“ޒައުލް ވެސް ތި ހުންނަނީ އޭނާގެ ކޮޅަށް. ކީއްވެ؟ އޭނާ ރީތީވީމަ ދޯ؟ އޭނާ މައުސޫމުކަން ދައްކާތީ ދޯ؟” އައިރާގެ ކޮންޓްރޯލް މުޅިން ކެނޑުނެވެ.
މި އަޑުގަދަވުމާއެކު ފާތުމަ ބަދިގެއިން ނިކުމެގެން އައެވެ. “ކިހިނެއްވީ؟ ކޮން ހަޅޭކެއް މި ގޭތެރޭގަ މި އޮތީ؟”
“މަންމާ، ބަލާބަލަ އައިރާދައްތަ ކުރި ކަންތައް. އަހަރެންގެ ކުރެހުން ވީދާލައި، އަހަންނާ ދިމާއަށް އެއްޗެހި ގޮވަނީ،” އަނޫ ރޮމުން މަންމަގެ ގައިގައި ބައްދާލިއެވެ.
ފާތުމަ އައިރާއަށް ބަލާލިއެވެ. “އައިރާ! ދަރިފުޅާ، ކޮން ކަމެއް ތި ފެށީ؟ ޒައުލް ކުރިމަތީގައި ތިހާ ހަޑިކޮށް އުޅޭކަށް ނުވާނެއެއްނު.”
އައިރާއެއްޗެކޭ ނުބުނެ ދުވެފައި މައްޗަށް ދިޔައީއެވެ. އޭނާ ކޮޓަރިއަށް ވަދެ ދޮރު ތަޅުލިއެވެ. އޭނާގެ ހިތުގައި އޮތީ ބަޔާންކުރަން ނޭނގޭ ފަދަ ވޭނެކެވެ. އޭނާއަށް ހީވަނީ މުޅި ދުނިޔެ އޭނާއާ ދެކޮޅުވެފައިވާ ހެންނެވެ.
އެރޭ އައިރާކާކަށް ނުދެއެވެ. ފާތުމަ އެތައް ފަހަރަކު ގޮވުމުންވެސް އޭނާ ދޮރެއް ނުހުޅުވިއެވެ. ޒައުލް އިނީ ސިޓިންގ ރޫމުގައި ފިކުރުބޮޑުވެފައެވެ. އޭނާއަށް އެނގެއެވެ. އައިރާއޭނާ ދެކެ ލޯބިވާކަމެވެ. އެކަމަކު އެ ލޯތްބަކީ އޭނާގެ މިނިވަންކަން ނަގާލާ، އޭނާގެ ވަށައިގެންވާ މީހުންނަށް ނުރައްކާވާ ފަދަ އެއްޗަކަށް ވާން ފެށުމުން ޒައުލް ހުރީ ބިރުގަނެފައެވެ.
ދަންވަރުގެ ވަގުތެވެ. މުޅި ގެ އޮތީ ހަމަހިމޭންވެފައެވެ. އައިރާ މަޑުމަޑުން ކޮޓަރިން ނިކުތެވެ. އޭނާ ދިޔައީ ޒައުލްގެ ކޮޓަރި ކައިރިއަށެވެ. ދޮރުގެ ތަޅުލާފައި ހުރިތޯ ބަލާލުމަށްފަހު، އޭނާ ސިޓިންގ ރޫމަށް ފޭބިއެވެ. އެތަނުގައި ހުރި ޒައުލްގެ ދަބަސް ފެނުމުން، އޭނާ އެ ދަބަސް ހުޅުވާލިއެވެ.
ދަބަހުގެ ތެރެއިން އޭނާއަށް ފެނުނީ ކުޑަ ނޯޓު ފޮތެކެވެ. އޭގައި ޒައުލް ލިޔެފައިވާ ބައެއް ޅެންތަކާއި ހިޔާލުތައް ހުއްޓެވެ. އައިރާ އަވަސް އަވަހަށް އޭގެ ސަފުހާތައް އުކާލިއެވެ. އެއް ސަފުހާއެއްގައި ލިޔެފައިވެއެވެ: “ލޯތްބަކީ މަޖުބޫރުކަމެއް ނޫނެވެ. އެއީ ހިތުގެ މިނިވަންކަމާއެކު އުފެދޭ އިހުސާސެކެވެ. އަހަރެން ބޭނުންވަނީ އަހަރެންގެ ހިޔާލުތައް ދެނެގަންނަ، އަހަރެންގެ ހިތުގެ ހަމަޖެހުމަކަށްވާނެ ބައިވެރިއެކެވެ.”
