ސުވާލު
ދެމީހުންގެ މެދުގައި އުފެދިފައިވާ އެ ސުވާލަކީ ނާޒުކު، އެހެނަސް ނުރައްކާތެރި ކަމެއް ފަދަ އެއްޗެކެވެ. އެއީ އެއްފަހަރު ދޫކޮށްލެވިއްޖެނަމަ އަނބުރާ ނުގެނެވޭނެ ފަދަ ވާހަކައެކެވެ.
“މާލޭގައި ކިޔާރާގެ އާއިލާ އުޅޭތަ؟” ޒިމާން އަހާލިއެވެ. އޭނާގެ އަޑު މަޑެވެ. ސާބިތެވެ. ނަމަވެސް އެ ސުވާލުގައި އާދައިގެ ސުވާލަކަށްވުރެ ބޮޑު ބަރުދަނެއް ހުއްޓެވެ.
ކިޔާރާ މިކަމަކަށް އުންމީދެއް ނުކުރެއެވެ. ކުޑަ ހިނދުކޮޅަކަށް އޭނާ ހުއްޓުން އެރިއެވެ. ބޭރުފުށުން އެކަން ނޭނގުނު ކަމުގައި ވިޔަސް، އޭނާގެ ހިތުގެ ހިނގުން މަޑުޖެހިލި ކަހަލައެވެ. ސައިތަށީގައި ހިފަހައްޓާލެވިފައިވާ އޭނާގެ އިނގިލިތައް ކުޑަކޮށް ބާރުވެލިއެވެ.
އޭނާ ޒިމާނަށް ބަލާލިއެވެ. ދެން ނަޒަރު ވަކިކޮށްލިއެވެ. އަދި އަނެއްކާވެސް އޭނާއަށް ބަލާލިއެވެ.
“ނޫން.” އޭނާ ވަރަށް މަޑުމައިތިރިކަމާއެކު ބުންޏެވެ. އޭނާގެ އަޑުގައި ވަނީ ހަމަހިމޭންކަމެވެ. އެއީ އެ ތަނުގައި ތިބެގެން ދިން ޖަވާބަކަށްވުރެ ބޮޑަށް، ދުރު މާޒީއަކުން ދިން ޖަވާބެއް ފަދައެވެ. “އަހަރެންގެ އާއިލާ އުޅެނީ ރަށުގައި. ރަށުން ބޭރުގައި މަސައްކަތްކުރަން އުޅޭ ހަމައެކަނި މީހަކީ އަހަރެން.”
އޭނާގެ އަޑަކުން އަމިއްލަ ނަފުސަށް ހަމްދަރުދީވާ ގޮތެއް ނުފެނެއެވެ. އަދި އެއީ މާ ބޮޑު ކަމަކަށް ހަދައިގެން ދެއްކި ވާހަކައެއްވެސް ނޫނެވެ. އެއީ ހަމަ ހަޤީޤަތެވެ. ނަމަވެސް އެ ވާހަކައިގެ އަސަރު ފިލައިގެން ނުދެއެވެ.
ޒިމާން އޭނާއަށް ވަރަށް ފަރުވާތެރިކަމާއެކު ބަލަން ހުއްޓެވެ. ހަމައެކަނި އޭނާ ބުނި ބަސްތަކަކަށް ނޫނެވެ. އޭނާގެ ލޮލުން ފެންނަން ހުރި އަސަރުތަކަށާއި، ވާހަކަ ދައްކާ ނިންމާލުމަށްފަހު އަމިއްލަ ނަފުސު ހަމައަކަށް އަޅުވާލި ގޮތަށެވެ.
“ކިޔާރާ ގެއްލިއްޖެނަމަ، އެކަން ފާހަގަކުރާނެ ބަޔަކު ތިބޭނެތަ؟”
މި ސުވާލު އައީ ކުއްލިއަކަށެވެ. އެއީ އެ ވަގުތުގެ އޮމާންކަން މުގުރާލި ތޫނު ޚަންޖަރެއް ފަދަ ސުވާލެކެވެ.
