ވާރޭގެ ތެރެއިން އިވޭ އަޑުތައް
އިރު އޮއްސި، ދުނިޔެމަތި ބަދަލުވެގެން ދިޔައިރުވެސް، ކިޔާރާގެ ކާމޭޒުމަތީގައި އެ ސިޓީއުރަ އޮތެވެ. އޭނާއަށް އެ ސިޓީއުރަ ކައިރިން އެތައް ފަހަރަކު ހިނގާފައި ދެވިއްޖެއެވެ. ކޮންމެ ފަހަރަކުވެސް އެ ނުނެގުމަށް އޭނާގެ އަމިއްލަ ނަފުސަށް ވިސްނައިދެއެވެ. ނަމަވެސް، އެ ސިޓީއުރައިގެ ތެރޭގައި އޮތް ކަރުދާސްކޮޅުގައި ކޮންމެވެސް ކަހަލަ ދަމާބާރެއް ހުރި ކަހަލައެވެ. ކޮންމެ ފަހަރަކުވެސް އޭނާގެ ނަޒަރު އެއަށް ހުއްޓެއެވެ.
“ކަލޭ ނުބަލައި ދާންވީ.”
އޭގައި އޮތީ އެންމެ ތިން ބަހެވެ. ފަރުވާތެރިކަމާއެކު ލިޔެފައިވާ އެ ތިން ބަސް، އޭނާގެ ކުޑަކުޑަ އެޕާޓްމަންޓުގެ ކޮންމެ ކަނަކަށް ފެތުރިފައިވާ ކަހަލައެވެ.
ބަދިގޭގެ އަލީގައި، ލޯ ފުސްވަންދެން އޭނާ އެ ލިޔުންތަކަށް ބެލިއެވެ. އޭގައި އެއްވެސް އިނގިލީގެ ނިޝާނެއް، ފޮނުވި މީހާގެ އެޑްރެހެއް، ނުވަތަ އެއްވެސް ނިޝާނެއް ފެންނަން ހުރިތޯ ބެލިއެވެ. ނަމަވެސް، އެއްވެސް އެއްޗެއް ފެންނާކަށް ނެތެވެ. އޮތީ ހަމައެކަނި ހުދު ކަރުދާސްކޮޅަކާއި ކަޅު ދެއްޔެވެ. އިތުރު ކަމެއް ނެތެވެ.
ބޭރުގައި، މާލޭގެ އާންމު ދިރިއުޅުން އޭގެ ހަލުވި ދުވެލީގައި ކުރިއަށްދެއެވެ. ހަނި ގޯޅިތަކުގެ ތެރޭގައި ސައިކަލުތަކުގެ އަޑު ގުގުމަމުންދެއެވެ. ބެލްކަނީގެ ތިރިން ކޮންމެވެސް ދިމާއަކުން ކުދިން ހޭނަގާ އަޑު އިވެއެވެ. ބަނދަރުމަތިން ފެރީއެއްގެ އަޑު ދުރުދުރަށް ފެތުރިގެން ދިޔައެވެ. ކޮންމެ ކަމެއްވެސް ފެންނަނީ ވަރަށް އާދައިގެ ގޮތަކަށެވެ. ނަމަވެސް، ކިޔާރާއަށް މިހާރު އެއްވެސް ކަމެއް އާދައިގެ ކަމަކަށް ނުވެއެވެ.
އޭނާ ކަޅު ސައިތަށްޓެއް ހަދައިގެން ބެލްކަނީގެ ކައިރީގައި މަޑުކޮށްލިއެވެ. އިރުއޮއްސުނު ވަގުތުގެ ފިނި ރޯޅިތަކުން އޭނާގެ މޫނަށް ފިނިކަން ލިބެމުންދިޔައެވެ.
