ފީފާ ވޯލްޑް ކަޕް 2026 ގެ ކުއާޓާ ފައިނަލްގެ ފުރަތަމަ މެޗުގައި މޮރޮކޯ ބަލިކޮށް، ޖެހިޖެހިގެން ތިންވަނަ ފަހަރަށް ފްރާންސް މުބާރާތުގެ ސެމީ ފައިނަލަށް ދަތުރުކޮށްފިއެވެ.
ޖިލެޓް ސްޓޭޑިއަމްގައި ކުޅުނު މި ފޯރިގަދަ މެޗު ފްރާންސުން ކާމިޔާބުކުރީ 2-0 އިންނެވެ.
މެޗުގެ ކުރީކޮޅު ފްރާންސުން ނުރައްކާތެރި ގިނަ ހަމަލާތަކެއް އުފައްދާފައިވާއިރު، ލޫކަސް ޑީނޭ ފޮނުވާލި ފޮނުވާލި ބާރު ހަމަލާއެއް ގޯލުގެ ހުރަސް ދަނޑިއަށް އަމާޒުވެފައިވެއެވެ. މެޗު ކޮންޓްރޯލް ކުރަމުންދިޔަ ފްރާންސަށް މެޗުގެ 28 ވަނަ މިނެޓުގައި ވަނީ ޕެނަލްޓީއެއް ލިބިފައެވެ. ކީލިއަން އެމްބާޕޭއަށް ކުރި ފައުލަކާ ގުޅިގެން، ވީއޭއާރް ބެލުމަށްފަހު ފްރާންސަށް ދިން މި ޕެނަލްޓީ އެމްބާޕޭ ފޮނުވާލި ނަމަވެސް މޮރޮކޯގެ ކީޕަރު ޔާސީން ބޯނޯ ވަނީ ހުޝިޔާރުކަމާއެކު ދިފާއުކޮށްފައެވެ.
މޮރޮކޯއިން މެޗުގެ ކޮންޓްރޯލް ހޯދަން މަސައްކަތްކުރި ނަމަވެސް، ފްރާންސުން ދިޔައީ މޮރޮކޯގެ ގޯލަށް ނުރައްކާ ކުރަމުންނެވެ. އެގޮތުން އޮސްމާން ޑެމްބޭލޭ އާއި އެޑްރިއަން ރަބިއޮޓް ފޮނުވާލި ހަމަލާތައް ކީޕަރު ބޯނޯ ހުއްޓުވިއިރު، މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހިއެވެ.
މެޗުގެ ފުރަތަމަ ލަނޑު ޖަހައި ލީޑު ނެގީ ފްރާންސުންނެވެ. މިއީ މެޗުގެ 60 ވަނަ މިނެޓުގައި އޭރިއާގެ އަރިމަތިން ޑެސިރޭ ޑޫއީ ތަނަވަސްކޮށްދިން ފުރުސަތެއްގައި، އެމްބާޕޭ ވަރަށް ހިތްގައިމުކޮށް ކާމިޔާބުކޮށްދިން ލަނޑެކެވެ. މި ލަނޑާއެކު އޭނާ ވަނީ މިއަހަރު ވޯލްޑް ކަޕްގެ އެންމެ ގިނަ ގޯލު ޖެހި ކުޅުންތެރިޔާ ލިއޮނަލް މެސީއާ އަރާ ހަމަކޮށް، މުބާރާތުގައި 8 ގޯލު ހަމަކޮށްފައެވެ.
މޮރޮކޯއިން ނަތީޖާ ހަމަހަމަކުރުމަށް ކުރި މަސައްކަތްތަކަށް ހުރަސް އެޅުނީ މެޗުގެ 66 ވަނަ މިނެޓުގައި ފްރާންސުން ޖެހި ދެވަނަ ލަނޑުންނެވެ. މޮރޮކޯގެ ޑިފެންސަށް ހެދުނު ގޯހެއްގެ ފައިދާ ނަގައި، ޑެމްބޭލޭ ވަނީ ޑިފެންޑަރެއް ކައިރިން ނައްޓުވާލުމަށްފަހު ގޯލުގެ ތިރީ ކަނަށް ބޯޅަ އަމާޒުކޮށްފައެވެ. އޭގެ ކުޑައިރުކޮޅެއް ފަހުން މައިކަލް އޮލީސޭ ދިން ބޯޅައަކުން އެމްބާޕޭ އިތުރު ލަނޑެއް ޖަހަން ފުރުސަތު ލިބުނު ނަމަވެސް، ރެފްރީ ނިންމީ އެއީ އޮފްސައިޑް ބޯޅައެއް ކަމަށެވެ.
މެޗުގެ ފަހުބައިގައި މޮރޮކޯއިން ލަނޑެއް ޖެހޭތޯ ބޮޑެތި މަސައްކަތްތަކެއް ކުރި ނަމަވެސް، ފްރާންސްގެ ވަރުގަދަ ޑިފެންސްލައިން ފޫއަޅުވާލެވޭ ގޮތެއް ނުވިއެވެ. ފްރާންސުން މެޗު ނިންމާލީ މުބާރާތުގައި ޖެހިޖެހިގެން ހަވަނަ މޮޅު ހޯދައިގެންނެވެ.
މި ކާމިޔާބީއާއެކު “ލެސް ބްލޫސް” ސެމީ ފައިނަލުން ޖާގަ ކަށަވަރުކުރިއިރު، ސެމީގައި އެ ޓީމު ބައްދަލުކުރަން ޖެހޭނީ ސްޕެއިން ނުވަތަ ބެލްޖިއަމްއާއެވެ. އަނެއްކޮޅުން، މޮރޮކޯއަށް މުބާރާތުން ވަކިވާން ޖެހުނު ނަމަވެސް، އެ ޓީމުން ވަނީ 2022 ވަނަ އަހަރުގެ ސެމީ ފައިނަލަށްފަހު، މިފަހަރުގެ ކުއާޓާ ފައިނަލާ ހަމައަށް ދަތުރުކޮށް އެ ޤައުމަކީ ދުނިޔޭގެ ފުޓްބޯޅައިގައި ކުރިއަރަމުން އަންނަ ވަރުގަދަ ބާރެއްކަން އަނެއްކާވެސް ސާބިތުކޮށްދީފައެވެ.