ކިޔާރާގެ ލޯ ބޮޑުވިއެވެ. އޭނާ ކުއްލިއަކަށް ޒިމާނާ ދިމާލަށް ބަލާލިއެވެ.
“ކީކޭ!؟” އޭނާ ހައިރާންކަމާއެކު ބުންޏެވެ. “ކީއްވެ ތިކަހަލަ ސުވާލެއް ތިކުރީ؟”
އޭނާގެ މޫނުމަތިން ކަންބޮޑުވުން ފެންނަން ހުއްޓެވެ. އެއީ އޮޅުންބޮޅުމާއި، ބިރުވެރިކަމުގެ ކުލަވަރެކެވެ. ނަމަވެސް ޒިމާން ގޮނޑީގައި ކުޑަކޮށް ލެނގިލަމުން، މޫނުމައްޗަށް ލާނެތް ހިނިތުންވުމެއް ވެރިކުރުވިއެވެ. އެއާއެކު، މަސްރަހު ބަދަލުވިއެވެ. ނުތަނަވަސްކަން ފިލައިދިޔައެވެ. އެ ނުރައްކާތެރިކަން ބަދަލުވީ ސަމާސާ މިޒާޖަކަށެވެ. ކިޔާރާ އެސްފިޔަ ޖަހާލިއެވެ. ދެން ލޯ ހަނިކޮށްލިއެވެ.
“ތިއުޅެނީ އަހަރެންނާ ސަމާސާކުރަން ދޯ.” އޭނާ ބުންޏެވެ. އޭނާގެ އަޑު މިހާރު މަޑެވެ. ނަމަވެސް ވީގޮތް ވިސްނުމުން އޭނާގެ ކޯތާފަތް ވަނީ ކުޑަކޮށް ރަތްވެފައެވެ.
ޒިމާން އެކަމަކަށް އިންކާރެއް ނުކުރެއެވެ. އޭނާ ހަމައެކަނި ބަލަން އިނީއެވެ. އެ ފުން، ކިޔައިގަންނަން އުނދަގޫ ނަޒަރުންނެވެ.
ޖެހިލި މަޑު ރޯޅިއާއެކު، ސައިތަށިން ދުވާ ވަހާއި، ކަނޑުން އަންނަ ލޮނުވަސް އެކުވެގެން ދިޔައެވެ. ދުރުން އިވޭ ރާޅުޖަހާ އަޑަކީ ހަމަހިމޭންކަމުގެ ތެރޭގައި އިވޭ ހިތުގެ ވިންދެއް ފަދަ އެއްޗެކެވެ.
“މިސް ކިޔާރާ.” ކުޑަ ހިނދުކޮޅަކަށްފަހު އޭނާ ބުންޏެވެ. އޭނާގެ އަޑުގެ ރާގު ބަދަލުވިއެވެ. ވަރަށް ކުޑަކޮށް، އެހެނަސް ފާހަގަކުރެވޭ ވަރަށެވެ. މިހާރު އެއީ ސީރިއަސް ރާގަކެވެ.
ކިޔާރާ އަނެއްކާވެސް އޭނާއަށް ބަލާލީ ޝައްކާއި ވަހުމުގެ ނަޒަރަކުންނެވެ. “އާނ؟”
“އަހަރެންނާއެކު ހަފުލާއަކަށް ދާން ބޭނުންތަ؟”
ބަސްތައް ސާދާއެވެ. ނަމަވެސް އެ ބަސްތަކުގެ ނަތީޖާ ބޮޑެވެ. ކިޔާރާ ހައިރާންވިއެވެ.
“އަހަރެން.. އަހަރެން..” އޭނާއަށް ބުނާނެ އެއްޗެއް ނޭނގުނެވެ. “އަހަރެން އާންމުކޮށް ނުދަން.. އަހަރެން ނުދަންނަ މީހުންނާއެކު އެއްވެސް ތަނަކަށް.”
