ނުތަނަވަސްކަން
ޒިމާންގެ ހިތަށް ފިނި އެއްޗެއް ވަދެގެން ދިޔަ ކަހަލައެވެ. އޭނާ މަގުމައްޗަށް ބަލާލިއެވެ. މީހުން ހިނގާބިނގާވެ އުޅެއެވެ. ކާރުތައް ދުއްވަައެވެ. ސައިކަލުތައް ދެއެވެ. ހުރިހާ ކަމެއްވެސް ފެންނަނީ އާންމުކޮށް ހުންނަ ގޮތަށެވެ. ނަމަވެސް އޭނާގެ އެތެރެހަށީގައި ކޮންމެވެސް ބޮޑު ކަމެއް ބަދަލުވެއްޖެއެވެ.
“އެހެންވީމާ އޭނާ ގެންދިޔައީ ކާކު؟”
އެންޒޯ ޖަވާބެއް ނުދެއެވެ. ދޭކަށް ނުވެސް ޖެހެއެވެ. ޒިމާން މަޑުމަޑުން ހޮސްޕިޓަލާ ދިމާއަށް އެނބުރުނެވެ.
“އޭނާ ހޯދާ.”
އޭނާގެ އަޑު މަޑެވެ. މާބޮޑަށްވެސް މަޑެވެ. އެންޒޯ ވަގުތުން ހަރަކާތްތެރިވާން ފެށިއެވެ.
“އަހަރެން ކެމެރާތައް ބަލާނަން.”
“މިހާރު.”
އެންޒޯ ހޮސްޕިޓަލުގެ ދޮރާ ދިމާއަށް ދިޔައެވެ. ޒިމާން ސިކުންތަކަށް އެ ހުރިތަނުގައި ހުއްޓެވެ. ދެން އޭނާގެ ފޯނު ވައިބްރޭޓްވިއެވެ. ސިކުންތަކަށް އޭނާގެ ހިތުގައި އުންމީދުގެ ދޯއްޖެއް ދިއްލުނެވެ. އޭނާ ތިރިއަށް ބަލާލިއެވެ. އެއްވެސް އެއްޗެއް ނެތެވެ. މެސެޖެއް ނެތެވެ. ކޯލެއް ނެތެވެ. ހަމައެކަނި ހުސް ސްކްރީނެވެ. އޭނާ ފޯނުގައި ބާރަށް ހިފަހައްޓާލިއެވެ. އަނެއްކާވެސް ކިއާރާއަށް ގުޅިއެވެ. މިފަހަރު ނަންބަރަށް ނުގުޅެއެވެ. ކިއާރާގެ ފޯނު އޮތީ ނިއްވާލާފައެވެ. އޭނާގެ ލޮލުގެ ކުލަވަރު ކަޅުވިއެވެ.
އާދައިގެ ކަމަކާއި ނުރައްކާތެރި ކަމެއްގެ ތަފާތު ދެނެގަންނަން އެނގޭހާ ދުވަހު އޭނާ ދުނިޔޭގައި އުޅެފިއެވެ. މިއީ ނުރައްކަލެކެވެ.
ހޮސްޕިޓަލުގެ އެތެރޭގައި، އެންޒޯ ވަރަށް ހަލުވިކަމާއެކު ހަރަކާތްތެރިވަމުން ދިޔައެވެ. ސެކިއުރިޓީ ސުޕަވައިޒަރު އޭނާއާ ދޮރުމަތިން ބައްދަލުކުރިއެވެ. އޭނާ އޭރު ހުރީ ސީ.ސީ.ޓީ.ވީ ފުޓޭޖުތައް ނަގައިގެންނެވެ.
“އޭނާ ނުކުތީ މުވައްޒަފުން ނުކުންނަ ދޮރުން.”
“ދައްކަބަލަ.”
ފުޓޭޖު ފެށުނެވެ. ސްކްރީނުން ކިއާރާ ފެނުނެވެ. އެހެރީ އޭނާއެވެ. އަތްދަބަސް ހިފައިގެން ހޮސްޕިޓަލުން ނުކުންނަނީއެވެ. ހުރީ ކޮންމެވެސް ކަމަކަށް ވިސްނާށެވެ. އޭނާގެ ފޯނަށް ބަލާލާފައި މަޑުމަޑުން ހިނިތުންވެލިއެވެ.
