ވީޑިއޯ ކްލަބުން “ޖުންޖުލާ” ބަލައިލުމަށްފަހު، މި އުފެއްދުމުން އެންމެ ބޮޑަށް ހިތުގައި ހަރުލާފައި ވާ ކެރެކްޓަރަކީ ޒަކިއްޔާއެވެ. ޒަކިއްޔާގެ ހިނިގަނޑާއި، ހިމޭންކަމާއި، އޭނާ ވާހަކަ ދައްކާ ތަފާތު ރާގަކީ އެޕިސޯޑު ނިމުނު ފަހުންވެސް ހަނދާނުން ފިލާނެ ކަންތަކެއް ނޫނެވެ.

“ޖުންޖުލާ” ޕޯސްޓަރުތަކުން ސިފަވަނީ ޑާކް ޕޮލިސް ތްރިލަރެއްގެ ގޮތުގައެވެ. ސީރީޒްގެ މައި ކެރެކްޓަރު ޒާރާގެ ރޯލު ކުޅެދެނީ މަޝްހޫރު ބަތަލާ ވާޝިއާ މުޙައްމަދެވެ. ވާޝިއާ ޒާރާގެ ކެރޭކަމާއި، ސާކެޒަމްއާއި، ހަރުކަށި މިޒާޖަށް ބާރުގަދަ ދިރުމެއް ގެނެސްދެއެވެ. ނަމަވެސް، މި ފުރަތަމަ އެޕިސޯޑުގެ ޖަޒުބާތީ ހިތަކީ ޒަކިއްޔާއެވެ.

ޒަކިއްޔާގެ ރޯލު ކުޅެދީފައިވަނީ މަރިޔަމް ނިޝާއެވެ. މީގެ ކުރިން ގިނައިން ލޯބީގެ އަދި ޖަޒުބާތީ ރޯލުތަކުން ފެނުނު ނިޝާ، “ޖުންޖުލާ”އިން ދިވެހި ސްކްރީނަށް އާ މީހެއް ގެނެސްދެއެވެ. މިއީ ނިޝާގެ ފެނުމާއި ހެދުމުގެ ތަފާތެއް އެކަންޏެއްނޫނެވެ. އޭނާ ހިނގާ ގޮތާއި، އިށީންނަ ގޮތާއި، މޫނުމަތީގެ ކުލަވަރާއި، ދެލޮލުން ބަލާ ގޮތާއި ހަމައެކަނި ހިނިގަނޑަކުންވެސް ޒަކިއްޔާއަކީ ފުރިހަމަ މީހެއްގެ ގޮތުގައި އުފައްދައިދެއެވެ.

ފުރަތަމައިން ޒަކިއްޔާ ފެންނަނީ ކުރާނެ ކަމެއް ލަފާކުރަން ނޭނގޭ، އަދި ބުނާ ވާހަކައެއް ގަބޫލުކުރަން ދަތި މީހެއްގެ ގޮތުގައެވެ. އޭނާ މޫނުމަތީގައި ހިނިގަނޑެއް ހުންނައިރުވެސް، އެ ހިނިގަނޑުގެ ފަހަތުގައި ފޮރުވިފައިވާ ވޭނެއް އިހުސާސްކުރެވެއެވެ. ނިޝާގެ ކާމިޔާބީއަކީ، ޒަކިއްޔާ މަޖާ ކެރެކްޓަރަކަށް ހަދާލައި ހުއްޓާނުލާ، އެ މަޖާކަމާއި ވޭނާއި ދެމެދު ވަރަށް ނާޒުކު މިނެއް ގެންގުޅުމެވެ.

މުޖުތަމައު ޒަކިއްޔާއަށް ބަލަނީ “މޮޔަ މީހެއް”ގެ ގޮތުގައެވެ. އޭނާ ބުނާ ވާހަކަތައް އަޑުނުއަހާ، އޭނާއަށް ފެންނަ ކަންތައް މާނައެއް ނެތް ކަންކަމަކަށް ހަދައި ދޫކޮށްލައެވެ. ނަމަވެސް، ވާހަކަ ކުރިއަށްދާ ވަރަކަށް އެނގެން ފަށަނީ، އެންމެން އަޅާނުލާ ދޫކޮށްލާ ކަންކަން އެންމެ ރަނގަޅަށް ފާހަގަކުރަނީ ޒަކިއްޔާކަމެވެ. މީހުން އޭނާއަށް ނުބަލާއިރު، ޒަކިއްޔާ އަނެއް މީހުންނަށް ބަލައެވެ.
ޒަކިއްޔާ އާއި ހޫދުއާ ދެމެދު އޮންނަ ގުޅުމަކީ މި އެޕިސޯޑުގެ އެންމެ އަސަރުގަދަ ބައެވެ. ހޫދުގެ ކެރެކްޓަރު ކުޅެދެނީ މުނީޒެވެ. މި ދެ ކެރެކްޓަރު އެއްތަނަކުން ފެންނަ ހިމޭން ވަގުތުތަކުން، ތަހުގީގުގެ އަޑުގަދަ މަންޒަރުތަކަށްވުރެ މާ ފުން އިހުސާސްތަކެއް ގެނެސްދެއެވެ. ނިޝާއާއި މުނީޒު މާ ވަރުގަދަ ބަސްތަކެއް ނުބުނެވެސް، ދެ ކެރެކްޓަރާ ދެމެދު އޮންނަ ލޯބި، ތަނަވަސްކަން އަދި ގުޅުން ބެލުންތެރިންނަށް އިހުސާސްކޮށްދެއެވެ.