އޭނާގެ އަޑު މަޑުވެލިއެވެ. އޭނާ ދެއްކީ ތެދު ވާހަކައެވެ. އޭނާ އުޅެނީ ވަރަށް އާދައިގެ، ހަމަހިމޭން ދިރިއުޅުމެކެވެ. ރޭވިފައިވާ، ރައްކާތެރި ދިރިއުޅުމެކެވެ. މަސައްކަތް، ގެ، އަދި އާއިލާއަށް ކުރާ ފޯނު ކޯލުތަކެވެ. އޭގެ އިތުރު އެއްވެސް ކަމެއް ނެތެވެ. އޮޅުންބޮޅުމެއް ނެތެވެ. މިފަދަ ކަމެއް ދުވަހަކުވެސް ނުވެއެވެ.
ޒިމާން އޭނާގެ ބޯ ކުޑަކޮށް އަރިކޮށްލައިގެން، ކިޔާރާއަށް ބަލަން އިނީ އޭނާ ދެނެގަންނަން މަސައްކަތްކުރާ ފަދަ ގޮތަކަށެވެ.
“އެހެންވީމާ، އެކަކު އަނެކަކު ދަސްކުރަންވީނު.” އޭނާ ބުންޏެވެ.
އެ ޖަވާބުގެ ސާދާކަމުން ކިޔާރާގެ ހިތުގެ ތެޅުން އަވަސްވެލިއެވެ. ޒިމާން ކުޑަކޮށް ކުރިއަށް ޖެހިލިއެވެ. އޭނާގެ މަޤުސަދަކީ ކިޔާރާއަށް އުނދަގޫ ކުރުމެއް ނޫނެވެ. ނަމަވެސް ދެމީހުންގެ މެދުގައިވާ ދުރުމިން ކުޑަކޮށްލުމެވެ.
“އަހަރެންނާ ބެހޭގޮތުން ކިޔާރާ ބޭނުންވަނީ ކޮން ކަމެއް އެނގެން؟”
ކިޔާރާ އޭނާއަށް ބަލަން ހުއްޓެވެ. އަހަން ބޭނުންވާ ސަތޭކަ ސުވާލު ހުއްޓެވެ. ތިއީ އަސްލު ކާކު ހެއްޔެވެ؟ ތިފަދަ ދިރިއުޅުމެއް ތިއުޅެނީ ކީއްވެ ހެއްޔެވެ؟ މީހުން ކަލޭއާ އެގޮތަށް ވާހަކަދައްކަނީ ކީއްވެ ހެއްޔެވެ؟ އަދި އަހަރެންނަށް ތިގޮތަށް ބަލަނީ ކީއްވެ ހެއްޔެވެ؟
ނަމަވެސް އޭނާގެ ދުލުން ނުކުތީ އެއިން އެއްވެސް ސުވާލެއް ނޫނެވެ.
“ކީއްވެ އަހަރެން؟” އޭނާ އެންމެ ފަހުން އަހާލިއެވެ. އޭނާގެ އަޑު މަޑެވެ. ނަމަވެސް ސާބިތެވެ.
އެ ސުވާލު ދެމީހުންގެ ދެމެދުގައި ގުގުމާލިއެވެ. އެއީ ތެދުވެރި ސުވާލެކެވެ. ދެމީހުން ބައްދަލުވި ފަހުން ފުރަތަމަ ފަހަރަށް ކިޔާރާގެ ކިބައިން ޖެހިލުންވުމެއް ނުފެނެއެވެ.
ޒިމާންގެ މޫނުމަތީގެ ކުލަވަރު ބަދަލުވިއެވެ. ބޮޑު ބަދަލެއް ނޫނެވެ. ނަމަވެސް އެއީ ފާހަގަކުރެވޭ ބަދަލެކެވެ. އޭނާގެ ލޮލުން ޝައުޤުވެރިކަން ފެންނަން ހުއްޓެވެ. އޭނާ ގޮނޑީގައި ރަނގަޅަށް އިށީނދެލިއެވެ. ދެން، ވަރަށް މަޑުމަޑުން އޭނާއާ ގާތަށް ޖެހިލިއެވެ. އަތްލާ ހިސާބަކަށް ނޫނެވެ. ނަމަވެސް އޭނާގެ ހާޒިރުކަން ކިޔާރާއަށް އިޙުސާސްވާވަރަށެވެ. އެ ދެމެދުގައިވާ ވައިގެ ތެރޭގައިވެސް ތަފާތު އަސަރެއް ހުއްޓެވެ.
