ހުވަފެން

އޭނާ ހުވަފެނުގައި ހުރީ މީހެއްގެ ގާތުގައެވެ. އެމީހަކު އޭނާއަށް ބަލަނީ އޭނާގެ ހަށިގަނޑުގެ ވަށައިގެންވާ ބައްޓަމަކަށް ނޫނެވެ. އެހެން އަންހެނަކާ އޭނާ އަޅާކިޔުމެއް ނެތެވެ. އަދި އޭނާ ހުރި ތަނުގައި ހުރުމުން އެކަމަށް މަޢާފަށް އެދެންޖެހޭ ފަދަ އިޙުސާސެއް އޭނާއަކަށް ނުކުރުވައެވެ. އަދި ކޮންމެވެސް ސަބަބަކާ ހުރެ، އެ ހުވަފެނުގައި ފެންނަނީ ޒިމާންއެވެ.

ފުރަތަމަ އޭނާއަށް ޒިމާންގެ މޫނު ސާފެއް ނުވެއެވެ. ފެންނަނީ ހަމައެކަނި ރިހިކުލައިގެ ހަނދުވަރުގެ ދަށުގައި ހުރި އޭނާގެ ހިޔަންޏެވެ. އޭނާގެ ފަހަތުގައި އޮތީ ނިމުމެއް ނެތް ކަނޑެވެ. ކަނޑުގެ އަނދިރިކަމުގެ ތެރެއިން ވަޔާއެކު އަންނަނީ މަޑުމައިތިރި ސިއްރުތަކެކެވެ.

ޒިމާން އަތް ދިއްކޮށްލިއެވެ. ކިޔާރާ ފަސްޖެހުނެވެ. ހުވަފެނުގައިވެސް އޭނާ ހުރީ ބިރުންނެވެ. އޭނާގެ އަތުގައި ހިފައިފިނަމަ ވެދާނެ ގޮތަކާ މެދުގައެވެ. ނުވަތަ އަތުގައި ނުހިފައިފިނަމަ ވެދާނެ ގޮތަކާ މެދުގައެވެ.

ދެން އޭނާއަށް އިވުނީ ޒިމާންގެ އަޑެވެ. ބަރު، އެހެނަސް އަހުލުވެރި އަޑެކެވެ. ބަހުން ފެށިގެން ހޮސްޕިޓަލާ ހަމައަށް، އަދި ބަގީޗާއިން ފެށިގެން އޭނާގެ ޚިޔާލުތަކުގެ އެންމެ އެކަހެރި ކަންކޮޅުތަކާ ހަމައަށް އޭނާގެ ފަހަތުން އައި އެ އަޑެވެ. “ބިރުނުގަނޭ، ކިޔާރާ.”

އޭނާގެ ހިތް ތެޅިލިއެވެ. އޭނާ ތިރިއަށް ބަލާލިއެވެ. އެ ދެމީހުންގެ ދެމެދުގައި ކޮންމެވެސް އެއްޗެއް ވިދަމުންދާ ކަހަލައެވެ. ފަށެކެވެ. ނިކަން ތުނި، ރިހިކުލައިގެ ފަށެކެވެ. ގާތްގަނޑަކަށް ލޮލަށް ނުފެންނަހާ ފަށެކެވެ. އެ ފަށް އޭނާގެ ހިތުގެ ފުންމިނުން ފެށިގެން ޒިމާންއާ ހަމައަށް ދެމިފައިވެއެވެ. އެއީ ހަނދުވަރުގެ އަލި ފަދައިން ނާޒުކު، ނަމަވެސް ހީވެސް ނުކުރެވޭހާ ވަރުގަދަ ފަށެކެވެ.

