މިމަހު 28 ވަނަ ދުވަހުގެ ރޭ އޮލިމްޕަހުގެ ސިނަމާ ތެރެއަށް ފާއްދާލި “ދޯދި” ފިލްމަކީ އާއްމުކޮށް މި ރާއްޖޭގައި ނެރޭ ފިލްމުތަކާ މުޅިން ތަފާތު ފިލްމެއްކަން މިއީ ފިލްމުގެ ޓްރެއިލާއިންވެސް އެނގިގެންދިޔަ ކަމެކެވެ. ފިލްމު ބެލި ނޫކަށިފުރައިގެ ޒުވާނުން ނުވަތަ ޖެންޒީ ކުދިންނަށް މި ިފލްމު ވަރަށް ބޮޑަށް އޯކޭވެ ސަޅިވިކަންވެސް ފާހަގަކޮށްލެވެއެވެ،
ދިވެހި ފިލްމީ ދާއިރާގައި ވިދުންގަދަ އާއިލާއަކަށް ނިސްބަތްވާ ޒުވާން ކައިލީން، މި ފިލްމު ބަލާފައި އޭނާގެ ހިތުގެ އަޑިން، ވަރަށް އޮނަސްޓް ރިވިއުއެއް އާއްމުކޮށްފައިވެއެވެ. ކައިލީންގެ މި ކޮމެންޓްތަކުގެ ތަރުޖަމާއެއް ހިއްސާކޮށްލާނަމެވެ.
ރޭގައި “ދޯދި” ބަލަން ދިޔައިން. މިއީ އަހަރެން އުންމީދު ކުރި ކަހަލަ ވަރަށް ތަފާތު އާ ފީލްއެއް ގެނެސްދިން ފިލްމެއް.
ދިވެހި ފިލްމުތަކުން ފުރާވަރުގެ ކުދިންގެ ވާހަކަ އެހާ ބޮޑަކަށް ނުފެނޭ. އެހެންވެ އަހަރެންގެ އުމުރުފުރާގެ ކުދިން އުޅޭ ގޮތް ވަރަށް ހަގީގީ ގޮތަކަށް ފެނުމުން ވަރަށް އުފާވި. ކެރެކްޓާތައް ފެނުނީ ވަރަށް ހަގީގީ އަދި ފުރިހަމަކޮށް. ކޮންމެ މީހެއްގެ ކިބައިގައި ހުންނަ އުނިކަންތައްތައް ވެސް ވަރަށް ރީތިކޮށް ދައްކުވައިދީފައިވޭ. އަދި އެއީ އެ މީހެއްގެ މިޒާޖާ ވެސް ގުޅޭ ކަންތައްތަކެއް.
އެކްޓަރުންގެ ހުނަރު ވަރަށް މޮޅު. ލާނާ ޖަލީލްގެ އެކްޓިން ވަރަށް ފުރިހަމަ. އިންނަ، ޝަހުދާން، އާމިރާ، ޝަރީޝް އަދި އެހެން ކާސްޓުންގެ އެކްޓިން ވެސް ފެނުނީ ވަރަށް ނެޗުރަލްކޮށް.
މާފުކުރުމުގެ މައުޟޫއު މި ވާހަކައިގައި ގެނެސްދީފައިވާ ގޮތް ވަރަށް ކަމުދިޔަ. މިހާރަކަށް އައިސް ގުޅުމެއްގައި ކުޑަވެސް މައްސަލައެއް ޖެހިއްޖެނަމަ އެއީ “ޓޮކްސިކް” ކަމެއް ކަމަށް ބަލާފައި ވަކިވުން އާންމުވެފައި އޮތަސް މި ފިލްމުން ފެނުނީ ހަގީގީ ރައްޓެހިން އެކަކު އަނެކަކަށް ކުރެވޭ ކަންތައްތަކަށް ޒިންމާދާރުވުމާއެކު މައްސަލަތައް ހައްލުކުރާ ތަން.
މި ފިލްމުން ބަދަލުކޮށްލަން ބޭނުންވާ ކަމެއް އޮތް ނަމަ އެއީ މަސްތުވާތަކެތީގެ ނުރައްކާތެރިކަން ކުޑަކޮށް ނަމަވެސް ފާހަގަކޮށްލުން. އެފަދަ ކަންކަމުގެ ބިރުވެރިކަން ކުޑަކަމެއްގެ ގޮތުގާ ނުދެއްކުމަކީ މުހިއްމު ކަމެއް ގޮތުގާ އަހަރެން ދެކެން.
އަހަރެން އެންމެ ގަޔާވި ކަމަކީ އާޓް ޑައިރެކްޝަނާއި އައްކޫގެ މިއުޒިކާއެކު މާލެއާއި ވިލިނގިލީގެ ރީތިކަން ފިލްމުގައި ގެނެސްދީފައިވާ ގޮތް. އަހަރެންގެ އުފަން ރަށުގެ އަސްލު ސިފަ ފެނުމުން ވަރަށް އުފާވި. އެއީ އެންމެ ރީތި ތަން ނޫން ކަމަށް ވިޔަސް އެތަނުގެ ރީތިކަން ފެންނަނީ އެތަނަކީ އަހަރެމެންނަށް ފަރިތަ ތަނަކަށް ވީމަ. އެ ކުދިކުދި ގޯޅިތަކުގެ ކުލަތައް ވަރަށް ފުރިހަމައަށް ދައްކުވައިދީފައިވޭ.
ޖުމްލަކޮށް ބުނާނަމަ “ދޯދި” އަކީ ދިވެހި ސިނަމާއަށް ލިބުނު އުންމީދެއް. މޮވަނު އާއި އޭނާގެ ޓީމަށް ވަރަށް ބޮޑަށް ސާބަސް ދެން. މިއަށްވުރެ ގިނަ މިފަދަ މަސައްކަތްތައް ފެންނާނެ ކަމަށް އުންމީދު ކުރަން.
