ފާރަވެރި ގަލަން
ވަގުތުކޮޅަކަށް މިރުޒާ ބަސްހުއްޓުނެވެ. އެހެން މީހުންގެ ވާހަކަތައް މެދުނުކެނޑި ކުރިއަށް ދިޔައެވެ. ބަދިގޭގައި ހުރި ކެޓަލްގެ އަޑު އިވެމުންދިޔައިރު، ފަރުދާތަކުގެ ތެރެއިން ފޭދިގެން އައި އިރުގެ އަލިކަން ތަޅުންގަނޑަށް އެޅިފައި ހުއްޓެވެ. އެއީ އާދައިގެ މެންދުރުފަހެކެވެ. ކުރިން ނަމަ އިރުއޮއްސުމުގެ ކުރިން އޭނާ ހަނދާން ނެތޭނެ ފަދަ ވަގުތެކެވެ.
ނަމަވެސް، އެ ޖުމްލަ އޭނާގެ ހަނދާނުގައި ހަރުލިއެވެ. ވަޝިއްޔާ އެ ވާހަކަ ބުނިއިރު ބަލާލި ގޮތް އޭނާ ހަނދާން ހުއްޓެވެ. އެއީ އޭނާއާ ދެކޮޅަށް ބުނި އެއްޗެއް ނޫނެވެ. ނަމަވެސް އޭނާއަށް ފެންނަ ހަޤީޤަތެއް ވަރަށް ސާދާކޮށް ބުނެލީއެވެ.
“ލިޔަނީ ކޮން ކަންތައްތަކަކާ ބެހޭގޮތުން؟” އިރުކޮޅަކުން މިރުޒާ އެހިއެވެ.
“ފެންނަ ކަންތައްތަކާއި، ދަސްވާ ކަންތައްތައް. ތަންތަނާއި، މީހުންނާއި، އަދި ކުރެވޭ ތަޖުރިބާތައް.”
“މީހުންނާ ބެހޭގޮތުން ލިޔާތީ އެމީހުން ހިތްހަމަނުޖެހޭނެތަ؟”
“އެމީހުންގެ ނަން ނުލިޔާނަމަ އެކަމެއް ނުވާނެ.”
“އެއީ ވަރަށް ފަސޭހަ ގޮތެއް.”
“ވެދާނެ.” ހިނިތުންވެލަމުން ވަޝިއްޔާ ޖަވާބުދިނެވެ. “ނަމަވެސް ބައެއް ފަހަރު މީހެއްގެ އެންމެ ޝައުޤުވެރި ކަމަކަށް ވަނީ އެމީހަކު ދުވަހަކުވެސް ދުލުން ބޭރުނުކުރާ ވާހަކަތައް.”
މިރުޒާ ބަލަން ހުންނަންޖެހޭ ވަރަށްވުރެ ގިނައިރު އޭނާއަށް ބަލަން ހުއްޓެވެ. އޭނާ ދުނިޔެއަށް ދައްކާ ސޫރައިގެ ފުރަގަހުގައިވާ އަސްލު މިރުޒާ ވަޝިއްޔާއަށް އެނގިއްޖެނަމަ، އޭނާއާ ބެހޭގޮތުން ލިޔާނީ ކީކޭބާވައޭ އޭނާގެ ހިތަށް އެރިއެވެ. އޭނާގެ ކެރޭ ގޮތާއި، މީހުން ހެއްވާލުމުގެ ހުނަރާއި، އަދި އެހެން މީހުންނަށް އޭނާ ވާ އެހީތެރިކަމުގެ ވާހަކަ ލިޔާނެ ބާވައެވެ؟ އެކި ވާހަކަތަކުގެ ތެރެއަށް އޭނާ ވަންނަ ފަސޭހަކަމާއި، މަޖިލީހެއްގެ މާހައުލު ދެނެގަންނަ އަވަސްކަމާއި، އަދި މީހުންގެ މައްސަލަތައް ހައްލުކޮށްދޭ މީހެއްގެ ގޮތުގައި އެންމެން އޭނާ ބަލައިގަންނަ ގޮތް ވަޝިއްޔާއަށް ފާހަގަވާނެ ބާވައެވެ؟
