ހުވަފެންތަކުގެ މައިދާން – ނަސީމާގެ ތާރީޚީ ކާމިޔާބީ

ޝަރީއަތުގެ ބޮޑު މަރުހަލާ ކާމިޔާބުކަމާއެކު ނިމި، އަނިޔާވެރިންގެ މައްޗަށް އިންސާފުގެ ދަންމަރު އުފުލިގެން ދިޔުމާއެކު، މުޅި ޤައުމުގެ ސަމާލުކަން އެހެން ދިމާއަކަށް އެނބުރެން ފެށިއެވެ. އެއީ ދިވެހިރާއްޖޭގެ އަންހެން ކްރިކެޓް ޓީމު ބައިނަލްއަޤުވާމީ މުބާރާތަކަށް ތައްޔާރުވަމުންދިޔަ ދަނޑިވަޅެވެ. ސައުތު އޭޝިއަން ވިމެންސް ކްރިކެޓް ޗެމްޕިއަންޝިޕްގެ ފައިނަލް ބުރު މާލޭގެ އެކުވެނި ކްރިކެޓް ދަނޑުގައި ބޭއްވުމަށް ހަމަޖެހިފައިވާއިރު، ޤައުމީ ޓީމުގެ އެންމެ އުންމީދީ އައު ކުޅުންތެރިއަކަށް އިރުޝާދު ދެވެމުން ދިޔައީ ނަސީމާ ޒާހިރަށެވެ.

ނަސީމާ ކޮންމެ ދުވަހަކު ފަތިހު ފަހެއް ޖަހާއިރު ދަނޑަށް ނުކުމެއެވެ. އޭނާގެ ހަށިގަނޑުން އޮހޮރޭ ދަލަކީ އޭނާގެ ހުވަފެންތަކުގެ އަގެވެ. ބައްޕަގެ ހަރުކަށި ބަންދާއި، އިންސާނީ ވަގުފާރީގެ ކަޅު އަނދިރި ދަލުގައި ހޭދަކުރި ދުވަސްތަކަކީ އޭނާގެ ހަށިގަނޑާއި ސިކުނޑި ބަލިކަށިކޮށްލި ކަންކަމެއް ނޫނެވެ. އެއީ ދަނޑުމަތީގައި ދުވަހަކުވެސް ބަލިނުވުމަށް އޭނާގެ އެތެރޭގައި އެޅުނު އެންމެ ވަރުގަދަ ބިންގަލެވެ. ކޯޗުންގެ އިރުޝާދުގެ ދަށުން އޭނާ ވެގެންދިޔައީ ޓީމުގެ އެންމެ ހުޝިޔާރު އޯލްރައުންޑަރަށެވެ. ބޯޅަ އުކުމުގައި ހަލުވި، އަދި ބެޓިންގައި ބިރުކުޑަ، ޖެހިލުންކުޑަ ކުޅުންތެރިއަކަށެވެ.

ފައިނަލް މެޗު އޮތް ދުވަހެވެ. މުޅި އެކުވެނި ދަނޑު އޮތީ ރަތާއި ފެހި އަދި ހުދުކުލައިގެ ޤައުމީ ދިދަތަކުން ފުރިފައެވެ. ސަޕޯޓަރުންގެ އަޑުގަދަ ހަޅޭކާއި ތާޅަފިލީގެ އަޑުން މުޅި ސަރަހައްދު ގުގުމަމުން ދިޔައެވެ. ދިވެހިރާއްޖެއާ ދެކޮޅަށް ނުކުތީ މި ސަރަހައްދުގެ އެންމެ ވަރުގަދަ އެއް ޓީމެވެ.

