ކޮލޮމްބޯ ކެފޭ
މިރުޒާ އިޚްތިޔާރުކުރީ ކޮލޮމްބޯގެ ހަލަބޮލިކަމާ ދުރު، ހިމޭން ސަރަޙައްދެއްގައި ހުރި ކުޑަ ކެފޭއެކެވެ. އެއީ މާ މަތީ ފަންތީގެ ތަނެއް ނޫން ނަމަވެސް، އެ ތަނުގައި ހުރީ ކުދި މޭޒު ޖަހައި ބޭރުގައި އިށީނދެވޭނެހެން ކުޑަ ނަގައި ހިޔާކޮށްފައެވެ. ފަނޑު އަލިކަމާއި، މައި މަގާ ދުރުގައި ހުރުމުން، މަޑުމައިތިރިކަމާއެކު ވާހަކަދައްކާލަން ވަރަށް ފަސޭހަ ތަނެކެވެ.
އެ ވަގުތު ކެފޭގެ ތެރޭގައި އާއި ބޭރުގައި ތިބީ މަދު ކަސްޓަމަރުންކޮޅެކެވެ. ދެ ފިރިހެނަކު ކޮފީ ބޯން ތިބެގެން ވާހަކަދައްކަމުން ދިޔައިރު، ކަނެއްގައި ހުރި މޭޒެއްގައި ޒުވާން ކަޕްލްއެއް އިށީނދެގެން ތިއްބެވެ.
މިރުޒާ ވަޝިއްޔާ ގޮވައިގެން ގޮސް އިށީނީ ބޭރުގައި ހުރި މޭޒެއްގައެވެ.
ވަޝިއްޔާ ގޮނޑީގައި ހަމަޖެހިލަމުން ވަށައިގެން ބަލައިލިއެވެ. “މިތަން ވަރަށް ހިތްގައިމު.”
“އަހަންނަށް މިކަހަލަ ބައެއް ތަންތަން އެނގޭ.”
“އާނ، ތިޔަހެން ވާނެކަން އެނގޭ.”
“އެއީ ކީއްވެ؟”
“ކޮންމެ އެއްޗެއް ހުންނަ ތަނެއްވެސް މިރުޒާއަށް އަބަދުވެސް ވަރަށް ރަނގަޅަށް އެނގޭނެ.”
“އެއީ އަހަރެން ކުރާ މަސައްކަތުގެ ގޮތުން ލިބޭ ފައިދާއެއް.”
ވަޝިއްޔާ އޭނާއާ ދިމާލަށް ހައިރާންކަމާއެކު ބަލައިލިއެވެ.
“މިހާރު އެއަށް ކިޔަނީ އެހެންތަ؟”
މިރުޒާ ހިނިތުންވެލަމުން މެނޫ ނެގިއެވެ.
“ކޮން އެއްޗެއް ބޭނުމީ؟”
“ސައި. ކުޅި އެއްޗަކާއި، ފޮނި އެއްޗެއްވެސް ބޭނުން.”
“ތިޔަ އުޅެނީ ވަރަށް ކާލާނަމޭ ހިތާ ދޯ؟”
“މިއަދު އަދި ހަމަޖެހިލައިގެން އެއްޗެއް ނުކެވޭ.”
މިރުޒާގެ މޫނުމަތީގެ ކުލަވަރު ބަދަލުވިއެވެ. “ކީއްވެ؟”
ވަޝިއްޔާ ކޮނޑު އަރުވައިލިއެވެ.
“ބަނޑުހައެއް ނުވި.”
“ވަޝިއްޔާ.”
“ކީކޭ؟”
“އަމިއްލަ ނަފްސަށް ސަމާލުކަން ދޭންވާނެ.”
ވަޝިއްޔާ ކުޑަ ވަގުތުކޮޅަކަށް އޭނާއާ ދިމާލަށް ބަލަން އިނެވެ. “އެނގޭ.”
މިރުޒާ ސަޔާއި، ކުޅި ތަފާތު ހެދިކާއާއި، ދެމީހުން ބަހާލައިގެން ކެވޭނެހެން ކުޑަ ފޮނި އެއްޗަކަށް އޯޑަރު ދިނެވެ. ވެއިޓަރު ދިއުމުން، ވަޝިއްޔާ ގޮނޑީގައި ލެނގިލައި ހަމަޖެހިލިއެވެ.
އެރޭ ފުރަތަމަ ފަހަރަށް، ޖަވާބު ނުދީ ހުރި ފޯނު ކޯލުތަކާއި ގޭގައި އޭނާއަށް އިންތިޒާރުކުރަމުންދާ ސުވާލުތަކާމެދު ވަޝިއްޔާ ފިކުރެއް ނުކުރެއެވެ. އޭނާ އެ އިނީ ހަމަހިމޭން މާޙައުލެއްގައި، އޭނާ އެކުގައި އުޅެން ބޭނުންވާ ފަދަ މީހަކާއެކުގައެވެ. އަދި އެ އިޙުސާސަށް އޭނާ އެދިއެދި ހުރި މިންވަރު އޭނާއަށް އިޙުސާސްވާން ފެށިއެވެ.
