިބްރާހީމް ވީ ވަޢުދަކީ އެ އާއިލާ ރައްކާތެރިކުރުމެވެ. އެއީ ފާޅުގައެއް ނޫނެވެ. ކަންކަމާ ބެހިގެންނެއްވެސް ނޫނެވެ. ދުރުގައި ހުރެގެންނެވެ. އޭނާ ބަލާނެއެވެ. އަޑުއަހާނެއެވެ. އަދި ޒިމާންއަށް ނުރައްކަލެއް ކުރިމަތިވާނަމަ، ޒިމާންއަށް އެނގުމުގެ ކުރިން އިބްރާހީމަށް އެކަން އެނގޭނެއެވެ.
އިބްރާހީމް ސިއްރިއްޔާތުގައި ކިތައް ފަހަރު ކަންކަމުގެ ތެރެއަށް ވަދެ ޒިމާން ސަލާމަތްކުރިކަން ޒިމާންއަކަށް ނޭނގެއެވެ. ބައެއް ފަހަރު އިންޒާރެއް ދީގެންނެވެ. އަނެއްބައި ފަހަރު މަޢުލޫމާތެއް ފޯރުކޮށްދީގެންނެވެ. ނަމަވެސް މި ފަހަކަށް އައިސް، ޒިމާންގެ ކިބައިން މީގެ ކުރިން ދުވަހަކުވެސް ނުފެންނަ ބަދަލެއް އިބްރާހީމަށް ފާހަގަވިއެވެ. ޒިމާން ބަދަލުވަނީއެވެ. ބަލިކަށިވަނީއެއް ނޫނެވެ. އެއަށްވުރެ މާ ނުރައްކާތެރި ކަމެއް ހިނގަނީއެވެ. ޒިމާންގެ ހިތް އެހެން މީހަކާ ގުޅެނީއެވެ. ޒިމާން އުޅޭ ދުނިޔޭގައި، މިފަދަ ގުޅުމަކީ މީހާގެ އެންމެ ބޮޑު ނާޒުކުކަމަށް ވެދާނެއެވެ.
އެހެންކަމުން އިބްރާހީމް ކިޔާރާއަށް ފާރަލާން ފެށިއެވެ. ފުރަތަމަ އޭނާ ބޭނުންވީ ކިޔާރާއަކީ އެހެން ބަޔަކާ ގުޅުން އޮތް މީހެއްތޯ ބަލާށެވެ. އޭނާ ޒިމާންއަށް އޮޅުވާލަނީތޯއެވެ؟ ޒިމާންގެ ދުނިޔޭގެ ކަންކަން އޭނާއަށް އެނގޭތޯއެވެ؟ ނުވަތަ އޭނާއަކީ ގަސްތުގައި ޒިމާންގެ ކުރިމައްޗަށް ފޮނުވާފައިވާ މީހެއްތޯއެވެ؟ އިބްރާހީމް އޭނާގެ ހަރަކާތްތައް ބަލައި، އޭނާ ދާ ތަންތަނާއި، ކާ އެއްޗިއްސާއި، އޭނާގެ ވަށައިގެން ތިބޭ މީހުން ދެނެގަތެވެ. މަޑުމަޑުން ހަޤީޤަތް ހާމަވާން ފެށިއެވެ. ކިޔާރާއަކީ ދުޝްމަނަކާ ގުޅުން އޮތީތީ ނުރައްކާތެރި މީހެއް ނޫނެވެ. އޭނާ ނުރައްކާތެރިވަނީ ޒިމާންއަށް އޭނާ މުހިންމުވާ މިންވަރުންނެވެ.
ނަމަވެސް، ގުދަނުގެ ފުޓޭޖް ބަލައިލުމުން އިބްރާހީމަށް އާ ކަމެއް ފެނުނެވެ. އޭނާ ހޭލި ގޮތެވެ. އޭނާ ކަންކަން ބަލައި، އެތަނުން ފިލި ގޮތެވެ. ކުޑަކުޑަ ނިޔަފަތި ކަނޑާ އެއްޗަކުން އޭނާގެ ބަނދެފައިވާ އަތް ދޫކޮށްލި ގޮތެވެ. އޭނާއަށްވުރެ ދެގުނަ ބޮޑު ތިން ފިރިހެނުންނާ ކުރިމަތިލައި، އެމީހުން ބަލިކޮށްލި ގޮތެވެ.