ނުވަތަ އޭނާގެ އަނެއް ފަރާތް ފެންނާނެ ބާވައެވެ؟ ދަންވަރު ރާވާ ސިއްރު ރޭވުންތަކެވެ. ހަމައެކަނި އުފާކޮށްލުމަށް ބާއްވާ ޕާޓީތައް ނޫން އެހެން ކަންތައްތަކެވެ. އޭނާގެ ގާތަށް އުފާ ހޯދަން އައިސް، އޭނާ ދޭ ތަކެއްޗަށް ދެވިހިފާފައި ތިބޭ މީހުންނެވެ. މަޖަލުގެ ނަމުގައި ބަދަލުކުރެވޭ މަސްތުވާތަކެއްޗާއި، ސިއްރުން އަތުން އަތަށް ބަދަލުވާ ފައިސާއާއި، މަޖުބޫރުކަމަކަށް ބަދަލުވާ އެހީތެރިކަމެވެ. އަދި ބޭރުފުށުން ފެންނަ ޝަރަފުވެރި ސޫރައިގެ ފުރަގަހުގައި އޮތް އޭނާގެ އަމިއްލަ އަނދިރި ދުނިޔެއެވެ.
އޭނާއަށް އެންމެ މުހިންމީ ކޮން ކަމެއްކަން ނިންމާކަށް ނޭނގުނެވެ. އެއީ ވަޝިއްޔާއަށް އޭނާގެ އަސްލު އެނގުމެވެ. ނުވަތަ އެކަން ދެނެގަންނަން މަސައްކަތްކުރާ ވަރަށް ވުރެ ބޮޑަށް އޭނާ އެކަމުން ދުރުވެ ހުރުމެވެ.
*****
ވަޝިއްޔާ ދިޔައީ ލަންކާގެ ދިރިއުޅުމަށް ދުވަހަކަށްފަހު ދުވަހަކުން ހޭނެމުންނެވެ. އޭނާ އެކި ބާޒާރުތަކަށް ގޮސް، އަމިއްލަ ވަޒަނުގެ ރަހަތައް ލިބެން ހުންނަ ފިހާރަތަކަށް ޒިޔާރަތްކޮށް، މަގުތަކާއި އިމާރާތްތަކުގެ ފޮޓޯ ނަގައި، އޭނާއަށް ފާހަގަކުރެވޭ ކަންކަން ފޮތެއްގައި ނޯޓުކުރަމުން ދިޔައެވެ. އެހެން މީހުންނަށް ފާހަގަނުވާ ކުދިކުދި ކަންކަން އޭނާއަށް ފާހަގަވެއެވެ. އެގޮތުން، ބާރުބޮޑު މަގުތަކުގެ މައްޗަށް ހަވީރުގެ އަތްވާއި އަލިކަން އެޅިފައި ހުންނަ ގޮތާއި، ކްލިނިކްތަކުގެ ބޭރުގައި މަޑުކޮށްގެން ތިބޭ މީހުންގެ މޫނުމަތިން ފެންނަ އަސަރުތަކާއި، އަބަދު އަންނަ ކަސްޓަމަރުން ފާހަގަކޮށް ފިހާރަވެރިން ދައްކާ އޯގާތެރިކަމުގެ އިތުރުން، އެ ތަނަކަށް ޒިޔާރަތްކުރާ މީހަކަށް ވުމާއި އެ ތަނެއްގައި ދިރިއުޅޭ މީހުންގެ ދިރިއުޅުން ދެނެގަންނަން ފެށުމާ ދެމެދު ހުންނަ ތަފާތު އޭނާއަށް އިޙުސާސްވިއެވެ.