ނިޝާގެ އެކްޓިންގެ ބާރު ފެންނަނީ ބޮޑެތި ޑައިލޮގުތަކުން ނޫނެވެ. ބައެއް ފަހަރު އެއްލޮލުން ބަލައިލާ ބެލުމެވެ. ބައެއް ފަހަރު އަނގަމަތިން ފެންނަ ކުޑަ ހިނިތުންވުމެވެ. ނޫނީ ހުނުން ހުއްޓާލާ ހިމޭން ވަގުތެކެވެ. މި ކުދި ހަރަކާތްތަކުން ޒަކިއްޔާގެ މުޅި ދުނިޔެ ނިޝާ ބެލުންތެރިންނަށް ހުޅުވައިދެއެވެ.

މި ފާޑަކަށް ޒަކިއްޔާ ކުޅެދިނުމުގައި މާ ބޮޑަށް އޯވަރއެކްޓް ކުރަން ފަސޭހައެވެ. ނަމަވެސް، ނިޝާ އެ ކެރެކްޓަރުގައި ހިފަހައްޓައެވެ. އޭނާ ޒަކިއްޔާއަށް ދޭ ބާރާއި، ދޭ މަޑުކަމާއި ދޭ ޖެހިލުންވުމުގައި ހުރެގެން ކެރެކްޓަރަށް ހަގީގީ މީހެއްގެ އިހުސާސް ގެނެސްދެއެވެ.

ފުރަތަމަ ކޮޅުގެ ބައެއް މަންޒަރުތައް ކުރިއަށްދާ ގޮތް ތަންކޮޅެއް އޮމާން ނޫންހެން ހީވެއެވެ. ޑާކް ހިއުމަރާއި ވޭންދެނިވި މައުޟޫއުތަކާ ދެމެދު ކުއްލިއަކަށް ބަދަލުވާ ރާގަށް އާދަވެމަށްވެސް ވަގުތުކޮޅެއް ނަގައެވެ. އެކަމަކު، ޒަކިއްޔާގެ ކެރެކްޓަރު ހުޅުވި، އޭނާގެ ހިތުގެ ފަޅި ފެންނަން ފެށުމާއެކު، މި އުފެއްދުމުން ނަޒަރު ކްތިކޮށްލަން ދަތިވެއެވެ.

“ޖުންޖުލާ” މާކެޓްކޮށްފައިވަނީ ކްރައިމް ތްރިލަރެއްގެ ގޮތުގައި ކަމުގައިވިޔަސް، ފުރަތަމަ އެޕިސޯޑު ނިމޭއިރު އެންމެ ބޮޑަށް ހަނދާނުގައި ހުންނާނީ ކުށެއްގެ ތަފްޞީލެއް ނޫނެވެ. ހަނދާނުގައި ހުންނާނީ ޒަކިއްޔާގެ ހިނިގަނޑެވެ. އޭނާގެ ހިމޭންކަމެވެ. އަދި މީހުން އޭނާއަށް ނުބަލާއިރު، އޭނާ ދުނިޔެއަށް ބަލާ ގޮތެވެ.

މަރިޔަމް ނިޝާގެ ކެރިއަރުގެ އެންމެ ކެރޭ، އެންމެ ތަފާތު އަދި އެންމެ ހަނދާނުގައި ހުންނާނެ ރޯލުތަކުން މިއީ އެއް ރޯލެވެ. ޒަކިއްޔާއަކީ ނިޝާ ކުޅެދޭ ކެރެކްޓަރެއް އެކަނި ނޫނެވެ؛ ސްކްރީން ނިވާވުމުންވެސް ބެލުންތެރިންނާއެކު ބަހައްޓާލާ މީހެކެވެ.

“ޖުންޖުލާ”އަކީ ވަރުގަދަ ފެށުމެކެވެ. ނަމަވެސް، މި ފެށުމުގެ އެންމެ ބޮޑު ވާހަކައަކީ މަރިޔަމް ނިޝާގެ ޒަކިއްޔާއެވެ.
ރޭޓިންގް: 4.8/5