ކިޔާރާ ހައިރާންކަމާއެކު އެއަށް ބަލަހައްޓައިގެން ހުއްޓެވެ. އެއީ އޭނާގެ ގައިގައި އައްސާފައިވާ އެއްޗެއް ނޫނެވެ. އޭނާ ދަމަމުންދާ އެއްޗެއްވެސް ނޫނެވެ. އެއްވެސް ތަނަކަށް ދާން މަޖުބޫރުކުރާ އެއްޗެއްވެސް ނޫނެވެ. އެއީ ހަމައެކަނި އެތަނުގައި ވުޖޫދުގައިވާ އެއްޗެކެވެ. ދެމީހުންކުރެ އެކަކުވެސް އެދުމެއް ނެތި، އުފެދިފައިވާ ހަމަހިމޭން ގުޅުމެކެވެ.

އޭނާ އަތް އުފުލާލިއެވެ. އެ ރިހި ފަށް މާ ބޮޑަށް އަލިވިއެވެ. އަދި އޭނާގެ އިނގިލިތައް ޒިމާންގެ އިނގިލިތަކުގައި ޖެހުމާއެކު މުޅި ހުވަފެނަށް ދިރުން ލިބުނު ކަހަލައެވެ. ކަނޑު ހިމޭންވިއެވެ. ކަނޑުގެ ލޮނުގަނޑުމައްޗަށް ހަނދުވަރުގެ އަލި ފެތުރިގެން ދިޔައެވެ. އަދި އެ ބުނެދޭން ނޭނގޭ ވަގުތުކޮޅުގައި، ކިޔާރާއަށް ޒިމާންގެ ހިތުގެ ތެޅުން އިވޭފަދަ އިޙުސާސެއް ކުރެވުނެވެ. އޭނާގެ ކައިރިއަކުން ނޫނެވެ. އަމިއްލަ ހަށިގަނޑުގެ ތެރެއިންނެވެ.

ކުއްލިއަކަށް އޭނާއަށް ހޭލެވުނެވެ. އަނދިރިކަމުގެ ތެރެއަށް އޭނާގެ ލޯ ހުޅުވުނެވެ. ކުޑަ ވަގުތުކޮޅަކަށް އޭނާ އެއްވެސް ހަރަކާތެއް ނުކޮށް އޮތެވެ. އޭނާގެ ކުޑަ ކޮޓަރީގެ ސީލިންގަށް ބަލަހައްޓައިގެން އޮތްއިރު، އޭނާގެ ހިތް ދިޔައީ ބާރަށް ތެޅެމުންނެވެ. ނޭވާ ހުރީ އަވަސްވެފައެވެ. ކޮޓަރި އޮތީ އޭނާ ދިޔައިރުވެސް އޮތް ގޮތަށެވެ. ދޮރުފޮތިތައް ހުރީ އެއްބައި ކަހާލެވިފައެވެ. ސިޓީގެ ފަނޑު އަލި ކުޑަދޮރުން އެތެރެއަށް އެޅިފައި ހުއްޓެވެ. އޭނާގެ ފޯނު އޮތީ އެނދު ކައިރީގައި ހުރި މޭޒުމަތީގައެވެ. ހުރިހާ ކަމެއްވެސް ހުރީ އާދައިގެ ގޮތަކަށެވެ. ހުރިހާ ކަމަކީވެސް ހަޤީޤަތެވެ. ނަމަވެސް އޭނާގެ ހިތުގައި އަދިވެސް އެ ހުވަފެނުގެ އަސަރު ހުއްޓެވެ.

ކިޔާރާ މަޑުމަޑުން އަރިަކަށް އެނބުރި، ރަޖާގަނޑު ގަޔާ ކައިރިކޮށްލިއެވެ. “އަހަންނަށް މިވަނީ ކީއްބާ؟” އޭނާ ސިއްރުސިއްރުން ބުންޏެވެ. އެއްވެސް ޖަވާބެއް ނުލިބުނެވެ. އިވެނީ ހަމައެކަނި ދުރުން އިވޭ ސިޓީގެ ހަލަބޮލިކަމުގެ އަޑެވެ.