އެންޒޯ ވަރަށް ބޮޑަށް ސަމާލުވެގެން ބަލަން ހުއްޓެވެ. ދެން.. ކަޅު ކުލައިގެ ކާރެއް ކުރިއަށް ޖައްސާލިއެވެ. އޭނާގެ ލޯ ހަނިވިއެވެ.
“މަޑުކޮށްލާ.”
ފުޓޭޖު ހުއްޓުވިއެވެ.
“އެއީ އަހަރެމެންގެ ކާރެއް ނޫން.”
ސުޕަވައިޒަރު ހުރީ ހައިރާންވެފައެވެ.
“އެކަމަކު އެއީ ހަމަ އެކަހަލަ ކާރެއް.”
“އެއްކަހަލަ ވުމަކީ އެކައްޗަކަށް ވުމެއް ނޫން.”
އެންޒޯ ކައިރިވެލިއެވެ. ކެމެރާ ހުރި ގޮތުން ނަންބަރު ބޯޑު ރަނގަޅަކަށް ނުފެނެއެވެ.
“ފަހަތަށް ޖައްސާބަލަ.”
އަނެއްކާވެސް ފުޓޭޖު ބަލަން ފެށިއެވެ. ކިއާރާ ދޮރު ހުޅުވާލިއެވެ. މަޑުކޮށްލިއެވެ. ދެން އެތެރެއަށް އެރިއެވެ. އެންޒޯގެ ބަނޑަށް ފިނިވެގެން ދިޔައެވެ. އޭނާ އެރީ މަޖުބޫރުވެގެންނެއް ނޫނެވެ. އޭނާ އެރީ އަމިއްލަ އިޚްތިޔާރުގައެވެ. އެއީ ޒިމާންގެ ކާރު ކަމަށް ޤަބޫލުކުރެވުނީތީއެވެ.
“އެ ކާރު ދިޔަ ދިމާލެއް ބެލޭނެތަ؟”
“އަހަރެމެންގެ ކެމެރާތައް ހުންނާނެ ނުކުންނަ ދޮރުމަތީގައި.”
“އެ ނަގާ.”
އަނެއް ސްކްރީން ދިއްލުނެވެ. އެ ކާރު އަނެއްކާވެސް ފެނުނެވެ. އަދި މަދު ސިކުންތުކޮޅެއްގެ ތެރޭގައި މަގުމަތީގެ ބާރުބޮޑު ޓްރެފިކްގެ ތެރެއަށް ގެއްލުނެވެ. އެންޒޯގެ ފޯނު ރިންގުވިއެވެ. އޭނާ ވަގުތުން ޖަވާބު ދިނެވެ.
“ލައްބަ؟”
އެއީ ޒިމާންއެވެ.
“އޭނާ ފެނިއްޖެތަ؟”
އެންޒޯ ސިކުންތެއްގެ ހަތަރުބައިކުޅަ އެއްބައި ވަގުތު މަޑުޖެހިލިއެވެ.
“އޭނާ ކާރަކަށް އަރައިފި.”
“ކާކުގެ ކާރަކަށް؟”
“އަހަރެމެންގެ ކާރެއް ނޫން.”
ހިމޭންކަމެވެ. ޒިމާން ނޭވާލާ އަޑު އެންޒޯއަށް އިވުނެވެ.
“އޭނާ ގެންދިޔައީ މަޖުބޫރުންތަ؟”
“ނޫން.”
އަނެއްކާވެސް ހިމޭންކަމެވެ.
“އޭނާއަށް ހީވީ އެއީ އަހަރެމެންގެ ޑްރައިވަރު ކަމަށް.”
ޒިމާންގެ އަޑު އާދަޔާ ހިލާފަށް މަޑުވެފައި، ނުރައްކާތެރި ގޮތަކަށް ބަދަލުވިއެވެ.
“އެ ކާރު ހޯދާ.”
“އަހަރެމެން އެ މަސައްކަތް ކުރަމުން މިދަނީ.”
“އެ ހޯދާ.”
