– ނަމަވެސް މީގެ ކެމިކަލް މާއްދާތަކުން އިންސާނުންގެ ފުރާނަ ސަލާމަތްކުރެވިދާނެ
ގަސްގަހާގެހިން އުފައްދާ ބާރުގަދަ ކެމިކަލް މާއްދާތައް ލެބޯޓްރީގައި އުފެއްދުމަށްޓަކައި ސައިންސްވެރިން ފުރަތަމަ ފިޔަވަޅުތައް އަޅައިފިއެވެ.
‘ވުލްފްސްބޭން’ އަދި ‘ލާކްސްޕަރ’ ފަދަ މާތަކަކީ ވަރަށް މަދު މިންވަރަކުންވެސް ނާރުތަކަށް ވިހަވެ، މީހާ ވާގިނެތިކޮށްލުމުގެ ބާރު ލިބިފައިވާ ގަސްތަކެކެވެ. ނަމަވެސް، މި ގަސްތަކުގައި ހުންނަ ކެމިކަލް މާއްދާތަކަކީ ތަދު ކެނޑުވުމަށާއި، މެލޭރިއާ، ކެންސަރު އަދި ދަނޑުވެރިކަމަށް ގެއްލުންދޭ ސޫފި ނައްތާލުމަށް ޒަމާނުއްސުރެ ބޭނުންކުރަމުން އަންނަ މާއްދާތަކެކެވެ. ދިރާސާކުރާ ފަރާތްތަކުން މިހާރު ވަނީ މި ބާރުގަދަ މާއްދާތައް ލެބޯޓްރީގައި އުފެއްދުމުގެ ފުރަތަމަ މަރުހަލާތައް ކާމިޔާބުކަމާއެކު ނިންމާފައެވެ. މިއީ ގުދުރަތީ މާއްދާތަކުން އުފައްދާ ބޭސްތައް ތަރައްގީކުރުމަށް ހުޅުވިގެންދިޔަ މުހިންމު ދޮރެކެވެ.
މި މަސައްކަތަކީ މިޝިގަން ސްޓޭޓް ޔުނިވަރސިޓީ (އެމްއެސްޔޫ) އާއި ޗެކް އެކަޑަމީ އޮފް ސައިންސަސްގެ ސައިންސްވެރިން ގުޅިގެން ކުރިއަށްގެންދިޔަ ދިރާސާއެކެވެ. މި ދިރާސާގެ ހޯދުންތައް ‘މޮލިކިއުލަރ ޕްލާންޓް’ މަޖައްލާގައި ވަނީ ޝާއިއުކޮށްފައެވެ.
“ދުނިޔޭގެ އެކި ކަންކޮޅުތަކުގައި އެތައް ހާސް އަހަރެއް ވަންދެން ތަފާތު ބޭސްވެރިކަމުގެ ތެރޭގައި މި ގަސްތައް ބޭނުންކުރަމުން އައިސްފައިވޭ،” މި ދިރާސާގައި އިސްކޮށް ބައިވެރިވި އެސިސްޓަންޓް ޕްރޮފެސަރ ގަރެޓް މިލާ ވިދާޅުވިއެވެ. އޭނާ އިތުރަށް ހާމަކުރެއްވި ގޮތުގައި، މި މާއްދާތައް އުފައްދާނެ ގޮތް ދެނެގަނެވުމުން، އައު ބޭސްތައް ޓެސްޓުކުރުމަށް އައު މަގުތަކެއް ފަހިވެގެންދާނެއެވެ.
ގުދުރަތުގެ ކެމިކަލް އުފެއްދުންތައް ކޮޕީކުރުމުގެ އުނދަގޫތައް
ސައިންސްގެ ރޮނގުން އެތައް ކުރިއެރުންތަކެއް ލިބިފައިވީ ނަމަވެސް، ގަސްގަހާގެހިން އުފައްދާ ކޮމްޕްލެކްސް ކެމިކަލް މާއްދާތައް އަމިއްލައަށް އުފެއްދުމަކީ އަދިވެސް ބޮޑު ގޮންޖެހުމެކެވެ.