އޭނާ އަލުން ލޯ މަރާލިއެވެ. މިފަހަރު އޭނާ މަސައްކަތްކުރީ ޒިމާންއާމެދު ނުވިސްނޭތޯއެވެ. އެކަމުގައި އޭނާ ނާކާމިޔާބުވިއެވެ. ވަގުތުން ޒިމާންގެ މޫނު ސިފަވިއެވެ. އޭނާގެ ކަޅު ކުލައިގެ ދެލޮލެވެ. މޫނުގައިވާ ލަކުނެވެ. އޭނާގެ ހަމަހިމޭން ހިނިތުންވުމެވެ. އަދި އެ ބަރު އަޑެވެ. ބަގީޗާގައި ކިޔާރާ ލޯ މަރާލައިގެން ވައިރޯޅީގެ އިޙުސާސްކުރަން ހުރިއިރު ޒިމާން އޭނާއަށް ބަލަހައްޓައިގެން ހުރި ގޮތެވެ. އޭނާ ބުނި ބަސްތަކެވެ. “އަހަންނަށް ކިޔާރާއާމެދު ނުވިސްނާ ނުހުރެވޭ.”

ކިޔާރާ އޭނާގެ ތުންފަތުގައި ދަތް އަޅާލިއެވެ. އަމިއްލަ ނަފުސަށް ހޭނީ ކަމެއް ނުވަތަ ރަޖާގަނޑު ތެރޭގައި ފިލާނީ ކަމެއް އޭނާއަކަށް ނޭނގުނެވެ. މިއީ ބުއްދިވެރި ގޮތެއް ނޫނެވެ. މިއީ މާ ބޮޑު މާނައެއް ހުރި ކަމެއްވެސް ނޫނެވެ. އޭނާއަށް ޒިމާން އެނގެނީ ކިރިޔާއެވެ. އަދި ޒިމާންގެ ކިބައިގައި އޭނާ ބިރުގަންނަވާ ކަންތައްތަކެއްވެސް އެބަހުއްޓެވެ. އޭނާއަށް ބަޔާންކޮށްދޭން ނޭނގޭ ކަންތައްތަކެވެ. އަދިވެސް އެކަންކަމާ ސުވާލުކުރަން ނުޖެހޭނެ ކަމަށް އޭނާއަށް ހީވާ ކަންތައްތަކެވެ.

ޒިމާންގެ ވަށައިގެން އަނދިރިކަމެއްވާކަން އޭނާއަށް އެނގެއެވެ. ހޮސްޕިޓަލުން އޭނާއަށް އެކަން ފެނުނެވެ. ޒިމާންގެ ވަށައިގެން ތިބި މީހުންގެ ލޮލުން އެކަން ފެނުނެވެ. އޭނާ ބޭނުންކުރާ އަގުބޮޑު ސެންޓުގެ ވަހުގެ ތެރެއިން ލޭގެ ވަސް އޭނާއަށް އިޙުސާސް ކުރެވުނެވެ. އޭނާގެ މީހުން ހަރަކާތްތެރިވަނީ އާދައިގެ ސެކިއުރިޓީ މަސައްކަތްކުރާ މީހުންނަށްވުރެ މާ ބޮޑަށް ތަމްރީނު ލިބިފައިވާ ގޮތަކަށްކަން އޭނާ ފާހަގަކުރިއެވެ. އެހެނަސް.. ޒިމާން އޭނާއަށް ބަލާލާއިރު، އޭނާއަށް އިޙުސާސްކުރެވެނީ ބިރުވެރި މީހެއްގެ ކުރިމަތީގައި ހުރެވޭ ކަމަކަށް ނޫނެވެ. އޭނާއަށް ކުރެވެނީ މުޅިން ތަފާތު އިޙުސާސެކެވެ. އޭނާއަކީ ބޭނުންތެރި މީހެއްކަމުގެ އިޙުސާސެވެ. އެއީ އޭނާގެ ފަރާތުން ލިބޭނެ އެއްޗަކަށްޓަކައެއް ނޫނެވެ. އޭނާގެ ސިފައަށްޓަކައެއް ނޫނެވެ. ނުވަތަ އޭނާއަކީ ބޭނުންތެރި މީހަކަށް ވާތީއެއްވެސް ނޫނެވެ. ހަމައެކަނި އޭނާއަކީ ކިޔާރާ ކަމަށް ވީތީއެވެ.