ބައެއް ފަހަރު އޭނާ މި ހޯދުންތައް މިރުޒާއާ ހިއްސާކުރެއެވެ. އަނެއްބައި ފަހަރު އޭނާއާ ޚިޔާލު ތަފާތުވެއެވެ. އަދި ބައެއް ފަހަރު، މިރުޒާ އޭނާއަށް ދައްކުވައިދޭ އާދައިގެ ރައްކާތެރި ދުނިޔެއާ އެއްވެސް ގުޅުމެއް ނެތް ފަދަ ސުވާލުތަކުން އޭނާ ހައިރާންކޮށްލައެވެ.
“މިތަނުގައި ދިރިއުޅެން ކަމުދޭތަ؟” އެއްދުވަހަކު ރޭގަނޑުގެ ކެއުމަށްފަހު އެންމެންނާއެކު ތިއްބާ ވަޝިއްޔާ ސުވާލުކުރިއެވެ.
މިރުޒާ އޭނާގެ ގޮނޑީގައި ލެނގިލިއެވެ. “ކަމުދޭހޭ؟ މީގެ ފައިދާތަކެއް އެބަހުރި.”
“އަހަރެން އެހީ އެހެންނެއް ނޫން.”
އޭނާ ވަޝިއްޔާއާ ދިމާލަށް އެނބުރުނެވެ. “ތިޔަ އެހީ ކީކޭ؟”
“މިތަނުގައި ދިރިއުޅުން ކަމުދޭތޯ؟”
މިރުޒާއަށް ވަރަށް ގިނަ ޖަވާބު ދެވުނީހެވެ. ލިބެން ހުރި ފުރުސަތުތަކާއި، ފައިސާއާއި، މިނިވަންކަމާ ބެހޭގޮތުން ވާހަކަ ދެއްކުނީހެވެ. ނުވަތަ އަމިއްލަ ވަޒަނާ ދުރުގައި ހުރުމުން އޭނާގެ މާޒީ އެނގޭނެ މީހަކު ނެތުމުގެ ލުއިފަސޭހަކަމާ ބެހޭގޮތުންވެސް ބުނެވުނީހެވެ. ނަމަވެސް، އޭނާ ބުނީ، “އަހަރެން ހީކުރަނީ މިހާރު މިކަމަށް ހޭނިއްޖެ ކަމަށް.” މިހެންނެވެ.
ވަޝިއްޔާ އެއާމެދު ވިސްނާލިއެވެ. “ކަމަކަށް ހޭނުމާއި އެކަމެއް ކަމުދިއުމަކީ ދެކަމެއް.”
“އަދި ކިރިޔާ އައި މީހަކާ ބަލާފައި ތިޔަ ކުރަނީ ވަރަށް އުނދަގޫ ސުވާލުތަކެއް.” މިރުޒާ ބުންޏެވެ.
“އަދި މިތަނުގައި އެހާ ގިނަ ދުވަހު އުޅުނު މީހަކާ ބަލާފައި ތިޔަ އުޅެނީ އާދައިގެ ސުވާލުތަކަށް ޖަވާބު ނުދީ.” ވަޝިއްޔާ ރައްދުގައި ބުންޏެވެ.
މިރުޒާ ހިނިތުންވެލިއެވެ. “ނޯޓުފޮތުގައި ތިޔަ ލިޔަނީ މީހުން ގުބޯ ހަދާލާ ކަހަލަ ވާހަކަތައްތަ؟”
“ހަމައެކަނި ޝައުޤުވެރި ވާހަކަތައް.”
“އަދި އަހަރެން މިއީ ޝައުޤުވެރި މީހެއްތަ؟”
ވަޝިއްޔާ އޭނާއަށް ބަލާލިއެވެ. އޭނާގެ މޫނުމަތިން ސީރިއަސްކަން ފެނުނު ނަމަވެސް، ލޮލުން ފެންނަނީ މަޖާވެފައި ހުރި ކަމުގެ އަސަރެވެ. “އަދި ގޮތެއް ނުނިންމަން.”
