ޝާހްރުކްގެ އުފަންދުވަހަށް އެންމެ ދުވަހަކަށް ވެފައި ވަނިކޮށް، މުމްބާއީ ސީ ލިންކްގައި “ކިންގް” ފިލްމާ ގުޅުވައިގެން ތައްޔާރުކޮށްފައިވާ ބޮޑު ޑިސްޕްލޭއެއް ވަނީ ފެނިގެން ގޮސްފައެވެ. މި މަންޒަރު އަމިއްލައަށް ބަލާލުމަށާއި ފޮޓޯއެއް ނެގުމަށް އޭނާ ބޭރަށް ދިޔަކަމަށް ހާމަކުރަމުން، ސޯޝަލް މީޑިއާގައި ޝާހްރުކް ލިޔެފައިވަނީ، “ރަހުމަތްތެރިން ތިބެންވާނީ ގޫގުލް ޖެމިނައި ފަދައިންނެވެ. އަބަދުވެސް ތިޔަ ދެއްވާ ބޮޑު ލޯތްބަށް ޝުކުރިއްޔާ. މި ފޮޓޯ ނެގުމަށް ސިއްރުން ބޭރަށް ނުކުންނަން ޖެހުނެވެ.”
ނޮވެމްބަރު 2 (މިއަދު) ގައި ފާހަގަކުރާ ޝާހްރުކްގެ އުފަންދުވަހާ ދިމާކޮށް، މި ފިލްމާމެދު އޮތް ޝައުޤުވެރިކަން މިހާރު ވަނީ ވަރަށް ބޮޑަށް އިތުރުވެފައެވެ. ގިނަ ބަޔަކު އުންމީދު ކުރަމުންދަނީ އުފަންދުވަހާ ދިމާކޮށް ފިލްމުގެ އާ އަޕްޑޭޓެއް ލިބޭނެ ކަމަށެވެ. ނަމަވެސް މިހާތަނަށް ރަސްމީ އެއްވެސް އިޢުލާނެއް ކުރެވިފައެއް ނުވެއެވެ.
ސިދާތު އާނަންދު ޑައިރެކްޓްކުރާ “ކިންގް” އަކީ ރެޑް ޗިލީޒް އެންޓަޓައިންމަންޓާއި މާފްލިކްސް ޕިކްޗާޒް ގުޅިގެން އުފައްދާ އެކްޝަން ތުރިލަރެކެވެ. ގޯރީ ޚާން، މަމްތާ އާނަންދު އަދި ސިދާތު އާނަންދު ޕްރޮޑިއުސްކުރާ މި ފިލްމު ސިނަމާތަކަށް ރިލީޒްކުރުމަށް ހަމަޖެހިފައިވަނީ 24 ޑިސެމްބަރު 2026 ގައެވެ.
މި ފިލްމުގެ މައިގަނޑު ރޯލުން ޝާހްރުކް ފެނިގެންދާއިރު، މިއީ އޭނާގެ ދަރިފުޅު ސުހާނާ ޚާން ސިނަމާތަކަށް ތައާރަފުވާ ފުރަތަމަ ފިލްމެވެ. ފިލްމުގެ ވިލަންގެ ރޯލުން އަބީޝެކް ބައްޗަން ފެނިގެންދާއިރު، ދީޕިކާ ޕަޑުކޯން، ރާނީ މުކަރްޖީ، އަނިލް ކަޕޫރު، ޖައިދީޕް އަހްލާވަތު، ރާގަވް ޖުޔަލް އަދި އަބޭ ވަރްމާ ފަދަ ތަރިންވެސް މި ފިލްމުން ފެންނާނެއެވެ.
ޚަބަރުތައް ބުނާގޮތުގައި މި ފިލްމަކީ ލޫކް ބެސަންގެ “ލިއޯން: ދަ ޕްރޮފެޝަނަލް” އިން އިންސްޕަޔަރވެގެން ތައްޔާރުކުރާ ފިލްމެކެވެ. ފިލްމުގެ ވާހަކަ ބިނާވެފައިވަނީ ތަޖުރިބާކާރު އަންޑަވޯލްޑް އެންފޯސަރަކު، ބައިނަލްއަޤުވާމީ ކުރިމަތިލުމެއްގެ ތެރޭގައި ޒުވާން އަންހެން ކުއްޖަކަށް އެހީތެރިވެދޭ ގޮތުގެ މައްޗަށެވެ. ނަމަވެސް ފިލްމުގެ ޕްލޮޓާ ގުޅޭގޮތުން އުފެއްދުންތެރިން އަދި ރަސްމީކޮށް އެއްޗެއް ހާމައެއް ނުކުރެއެވެ.
ބައިނަލްއަޤުވާމީ ފެންވަރަށް އުފައްދާ މި ފިލްމުގެ މިއުޒިކް ތައްޔާރުކުރަނީ ސަޗިން-ޖިގަރްއެވެ. މިއީ “ޕަތާން” އަށްފަހު ޝާހްރުކް އާއި ސިދާތު އާނަންދު ގުޅިގެން މަސައްކަތްކުރާ ދެވަނަ ފިލްމެވެ. އުފަންދުވަހާ ގާތްވަމުންދާ ވަރަކަށް، ސޯޝަލް މީޑިއާގެ މި ޕޯސްޓާއެކު ފިލްމުގެ ޕްރޮމޯޝަންގެ މަސައްކަތްތަކަށް ވަނީ އަނެއްކާވެސް އާ ދިރުމެއް ލިބިފައެވެ.