އެ ޚިޔާލުން އޭނާ ބިރުގަތެވެ. ނަމަވެސް އެ ބިރުވެރިކަމުގެ އަޑީގައި ހޫނުކަމެއް ވިއެވެ. އުފެދެމުން އަންނަ މަޑުމޮޅިކަމެކެވެ. އޭނާ ދެނެގަތުމުގެ އެދުމެކެވެ. އޭނާ ދޭހަވުމުގެ އެދުމެކެވެ. އެ މަޝްހޫރުކަމާއި، ބާރާއި އަދި އަނދިރި ހިޔަނިތަކުގެ އަޑީގައި ވަނީ ކޮން އެއްޗެއްތޯ ހޯދައި ބެލުމުގެ ޝައުޤުވެރިކަމެވެ.

އޭނާ އެނދު ކައިރީގައި އޮތް ކުޑަ މުތީއާއި ފިނިފެންމަލުގެ ދަތި ނެގިއެވެ. ނިދުމުގެ ކުރިން އޭނާ އެ އެތަނުގައި ބޭއްވީއެވެ. އޭނާގެ ބޮޑުވައި އިނގިލިން އެ ނާޒުކު މުތީތަކުގައި މަޑުމަޑުން ފިރުމާލިއެވެ. މޮޔަ ހަދިޔާއެކެވެ. ރީތި ހަދިޔާއެކެވެ. ކޮންމެވެސް ގޮތަކުން އޭނާއަކީ ރީތި މީހެއްކަމުގެ އިޙުސާސްކުރުވި ހަދިޔާއެކެވެ.

ކިޔާރާގެ މޫނުމައްޗަށް ފަނޑު ހިނިތުންވުމެއް އައެވެ. ދެން އޭނާ ހަނދާންވީ ރަތް ހެދުމުގެ މަތިންނެވެ. އޭނާގެ ކޯތާފަތް އަނެއްކާވެސް ރަތްވިއެވެ. ލޯގަނޑު ކުރިމަތީގައި އެ ހެދުން ލައިގެން ހުންނަ މަންޒަރު އޭނާއަށް މިހާރުވެސް ސިފަކުރެވެއެވެ. ވަގުތުން އޭނާ ބޯ ހޫރާލިއެވެ. “ނޫން.” ނަމަވެސް އެ ހިނިތުންވުން ފިލައިގެންނެއް ނުދިޔައެވެ. އެ ހެދުން ގަޔަށް ހެޔޮވަރުކޮށްލާނެކަން އޭނާއަށް އެނގެއެވެ. ފަހަރެއްގައި މާދަމައަކު ނޫނެވެ. ފަހަރެއްގައި އޭނާއަށްޓަކައެއްވެސް ނޫނެވެ. އަމިއްލަ ނަފުސަށް އޭނާ އެހެން ބުނެފާނެއެވެ. އެކަމަކު އޭނާއަށް އެނގެއެވެ. އޭނާ އެ ހެދުން ލާނެއެވެ.