މިއީ އާދައިގެ ޖަވާބަކަށް ވާންޖެހޭނެއެވެ. މީގެ ކުރިންވެސް އަންހެނުންނާއެކު އޭނާ ބަދަލުކޮށްފައިވާ ކަހަލަ ސަމާސާ ވާހަކައެކެވެ. ނަމަވެސް ވަޝިއްޔާ އެ ޖަވާބު ދިނީ ކުޅިވަރަކަށް ނޫނެވެ. އޭނާ އެ ބުނީ ބުނަން ބޭނުންވި އެއްޗެކެވެ. އެއްވެސް ކަމެއް ނުކޮށް ހުއްޓާ މީހުންގެ ތަޢުރީފު ލިބުމަށް އާދަވެފައިވާ މިރުޒާއަށް، ވަޝިއްޔާގެ ކުރިމަތީގައި ޝައުޤުވެރި މީހަކަށް ވުމުގެ ބޭނުންތެރިކަން އިޙުސާސްވިއެވެ. ހަމައެކަނި މުއްސަނދި ނުވަތަ ނުފޫޒުގަދަ މީހަކަށް ވުމުގެ ބަދަލުގައި، ޝައުޤުވެރި އިންސާނަކަށް ވުމަށެވެ. މިއީ އޭނާއަށް އާ އިޙުސާސެކެވެ.
*****
އެ ދެމީހުންގެ ދެމެދުގައި އުފެދުނު ޝައުޤުވެރިކަމަކީ ކުއްލިއަކަށް ފާޅުވި ކަމެއް ނޫނެވެ. އެއީ ކުދިކުދި ކަންކަމުގެ ތެރެއިން އުފެދުނު ގުޅުމެކެވެ. ބޭނުންވާ ވަރަށްވުރެ ދިގުލައިގެންދާ ވާހަކަތަކާއި، ވަޝިއްޔާ ފެނުމުގެ ކުރިން އޭނާގެ ހިނިގަނޑުގެ އަޑު މިރުޒާއަށް ފާހަގަވާން ފެށުމާއި، މަޖާ ކަމެއް ދިމާވުމުން މިރުޒާއަށްވެސް އެކަން ފާހަގަވިތޯ ބަލާލުމަށް ވަޝިއްޔާ އެނބުރިލާ ގޮތުން އެކަން އެނގެއެވެ.
މިރުޒާ އެ އެޕާޓްމަންޓަށް ޒިޔާރަތްކުރާނެ ބަހަނާތައް ހޯދައެވެ. ނަމަވެސް އެހެން މީހުންނަށް ޝައްކު ނުވާނޭހެން އޭނާ ސަމާލުވެއެވެ. ވަޝިއްޔާ ބުނާ ކުދިކުދި ވާހަކަތަކާއި، އޭނާ ކާން ބޭނުންވާ ތަކެއްޗާއި، ބަލަން ބޭނުންވާ ތަންތަން މިރުޒާ ހަނދާން ބަހައްޓައެވެ. ވަޝިއްޔާ ވަކި އެއްޗެއް ނުލިބިގެން އުޅޭ ވާހަކަ ބުނާއިރަށް، އެ އެއްޗެއް ގަންނަން ލިބޭނެ ތަނެއް މިރުޒާއަށް އެނގެއެވެ. އެންމެން އެކުގައި ދަތުރު ރާވާއިރު، މިރުޒާ އެހީތެރިވެދެއެވެ. މި ހުރިހާ ކަމަކީވެސް ވަކިވަކިން ބަލާއިރު އާދައިގެ ކަންކަމެވެ. ނަމަވެސް އެއްކޮށްލުމުން އެއީ ވަކި މަޤުސަދެއްގައި ކުރާ ކަންކަންކަން އެނގެއެވެ.
