ކިންގް” ގެ ފޯރިގަދަ އެކްޝަން މަންޒަރުތަކެއް ޝާހްރުކް ޚާން އާއި ސުހާނާ ނިންމާލައިފިއެވެ.
ސިިއްދާތު އާނަންދު އުފައްދާ މި ފިލްމަކީ ބޮޑު ތަރުހީބެއް ލިބޭނެ ކަމަށް ބެލެވޭ ފިލްމެކެވެ. “ކިންގް” ސިނަމާތަކަށް އަންނާނެ ކަމަށް ލަފާކުރެވެނީ 24 ޑިސެމްބަރު 2026 ގައެވެ.
ސިއްދާތު އާނަންދު މި ފިލްމު އިއުލާނު ކުރިީއްސުރެ، ޝާހްރުކް ޚާންގެ ފޭނުން ތިބީ މި ފިލްމު ބޮޑު ސްކްރީނުގައި ބަލާލުމަށް ކެތްމަދުވެފައެވެ. ފިލްމާ ގުޅޭ އާ މަޢުލޫމާތުތައް ލިބެމުންދާ ވަރަކަށް، ބެލުންތެރިންގެ މެދުގައި އޮތް ޝައުގުވެރިކަން ދަނީ އިތުރުވަމުންނެވެ. މިހާރު ޝާހްރުކް ޚާން ދަނީ މި ފިލްމުގެ މަސައްކަތްތަކުގައި ވަރަށް ބޮޑަށް ބިޒީކޮށް އުޅެމުންނެވެ. އެންމެ ފަހުގެ ރިޕޯޓްތައް ބުނާ ގޮތުގައި، އޭނާ މިހާރު ވަނީ އަށް ދުވަހަށް ދެމިގެންދިޔަ ވަރުގަދަ އެކްޝަން މަންޒަރުތަކެއްގެ ޝޫޓިން ނިންމާލާފައެވެ.
ޝާހްރުކް އާއި ސުހާނާ ވަރުގަދަ އެކްޝަން ސީކުއެންސެއް ނިންމާލުން
2026 ވަނަ އަހަރު ނުކުންނާނެ އެންމެ ބޮޑު އެއް ފިލްމަކީ “ކިންގް” އެވެ. ސިއްދާތު އާނަންދު ޑައިރެކްޓްކުރާ މި ފިލްމުގެ މައިގަނޑު ރޯލުން ފެންނާނީ ޝާހްރުކް ޚާން އެވެ. މީގެ އިތުރުން، މިއީ ޒޯޔާ އަޚްތަރުގެ “ދަ އާޗީސް” އަށް ފަހު، ސުހާނާ ޚާން ބޮޑު ސްކްރީނަށް ތައާރަފުވާ ފިލްމުވެސް މެއެވެ. “މިޑް-ޑޭ” އިން ރިޕޯޓްކޮށްފައިވާ ގޮތުގައި، ބައްޕަ އާއި ދަރިފުޅު މިހާރު ވަނީ ‘ވިޖަޔާދަޝަމީ’ ފާހަގަކުރުމުގެ ތެރޭގައި ހިނގާ ވަރުގަދަ އެކްޝަން މަންޒަރުތަކެއް ނިންމާލާފައެވެ.
މިކަމާ ގުޅޭ މައުލޫމާތު އެނގޭ ފަރާތަކުން ބުނި ގޮތުގައި، މި މަންޒަރުތައް ކުޅެފައިވަނީ ވަރަށް ގިނަ އަދަދެއްގެ މީހުންނާއެކު، ބެރުގެ އަޑުފަށާއި ކުލަތަކުން ފުރިގެންވާ ފޯރިގަދަ މާހައުލެއްގައެވެ. ޝާހްރުކް އާއި ސުހާނާ މި މަންޒަރުތައް ކުޅެފައިވަނީ އެތައް ސަތޭކަ ބެކްގްރައުންޑް އާޓިސްޓުންނާއެކު، އަށް ރޭގެ މަތިންނެވެ. އަދި ސުހާނާ އަމިއްލައަށް ބައެއް ނުރައްކާތެރި ސްޓަންޓްތައް ޖައްސާފައިވާ ކަމަށްވެސް މަޢުލޫމާތު ލިބެއެވެ.
ދާދި ފަހުން މިއުޒިކް ކޮމްޕޯޒަރުން ކަމަށްވާ ސަޗިން-ޖިގަރް ބުނެފައިވާ ގޮތުގައި، މި ފިލްމުގައި ޝާހްރުކް ޚާން ފެންނާނީ މުޅިން ތަފާތު ގޮތަކަށެވެ. އަދި އޭނާ ކިޔާފައިވާ ލަވަތަކަކީ މީގެ ކުރިން އޭނާގެ ފަރާތުން ފެނިފައިނުވާ ކަހަލަ އާ ފީލްއެއް ލިބޭނެ ލަވަތަކެއް ކަމަށްވެސް އެ ފަރާތުން ބުންޏެވެ. މީގެ އިތުރުން، ޝާހްރުކްގެ ސިފައަށް ބޮޑެތި ބަދަލުތަކެއް ގެނެސްފައިވާ ކަމަށާއި، މިއީ އޭނާގެ ކެރިއަރުގައި މިހާތަނަށް ކޮށްފައިނުވާ ކަހަލަ ތަފާތު މަސައްކަތެއް ކަމަށްވެސް ފާހަގަކުރިއެވެ.
ޝާހްރުކް އާއި ސުހާނާގެ އިތުރުން މި ފިލްމުން ފެންނާނެ ތަރިންގެ ތެރޭގައި ދީޕިކާ ޕަދުކޯން، އަބީޝެކް ބައްޗަން، ރާގަވް ޖުޔާލް، އަބޭ ވަރުމާ، އަނިލް ކަޕޫރު، ޖެކީ ޝްރޮފް، އަރްޝަދު ވަރުސީ، ރާނީ މުކަރުޖީ، ޖައިދީޕް އަހްލާވަތު، ސޯރަބް ޝުކްލާ، އަކްޝޭ އޮބެރޯއީ އަދި ކަރަންވީރު މަލްހޯތުރާ ހިމެނެއެވެ.
ފިލްމާ ގުޅޭ ބައެއް ތަފްސީލްތައް ހިއްސާކުރަމުން ސޯރަބް ޝުކްލާ ބުނީ، “ކިންގް” އަކީ ބެލުންތެރިންގެ އުންމީދުތަކާ އެއްވަރުގެ ފިލްމަކަށް ވާނެ ކަމަށެވެ. އަދި މި ފިލްމުގައި ބޮލީވުޑްގެ ގާތްގަނޑަކަށް %70 ފަންނާނުން ބައިވެރިވާ ކަމަށްވެސް އޭނާ ބުންޏެވެ.
“ކިންގް” ސިނަމާތަކަށް ރިލީޒްކުރުމަށް ހަމަޖެހިފައިވަނީ 24 ޑިސެމްބަރު 2026 ގައެވެ.