*****

މާލޭގެ އެހެން ހިސާބެއްގައި، ކިޔާރާގެ އާދައިގެ އެޕާޓްމަންޓަށްވުރެ މާ ބޮޑަށް ރައްކާތެރިކަން ވަރުގަދަ ފާރުތަކެއްގެ ފަހަތުގައި، ނުނިދިފައި ހުރި އެހެން އިންސާނަކު ހުއްޓެވެ. ޒިމާން ހުރީ ނިދާފައިވާ މާލެއަށް ފެންނަ ގޮތަށް ހުރި އުސް ކުޑަދޮރެއްގެ ކައިރީގައެވެ. އޭނާގެ އެއް އަތް ބިއްލޫރިގަނޑުގައި ޖައްސާލައިގެންނެވެ. އޭނާ ވަނީ ހަމަހިމޭންކަމުގެ ފަންނު ދަސްކުރުމުގައި އެތައް އަހަރެއް ހޭދަކޮށްފައެވެ. އިޙުސާސްތަކަކީ، އެއީ ފާޅުވާން ދޫކޮށްލައިފިނަމަ ނިކަމެތިކަމެއްކަން އޭނާ ދަސްކުރީ އެތައް އަހަރަކުންނެވެ. އޭނާ ވަނީ އޭނާގެ ވަށައިގެން އުސް ފާރުތަކެއް ބިނާކޮށްފައެވެ. އެއީ އޭނާއާ އެންމެ ގާތް މީހުންނަށްވެސް އޭނާގެ ހިތުގައިވާ އެއްޗެއް ނޭނގޭ ފަދަ އުސް ފާރުތަކެކެވެ.

އެންޒޯއަށް އޭނާ އެނގޭތާ އެތައް އަހަރެއް ވެއްޖެއެވެ. ފާތިމާއަށްވެސް އޭނާ އެނގޭތާ ގާތްގަނޑަކަށް އެހާ ދުވަސް ވެއްޖެއެވެ. އެއިން އެކަކުވެސް ޒިމާން މިފަދަ ގޮތަކަށް އުޅެނިކޮށް މީގެ ކުރިން ދެކެފައެއް ނުވެއެވެ. އަންހެނަކަށްޓަކައި ހެދުމެއް އިޚްތިޔާރު ކުރަނިކޮށް ދެކެފައެއް ނުވެއެވެ. ސެންޓެއް، އިސްތަށިގަނޑުގައި ޖަހާ ދައްޗެއް ނުވަތަ އަތުން ލިޔެފައިވާ ނޯޓެއް ދެކެފައެއް ނުވެއެވެ. އެހެން މީހެއްގެ އިޙުސާސްތަކާމެދު ވިސްނާފައި އޭނާ ހިނިތުންވާތަނެއް އެމީހުން ދުވަހަކުވެސް ނުދެކެއެވެ.

ޒިމާންއަށް އެކަން އެނގެއެވެ. އޭނާ އަމިއްލައަށްވެސް އެކަން ދޭހަވޭތޯ މަސައްކަތް ކުރަމުން ދިޔައެވެ. ކީއްވެ އޭނާ؟ ކީއްވެ މިހާރު؟

އޭނާގެ މުޅި ޖަމާއަތުގެ މުސްތަޤުބަލާ ގުޅުންހުރި ކަންކަމަށްވުރެ ބޮޑަށް، އޭނާގެ ކޮނޑުގައި ބޯ އަޅައިގެން ނިދިފައި އޮތް ވަރުބަލިވެފައިވާ ނަރުސް ކުއްޖާގެ ހަނދާންތައް އޭނާގެ ސިކުނޑީގައި ބޮޑު ޖާގައެއް ހޯދީ ކީއްވެގެން ހެއްޔެވެ؟ އޭނާއަށް ނިދުނު ތަން އެނގުމުން އޭނާގެ މޫނުމަތިން ފެނުނު އަސަރުތައް ޒިމާންގެ ހަނދާނުގައި އެހާ ސާފުކޮށް ހުރީ ކީއްވެ ހެއްޔެވެ؟ އޭނާ ލަދުގަތުމުން ޒިމާންއަށް އުފާވެރިކަން ލިބުނީ ކީއްވެ ހެއްޔެވެ؟ ހޮސްޕިޓަލުގައި އޭނާ ދެއްކި ހިތްވަރު ޒިމާންގެ ހަނދާނުން ނުފިލީ ކީއްވެ ހެއްޔެވެ؟ ބަގީޗާގެ ތެރޭގައި އޭނާ ހީނލި އަޑު، ޒިމާންގެ މުޅި ހަޔާތުގައި އިވުނު އެހެން ހުރިހާ އަޑުތަކަށްވުރެ ތަފާތުވީ ކީއްވެ ހެއްޔެވެ؟