ވަޝިއްޔާއަށް މިކަން ފާހަގަވެއެވެ. އޭނާއަކީ މޮޔައެއް ނޫނެވެ. އޭނާއަށް މިރުޒާގެ ދުނިޔެ ނޭނގުނަސް، މީހަކު އޭނާއަށް ދޭ ސަމާލުކަން ދެނެގަންނަން އެނގެއެވެ. މިރުޒާ ބަލާލާ ގޮތާއި، ވާހަކަދައްކާއިރު އަޑަށް އަންނަ ބަދަލާއި، ގިނަ ބައެއްގެ ތެރޭގައި ހުންނައިރުވެސް ވަޝިއްޔާ ހުރި ތަނަކަށް އޭނާ ސަމާލުވާކަން ވަޝިއްޔާއަށް އެނގެއެވެ.
އަދި މިރުޒާއަކީ އޭނާއަށް އާންމުކޮށް ފެންނަ ފިރިހެނުންނާ ތަފާތު މީހެއްކަންވެސް އޭނާއަށް ފާހަގަވިއެވެ. އޭނާއަކީ އިތުބާރާއެކު ވާހަކަދައްކާ، އަޑުއަހަން ދަންނަ، އަދި ކޮންމެ ފަދަ މީހަކާވެސް ގުޅިގެން އުޅެން ދަންނަ ހުނަރުވެރި މީހެކެވެ. މި ހުރިހާ ސިފަތަކަކަށް ވަޝިއްޔާގެ ހިތް ދެވުނެވެ.
ނަމަވެސް، ބައެއް ފަހަރު މިރުޒާގެ ފަރާތުން އޭނާއަށް ބުނެދޭން ނޭނގޭ ކަންތައްތަކެއް ފާހަގަވެއެވެ. ބައެއް ފަހަރު ފޯނެއް އައުމުން މިރުޒާ އެކަހެރިވެލައެވެ. އަދި އެނބުރި އަންނައިރު ހުންނަނީ ވަރަށް ބޮޑަށް ސީރިއަސްވެފައެވެ. ބައެއް ފަހަރު މީހުން އައިސް އޭނާއާ ކުއްލި ކަންތައްތަކާ މަޝްވަރާ ކުރެއެވެ. މިރުޒާ ވާހަކަދައްކަން ފެށުމުން، އޭނާގެ ވަށައިގެން ތިބޭ މީހުންގެ ސަމާލުކަން ވަގުތުން އޭނާއަށް ހުއްޓެއެވެ. ވަޝިއްޔާއަށް މި ބަދަލުތައް ފާހަގަވީ ނަމަވެސް، އޭގެ ފުރިހަމަ މާނައެއް އަދި އޭނާއަކަށް ނޭނގެއެވެ.
*****
އޭނާ ސްރީލަންކާއަށް އައީ ބަލިމަޑުކަމަށް ފަރުވާ ހޯދުމަށާއި، ވިޔަފާރިކުރުމަށާއި، ތަންތަން ބަލައިލުމުގެ އިތުރުން މަދު މަސްތަކެއްގެ އާދައިގެ ދަތުރެއްގެ އުންމީދުގައެވެ. އޭނާ އައީ ސިއްރުތަކެއް ހޯދާކަށް ނޫނެވެ. އަދި އެކި ގޮތްގޮތަށް ދިރިއުޅުން ބައްޓަންކޮށްފައިވާ މީހެއްގެ މައްޗަށް އޭނާގެ ޝައުޤުވެރިކަން ހިނގައިދާނެ ކަމަކަށް އޭނާ ކުޑަކޮށްވެސް އުންމީދެއް ނުކުރެއެވެ.
މިވަގުތަށް އޭނާއަށް ފެންނަނީ އެ ފިރިހެންމީހާ އޭނާއަށް ދައްކަން ބޭނުންވާ ސިފަތަކެވެ. އެހީތެރިކަން ފޯރުކޮށްދޭ އެއް ޤައުމެއްގެ އަޚެކެވެ. އޭނާ ހެއްވާލެވޭ ފަދަ ސަމާސާ މިޒާޖެއްގެ މީހެކެވެ. އަދި އޮޅުންބޮޅުން ބޮޑު މި ދުނިޔޭގައި ކަންކަން ކުރަންވީ ގޮތް ރަނގަޅަށް ދަންނަ މީހެކެވެ.
(ނުނިމޭ)