އިބްރާހީމް ހިނިތުންވެލިއެވެ. ފުރަތަމަ ފަހަރަށް އޭނާއަށް ވިސްނިއްޖެއެވެ. “މީގެ ސަބަބަކީ މިއީތާ.” އޭނާ ސްކްރީނާ ގާތްވެލިއެވެ. “އޭނާއަކީ ބަލިކަށި މީހެއް ނޫން.” އޭނާ ކިޔާރާ ގުދަނުން ނުކުމެ ހަމަޖެހިލައިގެން ހުރެ ފުލުހުންނަށް ގުޅި މަންޒަރު ބަލަން ހުއްޓެވެ.
“ކޮންޓްރޯލް ކުރެވޭ ވަރަށްވުރެ އޭނާގެ ހިތްވަރުގަދަ.” އޭނާ ހިނިތުންވިއެވެ. “ޒިމާންއާއެކު އޭނާއަށް އުޅެވޭނެ.”
އެރޭ ކިޔާރާއަށް ސައި މޭޒުމަތިން ސިޓީއުރައެއް ފެނުނެވެ. އޭގައި އެއްވެސް މީހެއްގެ ނަމެއް ނެތެވެ. އެއްވެސް ތަފްސީލެއް ނެތެވެ. އޮތީ ހަމައެކަނި އެންމެ ޖުމްލައެކެވެ. “ބައެއް ހަޤީޤަތްތައް ހާމަވުން ލަސްވަނީ، އެއީ ހަމައެކަނި އަޑުއެހުމުގެ ބަދަލުގައި، ވިސްނައިގަންނަން ޖެހޭ އެއްޗަކަށް ވާތީއެވެ.”
ކިޔާރާ އެއަށް ބަލަހައްޓައިގެން އިރުކޮޅަކު ހުއްޓެވެ. ދެން މަޑުމަޑުން އެ ހުޅުވައިލިއެވެ. އޭގެ ތެރޭގައި އޮތީ ބާ ފޮޓޯއެކެވެ. ޒިމާންއެވެ. މާ ޒުވާންއިރުއެވެ. އުމުރުން ދުވަސްވީ މީހެއްގެ ކައިރީގައެވެ. ކިޔާރާއަށް އެ މީހާއަކީ ކާކުކަމެއް ނޭނގުނެވެ. އެކަމަކު އެ ފޮޓޯއިންވެސް ޒިމާންގެ އެ ތޫނު ދެލޯ އޭނާ ދެނެގަތެވެ. އޭނާ ފޮޓޯގެ ފުރަގަސް ބަލައިލިއެވެ. އެތަނުގައިވެސް ޖުމްލައެއް ލިޔެފައި އޮތެވެ. “އެރޭ އެ ބަހުގައި އޭނާ އިނީ ކީއްވެގެންތޯ އަހާށެވެ.”
ކިޔާރާގެ ހިތުގެ ތެޅުން އަވަސްވިއެވެ. އެރޭ ފަހުން އޭނާ ޒިމާންއާ ބަގީޗާއިން ބައްދަލުކުރިއެވެ. ޒިމާން ހުރީ މޫދާ ދިމާލަށް ބަލަހައްޓައިގެންނެވެ.
“ޒިމާން؟”
ޒިމާން އެނބުރިލިއެވެ. އޭނާގެ މޫނުމަތިން ފެނުނު ހަރުކަށިކަން ވަގުތުން މަޑުމޮޅިވިއެވެ. “ކިހިނެއްވީ؟”
ކިޔާރާ އެ ފޮޓޯ ދައްކައިލިއެވެ. “ކީއްވެގެން އެރޭ އެ ބަހަށް އެރީ؟”
އެއްޗެއް ނުބުނެ ޒިމާން އިރުކޮޅަކު ހުއްޓެވެ. އޭނާގެ މޫނުމަތިން ފެނުނީ ހިމޭންކަމެވެ. ދެން ފުން ނޭވާއެއް ދޫކޮށްލިއެވެ. “ކިޔާރާއަށް އެނގުނީތާ.”
