އާދައިގެ ސައިތަށްޓެއް، ބަނޑުގެ ސިއްހަތަށް ފައިދާހުރި އަދި ހަށިގަނޑުގެ ދުޅަތަށް ލުއިކޮށްދޭ ބުއިމަކަށް ބަދަލުކޮށްލުމަށް ބޭނުންކުރާނެ 3 ބާވަތެއް: އެއިމްސް (AIIMS) ގެ ޑޮކްޓަރެއްގެ އިރުޝާދު
ކޮންމެ ދުވަހަކު ބޯ ސައިތަށީގެ ތެރެއަށް ބައެއް ބާވަތްތައް އެއްކޮށްލައިގެން ހަށިގަނޑުގެ ދުޅަހެޔޮކަން އިތުރުކުރެވިދާނެއެވެ. ހާވާޑްގައި ތައުލީމް ހާސިލްކުރައްވާފައިވާ އަދި އެއިމްސްގައި މަސައްކަތްކުރައްވާ ޑޮކްޓަރެއް ކަމަށްވާ ޑރ. ސޯރަބް ސޭތީ ވިދާޅުވާ ގޮތުގައި ކަޅުސައިގެ ތެރެއަށް އިނގުރާއި ކާފުރުތޮޅި އަދި ކަރަންފޫ އެއްކޮށްލުމުން ބަނޑުގެ ސިއްހަތު ރަނގަޅުވެ ހަށިގަނޑުގެ ދުޅަތަކަށް ލުއިލިބި ސިކުނޑިއާއި ހަށިގަނޑު ތާޒާކޮށްދޭނެއެވެ.
މެންދުރު ފަހު ވަރުބަލިކަން އިހުސާސްވާ ވަގުތުތަކުގައި ބޯ ސައިތަށީގެ ބޭނުމަކީ ހަމައެކަނި ހިތްހަމަޖައްސާލުން ކަމުގައި ވިޔަސް މި ބާވަތްތައް ބޭނުންކޮށްގެން އެއީ ސިއްހީ ގޮތުން ފައިދާހުރި ބުއިމަކަށް ހެދިދާނެއެވެ. ޑރ. ސޯރަބް އޭނާގެ އިންސްޓަގްރާމް ވީޑިއޯއެއްގައި ފާހަގަކުރައްވާފައިވާ ގޮތުގައި ސައިތަށި ތައްޔާރުކުރާނެ ގޮތަކީ:
1. ކަޅުސައި ފަތް ބޭނުންކުރުން: ފެނުގެ ތެރޭގައި ސައިފަތް ކައްކާލުމުން އޭގައި ހުންނަ އެންޓިއޮކްސިޑެންޓްތައް ބޭރުވެއެވެ. މިއީ ހިތުގެ ސިއްހަތަށާއި ސިކުނޑީގެ މަސައްކަތްތަކަށް ވަރަށް މުހިއްމު މާއްދާތަކެކެވެ.
2. ތާޒާ އިނގުރު ފޮއްޗެއް އެއްކޮށްލުން: އިނގުރަކީ ހަޖަމުކުރުމުގެ ނިޒާމު ހަލުވިކޮށްދީ ބަނޑު ފަސޭހަކޮށްދޭ އެއްޗެކެވެ. މީގެ އިތުރުން މޭނުބައިކުރުމާއި ހަށިގަނޑުގެ ދުޅަތަކަށް ލުއިލިބޭނެ އެއްޗެއްވެސް މެއެވެ.
3. ކާފުރުތޮޅި ކޮޅެއް ޗިސްކޮށްލާފައި އެއްކޮށްލުން: ކާފުރުތޮޅީގެ ސަބަބުން ބަނޑު ފުއްޕުން ކުޑަކޮށްދީ ސައިގައި މީރު ވަހެއް ޖައްސައިދޭނެއެވެ. މީގެ ސަބަބުން ހަކުރު އެޅުމުގެ ބޭނުން ވެސް ކުޑަވާނެއެވެ.
4. ކަރަންފޫ ކޮޅެއް އެއްކޮށްލުން: ކަރަންފޫގައި ހުންނަ މާއްދާއެއް ކަމަށްވާ ‘ޔޫޖެނޯލް’ އަކީ ފުރަމޭގެ މަސައްކަތްތަކަށް އެހީތެރިވެދީ ބަނޑުގެ ސިއްހަތު ރަނގަޅުކޮށްދޭ އެއްޗެކެވެ.
5. މާމުއި: ފޮނިކަން ގެންނަން ބޭނުންނަމަ ގުދުރަތީ މާމުއި ކޮޅެއް އެއްކޮށްލެވިދާނެއެވެ.
މިގޮތަށް ސައި ބުއިމަކީ ހަމައެކަނި އާދައަކަށް ހެދުމުގެ ބަދަލުގައި އެއީ އަމިއްލަ ސިއްހަތަށްޓަކައި ކުރާ ކަމެއްގެ ގޮތުގައި ބަލަންޖެހޭނެއެވެ.