“ސަބަބަކީ، މިސް ކިޔާރާ..” އޭނާ ވާހަކަ ދައްކަން ފެށިއެވެ. އޭނާގެ އަޑު ކުރިއަށްވުރެ މަޑުވެފައި، ބާރުގަދައެވެ.
އޭނާ ހުއްޓާލިއެވެ. ކިޔާރާގެ ނޭވާ ހިފަހައްޓާލަން މަޖުބޫރުވާ ފަދަ ވަގުތުކޮޅަކަށެވެ. ދެން ބުންޏެވެ. “އަހަރެންގެ ހިތުން ކިޔާރާގެ ޚިޔާލުތައް ފިލައިގެން ނުދާތީ.”
ދުނިޔެ ހުއްޓުނު ކަހަލައެވެ. ކަނޑުގެ އަޑެވެ. ގަސްގަހާގެހީގެ އަޑެވެ. ސައިތަށީގެ ވަހެވެ. ހުރިހާ އަޑެއް ފަނޑުވެގެން ދިޔައެވެ.
ކިޔާރާގެ މޭގައި ރިއްސާލި ކަހަލައެވެ. ސައިތަށި ކައިރީގައި އޮތް އޭނާގެ އިނގިލިތައް ބާރުކޮށްލީ އަމިއްލަ ނަފުސު ހަމައަކަށް އަޅުވާލުމަށެވެ. އޭނާ ނަޒަރު ވަކި ނުކުރެއެވެ. ވަކި ކުރެވޭކަށްވެސް ނެތެވެ. ޒިމާންގެ ބެލުމުގައި ހުރި ސާބިތުކަމެއްގެ ސަބަބުން އޭނާ ހުރީ ބަނދެވިފައެވެ.
“އަހަރެން އަދި ޒިމާން އެނގެނީއެއްވެސް ނޫން.” އޭނާ ވަރަށް މަޑުން ބުންޏެވެ.
އެއީ އިންކާރުކުރުމެއް ނޫނެވެ. އަދި އެއްބަސްވުމެއްވެސް ނޫނެވެ. އެއީ ހަމައެކަނި އޭނާގެ ހިތުގައި އުފެދުނު ތެދުވެރި އޮޅުންބޮޅުމެކެވެ.
ޒިމާންގެ ތުންފަތަށް ކުޑަ ހިނިތުންވުމެއް ވެރިވިއެވެ. “އަހަރެންނަށް އެނގެންޖެހޭ މިންވަރަށް އެނގޭ.” އޭނާ ބުންޏެވެ.
“އެއީ ކޮން އެއްޗެއް؟” ކިޔާރާ އަހާލިއެވެ. އޭނާގެ އަޑުގައި މިފަހަރު ހުރީ ގޮންޖަހާލުމުގެ އަސަރެކެވެ.
ޒިމާން ވަރަށް ފަރުވާތެރިކަމާއެކު ވިސްނާލުމަށްފަހު ބުންޏެވެ. “އަހަރެންނަށް އެނގޭ ކިޔާރާއަކީ އެހެން މީހުންނާ ތަފާތު މީހެއްކަން. ކިޔާރާ މީހުންގެ ހިތް އަތުލާކަށް މަސައްކަތެއް ނުކުރޭ. ދެއްކުންތެރިކަމެއް ނެތް. އުނދަގޫވާ ތަންތަނުގައި މަޑެއް ނުކުރޭ. އެކަމަކުވެސް..” އޭނާގެ ނަޒަރު ފުންވިއެވެ. “ކިޔާރާ ތި އިނީ މަޑުކޮށްގެން.”