“ގަސްތަކަކީ ދުނިޔޭގައި ތިބި އެންމެ މޮޅު ކެމިސްޓުން. އެތަކެތި ބޭނުންކުރަނީ އެތައް މިލިޔަން އަހަރުތަކުގެ ތެރޭގައި އެތަކެތީގެ ދިފާއުގައި ތަރައްގީކޮށްފައިވާ މާއްދާތަކެއް،” ޕްރޮފެސަރ ބިޔޯން ހެމްބާގަރ ވިދާޅުވިއެވެ. އަދި އިންސާނުންގެ ދިރިއުޅުމުގައި ބޭނުންކުރާ ކެފޭއިން، ކެޕްސައިސިން (މިރުހުގައި ހުންނަ ކާނާ)، މެންތޯލް އަދި ވެނީލާ ފަދަ އެތައް އެއްޗަކީ ގަސްގަހާގެހިން ލިބޭ ނުވަތަ އޭގެ ކެމިކަލް އޮނިގަނޑަށް ބިނާކޮށް އުފައްދާފައިވާ ތަކެތިކަން ދިރާސާވެރިން ފާހަގަކުރެއެވެ.
ކުއްލި ބައްދަލުވުމަކުން ދިރާސާގެ މިސްރާބު ބަދަލުވުން
މި ދިރާސާ ކުރިއަށްދިޔަ ގޮތް ބަދަލުވެގެންދިޔައީ ބާސެލޯނާގައި ބޭއްވުނު ސައިންސް ކޮންފަރެންސެއްގެ ތެރެއިންނެވެ. އެތަނުން ހެމްބާގަރއަށް ބައްދަލުވީ ހަމަ މި ދާއިރާއިން ދިރާސާކުރަމުންދިޔަ ޗެކް އެކަޑަމީ އޮފް ސައިންސަސްގެ ޓީމާއެވެ. ދެ ޓީމުންވެސް މަސައްކަތް ކުރަމުންދިޔައީ އެއް ބާވަތެއްގެ ބާރުގަދަ ކެމިކަލްތަކެއް ދެނެގަތުމަށެވެ. އެހެންކަމުން، ވަކިވަކިން މަސައްކަތް ކުރުމުގެ ބަދަލުގައި ދެ ޓީމު ގުޅިގެން މަސައްކަތް ކުރަން ނިންމިއެވެ.
ޖީންތަކުން ކެމިކަލް އުފައްދާ ގޮތް ހާމަވުން
ދެ ޓީމު ގުޅިގެން ކުރި މަސައްކަތުން، ވުލްފްސްބޭން އަދި ލާކްސްޕަރ ގަހުން ‘ޑިޓަރޕެނޮއިޑް އެލްކަލޮއިޑްސް’ އުފައްދާ ބަޔޯކެމިކަލް މަރުހަލާތައް ދެނެގަތެވެ. މިއީ ވަރަށް ބާރުގަދަ ވިހައެއްގެ އިތުރުން ބޭސްވެރިކަމަށް އުންމީދީ މާއްދާއެކެވެ.
ގަސްތަކުން މި މާއްދާތައް އުފައްދަނީ ވަރަށް މަދު މިންވަރަކަށް އަދި ވަރަށް ލަސް ސްޕީޑެއްގައެވެ. އެހެންކަމުން، މީގެ ޖީންތަކާއި އެންޒައިމްތައް ދެނެގަތުމަކީ ބޮޑު މިންވަރަކަށް މި މާއްދާތައް އުފެއްދުމަށް ކޮންމެހެން ބޭނުންތެރި ކަމެކެވެ. މި މަރުހަލާ ދެނެގަނެވުމުން، އެ ޖީންތައް ‘ޔީސްޓް’ ފަދަ އެއްޗަކަށް ބަދަލުކޮށްގެން، ގިނަ އަދަދަކަށް ބޭނުންވާ ކެމިކަލް އުފެއްދުމުގެ ފުރުސަތު ލިބިގެންދެއެވެ.
ދުންފަތް ގަހުން އައު ކެމިކަލް މާއްދާއެއް އުފެއްދުން
ދިރާސާވެރިން ވަނީ ވުލްފްސްބޭން އަދި ލާކްސްޕަރ އިން ހޯދި ޖީންތައް ދުންފަތް ގަހަށް ބަދަލުކޮށް، އެ ގަސްތައް ބޭނުންކޮށްގެން ކެމިކަލް އުފައްދާފައެވެ. މި ތަހުލީލުތަކުން ދެއްކި ގޮތުގައި ހަ އެންޒައިމެއް ގުޅިގެން ‘އެޓިސީނިއަމް’ ކިޔާ މާއްދާއެއް އުފެއްދިއެވެ.
މި ހޯދުމުގެ ސަބަބުން، ގަސްގަހާގެހީގެ ގުދުރަތީ ބާރު ބޭނުންކޮށްގެން، ތިމާވެއްޓާ ރައްޓެހި އަދި ދެމެހެއްޓެނިވި ގޮތެއްގައި އައު ބޭސްތައް އުފެއްދުމުގެ ތަސައްވުރު ހަގީގަތަކަށް ވުމުގެ އުންމީދު ވަނީ އާވެފައެވެ.