އާލާކޮށްފައިވާ މިންޓް ގަސްތައް ވައިގެ ތެރޭގައި މަޑުމަޑުން ހޫރެމުންދެއެވެ. އާންމުކޮށް އެ ގަސްތަކަށް ފެންދީ ބެލެހެއްޓުމަކީ އޭނާގެ ހިތަށް ހަމަޖެހުން ލިބޭ ކަމެކެވެ. ނަމަވެސް މިރޭ އެކަންކަމަށް ދެވޭނެ ސަމާލުކަމެއް އޭނާގެ ނެތެވެ. އޭނާގެ ޚިޔާލުތައް ދަތުރުކުރީ ހޮސްޕިޓަލަށެވެ. މީހާ ދިން ހަމަލާއަށެވެ. ޖޫނިއަރ ނަރުސް ކުއްޖާގެ މޫނުމަތިން ފެނުނު ބިރުވެރިކަމަށެވެ. ސްޓެއިންލަސް ސްޓީލް ޓްރޮލީ ވެއްޓުނު އަޑަށެވެ. އަދި އެންމެ ފަހުން.. ބަހުގެ ތެރޭގައި އިވުނު ޒިމާންގެ މަޑުމައިތިރި އަޑަށެވެ.
“ކިޔާރާ، ރަނގަޅަށް ނިދާލަން އުޅޭ.”
އޭނާ ފުން ނޭވާއެއް ދޫކޮށްލިއެވެ.
“މީ ހަމަ މޮޔަ ކަމެއް.” އޭނާ އަމިއްލަ ނަފުސާ ވާހަކަދެއްކިއެވެ.
“އޭނާއަކީ ޖަސްޓް އަނަދާ ޕޭޝަންޓް.”
އެއަށްވުރެ އިތުރު އެއްވެސް ކަމެއް ނެތެވެ.
އޭނާ އެ ސިޓީ ރީތިކޮށް ފަށްޖަހާލުމަށްފަހު، އޭނާގެ ނާސިންގް ޖާނަލްގެ ފަހަތު ބަޔަށް ލިއެވެ. މާދަމާ ފުލުހުންނަށް އެ ދައްކާނީއެވެ. އެއީ އެންމެ ބުއްދިވެރި ގޮތެވެ. އަދި އޭނާގެ މުޅި ދިރިއުޅުމަކީވެސް އަބަދުވެސް ބުއްދިވެރި ނިންމުންތަކެއްގެ މައްޗަށް ބިނާވެފައިވާ ދިރިއުޅުމެކެވެ.
*****
ޖެހިގެން އައި ދުވަހުގެ ހެނދުނު ފެށުނީ ވަރަށް އަލިގަދަ އަދި އާދަޔާ ޚިލާފަށް އަމާންކޮށެވެ. އަށްގަޑި ބައިވީއިރު، އެމަޖެންސީ ޑިޕާޓްމަންޓް އޭގެ އާންމު ހަލަބޮލިކަމުގެ ތެރެއަށް ވަދެއްޖެއެވެ.
ބާނައިގެން އައި މަހެއް ކޮށަން އުޅުމުގެ ތެރޭގައި އަތް ކަނޑައިގެން ދިޔަ ދުވަސްވީ މަސްވެރިއެއް، އޭނާގެ ފާރުގަނޑުގައި އަޅާފައިވާ ރޮދިތައް ނައްޓާލުމުން ޝުކުރުވެރި ހިނިތުންވުމެއް ދިނެވެ.
ކުޑަ އަންހެން ކުއްޖަކު، އޭނާގެ މަންމަގެ ފަރުވާ ނިމެންދެން އިންދާ ކުރެހި ކުރެހުމެއް ކިޔާރާއަށް ދައްކަން ބޭނުންވެގެން އުޅުނެވެ. ކުޑަ ވަގުތުކޮޅަކަށް ނަމަވެސް، ހޮސްޕިޓަލުގެ ތެރެއިން ފެންނަ މިފަދަ އޯގާތެރި މަންޒަރުތަކުގެ ސަބަބުން، ނޭނގޭ މީހަކު ފޮނުވި ސިޓީގެ މަތިން ކިޔާރާ ހަނދާން ނެތުނެވެ.
އެވަގުތު ސެކިއުރިޓީ އައެވެ. ސެކިއުރިޓީ ސުޕަވައިޒަރު ޑރ. މަހުމޫދާ މަޑުމަޑުން ވާހަކަދެއްކުމަށްފަހު، ނަރުހުން ތިބޭ ކައުންޓަރާ ދިމާއަށް ހިނގައިގަތެވެ.
“މިސް ކިޔާރާ؟”
އޭނާ ފައިލުން ނަޒަރު ވަކިކޮށްލާފައި ބަލައިލިއެވެ.
“ލައްބަ؟”
“އަޅުގަނޑުމެން ކިޔާރާއާ ކުޑަކޮށް ވާހަކަދައްކާލަން ބޭނުން.”