އައިރާގެ ލޮލުން ކަރުނަ އައެވެ. “އަހަރެން މިއީ އޭނާގެ ހިތުގެ ހަމަޖެހުމެއް ނޫންބާ؟” އޭނާ ހިތާހިތުން އަހާލިއެވެ.
އެވަގުތު ކޮޓަރީގެ ދޮރު ހުޅުވުނު އަޑަށް އައިރާސިހުނެވެ. އެއީ ޒައުލެވެ.
“އައިރާ؟ މިގަޑީގައި މިތަނުގައި ކީއްކުރަނީ؟” ޒައުލް ހައިރާންވެފައި އެހިއެވެ.
އައިރާއަވަހަށް ފޮތް ލައްޕާލައި ދަބަހަށް ލިއެވެ. “އަހަރެން… އަހަރެން ފެން ބޯންވެގެން އައީ.”
ޒައުލް އައިރާއާ ގާތަށް ޖެހިލިއެވެ. “އައިރާ، އަހަރެމެން ވާހަކަ ދައްކަން އެބަޖެހޭ. މިހެން އުޅުމަކުން އެއްވެސް ހައްލެއް ނާންނާނެ.”
“ކޮން ވާހަކައެއް؟ ޒައުލް އަހަރެން ދެކެ ލޯބިނުވާ ވާހަކަ ދޯ؟” އައިރާ އިސްޖަހާލައިގެން ހުރެ ބުންޏެވެ.
“ލޯތްބަކީ ހަމައެކަނި ބަހަކުން ބުނާ އެއްޗެއް ނޫން. އައިރާ، ކަލޭ ތިކުރާ ކަންތައްތަކުން އަހަރެން ކަލެއާ ދުރަށް މިދަނީ. ކަލޭގެ ހަސަދަވެރިކަމާއި، ކަލޭގެ ޝައްކުތަކަކީ އަހަރެންގެ ހިތް މަރުވާ ކަންތައްތައް،” ޒައުލް ސާފުކޮށް ބުންޏެވެ.
“އަހަރެން ޝައްކު ކުރަނީ ސަބަބެއް އޮތީމަ. ޒައުލް އަނޫއާ ދޭތެރޭ ބާއްވާ ގާތްކަމަކީ އާދައިގެ ކަމެއް ނޫން،” އައިރާ އަނެއްކާވެސް ކުރީގެ ވާހަކަ ފެށިއެވެ.
“އަނޫއަކީ އަހަރެންގެ ކޮއްކޮއެއް ފަދަ ކުއްޖެއް. އޭނާގެ ހިތް ސާފު. ކަލޭގެ ހިތް މިހާރު ވަނީ ރުޅިވެރިކަމުން ފުރިފަ. އައިރާ، އަހަރެން ބޭނުންވަނީ ކަލޭ ބަދަލުވާން. މިހެން އުޅެގެން އަހަރެމެންނަށް އެކުގައި ނޫޅެވޭނެ،” ޒައުލް މިހެން ބުނެފައި އަނބުރާ ކޮޓަރިއަށް ދިޔައެވެ.
އައިރާ އެތަނުގައި އެކަނި އިނދެ ރޯން ފެށިއެވެ. އޭނާގެ ހިތުގައި އޮތް ލޯބި މިހާރު ވަނީ ބިރުވެރިކަމަކަށް ބަދަލުވެފައެވެ. އޭނާއަށް ހީވަނީ އޭނާގެ އަތުން ހުރިހާ އެއްޗެއް ބީވެގެންދަނީ ހެންނެވެ.
ޖެހިގެން އައި ދުވަހަކީ ހުކުރު ދުވަހެވެ. އާއިލާގެ އެންމެން ތިބީ މެންދުރުގެ ކެއުމަށް ތައްޔާރުވެގެންނެވެ. ބޮޑުބޭބެ މިއަދު އައީ ވަރަށް އުފާވެރި ޚަބަރަކާއިގެންނެވެ.
“ޒައުލް، ދަރިފުޅާ. މިއަދު އަހަރެން މުހިންމު ނިންމުމެއް ނިންމައިފިން. އަންނަ މަހުގެ ފަނަރަވަނަ ދުވަހު ޒައުލްއާއި އައިރާގެ ކައިވެނި ކުރެވޭނެ،” ބޮޑުބޭބެ އިއުލާނު ކުރިއެވެ.
އައިރާގެ މޫނަށް ކުއްލިއަކަށް ދިރުން އައެވެ. އޭނާ އުފަލުން ޒައުލަށް ބަލާލިއެވެ. ނަމަވެސް ޒައުލްގެ މޫނުމަތިން ފެނުނީ ހިތްހަމަނުޖެހުމެވެ.