“ލައްބަ، އަހަރެން ހޯދާނަން.”
ކޯލު ކަނޑާލިއެވެ. އެންޒޯ ސްކްރީނަށް ބަލަހައްޓައިގެން ހުއްޓެވެ. އޭނާއަށް ޒިމާން ރުޅިއައިސްފައި ހުއްޓާ ފެނިއްޖެއެވެ. އޭނާ އަނިޔާވެރިވެފައި ހުއްޓާ ފެނިއްޖެއެވެ. އޭނާގެ ހަށިގަނޑަށްވުރެ ދެގުނަ ބޮޑެތި މީހުން ބިރުގަންނަވާލާ ވަރަށް ފިނިވެފައި ހުއްޓާވެސް ފެނިއްޖެއެވެ. ނަމަވެސް މިއީ ތަފާތު ހާލަތެކެވެ.
ސަބަބަކީ ކިއާރާއަކީ ހަމައެކަނި މުވައްޒަފެއް ނޫނެވެ. އޭނާއަކީ ވިޔަފާރީގެ ބައިވެރިއެއްވެސް ނޫނެވެ. އޭނާއަކީ ޒިމާން އަމިއްލަ ނަފުސުގެ ވަށައިގެން ޖަހާފައިވާ ކޮންމެ ފާރެއް ފޫއަޅުވާލާފައި، އޭނާގެ ހިތާ ހަމައަށް ވާސިލުވި ހަމައެކަނި އިންސާނާއެވެ. އަދި މިހާރު މީހަކު އެހުރީ އޭނާ ގެންގޮސްފައެވެ.
ޒިމާން އެނބުރި އޭނާގެ ކާރަށް ދިޔައިރު، ވަގުތުން އެތެރެއަކަށް ނޭރިއެވެ. އޭނާ ކާރު ކައިރީގައި ހުރެގެން ހޮސްޕިޓަލުގެ ދޮރާ ދިމާއަށް ބަލަހައްޓައިގެން ހުއްޓެވެ. އޭނާގެ ސިކުނޑީގައި އެތައް ޚިޔާލެއް ދައުރުވަމުން ދިޔައެވެ.
ކިއާރާއާ ބެހޭގޮތުން އެނގެނީ ކާކަށް ހެއްޔެވެ؟ އޭނާ ކިއާރާއާ ބައްދަލުކުރާކަން އެނގެނީ ކާކަށް ހެއްޔެވެ؟ އޭނާ ވަޒީފާ އަދާކުރާ ތަން އެނގެނީ ކާކަށް ހެއްޔެވެ؟ އޭނާ ބަލާ ކާރު ފޮނުވާނެކަން އެނގެނީ ކާކަށް ހެއްޔެވެ؟ އޭނާއަކީ ޒިމާންއަށް މުހިންމު މީހެއްކަން އެނގެނީ ކާކަށް ހެއްޔެވެ؟ އެންމެ ފަހު ސުވާލަކީ އޭނާ އެންމެ ބިރުގަންނަވާލި ސުވާލެވެ. ސަބަބަކީ ބައެއްފަހަރު އޭގެ ޖަވާބަކީ ސާފުކޮށް ފެންނަން އޮތް ކަމަކަށް ވާތީއެވެ.
މީހަކު ހުރީ ބަލަބަލައެވެ. މީހަކު ހުރީ އިންތިޒާރުގައެވެ. މީހަކަށް އެކަން ވިސްނުނީއެވެ. އެ މާބޮނޑިތަކެވެ. އެ މެސެޖުތަކެވެ. އެ ޕްރައިވެޓް ނަންބަރެވެ. އެ ހަފުލާއެވެ.
ބައެއްފަހަރު އޭނާ ކިއާރާއަށް ދިން ސަމާލުކަމަކީ އޭނާއަށް ހީކުރެވުނު ވަރަށްވުރެ ބޮޑަށް ބޭރަށް ފެންނަން އޮތް ކަމަކަށް ވެދާނެއެވެ. އޭނާއަށް އައި ބަދަލު މީހަކަށް ފާހަގަވީ ކަމަށްވެސް ވެދާނެއެވެ. އަދި މީހަކު އެކަމުގެ ބޭނުން ހިފަން ނިންމީ ކަމަށްވެސް ވެދާނެއެވެ.