ވާހަކަދައްކަން ވަތް ކޮޓަރި ތެރެއިން ފެންނަނީ ވަރަށް ސީރިއަސް މާހައުލެކެވެ.
ވޭތުވެދިޔަ ހަފުތާގައި ދިމާވި ޑިޓެކްޓިވް ކުޑަދޮރު ކައިރީގައި ހުއްޓެވެ. އޭނާ ވަރަށް އަދަބުވެރިކަމާއެކު ސަލާމް ކުރިއެވެ.
“އަޅުގަނޑުމެންނަށް މައުލޫމާތު ލިބިފައިވާ ގޮތުގައި ކިޔާރާގެ އެޕާޓްމަންޓަށް ކޮންމެވެސް އެއްޗެއް ލިބިފައިވޭ.”
ކިޔާރާގެ ހިތް ތެޅިގަތެވެ.
“ތިޔަ ބޭފުޅުންނަށް މިހާރުވެސް އެނގިއްޖެތަ؟”
އޭނާ ބޯޖަހާލިއެވެ.
“އާންމުކޮށް މީހުން ނުވަންނަ ސާވިސް އެންޓްރަންސްއަކުން މީހަކު ވަން ތަން ފެނިގެން، ބިލްޑިންގ މެނޭޖަރު އަޅުގަނޑުމެންނަށް ގުޅީ.”
ކިޔާރާ އޭނާގެ ފޮތުގެ ތެރެއިން ފަށްޖަހާފައިވާ ކަރުދާސްކޮޅު ނަގައި ދިއްކޮށްލިއެވެ.
“އަޅުގަނޑު މިއަދު މީތި ހިފައިގެން އަންނަން އުޅުނީ.”
އެ ޑިޓެކްޓިވް އެ ލިޔުން ކިޔާލިއެވެ. އޭނާގެ މޫނުމަތިން އެއްވެސް އަސަރެއް ނުފެނެއެވެ.
“ކޮން އިރަކު މީތި ފެނުނީ؟”
“އެއް ރޭ ކުރިން.”
“ގެއަށް ދިޔަ މަގުމަތީގައި މީހަކު ފަހަތުން އައިހެން ހީވިތަ؟”
“އެހެންނެއް ހިއެއް ނުވޭ.”
“ހިއެއް ނުވޭތަ؟ ނޫނީ ޔަގީން ނުވަނީތަ؟”
އޭނާ ކުޑަކޮށް ޖެހިލުންވިއެވެ.
“ޔަގީނެއް ނޫން.”
ޑިޓެކްޓިވް ޝުކުރު އަދާކުރުމަށްފަހު، އެ ކަރުދާސްކޮޅު ހެއްކެއްގެ ގޮތުގައި ކަވަރަކަށް ލިއެވެ.
“އަޅުގަނޑުމެން މީތި ތަހުޤީޤު ކުރާނަން.”
ނުކުންނަން އުޅެފައި އޭނާ ދޮރުމަތީގައި މަޑުކޮށްލިއެވެ.
“އާދަޔާ ޚިލާފު އެއްވެސް ކަމެއް ފާހަގަވެއްޖެނަމަ، ވަގުތުން ގުޅާލައްވާ.”
އޭނާ ބޯޖަހާލިއެވެ.
“ލައްބަ، ގުޅާނަން.”
ނަމަވެސް އޭނާ ދިޔަ ފަހުންވެސް ކިޔާރާގެ ހިތުގައި ސުވާލެއް އުފެދުނެވެ.
އެމީހަކު ބޭނުންވީ އޭނާ ބިރުގަންނަވަން ކަމަށްވާނަމަ.. ހަމައެކަނި ސިޓީއެއް ފޮނުވީ ކީއްވެ ހެއްޔެވެ؟ ސީދާ އޭނާގެ ކުރިމައްޗަށް ނައީ ކީއްވެ ހެއްޔެވެ؟
*****
ރަށުގެ އެހެން ހިސާބެއްގައި، ކަނޑުގެ ރީތި މަންޒަރު ފެންނަ އުސް އިމާރާތެއްގެ ކުޑަދޮރުތަކުން އިރުގެ އަލި އެތެރެއަށް އެޅެމުންދިޔައެވެ. ޒިމާން ކުޑަދޮރު ކައިރީގައި މަޑުމަޑުން ހުއްޓެވެ. އެއް އަތް ހުރީ ކުޑަދޮރުގެ އޮނިގަނޑުގައި ޖައްސާލައިގެންނެވެ.