ކިޔާރާގެ ހިތަށް ބަދަލެއް އައިކަން އޭނާއަށް އިޙުސާސްވިއެވެ. ސަބަބަކީ ޒިމާން އެ ބުނީ ތެދެކެވެ. އޭނާ އެ އިނީ މަޑުކޮށްގެންނެވެ. ނުދަންނަ މާހައުލެއްގައި، ބީރައްޓެހި ނުތަނަވަސްކަމެއްގެ ތެރޭގައިވެސް، އޭނާ އިނީ ޒިމާންގެ ގާތުގައެވެ.
“އަހަރެން މަޑުކުރީ އެއީ އަދަބުވެރިކަމަކަށްވާތީ.” އޭނާ އަވަސްއަވަހަށް ބުންޏެވެ.
ޒިމާން މަޑުމަޑުން ހީނލިއެވެ. “ނޫން.” އޭނާ ބުންޏެވެ. “ކިޔާރާ ތި މަޑުކުރީ ކިޔާރާގެ ހިތުގައި އުފެދުނު ޝައުޤުވެރިކަމެއްގެ ބޮޑުކަމުން.”
ކިޔާރާގެ އަނގަ ކުޑަކޮށް ހުޅުވުނެވެ. ނަމަވެސް ބުނާނެ އެއްޗެއް ދުލަކަށް ނައެވެ. ސަބަބަކީ، ހިތުގެ އަޑިން އޭނާއަށްވެސް އެނގެއެވެ. ޒިމާން އެ ބުނީ ކަނޑައެޅިގެން ތެދެކެވެ.
އެއަށްފަހު އައި ހަމަހިމޭންކަމަކީ އުނދަގޫ ހަމަހިމޭންކަމެއް ނޫނެވެ. އެއީ ވަރަށް ބަރު ހަމަހިމޭންކަމެކެވެ. ދެމީހުންކުރެ އެކަކަށްވެސް އަދި ރަނގަޅަށް ފަހުމްނުވާ ފަދަ އިޙުސާސްތަކަކުން ފުރިފައިވާ ވަގުތުކޮޅެކެވެ.
ވައިރޯޅި އަނެއްކާވެސް ބާރުވެލިއެވެ. ކިޔާރާގެ އިސްތަށިގަނޑުން ބައެއް އޭނާގެ މޫނުމައްޗަށް އެޅުނެވެ. އޭނާ އަމިއްލަ އިޚްތިޔާރުން ބޭރުގައި، އެ އިސްތަށިތައް ކަންފަތްދަށަށް ލައްވާލިއެވެ.
ޒިމާން އެ ކުދިކުދި ކަންތައްތަކަށް ވަރަށް ފަރުވާތެރިކަމާއެކު ބަލަން އިނެވެ. ކިޔާރާގެ އިނގިލިތައް ހަރަކާތްކުރި ގޮތާއި، އޭނާގެ ނޭވާލުމަށް އައި ބަދަލުތަކެވެ.
“ކިޔާރާ ތި ވިސްނަނީ މާ ބޮޑަށް.” އޭނާ މަޑުމަޑުން ބުންޏެވެ.
ކިޔާރާ ފުން ނޭވާއެއް ދޫކޮށްލިއެވެ. “ވިސްނަން ޖެހޭނެ އެއްނު.” އޭނާ ޖަވާބު ދިނެވެ. “ޒިމާންއަކީ ކަންތައްތައް ފަސޭހަކޮށްދޭ މީހެއް ނޫން.”
“ފަސޭހަ ކަންތައްތަކަކީ މާ ބޮޑު އޮއްޓަރެއް ހުންނަ ކަންތައްތަކެއް ނޫން.” ޒިމާން ބުންޏެވެ.
ކިޔާރާ އަނެއްކާވެސް އޭނާއަށް ބަލާލިއެވެ. ފުރަތަމަ ފަހަރަށް އޭނާގެ ތުންފަތުން ހަޤީޤީ ހިނިތުންވުމެއް ފެނުނެވެ. ވަރަށް ކުޑަ، ނަމަވެސް ތެދުވެރި ހިނިތުންވުމެކެވެ.