“ބައްޕާ، އަހަރެން ކުރިންވެސް ބުނީމެއްނު…” ޒައުލް ވާހަކަ ދައްކަން އުޅުނެވެ.
“މިއީ އަހަރެންގެ ނިންމުން. އަދި އައިރާގެ ބައްޕަގެވެސް ވަސިއްޔަތް. ދަރިފުޅު މިކަމާ ދެކޮޅު ނަހަދާނެ ކަމަށް އަހަރެން އުންމީދު ކުރަން،” ބޮޑުބޭބެ ހަރުކަށިކަމާއެކު ބުންޏެވެ.
ޒައުލް އިތުރު އެއްޗެކޭ ނުބުނެ ކެއުން ހުއްޓާލާފައި ތެދުވިއެވެ. އޭނާ ބޭރަށް ނިކުމެގެން ދިޔައީއެވެ.
އައިރާވަގުތުން ޒައުލްގެ ފަހަތުން ދިޔައެވެ. “ޒައުލް! މަޑުކޮށްބަލަ.”
ޒައުލް ސައިކަލު ކައިރީގައި މަޑުކޮށްލިއެވެ. “ކީއްކުރަން؟ އުފާވެއްޖެއެއްނު މިހާރު؟ މަޖުބޫރުން ކައިވެނި ކުރެވޭތީ؟”
“މަޖުބޫރަކީ ކޮބާ؟ އަހަރެމެންނަކީ އެކަކު އަނެކަކަށްޓަކައި ތިބި ބައެއް،” އައިރާ ބުންޏެވެ.
“ނޫން އައިރާ. ތިއީ ހަމައެކަނި ކަލޭގެ ހީއެއް. މި ކައިވެނި ކުރެވުނަސް، ކަލެއަށް އަހަރެންގެ ހިތެއް ނުލިބޭނެ. ހިތެއް ނެތް މީހަކާއެކު އުޅެވޭނެތަ؟” ޒައުލް ސައިކަލަށް އަރައި ދުއްވާލިއެވެ.
އައިރާ އެތަނުގައި ހުއްޓާ އަނޫ އައެވެ. “ދައްތާ، ކޮންގެރެޓްސް. އަހަރެން ވަރަށް އުފާވެއްޖެ.”
އައިރާއަނޫއަށް ބަލާލީ ނަފުރަތުން ފުރިގެންވާ ނަޒަރަކުންނެވެ. “ކަލޭ އުފާވެފައޭ؟ ކަލޭގެ ހިތް ހަލާކުވެފައެއްނު އޮންނާނީ؟ އަހަރެންނަށް އެނގޭ ކަލޭ ޒައުލަށްޓަކައި ހުވަފެންތަކެއް ދެކެމުންދާކަން. އެކަމަކު ބަލަން ހުންނަޖެހޭނީ، އޭނާ ވާނީ ހަމައެކަނި އަހަރެންގެ މީހަކަށް.”
“ދައްތާ، ތިހާ ވަރަށް ނުވިސްނަބަލަ. އަހަރެން މި ބުނީ ހަގީގަތުގައިވެސް އުފާވެޔޭ. ޒައުލްބޭއަކީ ރަނގަޅު މީހެއް. އޭނާ ދައްތަ ރަނގަޅަށް ބަލާނެ،” އަނޫ މަޑުމައިތިރިކަމާއެކު ބުންޏެވެ.
އައިރާއެއްޗެކޭ ނުބުނެ ގެއަށް ވަނެވެ. އޭނާގެ ސިކުނޑީގައި މިހާރު ރޭވެމުންދަނީ ކައިވެނީގެ ތައްޔާރީތަކެވެ. ނަމަވެސް އެ ހުރިހާ އުފާވެރިކަމެއްގެ ތެރޭގައިވެސް، ޒައުލްގެ އެ ފަހު ބަސްތައް އޭނާގެ ކަންފަތުގައި ގުގުމަމުން ދިޔައެވެ. “ކަލެއަށް އަހަރެންގެ ހިތެއް ނުލިބޭނެ.”
އައިރާ ލޯގަނޑު ކުރިމަތީގައި ހުއްޓިލިއެވެ. “އަހަރެން އޭނާގެ ހިތް އަތުލާނަން. ކޮންމެ ފަދަ ގުރުބާނީއެއް ވެގެންވެސް. އަދި އަނޫ… އަނޫ އޭނާއާ ދުރުކުރަން ކުރަންޖެހުނު ކޮންމެ ކަމެއް އަހަރެން ކުރާނަން.”
