އާދަމްއާއި ޑޭވިޑަށް 402 ވަނަ ކޮޓަރިއާ ހަމައަށް ދެވުނުއިރު، އެތަނުގެ ބޭރުގައި ދެ ހަނގުރާމަވެރިން ތިއްބެވެ. އެމީހުން ދިޔައީ ކޮންމެ ކޮޓަރިއެއްގެ ދޮރު ހަލާކުކޮށްލައިގެން އެތެރެއަށް ވަންނަމުންނެވެ.

“މަޑުކުރޭ،” އާދަމް ޑޭވިޑްގެ އަތުގައި ހިފެހެއްޓިއެވެ. “އެމީހުން އެތިބީ ދޮރުމަތީގަ. އަހަރެމެން ޖެހޭނީ އެމީހުންގެ ސަމާލުކަން އެހެން ދިމާލަކަށް އަނބުރާލަން.”

އާދަމް ކައިރީގައި ހުރި ފަޔަރ އެލާމްގެ ބަޓަނަށް ބަލާލިއެވެ. އޭނާ އެ ބަޓަން ފިތާލައިފިނަމަ، މުޅި ހޮޓަލުގައި ސައިރަންގެ އަޑު ގުގުމާލާނެއެވެ. އެއީ ނުރައްކާތެރި ކަމެއް ނަމަވެސް، އެހެން ގޮތެއް ނެތެވެ.

“އަހަރެން މި އެލާމް ޖައްސާލާނަން. އޭރުން އެމީހުން ހާސްވާނެ. އެވަގުތު ތިޔަބޭފުޅާ ދުވެފައި ގޮސް ކޮޓަރިއަށް ވަދޭ،” އާދަމް ރޭވުން ކިޔައިދިނެވެ.

ޑޭވިޑް ބޯޖަހާލިއެވެ. އާދަމް ފުން ނޭވާއެއްލުމަށްފަހު އެލާމް ފިތާލިއެވެ.

ބީޕް! ބީޕް! ބީޕް! ބާރުގަދަ އަޑަކާއެކު މުޅި ހޮޓާ ގުގުމާލިއެވެ. ހަނގުރާމަވެރިން ސިހިގެން ކޮޅުކޮޅުމައްޗަށް ބަލަން ފެށިއެވެ. “މިއީ ކޮން ކަމެއް؟” އެމީހުން ހަޅޭއްލަވައިގަތެވެ.

އެ ފުރުސަތުގެ ބޭނުން ހިފައި، ޑޭވިޑް ދުވެފައި ގޮސް 402 ވަނަ ކޮޓަރީގެ ދޮރުގައި ޓަކިޖެހިއެވެ. “ސާރާ! ހުޅުވާ! މިއީ ޑޭވިޑް!”

ސާރާ ދޮރު ހުޅުވާލުމާއެކު ޑޭވިޑް އެތެރެއަށް ވަދެގަތެވެ. ނަމަވެސް އާދަމްއަށް އެތެރެއަށް ވަދެވޭގޮތެއް ނުވިއެވެ. އެއް ހަނގުރާމަވެރިއަކު އޭނާއާ ދިމާލަށް ބަޑިޖަހަން ފެށިއެވެ.

—

އާދަމް ދުވެފައި ގޮސް ކައިރީގައި ހުރި ސިޑިއަކުން މައްޗަށް އެރިއެވެ. އޭނާގެ ފަހަތުން ވަޒަންތައް އަންނަމުންދިޔައެވެ. އޭނާގެ ފަޔަށް ކުޑަ އަނިޔާއެއް ވީ ނަމަވެސް، އޭނާ ހުއްޓައެއް ނުލައެވެ.

މިވަގުތު ހޮޓަލުގެ ބޭރުގައި، ދިވެހި ސިފައިންނާއި ފުލުހުންގެ ހާއްސަ ފައުޖުތައް ތައްޔާރުވަމުންދިޔައެވެ. “އަހަރެމެން ޖެހޭނީ ހޮޓަލުގެ ފުރާޅުމަތިން އެތެރެއަށް ވަންނަން،” ކޮމާންޑަރު އިރުޝާދު ދިނެވެ. “އެތެރޭގައި ތިބި މީހުންގެ ފުރާނައަށް ނުރައްކާވެދާނެތީ، ބަޑިޖެހުމުގައި ވަރަށް ފަރުވާތެރިވާންވާނެ.”