“ކޯއްޗެއް އެނގުނީ؟”
އޭނާ ކަނޑާ ދިމާލަށް ބަލައިލިއެވެ. “އަހަރެން އެރޭ އުޅުނީ މީހަކު ހޯދަން.”
“ކާކު؟”
“ދަރަންޏެއް ނުދައްކައިގެން އުޅުނު މީހަކު.”
ކިޔާރާ އޭނާއަށް ބަލަހައްޓައިގެން ހުއްޓެވެ. ދެން ކުއްލިއަކަށް ހުރިހާ ކަމެއް ވިސްނުނެވެ. “އަހަރެންގެ ބޭބެ.”
ޒިމާން ބޯޖަހައިލިއެވެ. ކިޔާރާގެ މޫނުމަތީގެ ކުލަވަރު ބަދަލުވިއެވެ. ޒިމާން ހުރިހާ ވާހަކައެއް ކިޔައިދިނެވެ. ބޭބެ ނެގި ފައިސާއާއި، އޮންލައިން ގޭމް ކުޅުމާއި، ބިޑްކުރުމުގެ ވާހަކައެވެ. ދަރަނި ބޮޑުވަމުން ދިޔައިރުވެސް އާއިލާއަށް އެއްވެސް ކަމެއް ނޭނގި އޮތް އޮތުމެވެ. ކިޔާރާގެ ދެލޯ ކަރުނުން ފުރުނެވެ.
“ބޭބެ އަހަރެމެން ގާތު އެއްވެސް ވާހަކައެއް ނުބުނޭ.”
“ނުބުނާނެ.”
“ކީއްވެ އަހަރެން ގާތު ކުރިން ނުބުނީ؟”
ޒިމާން އޭނާއަށް ބަލައިލިއެވެ. “އަހަރެންނަށް ކިޔާރާއާ ބައްދަލުވީ ހިސާބުން، އެ ވާހަކަ ބުނާނެ ހިތްވަރެއް ނުލިބުނު.”
ކިޔާރާ ކަރުނަ ހިންދާލަމުން އަހައިލިއެވެ. “ކީއްވެ؟”
ޒިމާން އޭނާއާ ގާތަށް ޖެހިލިއެވެ. “އަހަރެން އޭނާ ހޯދުމުގެ ކުރިން، އަހަރެންނަށް ކިޔާރާ ފެނުނީތީ.”
ކިޔާރާގެ ހިތުގައި ރިއްސައިލިއެވެ. “އެހެންވީމާ އަހަރެމެން ބައްދަލުވީ އިއްތިފާޤަކުން ނޫންތާ؟”
“އަހަރެން އެ ބަހަށް އެރި ސަބަބަކީ އިއްތިފާޤެއް ނޫން.” އޭނާ މަޑުޖެހިލިއެވެ. “އެކަމަކު ކިޔާރާއާ ބައްދަލުވުމުން ހުރިހާ ކަމެއް ބަދަލުވެއްޖެ.”
ކިޔާރާ އިސްދަށަށް ޖަހައިލިއެވެ. ޒިމާން ކުރިއަށް ގެންދިޔައެވެ. “އަހަރެން ދިޔައީ ދަރަންޏެއް ހޯދަން.” އޭނާގެ އަޑު މަޑުވިއެވެ. “އެކަމަކު އަހަރެންނަށް ލިބުނީ ކިޔާރާ.”
ކިޔާރާ އިސްއުފުލައި ބަލައިލިއެވެ. “ދެން އެ ހުރިހާ ކަމެއް ހަނދާން ނެތުނީ؟”
އޭނާ ލުއިކޮށް ހިނިތުންވެލިއެވެ. “އަހަރެން ހުރިހާ ކަމެއް ހަނދާން ނެތުނު.”