——-
ކައިވެނީގެ ތާރީޚު ކައިރިވަމުން އައި ވަރަކަށް، “ފުރަމަލަގެ” ތެރޭގައި އޮތް ހަލަބޮލިކަން އިތުރުވަމުން ދިޔައެވެ. ގޭގެ ފާރުތަކުގައި އާ ކުލަލެވި، ފަރުނީޗަރުތައް އައު ކުރެވި، މުޅި މާހައުލު އީދެއް ފަދައިން ތައްޔާރުވަމުން ދިޔައެވެ. ނަމަވެސް، އެ އުފާވެރިކަމުގެ ފަރުދާގެ ފުރަގަހުގައި ވަނީ ބަޔާންކުރަން ދަތި ހާސްކަމެކެވެ.
ޒައުލް އޮފީހުން އަންނަނީ އިރާކޮޅުގައެވެ. އޭނާ ގިނަ ވަގުތު ހޭދަކުރަނީ އަމިއްލަ ކޮޓަރީގައެވެ. އައިރާ އޭނާއާ ވާހަކަދައްކަން ކުރާ ކޮންމެ މަސައްކަތެއް ނިމިގެންދަނީ ޒައުލްގެ ކުރު ޖަވާބުތަކަކުންނެވެ. މިކަމަކީ އައިރާގެ ހިތް ނުތަނަވަސްކުރުވާ ކަމެކެވެ.
އެއްދުވަހަކު މެންދުރުފަހުގެ ވަގުތެވެ. އައިރާއާއި ފާތުމަ ތިބީ ކައިވެނީގެ ރަންކިޔުމަށް ބޭނުންވާ ތަކެތީގެ ލިސްޓެއް ތައްޔާރުކުރާށެވެ.
“ދަރިފުޅާ، ޒައުލް ކައިރީގައި އަހާބަލަ އޭނާ ބޭނުންވާ ކުލައެއް. ފަހާ މީހާއަށް ގުޅަން މި އުޅެނީ،” ފާތުމަ ބުންޏެވެ.
ޒައުލްގެ ކޮޓަރިއާ ދިމާއަށް އައިރާ ހިނގައިގަތެވެ. ކޮޓަރީގެ ދޮރު ހުރީ ކުޑަކޮށް ހުޅުވިފައެވެ. އައިރާ އެތެރެއަށް ވަންނަން އުޅެފައި މަޑުޖެހިލީ އެތެރެއިން އިވުނު އަޑަކުންނެވެ.
“އަނޫ، ކަލޭ ބޭނުންވަނީ ކޮން ކުލައެއްގެ ހެދުމެއް؟” އެއީ ޒައުލްގެ އަޑެވެ.
“އަހަރެންތަ؟ ޒައުލްބޭ، މިއީ ދައްތަގެ ކައިވެންޏެއްނު. ދައްތަ ބޭނުންވާ ކުލައެއް ނޫންތަ މުހިންމީ؟” އަނޫގެ އަޑު އިވުނެވެ.
“ދައްތަ ބޭނުންވާ އެއްޗެއް ދައްތަ އިޚްތިޔާރު ކުރާނެ. އަހަރެން ބޭނުންވަނީ އަނޫއަށް އެންމެ ރީތިވާނެ ކުލަ އެނގެން،” ޒައުލް މަޑުމައިތިރިކަމާއެކު ބުންޏެވެ.
އައިރާގެ ދަތްކުނޑިވިކިގެން ދިޔައެވެ. އޭނާގެ ދެލޮލުން އަލިފާންކަނި ބުރާ ކަހަލައެވެ. އޭނާ އެތެރެއަށް ވަދެގަތެވެ.
“ޒައުލް! ކަލޭ މިތާ ކީއް ތިކުރަނީ؟” އައިރާގެ އަޑު މުޅި ކޮޓަރީގައި ގުގުމާލިއެވެ.
ޒައުލްއާއި އަނޫ ސިހިފައި ބަލާލިއެވެ. އަނޫ އަތުގައި އޮތީ ރަޖިސްޓްރީ ފޮތެކެވެ. އޭނާ އިނީ ޒައުލަށް އޮފީހުގެ ބައެއް ލިޔެކިޔުންތައް ތަރުތީބުކޮށްދޭށެވެ.
“އައިރާ، ކީއްވެ ތިހާ ބާރަށް ހަޅޭއްލަވަނީ؟ އަނޫ މި އިނީ އަހަރެންގެ ބައެއް މަސައްކަތުގައި އެހީވާން،” ޒައުލް ހަމަޖެހިލަމުން ބުންޏެވެ.