ހޮޓަލުގެ އެތެރޭގައި، ހަނގުރާމަވެރިން މިހާރު ތިބީ ވަރަށް ބޮޑަށް ރުޅިއައިސްފައެވެ. އެމީހުންނަށް އެނގެއެވެ، ވަގުތު ކުޑަވަމުންދާކަމެވެ. “އެންމެން މަރާލާ! އެކަކުވެސް ދޫނުކުރާތި!” ޒައިދު އަމުރުކުރިއެވެ.

އާދަމްއަށް ދެވުނީ ހޮޓަލުގެ އެންމެ މަތީ ފަންގިފިލާގައި އޮންނަ ‘ސްކައި ލައުންޖް’ އަށެވެ. އެތަނުގައި ތިބި ފަތުރުވެރިން ތިބީ ބިރުން ގަނޑުވެފައެވެ.

“އެންމެން މަޑުމަޑުން ތިބޭ! އަހަރެން މިތަނުން ނުކުންނާނެ މަގެއް ދައްކައިދޭނަން،” އާދަމް ވަރުބަލިވެފައި ހުރެ ބުންޏެވެ.

އެވަގުތު އޭނާގެ ފޯނަށް މެސެޖެއް އައެވެ. އެއީ އޭނާގެ އަންހެނުން، އާމިނަތުގެ މެސެޖެކެވެ. “އާދަމް، ކޮބައިތަ؟ ޓީވީން މި ފެންނަނީ ހޮޓަލުގައި ބަޑިޖަހާ މަންޒަރު. އަވަހަށް ގެއަށް އާދޭ، ދަރިފުޅު ވަރަށް ރޮއިފި.”

އާދަމްގެ ލޮލުން ކަރުނަ ހިލުނެވެ. އޭނާއަށް އެނގެއެވެ، އޭނާ ގެއަށް ދިއުމަށްވުރެ، މިވަގުތު މިތިބި މީހުންގެ ފުރާނަ ސަލާމަތްކުރުން މާ މުހިންމުކަން. އޭނާ މެސެޖަކަށް ޖަވާބު ދިނެވެ. “އަހަރެން ރަނގަޅު. ދަރިފުޅު ގާތު ބުނޭ ބައްޕަ އެބަ އަންނަމޭ. ދުޢާކޮށްދީ.”

—

ހޮޓަލުގެ ކަރަންޓު ކުއްލިއަކަށް ކެނޑިގެން ދިޔައެވެ. މުޅި އިމާރާތަށް ވެރިވީ ކަނު އަނދިރިކަމެކެވެ. މިއީ ހަނގުރާމަވެރިންގެ ރޭވުމުގެ ބައެކެވެ. އެމީހުންގެ އަތުގައި ހުރި ނައިޓް-ވިޝަން ގޮގްލްސް ބޭނުންކޮށްގެން އަނދިރީގައި މީހުން ހޯދުމަކީ އެމީހުންނަށް ލިބުނު ފުރުސަތެކެވެ.

“ކޮންމެ ކޮޓަރިއަކަށް ވަދޭ! ހުރިހާ އެންމެން މަރާލާ!” ޒައިދުގެ އަޑު ވައިރުލެސް ސެޓުން އިވުނެވެ.

އާދަމްއަށް އެނގުނެވެ. މިހާރު ވަގުތު ކުޑަވަމުންދާކަމެވެ. އޭނާ ސްކައި ލައުންޖުގައި ތިބި މީހުންނަށް އިޝާރާތްކުރިއެވެ. “އެންމެން އެކަކު އަނެކަކުގެ އަތުގައި ހިފާ. އަޑުނުލައްވާ މަޑުމަޑުން ހިނގާ. އަހަރެމެން މިދަނީ ސްޓާފް ލިފްޓާ ދިމާލަށް، އެއީ މިވަގުތު އޮތް ހަމައެކަނި މަގު.”