ކިޔާރާގެ ކޯތާފަތް މަތިން ކަރުނަ ތިއްކެއް ފޭބިއެވެ. ޒިމާން ވަރަށް އޯގާތެރިކަމާއެކު އެ ކަރުނަ ފޮހެލިއެވެ. “ކިޔާރާ، އަހަރެން މިއިން އެއްވެސް ކަމެއް ރާވައިގެނެއް ނުކުރަން.”
ކިޔާރާ މަޑުމަޑުން ބުންޏެވެ. “އަހަރެންވެސްމެ.”
ދެމީހުންގެ އަތް ގުޅުނެވެ. އިނގިލިތައް މަހާލެވުނެވެ. އެކަކުވެސް ދުރަކަށް ނުދެއެވެ. ހަނދުވަރުގެ އަލީގައި، ހިމޭން ކަނޑުގެ އައްސޭރީގައި އެތައް އިރަކު އެމީހުން ތިއްބެވެ. އެއީ ލޯބި ކަމަށް ބުނާނެ ހިތްވަރެއް އަދި އެކަކުގެ ކިބައިގައިވެސް ނެތެވެ. ނަމަވެސް އެއީ ހަމައެކަނި ގަޔާވުމެއް ކަމަށް ޤަބޫލުކުރާނެ މޮޔައަކުވެސް ނެތެވެ.
ކޮންމެވެސް ކަމެއް ބަދަލުވެއްޖެއެވެ. ދެމީހުންގެ ރޫހުގެ ދެމެދުގައި ރިހި ކުލައިގެ ރޮދިގަނޑެއް ފަދަ ނުފެންނަ ގުޅުމެއް އުފެދިއްޖެއެވެ. ހިމޭން އަލިކަމެކެވެ. “ރިހި ރޫހެކެވެ.”
އެރޭ ފަހުން، އެންޒޯ ޒިމާންގެ އޮފީހަށް ވަނެވެ. “އަހަރެމެންނަށް އެނގިއްޖެ ފާރަލަނީ ކާކުކަން.”
ޒިމާން އިސްއުފުލައި ބަލައިލިއެވެ. “ކާކު؟”
“އިބްރާހީމް.”
ޒިމާން ހުއްޓުން އެރިއެވެ. “ބައްޕަގެ އިބްރާހީމް؟”
އެންޒޯ ބޯޖަހައިލިއެވެ. “ކީއްވެ؟”
“އޭނާ ޒިމާންއަށް ފާރަލާތާ އެތައް އަހަރެއް ވެއްޖެ.”
ޒިމާން އެ ބާ ފޮޓޯއަށް ބަލަހައްޓައިގެން އިނެވެ. “އޭނާ އަހަރެންގެ އާއިލާ ރައްކާތެރިކުރަނީ.”
“އަދިވެސް އެކަން އެބަކުރޭ.”
“ދެން ކިޔާރާ؟”
އެންޒޯ ފަސްޖެހިލިއެވެ. “އޭނާ ބޭނުންވީ ކިޔާރާއަކީ ނުރައްކަލެއްތޯ ބަލަން.”
ޒިމާންގެ މޫނުމަތިން ހަރުކަށިކަން ފެނުނެވެ. “ދެން؟”
އެންޒޯ ކުޑަކޮށް ހިނިތުންވެލިއެވެ. “އޭނާ ޤަބޫލެއް ނުކުރޭ އެއީ ނުރައްކަލެއް ކަމަކަށް.”
“އޭނާ ބުނީ ކީކޭ؟”
އެންޒޯ އެ ފޮޓޯ މޭޒުމަތީގައި ބާއްވަމުން ބުންޏެވެ. “އޭނާ ކިޔާރާއަށް ނަމެއް ދީފި.”
ޒިމާން މަޑުކޮށްލިއެވެ.
“ރިހި ރޫހެއް.”