އޭނާގެ އަތުގައި އެއްވެސް ޖަވާބެއް ނެތެވެ. އަދި ޒިމާން ފަދަ މީހަކަށް ޖަވާބު ނޭނގުމަކީ ވަރަށް ބޮޑު ނުތަނަވަސްކަމެއް ގެނުވާ ކަމެކެވެ. އޭނާގެ ފަހަތުގައި ހުރި މޭޒުމަތީގައި އޭނާގެ ފޯނު އޮތެވެ. ކިޔާރާގެ ނަންބަރު ވަނީ ސޭވްކޮށްފައެވެ. އޭނާ އެއަށް އެއްފަހަރު ބަލާލިއެވެ. ދެން އަނެއްކާވެސް ބަލާލިއެވެ. ފަނޑު ހިނިތުންވުމެއް އޭނާގެ މޫނުމައްޗަށް އައެވެ. ކިޔާރާ މިވަގުތު ކުރަނީ ކީއްކަމެއް އޭނާއަކަށް ނޭނގެއެވެ. ފަހަރެއްގައި އޭނާ އޮތީ ނިދާފައެވެ. ފަހަރެއްގައި އޭނާއާމެދު ވިސްނަނީއެވެ. ނުވަތަ އެ ހަފުލާއަށް ދާން އެއްބަސްވީތީ ދެރަވަނީއެވެ.

އެ ފަހު ޚިޔާލާއެކު އޭނާގެ ހިނިތުންވުން ފިލައިގެން ދިޔައެވެ. އޭނާ ދެރަވާކަށް ޒިމާން ބޭނުމެއް ނޫނެވެ. އޭނާ ބޭނުންވަނީ ކިޔާރާ އަމިއްލަ އިޚްތިޔާރުގައި، އުފަލާއެކު އައުމަށެވެ. އެ ތަފާތަކީ އޭނާ ޤަބޫލުކުރަން ބޭނުންވާ މިންވަރަށްވުރެ ބޮޑަށް އޭނާއަށް މުހިންމު ކަމެކެވެ.

ޒިމާން އަނެއްކާވެސް ކުޑަދޮރާ ދިމާއަށް އެނބުރުނެވެ. އޭނާގެ ފައިދަށުގައި މުޅި ސިޓީ އޮތީ ހޭލައެވެ. މި ދަންވަރުވެސް ހަލަބޮލިކަމާއެކުގައެވެ. މަގުތަކުގެ އަނދިރިކަމުގެ ތެރޭގައި ބޮކިތައް ވިދަމުން ދިޔައިރު، އިމާރާތްތަކުގެ ފަހަތުން ކަނޑު އޮތީ ފެންނަ ނުފެންނަ ވަރަށެވެ. އެ އުސް އިމާރާތްތަކާއި އަލިތަކުގެ ތެރޭގައި ކޮންމެވެސް ތަނެއްގައި ކިޔާރާ އެބައޮތެވެ. އެ ޚިޔާލުން އޭނާއަށް މީގެ ކުރިން އިޙުސާސް ނުކުރެވޭ ފަދަ ހަމަޖެހުމެއް ލިބުނެވެ. އޭނާއަށް އެކަން ދޭހައެއް ނުވެއެވެ. ނަމަވެސް އޭނާ އެކަމާ ދެކޮޅެއްވެސް ނުހަދައެވެ.