އެންޒޯ ދުވަމުން އެނބުރި އައެވެ.
“އަހަރެމެންނަށް ކޮންމެވެސް އެއްޗެއް ފެނިއްޖެ.”
ޒިމާން އެނބުރުނެވެ.
“ހޮސްޕިޓަލުން ނުކުތުމަށްފަހު ތިން ކެމެރާއަކަށް އެ ކާރު އަރާފައިވޭ.”
“ކޮން ދިމާލަކަށް؟”
“އިރުމަތީ ފަރާތަށް.”
“ނަންބަރު؟”
“އެއްބައި ފެނޭ.”
“އެހެންވީމާ މުޅި ނަންބަރު ހޯދާ.”
“އަހަރެމެން އެ މަސައްކަތް އެބަ ކުރަން.”
ޒިމާން ކާރަށް އެރުމަށް ފިޔަވަޅެއް ކުރިއަށް އެޅިއެވެ.
“ހުރިހާ އެންމެންނަށް ގުޅާ.”
އެންޒޯ ފަހަތުން ދިޔައެވެ. “ހުރިހާ އެންމެންނަށް؟”
“އަހަރެން އިތުބާރުކުރާ ހުރިހާ އެންމެންނަށް.” އޭނާގެ އަޑުގައި ހުރީ ސާބިތުކަމެވެ.
“އަދި އެންޒޯ..” އޭނާ ހުއްޓުނެވެ.
“ލައްބަ؟”
ޒިމާން އޭނާއަށް ބަލާލިއެވެ. އޭނާގެ ލޮލުގައި ހުރި ކުލަވަރުން އެންޒޯގެ ބަނޑަށްވެސް ބިރުވެރިކަން ވަދެގެން ދިޔައެވެ.
“އެއްވެސް މީހަކު އޭނާގެ ގައިގައި އަތްލައިގެން ނުވާނެ.”
އެންޒޯ ބޯޖަހާލިއެވެ. “ވިސްނިއްޖެ.”
“އެއްވެސް މީހަކު އޭނާ ބިރުގަންނަވައިގެން ނުވާނެ.”
އަނެއްކާވެސް ބޯޖަހާލިއެވެ.
“އެއްވެސް މީހަކު އަމިއްލަ ގޮތްގޮތަށް ކަންކަން ކޮށްގެން ނުވާނެ.”
“އަހަރެންނަށް ވިސްނިއްޖެ.”
ޒިމާން ކާރުގެ ދޮރު ހުޅުވާލިއެވެ. ދެން ހުއްޓުނެވެ. އެންމެ ސިކުންތަކަށް އޭނާގެ ލޯ މަރާލިއެވެ. އަދި އާދަޔާ ޚިލާފު ގޮތަކަށް، އޭނާގެ ހަނދާނަށް އައީ އެމީހުން ބައްދަލުވި ފުރަތަމަ ރެއެވެ. ވަރުބަލިވެފައި އިން އަންހެނެކެވެ. ބަހެއްގެ ތެރެއެވެ. އޭނާގެ ބޯ ޒިމާންގެ ކޮނޑުގައި ޖެހިފައި އޮތް ގޮތެވެ. އެ މީރު ވަހެވެ. އަދި އޭނާ ލަދުން އިނދެ މައާފަށް އެދުނު ގޮތެވެ.
“އަހަރެން މިއަށްވުރެ ބަރު ބުރަ އުފުލައިފީމެވެ، ލޯބިވާ..” ޒިމާން އެދުވަހު އެހެން ބުނީ ސަމާސާއަކަށެވެ. ނަމަވެސް މިއަދު އެ ހަނދާނުން އޭނާއަށް ތަދުވެއެވެ. ސަބަބަކީ އެ ކިއާރާ އޭނާއަށް އިތުބާރު ކުރީތީއެވެ. އެއީ ޒިމާންގެ ކާރު ކަމަށް ޤަބޫލުކޮށް، އެ އިތުބާރުގެ މަތީގައި އޭނާ އެ ކާރަށް އެރީތީއެވެ. އަދި އެ އިތުބާރުގެ ސަބަބުން މިއަދު އޭނާ އެވަނީ ގެއްލިފައެވެ.
