ދިވެހި ފިލްމީ އުފެއްދުންތަކަށް ލޯބިކުރާ ފަރާތްތަކުގެ މެދުގައި ބޮޑު މަގުބޫލުކަމެއް ހޯދާފައިވާ ޑާކް ރެއިން އެންޓަޓައިންމަންޓުގެ އައު ފިލްމު “މަގޭ ބިޓުގެ ވެޑިން” ގެ ރަސްމީ ޕޯސްޓަރާއެކު، ފިލްމުގެ މައިގަނޑު ކާސްޓް އާންމުކޮށްފިއެވެ.
ޓްރޮޕިކަލް ރެއިން އެންޓަޓައިންމަންޓާ ގުޅިގެން އުފައްދާ މި ފިލްމަކީ މުހައްމަދު އަލީ (މޮގާ) އަދި އައިޝަތު ފުއާދުގެ ޕްރޮޑަކްޝަނެކެވެ. “މަގޭ ބިޓުގެ ވެޑިން” އިޝްތިހާރު ކުރަމުންދަނީ މިހާތަނަށް ފެންނާނެ އެންމެ “ހަލަބޮލި” ނުވަތަ އެންމެ “ކެއޯޓިކް” ލޯބީގެ މުނިފޫހިފިލުވުމުގެ ގޮތުގައެވެ.
މި ފިލްމުގެ މައިގަނޑު ތަރިންގެ ގޮތުގައި ފެނިގެންދާނީ ދިވެހި ފިލްމީ ދާއިރާގައި މިހާރު ވިދަމުންދާ ޝަރަފް އަބްދުﷲގެ އިތުރުން ފާތިމަތު ރާޔާ އަބްދުﷲ އެވެ. މީގެ އިތުރުން މަގުބޫލު ކޮމެޑިއަން ޝާފިއު އިބްރާހީމް (ފުބޫ)، ތަޖުރިބާކާރު ބަތަލާ ޝީލާ ނަޖީބް، އަދި އަހުމަދު ސައީދު ވެސް މުހިންމު ރޯލުތަކުން ފެނިގެންދާނެއެވެ. ކާސްޓުގައި ދެން ހިމެނެނީ ހާޒިފް މުހައްމަދު، އާމިނަތު ނޫރާ އަދި އަބްދުﷲ ޒަލީޝާން އެވެ.
ޝަހުދާ މަހްމޫދު ލިޔެ ޑައިރެކްޓްކުރާ މި ފިލްމުގެ ސިނަމަޓޯގްރަފީ ތައްޔާރުކުރަނީ އަހުމަދު ޒިފާފެވެ. ފިލްމުގެ އެޑިޓިން މަސައްކަތް އަލީ ޝިފާއު (ޗިއްޕެ) ކުރާއިރު، ޕްރޮޑިއުސަރުންގެ ގޮތުގައި އައިޝަތު ފުއާދު، މުހައްމަދު އަލީ އަދި ކައިލީން މުހައްމަދު އަލީ ހަރަކާތްތެރިވެއެވެ.
ބެލުންތެރިންގެ މެދުގައި ބޮޑު އިންތިޒާރެއް އުފެދިފައިވާ “މަގޭ ބިޓުގެ ވެޑިން” ސިނަމާތަކަށް އަންނާނެ ކަމަށް އިއުލާނުކޮށްފައިވަނީ 2026 ވަނ އަހަރުގެ ސެޕްޓެމްބަރު މަހުގެ 3 ވަނަ ދުވަހުއެވެ. މި ފިލްމަކީ އާދަޔާ ހިލާފު މަޖާ އަދި ޝައުގުވެރި ހާދިސާތަކެއް ފެނިގެންދާނެ ފިލްމެއް ކަމަށް ޕްރޮޑަކްޝަން ޓީމުން މައުލޫމާތުދެއެވެ.