*****
ފުރަތަމަ ގެނައީ ސަޔެވެ. ވަޝިއްޔާ އޭނާގެ ދެއަތުން ހޫނު ތަށީގައި ހިފަހައްޓާލިއެވެ. އެ ހޫނުކަމުން އޭނާގެ އިނގިލިތަކަށް އަރާމުވަމުން އިޙުސާސްކުރެވުނެވެ.
މިރުޒާ އޭނާއާ ދިމާލަށް ބަލަން އިނެވެ.
“ކިހިނެއްވީ؟” ވަޝިއްޔާ އެހިއެވެ.
“ކަމެއް ނުވޭ.”
“ތިޔަ އިނީ އަހަންނާ ދިމާލަށް ބަލަހައްޓައިގެން.”
“އެހެން އިނުން މަނައީތަ؟”
ވަޝިއްޔާ ހިނިތުންވެލިއެވެ.
“މިރޭ ތިޔަ އިނީ އާދަޔާ ޚިލާފަށް މަޑުން.”
“އަހަރެން މި ވިސްނަނީ މިހާރު ހިތްހަމަޖެހިލެވިއްޖެތޯ.”
“އާނ، މިހާރު ހާސްކަން ކުޑަ. ރަނގަޅު.”
“ތެދެއް؟”
“އާނ. އަހަންނަށް ހީވަނީ އެ އެޕާޓްމަންޓުން ބޭރަށް ނުކުމެލަން ބޭނުންވެފައި އިނީހެން. އެތާ އެކަނި އިނދެގެން މާ ގިނައިން ވިސްނެނީ.”
“އެ ހާދިސާއާ ބެހޭގޮތުންތަ؟”
ވަޝިއްޔާ ސައިތަށްޓާ ދިމާލަށް ބަލައިލިއެވެ.
“ހުރިހާ ކަމަކާ ބެހޭގޮތުން.”
މިރުޒާ އެއްވެސް އެއްޗެކޭ ނުބުނެ މަޑުން އިނެވެ.
ވަޝިއްޔާ ސައިފޮދެއް ބޯލުމަށްފަހު ވާހަކަ ކުރިއަށް ގެންދިޔައެވެ.
“އަހަންނަށް ހީވަނީ އެންމެ އުނދަގޫވަނީ ކަންވީގޮތް ނޭނގޭތީހެން. މީހަކު ގަސްދުގައި އަހަންނަށް ކަމެއް ކުރީނަމަ، އެއީ ކާކުކަން އެނގެން ބޭނުން. އެކަމަކު އެކަމާ މާ ބޮޑަށް ވިސްނަންޏާ، ކޮންމެ ކުޑަކުޑަ ކަމަކާވެސް ބިރުގަންނަން ފަށަނީ.”
“ތިޔައީ ވެދާނެ ގޮތެއް.”
“އަހަރެން އެކަހަލަ މީހަކަށް ވާން ބޭނުމެއް ނޫން މިރުޒާ. ކޮންމެ ތަނަކަށް ދާން ބިރުގަންނަ، ނުވަތަ އެއްވެސް މީހަކަށް އިތުބާރު ނުކުރެވޭ މީހަކަށް ވާކަށް ބޭނުމެއް ނޫން.”
“އެހެންވީމާ ކޮންމެ ސިކުންތަކު ކެރޭ މީހަކަށް ވާން އަމިއްލަ ނަފްސަށް މަޖުބޫރު ނުކުރޭ.”
ވަޝިއްޔާ މިރުޒާއާ ދިމާލަށް ބަލައިލިއެވެ.
“ބުނަން ފަސޭހަވިޔަސް، އެއީ ކުރަން އުނދަގޫ ކަމެއް.”
“އަހަންނަށް އެނގޭ.”
އޭނާގެ ޖަވާބުގައި އާދަޔާ ޚިލާފު އިޚުލާޞްތެރިކަމެއް ހުއްޓެވެ.
ވަޝިއްޔާ އޭނާގެ މޫނަށް ބަލައިލިއިރު، އޭނާގެ ލޯ ކައިރިން ވަރުބަލިކަން ފާހަގަވިއެވެ.
“ނިދި ރަނގަޅަށް ލިބޭތަ؟”
“ފުދޭވަރަކަށް.”
“އޭގެ މާނައަކީ ނުލިބެއޭ.”
ވަޝިއްޔާ ހީނލިއެވެ.
“ތިޔަ ވާހަކަދައްކަނީ ހީވަނީ މަންމައެއްހެން.”
