އިންޓަނެޓްގައި މިހާރު މަޝްހޫރުވެގެން އުޅޭ “ޖަޕަނީޒް ޗީޒްކޭކް” މިއީ ހަމައެކަނި ޔޯގަޓާއި ބިސްކޯދުކަން އެނގޭދޯއެވެ. އެކަމަކު އިންޓަނެޓް ބޭނުންކުރާ މީހުން އުޅޭ ގޮތުން ހީވަނީ މިއީ ވަރަށް ބޮޑު އަޖައިބެއްހެންނެވެ. ތިބާގެ “ފޯ ޔޫ ޕޭޖް” (FYP) އިން މި ދުވަސްވަރު ޔޯގަޓް ދަޅުތަކަށް ބިސްކޯދު އަޅައިގެން އުޅޭ މަންޒަރު ފެންނަނަމަ މަރުހަބާއެވެ. ތި ހުރީ ރަސްމީކޮށް ޖަޕަނީޒް ޗީޒްކޭކްގެ ޒަމާނަށް ވަދެވިފައެވެ.
އިންޓަނެޓް ތެރެއިން މަޝްހޫރުވެފައިވާ މި އާ އާދަޔަކީ މާ ބޮޑު މަސައްކަތެއް ނެތި ކުރެވޭ، ކުޑަކޮށް އޮޅުންބޮޅުން ބޮޑު އަދި ހަގީގަތަށްވުރެ ބޮޑުކޮށްލައިގެން އުޅޭ ކަމެކެވެ. އަހަރެން މިހެން ބުނުމުން އަހަރުމެން ޓީމުގެ އިވްރީޝާގެ މޫނަށް ނިކަން ވައްތަރު ޖައްސާލާނެކަން ގައިމެވެ. ކަންބޮޑުކޮށްލައިގެން އުޅުނަސް، ކޮންމެވެސް ސަބަބަކާ ހުރެ އެންމެން އަންނަނީ މި ރަހަފަތުގެ އަޖުމަބަލަމުންނެވެ. މި ބުނާ “ޖަޕަނީޒް ޗީޒްކޭކް” އަކީ އަސްލު ކޮން އެއްޗެއްހެއްޔެވެ؟ މިއީ ފޮނިކާތަކެތީގެ ދުނިޔެއަށް އައި ވަރަށް ބޮޑު އިންގިލާބެއް ކަމަށް މީހުން ދައްކަނީ ކީއްވެގެންހެއްޔެވެ؟
ކޮބައިތަ މި ބުނާ ޖަޕަނީޒް ޗީޒްކޭކަކީ؟
ނަން ކިތަންމެ މޮޅަސް މީތި ތައްޔާރުކުރާ ގޮތް ވަރަށް ސާދާއެވެ. ގްރީކް ޕްލެއިން ޔޯގަޓް ދަޅެއްގެ ތެރެއަށް ބައެއް ބިސްކޯދު (ގިނައިން ބޭނުންކުރަނީ ލޯޓަސް ބިސްކޯފް ބިސްކޯދު) ކޮއްޕާލުމަށްފަހު ހަގަޑިއިރު ފްރިޖުގައި ބަހައްޓާނީއެވެ. ހެނދުނުވާއިރު ބިސްކޯދުތައް އޮންނާނީ މަޑުވެފައެވެ. ދެން އެ އެއްކޮށްލުމުން އެވީ “ޗީޒްކޭކް” އަކަށެވެ.
މީގައި ކްރީމް ޗީޒްއެއް ނުހުރެއެވެ. ފިހާކަށް ނުޖެހެއެވެ. އަދި މިއީ އަސްލު ޗީޒްކޭކެއްވެސް ނޫނެވެ. މިއީ ހަމައެކަނި ގްރީކް ޕްލެއިން ޔޯގަޓާއި ލޯޓަސް ބިސްކޯފް ބިސްކޯދެވެ.