އެ ބަސްތައް ވައިގެ ތެރޭގައި ހަރުލާފައި ހުއްޓެވެ. ޒިމާން މަޑުމަޑުން ބަގީޗާއާ ދިމާލަށް ބަލައިލިއެވެ. ކިޔާރާ ހުރީ ހަނދުވަރުގެ އަލީގައެވެ. ވައިރޯޅިތަކާއެކު އޭނާގެ އިސްތަށިގަނޑު ހޫރެމުން ދިޔައެވެ. އޭނާ ފެންނަނީ ވަރަށް ހިތްހަމަޖެހިފައި ހުރި މަންޒަރެވެ. ރީތިވެފައި، ދިރިހުރި ފަދައެވެ.
ކުއްލިއަކަށް އެ ބަހުގެ މާނަ ޒިމާންއަށް ވިސްނުނެވެ. އެތައް އަހަރެއް ވަންދެން އަނދިރީގައި އޮތް އޭނާގެ ހިތުގެ ބަޔަކަށް އަލިކަން ގެނެސްދިނީ އޭނާއެވެ. އޭނާގެ ސިކުނޑިއަށް އެ އިޙުސާސްތައް ފަހުމްވުމުގެ މާ ކުރިން، އޭނާގެ ރޫހު ވަނީ ކިޔާރާގެ ރޫހު ދެނެގަނެފައެވެ. އެ ބަސް ދަތުރު މުހިންމުވީ އެހެންވެގެންނެވެ. އޭނާ އެރޭ ބަހަށް އެރީ ދަރަނިވެރިއަކު ހޯދާށެވެ. އެކަމަކު އޭނާ އެނބުރި އައީ އެއަށްވުރެ މާ އަގުބޮޑު އެއްޗެއް ހިފައިގެންނެވެ. އޭނާ ހޯދަން އުޅުނުކަންވެސް ނޭނގޭ ފަދަ އަގުބޮޑު ޖަވާހިރަކާއެކުގައެވެ. ގެއްލެން ބޭނުންނުވާ މީހަކާއެކުގައެވެ. ލޯބިވެވެން ފެށިފައިވާ މީހަކާއެކުގައެވެ.
ދުރުގައި ހުރެގެން އިބްރާހީމްވެސް އެ ހަނދަށް ބަލަހައްޓައިގެން ހުރެ ވިސްނަމުން ދިޔައެވެ. މިހާރު އޭނާގެ މަސައްކަތަކީ ކިޔާރާގެ ކިބައިން ޒިމާން ސަލާމަތްކުރުމެއް ނޫނެވެ. އެއީ އެ ދެމީހުން އެކަކު އަނެކަކަށް މުހިންމުވާ މިންވަރު އެހެން މީހުންނަށް އެނގޭ ދުވަހަކުން، އެ ދެމީހުން އެންމެންގެ ކިބައިން ރައްކާތެރިކުރުމެވެ.
މި ވާހަކައިގެ ފެށުމަކީ ޒިމާން އެ ބަހަށް އެރުވި ދަރަންޏެއް ނޫނެވެ. އެއީ ހަމައެކަނި ފުރަތަމަ ފެށުމެވެ. ހަޤީޤީ ނުރައްކާ އޮތީ އޭގެ ފަހަތުގައި ފޮރުވިފައެވެ. މިހާރު ކިޔާރާގެ ހިތް ޒިމާންއަށް ހުޅުވެމުންދާއިރު، އަދި ޒިމާންގެ މުޅި ދުނިޔެ ކިޔާރާގެ ވަށައިގެން އެނބުރެން ފަށާފައިވާއިރު، އެހެން މީހަކު ވަނީ އެ ގުޅުމުގެ ނުފެންނަ ރޮދިފަށުގައި ހިފާ ދަމަން ފަށާފައެވެ. އެއީ އެމީހުން ވަކިކުރާކަށް ނޫނެވެ. އެމީހުންގެ ލޯބި ކެތްކުރާނީ ކިހާ ވަރަކަށްތޯ ބަލާށެވެ.
(ނުނިމޭ)
