މާލެއިން 3 ވަނަ މީހަކު ކޮވިޑް-19 އަށް ފައްސިވެއްޖެއެވެ.
ހެލްތު ޕްރޮޓެކްޝަން އެޖެންސީން ކުރި ޓްވީޓެއްގައި ބުނީ، ބުދަ ދުވަހު މާލެއިން ކޮވިޑް-19 އަށް ފައްސިވި ފުރަތަމަ މީހާ އާއި ސީދާގޮތުން ބައްދަލުވި ފަރާތެއްގެ ސާމްޕަލްގެ ނަތީޖާ ލިބުނުއިރު، އޭނާ ވެސް އެ ބައްޔަށް ފައްސިވެފައިވާ ކަމުގައެވެ. ހެލްތު ޕްރޮޓެކްޝަން އެޖެންސީން އިތުރަށް ހާމަކޮށްފައިވާ ގޮތުގައި އެމީހާ މިހާރު ހުރީ އެކަހެރިކޮށްފައެވެ.
މިއާއި އެކު، ކޮވިޑް-19 އަށް މާލެއިން ފައްސިވި މީހުންގެ އަދަދު މިވަނީ 3 އަށް އަރާފައިވާއިރު، މި ބަލި ޖެހުނު ދިވެހިންގެ އަދަދު މިވަނީ 8 އަށް އަރާފައެވެ.
ހެލްތު ޕްރޮޓެކްޝަން އެޖެންސީން ކުރި އިތުރު ޓްވީޓެއްގައި ބުނެފައިވާގޮތުގައި، މާލެއިން ކޮވިޑް-19 އަށް ފައްސިވި ފުރަތަމަ މީހާ އާއި ބައްދަލުވި 14 މީހަކު، ކޮވިޑް-19 އަށް ޝައްކުކުރެވޭ ޢަލާމާތްތަކެއް ހުރެގެން ހުޅުލޭ އައިސޮލޭޝަން ފެސިލިޓީއަށް ބަދަލުކުރުމުގެ މަސައްކަތް ކުރެވެމުންދާ ކަމަށެވެ.