“ކޮންމެ މީހަކަށްވެސް އެ މީހަކީ ހުރިހާ ކަމެއްގައި ކެތްތެރިވެވޭނެ މީހެއް ނޫންކަން ހަނދާންކޮށްދޭން ޖެހޭނެ.”
“އެކަން ކޮށްދޭން ތިޔަ އުޅެނީ ވަޝިއްޔާތަ؟”
“ނޫން.”
ދެމީހުން އެކުގައި ބާރަށް ހީނލިއެވެ.
ކާ އެއްޗެހި ގެނައުމުން ވާހަކަ މެދުކެނޑުނެވެ. ވަޝިއްޔާ ވަގުތުން ކުޅި ހެދިކާއެއް ނެގިއެވެ.
“އަސްލުވެސް ވަރަށް ބަނޑުހައިވެއްޖެ.”
ވަޝިއްޔާ ފުރަތަމަ ފަހަރަށް ކާން ފެށިތަން ބަލަން މިރުޒާ އިނެވެ.
“މީރުތަ؟ މިހާރު ރަނގަޅުތަ؟”
“ވަރަށް ރަނގަޅު.”
“އެންމެ ރަނގަޅު. ކުޑަމިނުން ކޮންމެވެސް ކަމެއް މިރޭ އަހަންނަށް ކާމިޔާބު ކުރެވިއްޖެތާ.”
ވަޝިއްޔާ ސައިތަށި ބޯން އިނދެ އޭނާއާ ދިމާލަށް ބަލައިލިއެވެ.
“އާނ، ތިޔައީ ތެދެއް. އާނ.. އަހަރެން ހަމަ ގައިމުވެސް މިރުޒާގެ ކޮމްޕެނީ އިންޖޯއީ ކުރަން.”
ކުޑަ ވަގުތުކޮޅަކަށް ދެމީހުންވެސް ހިމޭންވިއެވެ. ވަޝިއްޔާ ބުނި ބަސްތަކުގެ މާނަ، އެ ދެކެވުނު ވާހަކައަށްވުރެ ބޮޑަށް އެ މާޙައުލުގައި ހަރުލާފައި ހުރި ކަހަލައެވެ.
*****
އެ ދެމީހުންގެ ދެމެދުގައި ފޮރުވައިނުލެވޭ ފަދަ ވަރުގަދަ އިޙުސާސަކާއި އެކަކު އަނެކަކު ގާތަށް ދަމައިގަތުމެއް އުފެދިފައިވެއެވެ. އެ ދެމީހުންނަކީ ކުޑަކުދިންނެއް ނޫނެވެ. އަދި އުފެދެމުން އަންނަ އިޙުސާސްތަކުގެ ހަޤީޤަތާމެދު އެއިން އެކަކަށްވެސް އޮޅުމެއް ނެތެވެ. މިރުޒާއަކީ މީހަކަށް ކުރާ އިޙުތިރާމާއި، އުފެދޭ ޝައުޤުވެރިކަމުގެ ތަފާތު ދަންނަ ފުރާ ފުރިހަމަވެފައިވާ ފިރިހެނެކެވެ. ވަޝިއްޔާއަށް ވެސް، އޭނާގެ ހިތުގައި މިރުޒާއަށް އޮތް ޝައުޤުވެރިކަން އާދައިގެ ރަހުމަތްތެރިކަމުގެ އިން ފަހަނައަޅައި ގޮސްފިކަން ރަނގަޅަށް އެނގެއެވެ.
އޭނާގެ އަޑަށް ވަޝިއްޔާ ގަޔާވެއެވެ. މިރުޒާ ކަމަކަށް ޝައުޤުވެރިވެގެން ކަނުލައި އަޑުއަހާ ގޮތް ވަޝިއްޔާއަށް ކަމުދެއެވެ. އޭނާގެ ސަމާސާ މިޒާޖާއި، އަމިއްލަ ނަފްސަށް އޮންނަ އިތުބާރާއި، އަދި ބައެއް ފަހަރު އަމިއްލަ އިޙުސާސްތައް ކޮންޓްރޯލްކުރަން ހަނދާން ނެތޭ ވަގުތުތަކުގައި ފެންނަ މަޑުމޮޅިކަން ވެސް ވަޝިއްޔާއަށް ކަމުދެއެވެ. އެހެންނަމަވެސް، މިރުޒާއަކީ އުނދަގޫ ސިފަތަކެއް އެކުލެވޭ މީހެއްކަން ވެސް އޭނާއަށް އެނގެއެވެ.