“މަސައްކަތްތަ؟ ނޫނީ ހެދުމުގެ ކުލަ ހޮވަނީތަ؟ އަހަރެން ހުރިހާ ވާހަކައެއް އަޑުއަހައިފިން. ޒައުލް، ކަލެއަށް އަހަރެން ފެންނަނީ ހަމައެކަނި ބޮލުގައި އެޅިފައިވާ ބުރައެއްގެ ގޮތުގަތަ؟” އައިރާ ރޮމުން ބުންޏެވެ.
“ދައްތާ، ހެޔޮނުވާނެ. ތިހެން ހީނުކުރޭ. ޒައުލްބޭ ހަމައެކަނި އެހީ…” އަނޫ ވާހަކަ ދައްކަން އުޅުނެވެ.
“ކަލޭ ހަނު ހުރޭ! މިއީ ކަލެއާ ބެހޭ ކަމެއް ނޫން. ކަލޭ ތި އުޅެނީ އަހަރެންގެ ދިރިއުޅުން ހަލާކުކުރަން. މިއަދުން ފެށިގެން، ކަލޭ ޒައުލްގެ ކޮޓަރިއަށް ވަދެގެން ނުވާނެ،” އައިރާ، އަނޫގެ އަތުގައި ހިފައި ދަމާފައި ކަހަލަ ގޮތަކަށް ކޮޓަރިން ނެރުނެވެ.
ޒައުލް ރުޅި އައިސްގެން ތެދުވިއެވެ. “އައިރާ! ހުއްޓާލާ. ތިއީ ކޮން ކަހަލަ އަޚްލާގެއް؟ އަނޫއަކީ ކަލޭގެ ކޮއްކޮއޭ. ކަލޭގެ ތި އުޅުމުގެ ސަބަބުން އަހަރެންގެ ހިތުގައި އޮތް ކުޑަ ގަދަރުވެސް ތި ގެއްލުވާލަނީ.”
އައިރާ ޒައުލަށް ބަލާލިއެވެ. “ގަދަރޭ؟ ޒައުލް، އަހަރެން މި ހުރިހާ ކަމެއް މިކުރަނީ އަހަރެންގެ ލޯބި ސަލާމަތް ކުރަން. ކަލެއަށް ނޭނގެނީތަ އަހަރެން ކަލޭ ދެކެ ލޯބިވާ މިންވަރު؟”
“ތިއީ ލޯތްބެއް ނޫން. ތިއީ ބަލިމަޑުކަމެއް. އައިރާ، ލޯބީގައި އޮންނަންޖެހޭނީ އިތުބާރު. ކަލޭގެ ހިތުގައި އިތުބާރެއް ނެތް،” ޒައުލް މިހެން ބުނެފައި ކޮޓަރިން ނިކުމެގެން ދިޔައެވެ.
އެރޭގެ ކެއުމުގެ ވަގުތުގައި މުޅި މޭޒުމަތި އޮތީ ހަމަހިމޭންވެފައެވެ. އަނޫ އިނީ އިސްޖަހާލައިގެންނެވެ. އޭނާގެ ލޯ ދުޅަވެފައި ހުރި ގޮތުން އޭނާ ވަރަށް ބޮޑަށް ރުއިކަން އެނގެއެވެ. ބޮޑުބޭބެއަށް މިކަން ފާހަގަވިއެވެ.
“އަނޫ، ދަރިފުޅާ. ކިހިނެއްވީ؟ ބަލީތަ؟” ބޮޑުބޭބެ އޯގާތެރިކަމާއެކު އެހިއެވެ.
“ނޫން ބައްޕާ. ހަމަ ބޯ އަނބުރާތީ،” އަނޫ ދޮގެއް ހަދާލިއެވެ.
އައިރާ މަލާމާތުގެ ހިނިތުންވުމަކާއެކު އަނޫއަށް ބަލާލިއެވެ. “ބޯ އަނބުރާނީކީ ނޫން. މާ ބޮޑަށް މީހުންގެ ކަންތައްތަކުގެ ތެރެއަށް ވަންނަން އުޅުނީމަ ވާނީ ތިހެން.”
ފާތުމަ އައިރާއަށް ދެލޯ އަޅާލިއެވެ. “އައިރާ! ކެއުމުގެ މޭޒުމަތީގައި ތިކަހަލަ ވާހަކަ ނުދައްކާ.”
ކެއުމަށްފަހު، ޒައުލް ބޮޑުބޭބެއާ ވަކިން ބައްދަލުކުރިއެވެ. “ބައްޕާ، އަހަރެން ބޭނުންވަނީ މި ކައިވެނި މަޑުޖައްސާލަން.”
(ނުނިމޭ)