ފަހަތުން ފާތިމާގެ ފިޔަވަޅުތަކުގެ އަޑު އިވުނެވެ. ފަހަރެއްގައި އެމީހުންނަށް ވަގުތު ދިނުމަށްޓަކައި އޭނާ ގޭތެރޭގައި މަޑުކޮށްލީ ކަމަށްވެދާނެއެވެ. ބަގީޗާއިން ބޭރުގެ ދުނިޔެ މިހާރު ވަނީ ވަރަށް ދުރުގައެވެ. ހީވަނީ މި ވަގުތުކޮޅަކީ މުޅިން ވަކި، މިނިވަން ވަގުތުކޮޅެއްހެންނެވެ.
“އެ ހަފުލާގެ ވާހަކަ ކިޔައިދީ.” ކިޔާރާ އެންމެ ފަހުން ބުންޏެވެ.
ޒިމާންގެ މޫނުމަތިން ހިތްހަމަޖެހުމުގެ ކުލަވަރު ފެނުނެވެ. “އެއީ އަމިއްލަ ބައްދަލުވުމެއް.” އޭނާ ބުންޏެވެ. “މާ ގިނަ މީހުންނެއް ނޫޅޭނެ. މަދު ބަޔަކު އުޅޭނީ.”
“މަދު ބަޔަކު އުޅުނަސް، އެކަން އަހަރެންނަށް ފަސޭހައެއް ނުވާނެ.” ކިޔާރާ ބުންޏެވެ.
ޒިމާން ހިނިތުންވެލިއެވެ. “ކިޔާރާ ހުންނާނީ އަހަރެންނާއެކު.” އޭނާ ބުންޏެވެ.
އޭނާ އެ ބުނި ގޮތަކީ ހުށަހެޅުމެއް ނޫނެވެ. އަދި އާދޭހެއްވެސް ނޫނެވެ. އެއީ ނިމިފައިވާ، ގޮތް ނިންމާފައިވާ ކަމެކެވެ. އަދި އޭގެ ސަބަބުން ކިޔާރާއަށް އުނދަގުލެއް ނުވިއެވެ. ހަޤީޤަތުގައި އެކަން ވާންޖެހޭނީ އުނދަގުލަކަށެވެ. އެކަމަކު އޭނާއަށް އިޙުސާސްވީ ތަފާތު ގޮތަކަށެވެ.
ކިޔާރާ ކުޑަ ވަގުތުކޮޅަކަށް ކަނޑާ ދިމާލަށް ބަލާލިއެވެ. އިރުގެ ދޯދިތައް ރާޅުތަކުގެ މައްޗަށް އެޅިފައިވާ ރީތި މަންޒަރެވެ. އޭނާގެ ދިރިއުޅުމަކީ އަބަދުވެސް ރައްކާތެރި، އެނގިފައިވާ ދިރިއުޅުމެކެވެ. ނަމަވެސް މިތަނުގައި އިށީނދެގެން އިންއިރު، ދެން ވާނެ ގޮތެއް އޭނާއަކަށް ނޭނގެއެވެ.
“ހަމައެކަނި މިފަހަރު.” އޭނާ މަޑުމަޑުން ބުންޏެވެ.
ޒިމާންގެ ނަޒަރު އޭނާއަށް ހުއްޓުނެވެ. ކިޔާރާ އޭނާއަށް ބަލާލިއެވެ. “އަހަރެން ދާނަން. ހަމައެކަނި މިފަހަރު.”
ޒިމާންގެ ތުންފަތަށް ވެރިވީ ކުޑަ، އެހެނަސް ފުން ހިނިތުންވުމެކެވެ. “ރަނގަޅު.” އޭނާ ބުންޏެވެ.
އަދި އެ ވަގުތުކޮޅު.. ހަމައެކަނި އެ ހިނދުކޮޅު.. ކިޔާރާއަށް އިޙުސާސްވީ އޭނާއަށް ނޭނގޭ، ނުރައްކާތެރި، އެހެނަސް ދުރަށް ދާން ބޭނުންނުވާ ފަދަ ކަމެއްގެ ތެރެއަށް ފިޔަވަޅު އެޅުނު ކަމެވެ.
(ނުނިމޭ)