ދަނޑުގެ ވީއައިޕީ ސްޓޭންޑުގައި ޚާއްސަ ދަޢުވަތަކަށް އައިސް ތިބީ ރާކިޔާއާއި ޖަމްޝީދެވެ. ރާކިޔާ ލައިގެން ހުރީ ޤައުމީ ޓީމުގެ ޖާޒީއެވެ. އޭނާގެ މޫނުމަތިން ފެންނަނީ ނަސީމާއަށްޓަކައި އޮތް ފަޚުރުވެރިކަމެވެ. ޖަމްޝީދު ރާކިޔާގެ ގާތުގައި އިނދެ، އެކުގައި ދަނޑަށް ބަލަހައްޓައިގެން ހުރީ އުފާވެރިކަމުން ފުރިގެންވާ ހިތަކާއެކުގައެވެ. އެމީހުންގެ ސަބަބުން މިނިވަންވި، އެމީހުންގެ ލޯބިވާ އެކުވެރިޔާ މިއަދު ޤައުމީ ޝަރަފުގެ އެންމެ އުހަށް އަރައިގެންދާ މަންޒަރު ދެކުމަކީ އެ ދެމީހުންނަށް ލިބުނު ބަޔާންކުރަން ދަތި ހިތްހަމަޖެހުމެކެވެ.

އެހެންނަމަވެސް، އެންމެން ހައިރާންކޮށްލި މަންޒަރަކީ، ސްޓޭންޑުގެ އާދައިގެ ސީޓުތަކުގެ ތެރޭގައި އިސްޖަހައިގެން އިން ނަސީމާގެ ބައްޕަ ޒާހިރު ފެނުމެވެ. ދަރިފުޅަށް ކުރި އަނިޔާތަކާއި، އަންހެން ދަރިންނަކީ ބޭކާރު ބައެއް ކަމަށް ދެކުނު ދެކުމާމެދު އޭނާ މިއަދު ވަނީ އިންތިހާއަށް ލަދުގަނެފައެވެ. ނަސީމާ ކޯޓުގައި ދެއްކި ހިތްވަރާއި، ޤައުމީ ޓީމަށް ހޮވިގެން އައި ޚަބަރުތަކުން އޭނާގެ ހަރު ހިތް ވަނީ ވިރިފައެވެ. އޭނާ އައީ ދަރިފުޅުގެ ކިބައިން މާފަށް އެދުމަށާއި، ދުރުން ނަމަވެސް ދަރިފުޅަށް ހިތްވަރު ދިނުމަށެވެ.

މެޗު ފެށިގެން ދިޔައީ ވަރަށް ފޯރީގައެވެ. އިދިކޮޅު ޓީމުން ފުރަތަމަ ކުޅެ، ބޮޑު ސްކޯއެއް ހެދިއެވެ. ރާއްޖޭގެ ޓީމު ޖަވާބުގައި ކުޅެން އަރައި، ކުރީކޮޅު މުހިންމު ވިކެޓްތަކެއް ގެއްލި، ބޮޑު ޕްރެޝަރަކާ ކުރިމަތިލާން ޖެހުނެވެ. ދިވެހި ސަޕޯޓަރުންގެ އަޑު މަޑުވެ، މާޔޫސްކަމުގެ ހިޔަނި ދަނޑަށް ވެރިވަމުން ދިޔައެވެ. އެވަގުތު، ހަތްވަނަ ނަންބަރަށް ބެޓު ކުރަން ނުކުތީ ނަސީމާއެވެ.

ނަސީމާ ހެލްމެޓް އަޅައި، ބެޓު އަތަށް ހެޔޮވަރުކޮށްލަމުން ދަނޑުގެ މެދަށް ހިނގައިގަތެވެ. އޭނާގެ ލޮލުގައި ވަނީ ސާބިތުކަމެވެ. އޭނާއަށް ހަނދާންވީ ކުޑައިރު ރަށުގެ ގޯތިތެރޭގައި ލަކުޑިބުރިއަކުން ބޯޅައިގައި ޖެހި ދުވަސްތަކެވެ. ބައްޕަ އެ ބޯޅަ ފަޅާލި ދުވަހެވެ. އަދި އިންސާނީ ވަގުފާރީގެ ގުދަނުގެ ދަގަނޑު ތޭރިތަކުގެ ދޭތެރެއިން މި އެކުވެނި ދަނޑުގެ ފްލަޑްލައިޓްތަކަށް ބަލަހައްޓައިގެން ކަރުނައެޅި ރެއެވެ.