ފަހަރެއްގައި ބައެއް ގުޅުންތަކަކީ ވަގުތުން ދޭހަވާންޖެހޭ އެއްޗެއް ނޫނެވެ. ފަހަރެއްގައި ބައެއް މީހުން ތިބާގެ ހަޔާތަށް އަންނަނީ ވަރަށް ހިމޭންކޮށް، އިންޒާރަކާ ނުލައި، ހުއްދައަކާ ނުލައެވެ. އަދި ކޮންމެވެސް ގޮތަކުން ތިބާގެ ވަށައިގެންވާ ހުރިހާ ކަމެއްގެ މާހައުލު ބަދަލުކޮށްލައެވެ.

އިއްތިފާޤެކެވެ. ބަހުގެ ދަތުރެކެވެ. ހޮސްޕިޓަލުގެ ކޮޓަރިއެކެވެ. ޖޭސްމިން ސައިތަށްޓެކެވެ. ރަތް ހެދުމެކެވެ. ނޯޓެއްގެ ފަހަތުގައި ލިޔެފައިވާ ނަންބަރެކެވެ. ކުދިކުދި ކަންތައްތަކެވެ. ވަކިވަކިން ބަލާއިރު އެއްވެސް މާނައެއް ނެތް ކަންތައްތަކެވެ. ނަމަވެސް އެ ހުރިހާ ކަމެއް އެކުވުމުން.. އެކަންކަމުން ކޮންމެވެސް އެއްޗެއް އުފެދެން ފަށައިފިއެވެ. އެއީ އެއިން އެކަކުވެސް އަދި ނަމެއް ދީފައި ނުވާ ކަމެކެވެ. ދެމީހުންކުރެ އެކަކަށްވެސް ފުރިހަމައަށް ދޭހަނުވާ ކަމެކެވެ. އިއްތިފާޤާއި ނަސީބުގެ ދެމެދުގައިވާ ކޮންމެވެސް ކަމެކެވެ.

އަދި ފަހަރެއްގައި އެއީ އެންމެ ނުރައްކާތެރި ބައެވެ. ކިޔާރާއަށްވެސް އަދި ޒިމާންއަށްވެސް އެ ދެމީހުންގެ ދެމެދުގައިވާ އެ ފެންނަން ނެތް ފަށް ގެންގޮސްދޭނީ ކޮންތާކަށް ކަމެއް ނޭނގެއެވެ. އެމީހުންނަށް އެނގޭހާވެސް ކަމަކީ އެ ފަށް އެތަނުގައި ވާކަމެވެ. ފަށުވި ފަދައިން އޮމާން، ހަނދުވަރު ފަދައިން އަލި، އަދި ދުރުމިނުގައިވެސް ކެތްކުރެވޭހާ ވަރުގަދަ ފަށެކެވެ. އަދި ވަރަށް ހިމޭންކަމާއެކު، އެއްވެސް މީހަކަށް އިޙުސާސް ނުވާނޭހެން، އެ ފަށް ދަނީ މުޅިން ތަފާތު ދެ ރޫހެއް އެއް މިސްރާބަކަށް ދަމަމުންނެވެ. ދުވަހަކުވެސް ބައްދަލުވާން ނުޖެހޭ ދެ ހަޔާތެކެވެ. އެކަކު އަނެކަކު ދެނެގަންނަންޖެހޭ އެއްވެސް ސަބަބެއް ނެތް ދެ ހިތެކެވެ. އިއްތިފާޤުން ބައްދަލުވި ދެ ބީރައްޓެހިންނެވެ. ނަމަވެސް، ދުވަސްތައް ފާއިތުވަމުންދާ ވަރަކަށް އެކަކު އަނެކަކަށް ބީރައްޓެހިކަމުގެ އިޙުސާސް ދަނީ ކުޑަވަމުންނެވެ.