ބާރަށް ހަރަކާތްތެރިވާ ކޮންމެ ފަހަރަކު އޭނާގެ އަރިކަށީގައިވާ ފާރުގަނޑުން ތަދު އިޙުސާސް ކުރެވެއެވެ. ނަމަވެސް ދުވަހަކަށްވުރެ ދުވަހެއް އެ ތަދު ކުޑަވަމުންދެއެވެ.
އެންޒޯ ފައިލެއް ހިފައިގެން އެތެރެއަށް ވަނެވެ.
“ޑިޓެކްޓިވް އެ ސިޓީ ގެންގޮސްފި.”
ޒިމާން އެއްޗެކޭ ނުބުނެ މަޑުން ހުއްޓެވެ.
“އެމީހުން ދަނީ އޭނާގެ އެޕާޓްމަންޓް ކައިރި ބަލަހައްޓަމުން.”
“ރަނގަޅު.”
އެންޒޯ އިރުކޮޅަކު އޭނާއަށް ބަލަން ހުއްޓެވެ.
“ތިބޭފުޅާ ހީކުރައްވަނީ އެއީ އޭނާ ބިރުގަންނަވަން ފޮނުވި އެއްޗެއް ކަމަށްތަ؟”
“އަހަރެން ހީކުރަނީ އެއީ އޭނާ އިމްތިހާން ކުރަން ކުރި ކަމެއް ކަމަށް.”
“އިމްތިހާން ކުރަން؟”
ޒިމާން ކުޑަދޮރުން ނަޒަރު ވަކިކޮށްލާފައި އެނބުރިލިއެވެ.
“ކޮންމެވެސް މީހަކު ބޭނުންވަނީ އޭނާ ހާސްވެގެން އުޅޭތޯ ބަލަން.”
“އަދި އޭނާ ހާސްނުވެއްޖެއްޔާމު؟”
“އެހެން ކަމެއް ކުރަން އެމީހުން މަސައްކަތް ކުރާނެ.”
ކޮޓަރި ތެރެއަށް ހަމަހިމޭންކަން ވެރިވިއެވެ. ދުރުން ބަނދަރު މައްޗަށް ވާރޭ ވިލާތައް ޖަމާވަމުންދިޔައިރު، ކަނޑުގެ ކުލަ ދަގަނޑު ކުލައަކަށް ބަދަލުވަމުންދިޔައެވެ.
އިރުކޮޅެއް ވަންދެން އެކަކުވެސް ވާހަކައެއް ނުދައްކައެވެ.
އެންމެ ފަހުން ޒިމާން މަޑުމައިތިރިކަމާއެކު ބުންޏެވެ.
“މިކަންކަމުގެ ތެރެއަށް ވަންނާކަށް އޭނާ އަމިއްލައަކަށް ނޭދޭ.”
“އާދެ.”
“އޭގެ މާނައަކީ މިކަމުން ސަލާމަތްވުމުގެ ފުރުސަތު އޭނާއަށް ލިބެންޖެހޭނެއޭ.”
އެންޒޯ ބޯޖަހާލިއެވެ.
“އަޅުގަނޑު އެ ފުރުސަތު އޭނާއަށް ލިބޭނެކަން ޔަގީންކުރާނަން.”
*****
އެރޭ ކިޔާރާ ހޮސްޕިޓަލުން ނުކުތީ އާންމުކޮށް ނުކުންނަ ގަޑިއަށްވުރެ ލަހުންނެވެ. އުޑުމަތި ބަނަވެ، ތުނިކޮށް ވާރޭ ވެހެން ފަށައިފިއެވެ. އޭގެ ސަބަބުން މަގުތަކުން ރިހިކުލައިގެ ދިލައެއް ފެންނަ ކަހަލައެވެ. އޭނާގެ ކާޑިގަން ގަޔާ ކައިރިކޮށްލަމުން، ބަސް ހުއްޓިޔާ ދިމާއަށް ހިނގައިގަތެވެ.