ޒިމާން ލޯ ހުޅުވާލިއެވެ. އޭނާގެ ރޫހުގެ ތެރޭގައި ހޭލި ކޮންމެ އިޙުސާސެއް މިހާރު ވަނީ ލޯތްބަށްވުރެ ބޮޑަށް ނުރައްކާތެރި ކަމަކަށް ބަދަލުވެފައެވެ. އެއީ ބިރުވެރިކަމެވެ. ރޯ ބިރުވެރިކަމެވެ. އާދަޔާ ޚިލާފު، ރައްކާތެރިކުރުމުގެ ރޫހެކެވެ. އަދި އެ ހުރިހާ ކަމެއްގެ ތެރޭގައި އޭނާ އަމިއްލަ ނަފުސަށް ވީ ވަޢުދެއް އޮތެވެ.
އޭނާ ކިއާރާ ހޯދާނެއެވެ. ކޮންމެ ތަނަކަށް ގެންދިޔަސްމެއެވެ. ކޮންމެ އަގެއް ދައްކަން ޖެހުނަސްމެއެވެ.
*****
ކިއާރާ ލޯ ހުޅުވާލިއެވެ. އަނދިރިކަމެވެ. މުޅި ތަނުގައި އޮތީ ކަނު އަނދިރިކަމެވެ. މަދު ސިކުންތުކޮޅަކަށް އޭނާ ހުރީ ކޮންތާކުކަން ހަނދާނެއް ނުވިއެވެ. ބޯ ހުރީ ވަރަށް ބަރުވެފައެވެ. ވިސްނުންތައް ހުރީ ލަސްވެފައެވެ. އޭނާ ތެދުވަން މަސައްކަތް ކުރިއެވެ. ނަމަވެސް ބޯއެނބުރުމުގެ ސަބަބުން އަނެއްކާވެސް އޮށޯންނަން ޖެހުނެވެ. އޭނާ މަޑުމަޑުން ނޭވާލިއެވެ. އެއްފަހަރު، ދެފަހަރު، ތިންފަހަރުއެވެ.
ދެން ހުރިހާ ކަމެއް ހަނދާނަށް އައެވެ. އެ ކާރެވެ. އެ ޑްރައިވަރެވެ. އެ މެސެޖެވެ. އެ ބުރުވާލި އެއްޗެވެ. އޭނާގެ ބަނޑަށް ބާރުވިއެވެ. އޭނާ ފޯނު ހޯދަން އަތްލިއެވެ. ފޯނެއް ނެތެވެ. ކައިރީގައި ހުރި ތަންތަނުގައި އަތްލިއެވެ. އެއްވެސް އެއްޗެއް ނެތެވެ.
އަނެއްކާވެސް ހަރަކާތްތެރިވާން މަސައްކަތް ކުރިއެވެ. ހަށިގަނޑު ހުރީ ބަލިކަށިވެފައެވެ. ނަމަވެސް ސިކުންތަކަށްފަހު ސިކުންތެއް އޭނާގެ ސިކުނޑި ސާފުވަމުން ދިޔައެވެ. އޭނާ ކަނުލާ އަޑުއެހިއެވެ. ހިމޭންކަމެވެ. ދެން.. ކޮންމެވެސް މެޝިނެއް ހިނގާ އަޑު އިވުނެވެ. ދޮރެއް ލެއްޕުނު އަޑެވެ. ފިޔަވަޅުގެ އަޑެވެ. ކިއާރާގެ ހިތުގެ ތެޅުން އަވަސްވިއެވެ. އޭނާ ހުރީ ކޮންތާކު ކަމެއް ނޭނގެއެވެ. އޭނާ ގެންދިޔައީ ކާކު ކަމެއްވެސް ނޭނގެއެވެ. ނަމަވެސް އެނގޭ އެއް ކަމެއް އެބައޮތެވެ. މިއީ ޒިމާންއެއް ނޫނެވެ.