މީގެ ރަހަ ފޮނިވެފައި ކްރީމް ގޮތެއް ހުރެއެވެ. އިންޓަނެޓްގައި މީހުން ބުނާގޮތުން މިއީ ކެލޮރީ މަދު، ސިއްހަތަށް ރަނގަޅު ފޮނި އެއްޗެކެވެ. އެކަމަކު މިއަށް ޗީޒްކޭކޭ ކިޔުމަކީ ކުޑަކޮށް އޮޅުވާލުމެއް ކަހަލަ ކަމެއްކަމަށް ދިރާސާވެރިން ބުނެއެވެ.
މީހުން މި ކެއުމަށް މޮޔަވެގެން އުޅެނީ ކީއްވެ؟
މި ޓްރެންޑް ފެށުނީ ޖަޕާނުގެ ސޯޝަލް މީޑިއާ ތެރެއިންނެވެ. އެކަމަކު ހުޅަނގުގެ މީހުން މި ކޮންސެޕްޓް ނަގައިގެން މިއަށް މޮޅު ނަމެއް ދިނީއެވެ. މިހާރު ވީޑިއޯތަކުން ފެންނަނީ މިއީ ދުވަހަކުވެސް ނުކާހާ މީރު އެއްޗަކަށް ހަދައިގެން މީހުން އުޅޭ މަންޒަރެވެ. އަހަރުމެންގެ ޓީމުން މި އެންމެ ގިނައިން ތައްޔާރުކުރި އިވްރީޝާ ވެސް މީގެ ވާހަކަދައްކާވަރުން އަހަރުމެން ޓީމު އެންމެންވެސް މި ތިބެނީ ކުޅުދިޔާވެފައެވެ. އެކަމަކު ބައެއް މީހުން ބުނާގޮތުން މީގެ ރަހަ ހަމަ ޔޯގަޓާއި ބިސްކޯދު އެއްކުރީމާ ހުންނަ ރަހަޔާ އެއްވެސް ތަފާތެއް ނުހުރެއެވެ. ވަކި ޚާއްޞަ ރަހައެއް ނުހުރެއެވެ. އަހަރެން މި ރަހަފަތުގެ އަޖުމަ ނުބަލާތީ މި ދެއްކެނީ ގޯސްވާހަކައެއްކަމަށް ބުނެ އިވްރީޝާ ވަކާލާތުކުރާނެކަން ގައިމެވެ.
ނަމުގެ ސަބަބުން ލިބުނު މަގުބޫލުކަން!
އަސްލު ޖަޕަނީޒް ޗީޒްކޭކަކީ 1960ގެ އަހަރުތަކުގައި އުފެއްދި ވަރަށް މަޑު، ފުފިފައި ހުންނަ މީރު އެއްޗެކެވެ. އެކަމަކު މިހާރު މި އުޅޭ ވައިރަލް ވާޝަން އަކީ އެއްވެސް ހުނަރެއް ނެތި ހަމައެކަނި ފްރިޖަށް ލައިގެން ތައްޔާރުކުރާ އެއްޗެކެވެ. މިއަށް “ޖަޕަނީޒް” އޭ ކިޔުމުން މީހުންނަށް މިއީ ވަރަށް މޮޅު އެއްޗެއް ކަމަށް ހީވަނީ އެވެ.
މިއީ އަސްލުވެސް ތައްޔާރުކޮށްލަން ރަނގަޅު އެއްޗެއްތަ؟
ސިއްހަތަށް ބަލައިގެން ކޮންމެވެސް ވަރެއްގެ ފޮނި އެއްޗެއް ކާލަން ބޭނުންނަމަ މިއީ ރަނގަޅު އެއްޗަކަށް ވެދާނެއެވެ. އެކަމަކު އަސްލު ޗީޒްކޭކެއްގެ ރަހަ ބޭނުންނަމަ މީގެން ލިބޭނީ މާޔޫސްކަމެއް ކަަމަށް މި ކާނާ ދިރާސާކުރާ ބައެއް މީހުން ބުނެއެވެ.