“މިއީ އަހަރެންގެ ވަގުތު.” ނަސީމާ އަމިއްލަ ނަފްސަށް ބުނެލިއެވެ. “މިއީ އަހަރެންގެ އަޑު ދުނިޔެއަށް އިއްވަންވީ ވަގުތު.”

ނަސީމާ ކުޅެން ފެށީ ހައިރާންކުރުވަނިވި ޖޯޝަކާއެކުގައެވެ. އިދިކޮޅު ޓީމުގެ އެންމެ ބާރުގަދަ ބޯޅަތަކަށް އޭނާ ރައްދުދިނީ ފުރިހަމަ ޝޮޓްތަކުންނެވެ. ބޯޅަ ދަނޑުގެ ހަތަރު ފަރާތަށް ބުރައިގެން ދިޔައިރު، ހަތަރަކާއި ހައެއްގެ ވިއްސާރައެއް އޮއްސާލިއެވެ. ދަނޑުގެ ސަޕޯޓަރުން ކޮޅަށް ތެދުވެ، “ނަސީމާ! ނަސީމާ!” އޭ ކިޔައި އަޑުގެ ކޮޅަށް ހަޅޭއްލަވަން ފެށިއެވެ. ރާކިޔާއާއި ޖަމްޝީދު އުފަލުން އަތްތިލަބަޑި ޖަހަމުން ދިޔައެވެ.

މެޗުގެ އެންމެ ފަހު އޯވަރެވެ. ރާއްޖެ މޮޅުވާން ބޭނުންވަނީ އެންމެ ފަހު ދެ ބޯޅައިން 8 ލަނޑެވެ. ސްޓްރައިކްގައި ހުރީ ނަސީމާއެވެ. ޕްރެޝަރު އޮތީ އޭގެ އެންމެ އުސްމިނުގައެވެ. އިދިކޮޅު ބޯލަރު ދުވެފައި އައިސް އެއްލި ބޯޅަ، ނަސީމާ ވަރަށް ފުރިހަމައަށް ޓައިމްކޮށް، ދަނޑުގެ ބޭރަށް، ހަ ލަނޑަށް ޖަހައިލިއެވެ! މުޅި ދަނޑު އެއްއަޑަކުން ގުގުމައިގެން ދިޔައެވެ.

ދެން އޮތީ އެންމެ ފަހު ބޯޅައެވެ. މޮޅުވާން ބޭނުންވަނީ 2 ލަނޑެވެ. އެއްވަރުވާނީ 1 ލަނޑުންނެވެ. ބޯލަރު ފަހު ބޯޅަ އުކިއެވެ. އެއީ ވަރަށް ބާރު ޔޯކާއެކެވެ. ނަސީމާ ކުޑަކޮށް ފަހަތަށް ޖެހިލައި، ވަރަށް ހުޝިޔާރުކަމާއެކު ބޯޅަ ލޯންގް-އޮން ދިމާއަށް ޖަހާލުމަށްފަހު ދުއްވައިގަތެވެ. އެއް ލަނޑު ހަމަކޮށް، ދެވަނަ ލަނޑަށް އެނބުރި ދުވި ވަގުތު، ފީލްޑަރު އެއްލި ބޯޅަ ވިކެޓާ ދިމާއަށް އައެވެ. ނަސީމާ ފުންމައިގެން ގޮސް ބެޓު ކްރީޒްގެ އެތެރެއަށް ކައްސާލިއެވެ.

“ނޮޓް އައުޓް! ދެ ލަނޑު!” އަމްޕަޔަރުގެ އިޝާރާތާއެކު، ރާއްޖެ މެޗުން މޮޅުވެ، މުބާރާތުގެ ތާރީޚީ ތަށި އުފުލައިލިއެވެ!