ކިޔާރާއަށް އެންމެ ފަހުން އަލުން ނިދިއްޖެއެވެ. މުތީއާއި ފިނިފެންމަލުގެ ދަތި އޮތީ އޭނާގެ ބޯދަށުގައިވާ ބާލީސް ކައިރީގައެވެ. އަދި އޭނާގެ ހުވަފެނީ ދުނިޔޭގެ އެންމެ ފުންމިނުގައި، އެ ރިހި ފަށް އަނެއްކާވެސް ފެންނަން ފެށިއެވެ. މިފަހަރު، އެކަމުން އޭނާ ބިރެއް ނުގަނެއެވެ. އޭނާ އެ ފަށުގައި ހިފުމަށް އަތް ދިއްކޮށްލިއެވެ. އަދި ހަމަ އެވަގުތު، ކޮންމެވެސް އެހެން ތަނެއްގައި ހުރި އެހެން ރޫހަކުވެސް އެ ފަށުގައި ހިފުމަށް އަތް ދިއްކޮށްލި ކަހަލައެވެ.

ފަހަރެއްގައި ލޯތްބަކީ އަބަދުވެސް ގުގުރިއަކާއެކު އަންނަ އެއްޗެއް ނޫނެވެ. ފަހަރެއްގައި ބައެއް ފަހަރު އެކަން ފެށެނީ ވަރަށް ހިމޭންކޮށެވެ. ބީރައްޓެހި މީހެއްގެ ކޮނޑުގައި ބޯ އަޅައިގެން ނިދޭ ވަރުބަލިވެފައިވާ އަންހެނެއްގެ ފަރާތުންނެވެ. އޭނާގެ ހަށިގަނޑުގެ ބަރުދަން އަމިއްލަ ކޮނޑަށް އިޙުސާސްވީ ގޮތް ހަނދާންކުރާ ނުރައްކާތެރި ފިރިހެނެއްގެ ފަރާތުންނެވެ.

ޖޭސްމިން ސައިތަށްޓެއްގެ މަތީގައި ކުރެވޭ ސުވާލަކުންނެވެ. ކާ އެއްޗެހި އަޅާފައިވާ ކޮތަޅެއްގެ ތެރޭގައި ބާއްވާފައިވާ ހަދިޔާއަކުންނެވެ. ކުއްލިއަކަށް ހިތަށް ކުރެވޭ އިޙުސާސް ތަފާތުވީ ކީއްވެގެންތޯ އަމިއްލަ ނަފުސާ ސުވާލުކުރާ ދެ މީހުންގެ ފަރާތުންނެވެ.

އަދި ފަހަރެއްގައި ބައެއް ރޫހުތަކަކީ އެކަކު އަނެކަކު މޫނަކުން ނުވަތަ ނަމަކުން ދެނެގަންނަ ބައެއް ނޫނެވެ. ފަހަރެއްގައި އެމީހުން އެކަކު އަނެކަކު ދެނެގަންނަނީ އިޙުސާސްތަކުންނެވެ. ބުނެދޭން ނޭނގޭ އެ ހޫނުކަމުންނެވެ. ހިތުގެ ތެޅުމުންނެވެ. ކޮންމެވެސް ކަމެއް ބަދަލުވެއްޖެކަމުގެ ހިމޭން ޔަގީންކަމުންނެވެ. ކޮންމެވެސް ކަމެއް ފެށިއްޖެއެވެ. ރިހިކުލައިގެ ކަމެކެވެ. ނާޒުކު ކަމެކެވެ. ރޫހުގެ ފުންމިނުގައި ދިރިއުޅޭ ކަމެކެވެ.

އަދި އެމީހުންނަށް ފެންނަން ނެތް އެ ފަށަކީ، ދެމީހުން ކުރެ އެކަކަށްވެސް އެއިން ސަލާމަތް ނުވެވޭނެ ހަމައެކަނި ކަމަށް ވެދާނެކަމެއް، އެއިން އެކަކަށްވެސް އަދި ރޭކާނުލައެވެ.

(ނުނިމޭ)