މުޅި ރަށް އޮތީ އާދަޔާ ޚިލާފަށް ހަމަހިމޭންކޮށެވެ. ހީވަނީ މުޅި ދުނިޔެ ނޭވާ ހިފަހައްޓާލައިގެން އޮތްހެންނެވެ. މަގު ހުރަސްކުރާ ހިސާބަށް ދެވުނުތަނާ، ދުވަސްވީ މީހަކު އޭނާގެ އަތުގައި ހުރި ދެ ކޮތަޅު ފަޅައިގެން ގޮސް މަގުމައްޗަށް އެއްޗެހިތައް ބުރައިގެން އުޅޭ މަންޒަރު ފެނުނެވެ.
އެއްވެސް ވިސްނުމަކާ ނުލައި ކިޔާރާ އެދިމާއަށް އަވަސްވެގަތެވެ.
“އަޅުގަނޑު އެހީވެދީފާނަން.”
އެ މުސްކުޅި މީހާ ޝުކުރުވެރިކަމާއެކު ހިނިތުންވެލިއެވެ.
“ޝުކުރިއްޔާ ދަރިފުޅާ.”
ދެމީހުންވެގެން މަގުމައްޗަށް ބުރައިގެން ދިޔަ މޭވާތަކާއި ތަރުކާރީތައް ހޮވައި، ކައިރީގައި ހުރި ބެންޗަކާ ހަމައަށް އެ މީހާއަށް އެހީތެރިވެދިނެވެ.
“ތިއީ ވަރަށް އޯގާތެރި ހިތެއްގެ ވެރިއެއް.” އެ މީހާ ވަރަށް ލޯތްބާއެކު ބުންޏެވެ.
ކިޔާރާ ހިނިތުންވެލިއެވެ.
“އަޅުގަނޑު މިކުރީ ކޮންމެ މީހަކުވެސް ކުރަންޖެހޭނެ ކަމެއް.”
އެ މީހާ ފުން ނަޒަރަކުން އޭނާއަށް ބަލައިލިއެވެ.
“ނޫން.”
“ކޮންމެ ކޮންމެ މީހަކު މަޑެއް ނުކުރާނެ.”
އޭނާ މަޑުމަޑުން ހީނލިއެވެ.
“އަޅުގަނޑުގެ ވަޒީފާގެ ގޮތުން މީހަކަށް ދެރައެއް ލިބޭތަން ފެނުމުން އަޅާނުލާ ދިއުމަކީ ކުރެވޭނެ ކަމެއް ނޫން.”
އޭނާ ދާން އެނބުރިލި ވަގުތު، އެ މުސްކުޅި މީހާ އެންމެ ފަހު ވާހަކައެއް ބުންޏެވެ.
“އެ ސިފަ ދުވަހަކުވެސް ދޫކޮށްނުލާތި.”
ދެން ކިޔާރާ ބަސް ހުއްޓިޔާ ދިމާއަށް ހިނގައިގަތެވެ. މަގުގެ އަނެއް ފަރާތުން މީހަކު މި ހުރިހާ މަންޒަރެއް ބަލަން ހުރިކަމެއް އޭނާއަކަށް ނޭނގެއެވެ. އެ މީހާ ބަލަމުންދިޔައީ ޝައްކުގެ ނަޒަރަކުން ނޫނެވެ. ނުވަތަ ނަފުރަތާ އެކުގައެއްވެސް ނޫނެވެ. ނަމަވެސް ވަރަށް ފަރުވާތެރިކަމާއެކުގައެވެ. ސަބަބަކީ ބައެއް ފަހަރު ވަރުގަދަ ރޫހުތައް ފާހަގަވަނީ ނުރައްކާތެރި ވަގުތުތަކުގައެއް ނޫނެވެ. އެކަކުވެސް ބަލަން ނުހުންނާނެ ކަމަށް ހީކޮށް ކުރާ އާދައިގެ އޯގާތެރި ކަންތައްތަކުންނެވެ.
ފަހަރުގައި “ރިހި ރޫހެއް”ގެ އަސްލު މާނައަކީވެސް އެއީ ކަންނޭނގެއެވެ. އެއީ އަނދިރިކަމުގެ އަސަރު ނުފޯރާ މީހެއް ނޫނެވެ. ނަމަވެސް، އެއްވެސް މީހެއްގެ ތަޢުރީފަކަށް ނޭދި، އެ އަނދިރިކަމުގެ ތެރޭގައިވެސް އޯގާތެރިކަން ދަމަހައްޓާ މީހާއެވެ.
(ނުނިމޭ)