ދަނޑުމައްޗަށް މުޅި ޓީމު ދުވެފައި އަރައި، ނަސީމާ އުރާލިއެވެ. ރަތާއި ފެހި އަދި ހުދުކުލައިގެ ކަރުދާސްކޮޅުތައް އުޑުމަތިން ވެހެމުން ދިޔައެވެ. ނަސީމާގެ ދެލޮލުން އުފާވެރިކަމުގެ ކަރުނަ ފައިބަމުން ދިޔައެވެ. އެ މަންޒަރު ބަލަން ހުރި އޭނާގެ ބައްޕަ ޒާހިރުގެ ލޮލުންވެސް ކަރުނަ ފޫދިގެން ދިޔައެވެ.

އިނާމު ދިނުމުގެ ރަސްމިއްޔާތުގައި މުބާރާތުގެ އެންމެ މޮޅު ކުޅުންތެރިޔާގެ މަގާމު ލިބުނީ ނަސީމާއަށެވެ. މައިކް ކުރިމަތީގައި ހުރެ، ރަން ތަށި އަތަށް ނަގަމުން ނަސީމާ ބުންޏެވެ:

“މި ތަށްޓަކީ އަޅުގަނޑުގެ ހުވަފެންތައް ކަތިލަން އުޅުނު އެންމެންނަށް ދެވުނު ޖަވާބެއް. އަދި އަޅުގަނޑަށް މިނިވަންކަން ހޯދައިދިން އަޅުގަނޑުގެ ލޯބިވާ އެކުވެރިން، ރާކިޔާއާއި ޖަމްޝީދަށް ޚާއްސަ ހަދިޔާއެއް. އަންހެން ކުދިންނަކީ ބަންދުވެ ތިބެންޖެހޭ ބައެއް ނޫން. އަޅުގަނޑުމެންނަށް އުދުހެވޭނެ، އަޅުގަނޑުމެންނަށް ދުނިޔެ ފަތަހަކުރެވޭނެ!”

ދަނޑުން ފައިބައިގެން އައި ވަގުތު، ޒާހިރު ދުވެފައި އައިސް ނަސީމާގެ ކުރިމަތީގައި ހުއްޓުނެވެ. އަދި ކަރުނައާއެކު ދަރިފުޅުގެ ގައިގައި ބައްދައިގަތެވެ. “ދަރިފުޅާ.. ބައްޕައަށް މާފުކުރޭ. ބައްޕަ ދަރިފުޅުގެ އަގު ވަޒަންކުރަން ނޭނގުނީ. މިއަދު ބައްޕަ ދަރިފުޅާމެދު އިންތިހާއަށް ފަޚުރުވެރިވަން!” ބައްޕަގެ އެ ބަސްތަކުން ނަސީމާގެ ހިތުގައި އަހަރުތަކެއް ވަންދެން އޮތް ފުން ޒަޚަމް މުޅިން ފަސޭހަވެގެން ދިޔައެވެ. ބައްޕަގެ މާފަކީ އޭނާގެ ހަޔާތަށް ލިބުނު އެންމެ ބޮޑު އެއް ކާމިޔާބީއެވެ.

ހަމަ އެވަގުތު ރާކިޔާއާއި ޖަމްޝީދުވެސް ދުވެފައި އައިސް ނަސީމާގެ ގައިގައި ބައްދައިގަތެވެ. ހަތަރު މީހުން އެކުގައި އުފާ ފާޅުކުރަމުން ދިޔައިރު، އެ މަންޒަރު ބަލަން ތިބި އެންމެންގެ ލޮލުން އުފަލުގެ ކަރުނަ ފާޅުވަމުން ދިޔައެވެ. އަނިޔާވެރިކަމާއި އަޅުވެތިކަމުގެ އަނދިރި ދުވަސްތަކަށްފަހު، އެމީހުންގެ ދިރިއުޅުމަށް މިވަނީ ފުރިހަމަ އުފާވެރިކަމާއި ކާމިޔާބީގެ އަލިކަން ވެރިވެފައެވެ.