ކުއްލިއަކަށް ޒިމާންގެ މެސެޖު އޭނާގެ ހަނދާނަށް އައީ ވަރަށް ބޮޑު ތަދަކާއެކުގައެވެ. “ކޮބައިތަ؟ އަހަރެން މިހުރީ ކަންމަތީގައި މަޑުކޮށްގެން.”
އޭނާގެ ލޮލުން ކަރުނަ އޮހިގަތެވެ. އެއީ އޭނާ ބިރުގަތްލެއް ބޮޑުކަމުންނެއް ނޫނެވެ. ނަމަވެސް، އެންމެ ފަހުން އޭނާއަށް ހަޤީޤަތް ވިސްނުނީތީއެވެ. އޭނާ މި ގެންދިޔައީ އޮޅުމަކުން ނުވަތަ މީހަކު ގަސްދުގައި ޒިމާންގެ ނަން ބޭނުންކޮށްގެންނެވެ. އަދި ކޮންމެވެސް ތަނެއްގައި، ދުވަހަކުވެސް އޭނާއާ ބައްދަލުނުވާނެ އަންހެނަކަށް ޒިމާން އިންތިޒާރު ކުރަނީއެވެ.
ކިއާރާ އުނދަގުލުން ކޮޅަށް ތެދުވިއެވެ. އޭނާގެ ދެއަތް ތުރުތުރުލައެވެ. ނަމަވެސް އެ ބިރުވެރިކަމުގެ ތެރެއިން، އޭނާގެ ހިތުގައި އެހެން ކަމެއް އުފެދުނެވެ. އެއީ ޒިމާންއާ ބައްދަލުވުމުގެ މާ ކުރިންވެސް އޭނާގެ ކިބައިގައި ހުރި ސާބިތުކަމެވެ. އޭނާ މީގެ ކުރިންވެސް ބިރުވެރި ހާލަތްތަކާ ކުރިމަތިލައިފިއެވެ. އޭނާއަކީ ނަރުހެކެވެ. އެހެން މީހުން ބިރުން ހާސްވާ ވަގުތުތަކުގައި ކެތްތެރިކަމާއެކު ހުންނަން އޭނާއަށް އެނގެއެވެ.
އެހެންކަމުން އޭނާ ނޭވާ ހަމައަކަށް އެޅުވިއެވެ. މަޑުމަޑުންނެވެ. ސަމާލުކަމާއެކުގައެވެ. އަދި އޭނާގެ ބިރުގެންފައިވާ ރޫހުގެ ފުންމިނުގައި، އެއްކަމެއް ޔަގީންވިއެވެ. އޭނާ ގެއްލިފައިވާކަން ޒިމާންއަށް އެނގޭނެއެވެ. އަދި އެކަން އެނގުމާއެކު އޭނާ ހޯދަން ޒިމާން އަންނާނެއެވެ.
އެ ޚިޔާލަކީ އޭނާއަށް ލިބޭ ހިތްހަމަޖެހުމެއް ކަމެއް ނުވަތަ އިތުރު ބިރުވެރިކަމެއް ކަމެއް އޭނާއަކަށް ނޭނގެއެވެ. ބައެއްފަހަރު އެއީ އެ ދެގޮތްވެސްމެއެވެ. ސަބަބަކީ އެ މާބޮނޑިތަކާއި، “ގުޑް މޯނިން” މެސެޖުތަކާއި، އެމީހުންގެ ރޫހު ގުޅުވައިދޭ ކަމަށް އޭނާއަށް ޤަބޫލުކުރެވުނު ނުފެންނަ ރޮދިފަށުގެ ތެރެއިން، އެއް މުހިންމު ހަޤީޤަތެއް އޭނާ ހަނދާން ނެތުނީއެވެ.
ޒިމާންއަކީ އާދައިގެ މީހެއް ނޫނެވެ. އަދި ކިއާރާ ގެންދިޔަ ބަޔަކަށް އެ ކުރެވުނީ، ކެތްތެރިކަން ކޮޅުންލާފައިވާ މާލޭގެ އެންމެ ނުރައްކާތެރި މީހާއަށް، އޭނާގެ އަސްލު ސިފަ ދައްކާލަން ދެވުނު ފުރުސަތެކެވެ.
(ނުނިމޭ)
