ފިލްމު އުފެއްދުންތެރިޔާ ކަރަން ޖޯހަރް ހުށަހަޅައިދޭ މަޤުބޫލު ސެލެބްރިޓީ ޗެޓް ޝޯވ “ކޮފީ ވިތު ކަރަން” ގެ ނުވަވަނަ ސީޒަނާއެކު މި ޝޯވ ނިންމާލަން އުޅޭ ކަމަށް ޚަބަރުތައް ބުނަން ފަށައިފިއެވެ. ކަރަން އަންނަނީ އޭނާގެ އަމިއްލަ ޕްރޮޑަކްޝަން ބެނާގެ ދަށުން އައު ޓޯކް ޝޯވއެއް ފެށުމަށް ތައްޔާރުވަމުން އަންނަ ކަމަށް ވެއެވެ.
“މިޑް-ޑޭ” އިން ޙިއްސާކޮށްފައިވާ ގޮތުގައި، ކަރަން ޖޯހަރް އައު ޗެޓް ޝޯވއެއް ފަށަން ނިންމާފައިވަނީ އެ ޕްރޮގްރާމްގެ ފުރިހަމަ މިލްކުވެރިކަން އޭނާގެ އަމިއްލަ ކުންފުންޏަށް ލިބޭ ގޮތަށެވެ. ބެލެވޭ ގޮތުގައި “ކޮފީ ވިތު ކަރަން” ނިންމާލުމަށްފަހު އައު ފޯމެޓަކަށް މަސައްކަތް ކުރަން އޭނާ ނިންމި އެއް ސަބަބަކީ މިއީއެވެ.
މި އައު ޝޯވ ދައްކާނެ ޕްލެޓްފޯމާއި، ފަށާނެ ތާރީޚާއި، އޭގެ ފޯމެޓާ ގުޅޭ ތަފްސީލީ މަޢުލޫމާތުތައް އަދި ހާމަކޮށްފައި ނުވި ނަމަވެސް، ޝޯވގެ މައިގަނޑު ކޮންސެޕްޓް މިހާރު އެކުލަވާލެވިފައިވާ ކަމަށް ރިޕޯޓްތައް ބުނެއެވެ. އެހެންނަމަވެސް، ކަރަން ޖޯހަރް ނުވަތަ މިކަމާ ގުޅުންހުރި އެއްވެސް ފަރާތަކުން ރަސްމީކޮށް އަދި މިކަން ކަށަވަރުކޮށްދީފައެއް ނުވެއެވެ.
މީގެ ކުރިން އާންމުކުރި ޓީޒާއެއްގައި ކަރަން ވަނީ “ކޮފީ ވިތު ކަރަން” ގެ ނުވަވަނަ ސީޒަނަކީ އެ ޝޯވގެ ފަހު ސީޒަންކަން ކަށަވަރުކޮށްދީފައެވެ. އެ ވީޑިއޯގައި ކަރަން ވަނީ 2004 ވަނަ އަހަރު މިފަދަ ޝޯވއެއް އުފެއްދުމުގެ ޚިޔާލު އޭނާގެ ބައްޕަ ޔަޝް ޖޯހަރާ ހިއްސާކުރި ހަނދާންތައް އާކުރަމުން އަސަރާއެކު ވާހަކަދައްކާފައެވެ. އޭނާގެ ބައްޕަ ނިޔާވީ އެ ޝޯވ ފެށިތާ މާގިނަ ދުވަސްތަކެއް ނުވަނީސް ކަމަށާއި، ނަމަވެސް އެ ޝޯވއަކީ އޭނާގެ ކެރިއަރުގައި ވަރަށް ދިގު މުއްދަތަކަށް ދެމިގެންދިޔަ މުހިންމު ބަޔަކަށް ވެގެންދިޔަކަން އޭނާ ފާހަގަކުރިއެވެ.
މީގެ އިތުރުން، މި ޝޯވގެ ސަބަބުން އޭނާއާ “ނެޕޮޓިޒަމް” ނުވަތަ އާއިލީ ނުފޫޒުގެ ލޭބަލް އެޅުވިފައިވާ ގޮތުގެ މައްޗަށްވެސް ކަރަން އަލިއަޅުވާލިއެވެ. އަދި ޝޯވއަށް އައި މެހެމާނުންގެ ތެރެއިން ބައެއް މީހުން ލޯބީގެ ގޮތުން ގުޅި ފަހުން ކައިވެނިކުރިއިރު، އަނެއް ބަޔަކު ވަކިވެގެންދިޔަ ހަނދާންތައްވެސް އޭނާ އާކުރިއެވެ. މަޖާޒީ ގޮތަކަށް ވާހަކަދައްކަމުން ކަރަން ބުނީ، މި ޝޯވގެ ސަބަބުން ޤައުމީ ފެންވަރުގެ ބައެއް މަޝްހޫރު ތަރިންގެ ކެރިއަރުވެސް ބައެއް ފަހަރު ނުރައްކަލުގެ ތެރެއަށް ވެއްޓުނު ކަމަށެވެ.
މި ޓީޒާ ނިންމާލަމުން ކަރަން ވަނީ އެންމެ ފަހު “ކޮފީ ތަށީގައި” ބައިވެރިވުމަށް ބެލުންތެރިންނަށް ދަޢުވަތު އަރުވާފައެވެ. ފިލްމު އުފެއްދުންތެރިޔާ ކަރަން ޖޯހަރް ހުށަހަޅައިދޭ “ކޮފީ ވިތު ކަރަން” އަކީ މަޝްހޫރު ފަންނާނުންނާ ކުރެވޭ ފާޅުކަން ބޮޑު ސަމާސާ ވާހަކަތަކާއި، އަވަސް ސުވާލުތަކަށް ނުވަތަ “ރެޕިޑް ފަޔަރ” އަށް މަޤުބޫލުވެފައިވާ ޝޯވއެކެވެ. ފިލްމީ ދާއިރާގައި އޮންނަ އޭނާގެ ގާތް ގުޅުންތަކުގެ ބޭނުން ހިފައިގެން، ކަރަން ވަނީ މަޖާ މާހައުލެއްގައި ކުރާ ފުން ސުވާލުތަކުގެ އެހީގައި، މެހެމާނުންގެ ފަރާތުން ހަނދާން ނައްތާލަން ދަތި ހަޤީޤަތްތަކާއި އިޢުތިރާފުތައް ބެލުންތެރިންނާ ހަމައަށް ގެނެސްދީފައެވެ.
މި ޝޯވގެ ފުރަތަމަ ހަ ސީޒަން 2004 އިން 2019 އަށް “ސްޓާ ވޯލްޑް އިންޑިއާ” އިން ދައްކާފައިވާއިރު، މިއީ އެ ޗެނަލްގެ އެންމެ ފާހަގަކޮށްލެވޭ އެއް ޕްރޮގްރާމެވެ. އޭގެ ފަހުން މި ޝޯވ އޯ.ޓީ.ޓީ ޕްލެޓްފޯމަށް ބަދަލުވެ، ޑިޖިޓަލް މީޑިއާ މެދުވެރިކޮށް ކުރިއަށްވުރެ ފުޅާ ދާއިރާއެއްގައި ބެލުންތެރިންނާ ހަމައަށް ވާސިލުވެފައިވެއެވެ.