އޭނާގެ ކައިވެންޏަކީ ވަޝިއްޔާއަށް އަޅާނުލައި ދޫކޮށްލެވޭނެ ކުޑަ ކަމެއް ނޫނެވެ. އަދި އޭނާގެ ވިޔަފާރީގެ ވަށައިގެންވާ ސިއްރުތަކަކީ، މިރުޒާއާ ގާތްވުމުގައި ވަޝިއްޔާ ސަމާލުވާންޖެހޭ ސަބަބުތަކެކެވެ. އެހެންނަމަވެސް، އެކުގައި ހޭދަވާ ވަގުތުތަކުގައި މިރުޒާގެ ފަރާތުން ލިބޭ އިޙުސާސްތަކަކީ ހިތް އަތުލާ ފަދަ އާދަޔާ ޚިލާފު އިޙުސާސްތަކެކެވެ.
އެއީ އޭނާ ވަޝިއްޔާއަށް ވަަޢުދުތަކެއް ވާތީއެއް ނޫނެވެ. އަދި އަގުބޮޑު ހަދިޔާތަކެއް ނުވަތަ މާބޮޑު ތަޢުރީފުތަކެއް އޮއްސާތީއެއް ވެސް ނޫނެވެ. އެކަމަކު، އޭނާއަށް ދެވޭ ސަމާލުކަމުގެ ސަބަބުންނެވެ. އަދި އަބަދުވެސް ކޮންމެވެސް ކަމަކު އެދިގެން އުޅޭ މީހުންގެ މެދުގައި އަހަރުތަކެއް ހޭދަކޮށްފައިވާ މިރުޒާއަށް، ސައިތަށްޓެއްގެ މަތީގައި އޭނާއާ ދެބަސްވެ، ވާދަކޮށްލެވޭ ފަދަ މީހަކާއެކު ހޭދަކުރެވޭ އާދައިގެ ވަގުތުކޮޅުން ބޮޑު ހިތްހަމަޖެހުމެއް ލިބެއެވެ.
އޭނާ ވަޝިއްޔާގެ ވާހަކަތައް އަޑުއަހަން ބޭނުންވެއެވެ. ވާހަކަދައްކާއިރު ވަޝިއްޔާގެ މޫނުމަތިން ފެންނަ ބަދަލުތަކަށް ބަލަން އޭނާ ބޭނުންވެއެވެ. ކްލަބްގައި ހިނގި ހާދިސާއަށްފަހު ވަޝިއްޔާގެ މޫނުމަތިން ފެންނަ ވަރުބަލިކަމާއި ބިރުވެރިކަން ނެތި، އޭނާ ހިނިތުންވާ މަންޒަރު ދެކެން މިރުޒާ ބޭނުންވެއެވެ. އަދި އެންމެ ބޮޑަށް އޭނާ ބޭނުންވަނީ، ވަޝިއްޔާގެ ކައިރީގައި އިތުރު ވަގުތުކޮޅަކަށް މަޑުކޮށްލުމަށެވެ.
“ތި އިންނަނީ އަނެއްކާވެސް ކަޅި ޖަހާނުލާ އަހަރެންނަށް ބަލަހައްޓައިގެން.” ވަޝިއްޔާ ބުންޏެވެ.
“ވެދާނެ.”
“ދެން ކީއްވެ؟”
“އަދިވެސް މި އުޅެނީ ތިޔައީ ކޮންކަހަލަ އަންހެނެއްކަން ދެނެގަނެވޭތޯ.”
ވަޝިއްޔާ އޭނާގެ ބޯ އަރިކޮށްލިއެވެ.
“ކުރިއެރުމެއް ލިބިއްޖެ؟”
“މާބޮޑު ކުރިއެރުމެއް ނުލިބޭ.”
“ރަނގަޅު. އަހަރެން ބޭނުމެއް ނޫން މާ އަވަހަށް ދެނެގަނެވޭނެ މީހަކަށް ވާކަށް.”
މިރުޒާ ހިނިތުންވެލިއެވެ. “ތިޔައީ އެކަހަލަ މީހެއް ނޫން.”
ވަޝިއްޔާ އޭނާގެ ހިނިތުންވުން ފޮރުވަމުން ދުރަށް ބަލައިލިއެވެ.
އެ ވަގުތު، އެ ދެމީހުންގެ މެދުގައި އޮތް ގުޅުން ހީވަނީ އަތުން ހިފޭހާ ގާތުގައި އޮތް ކަމެއްހެންނެވެ. އެ ހިމޭން މާހައުލު އެ އިޙުސާސްތަކުން ފުރިގެން ދިޔައެވެ. އެހެންނަމަވެސް، އެ ގުޅުމަށް ނަމެއް ދޭން އެކަކުވެސް އަވަސްވެގަންނާކަށް ބޭނުމެއް ނުވިއެވެ.
ކައި ނިމުމުން، ބޭރުގައި އޮތް ހިމޭން ހިސާބެއްގައި ކުޑަކޮށް ހިނގާލަން މިރުޒާ ޚިޔާލު ދިނެވެ.
(ނުނިމޭ)