އެރޭ މާލޭގެ މަގުތަކުގައި އޮތީ ބޮޑު އީދެއް ފަދަ އުފާފާޅުކުރުމެކެވެ. ޤައުމީ ޓީމުގެ ކާމިޔާބީ ފާހަގަކުރުމަށް ބޭއްވި ޚާއްސަ ހަފުލާގައި، ކުޅިވަރުގެ އިސްވެރިންނާއި ދައުލަތުގެ ވެރިން ބައިވެރިވެވަޑައިގެންނެވިއެވެ. ނަސީމާއަށް ބައިނަލްއަޤުވާމީ ލީގުތަކުން ކުޅުމުގެ ފުރުސަތުތައް ލިބިގެން ދިޔައިރު، އޭނާ ވެގެންދިޔައީ މުޅި ދިވެހިރާއްޖޭގެ ޒުވާނުންނަށް، ޚާއްސަކޮށް އަންހެން ކުދިންނަށް ހިތްވަރުގެ ނަމޫނާއަކަށެވެ.

އެ ހަފުލާގެ އެއްފަރާތުގައި، ރާކިޔާއާއި ޖަމްޝީދު އިށީނދެގެން ތިއްބެވެ. އެމީހުންގެ މޫނުމަތިން ފެންނަނީ ހަމަޖެހުމާއި ފުން ލޯތްބެވެ. އެކުވެރިޔާގެ ކާމިޔާބީއަކީ އެމީހުންގެވެސް ކާމިޔާބީއެކެވެ.

“ޖިމީ.” ރާކިޔާ މަޑުމައިތިރިކަމާއެކު ޖަމްޝީދުގެ އަތުގައި ހިފާލަމުން ބުންޏެވެ. “ބަލާބަލަ، ނަސީމާ އެހެރީ އޭނާގެ ހުވަފެން ހަޤީޤަތަކަށް ހަދާފައި. ދެން އޮތީ އަހަރެމެންގެ ހުވަފެން. އަހަރެމެން ފަދައިން އަނިޔާ ލިބޭ ކުދިންނަށް އެހީވާނެ މަގެއް އަހަރެމެން ހޯދަންވާނެ.”

ޖަމްޝީދު ހިނިތުންވެލިއެވެ. “ރާކީގެ ހިތުގައި އޮތް އެއްޗެއް އަހަރެންގެ ހިތުގައިވެސް އެބައޮތް. އަހަރެމެން އެނބުރި ރަށަށް ގޮސް، ނުވަތަ މާލޭގައި ނަމަވެސް، މަގުމަތިވާ ކުދިންނާއި އަނިޔާ ލިބޭ ކުދިންނަށް ރައްކާތެރިކަން ދޭނެ މަރުކަޒެއް، ފައުންޑޭޝަނެއް ހަދާނަން. ޒުލްފީބެ ޖަލުން މިނިވަންވުމުން އޭނާވެސް އަހަރެމެންނާ ގުޅޭނެ. މިއީ އަހަރެމެން ދުނިޔެއަށް ދޭނެ އެންމެ ބޮޑު ހަދިޔާއަކީ.”

ރާކިޔާ ޖަމްޝީދުގެ ކޮނޑުގައި ބޯއަޅާލިއެވެ. އެ ދެހިތުގެ ވިންދު، އެއް ރާގަކަށް، އެއް އަމާޒަކަށް ޖަހަމުން ދިޔައެވެ. ކުރިމަތީގައި އޮތީ އުންމީދުން ފުރިގެންވާ އައު ބާބެކެވެ. ނަސީމާގެ ކާމިޔާބީއަކީ އެ ދަތުރުގެ ފެށުމެވެ. ދެން އޮތީ ޒުލްފީގެ މާޒީގެ ބާކީ ހަޤީޤަތްތަކާ ކުރިމަތިލުމާއި، މި ދެހިތުގެ ލޯބީގެ ގޮށް ޖަހައިލުމުގެ ވަގުތެވެ.

(ނުނިމޭ)