އެވަގުތު، 402 ވަނަ ކޮޓަރީގެ ތެރޭގައި ޑޭވިޑާއި ސާރާ ތިބީ ނޭވާ ހިފަހައްޓާލައިގެންނެވެ. އެމީހުންގެ ތުއްތު ދަރިފުޅު ރޯން ފެށިއެވެ. ސާރާ އަވަސް އަވަހަށް ދަރިފުޅުގެ އަނގަމަތީގައި އަތް އެޅިއެވެ.

“ޝޫޝް… ދަރިފުޅާ، ރޮއިގެން ނުވާނެ،” ސާރާ މަޑުމަޑުން ބުންޏެވެ. އޭނާގެ ލޮލުން ކަރުނަ އޮހެމުންދިޔައެވެ.

ކޮޓަރީގެ ބޭރުން ބޫޓު ފިޔަވަޅުގެ އަޑު އިވެން ފެށިއެވެ. މީހަކު ދޮރުގެ ތަޅުގައި ހިފާލި އަޑު އިވުނެވެ. ޑޭވިޑް ކައިރީގައި ހުރި ބަރު ބިއްލޫރި ފުޅިއެއް ނަގައި، ދިފާއުވުމަށް ތައްޔާރުވިއެވެ. ނަމަވެސް ބޭރުގައި ތިބި މީހުން އެހެން ކޮޓަރިއަކާ ދިމާލަށް ދިޔައެވެ.

—

މާލޭގެ މަގުތަކުގައި ސިފައިންގެ ބޮޑެތި އުޅަނދުތައް ހަރަކާތްތެރިވަމުންދިޔައެވެ. އެމް.އެން.ޑީ.އެފްގެ ހާއްސަ ފައުޖު ނުވަތަ ސްޕެޝަލް ފޯރސަސް މިހާރު ތިބީ ހޮޓަލުގެ ފުރާޅުމަތީގައެވެ.

“ޓީމް އަލްފާ، ކަލޭމެން ވަންނާނީ ޓެރަސް އިން. ޓީމް ބްރާވޯ، ކަލޭމެން މައި ދޮރުން ވަންނަން ތައްޔާރުވޭ،” ކޮމާންޑަރުގެ އަމުރު ލިބުނެވެ.

ބާރުގަދަ ގޮވުމަކާއެކު، ސިފައިން ހޮޓަލުގެ ފުރާޅުން އެތެރެއަށް ވަދެގަތެވެ. ހަނގުރާމަވެރިންނާއި ސިފައިންނާ ދެމެދު ވަރުގަދަ ބަދަލުކުރުންތަކެއް ހިނގަން ފެށިއެވެ. ބަޑީގެ އަޑުން މުޅި މާލެ ގުގުމާލިއެވެ.

މި ހަލަބޮލިކަމުގެ ތެރޭގައި، އާދަމްއަށް އޭނާގެ ޓީމު ގޮވައިގެން ސްޓާފް އޭރިއާއަށް ދެވުނެވެ. އެތަނުން އޭނާއަށް ފެނުނީ ވާފިރުބެއެވެ.

“ވާފިރުބޭ! ސަލާމަތުން އެބަ ތިބީމުދޯ؟” އާދަމް ދުވެފައި ގޮސް ވާފިރުބޭގެ ގައިގައި ބައްދާލިއެވެ.

“އާނ، އާދަމް. އަހަރެމެން މިތިބީ ރައްކާތެރި ތަނެއްގަ. އެކަމަކު އަދިވެސް ވަރަށް ގިނަ މީހުން އެބަތިބި އެކި ފަންގިފިލާތަކުގައި ތަޅުލެވިފަ،” ވާފިރުބޭ ކަންބޮޑުވުމާއެކު ބުންޏެވެ.

—

ހަނގުރާމަވެރިންގެ ތެރެއިން ‘ޢިމްރާން’، މިހާރު ހުރީ ވަރަށް ބޮޑަށް ޒަޚަމްވެފައެވެ. އޭނާ އިނީ ހޮޓަލުގެ ކޮރިޑޯއެއްގައި އިށީނދެގެންނެވެ. އޭނާގެ އަތުގައި އޮތް ފޯނަށް އޭނާގެ މަންމަ ގުޅަމުންދިޔައެވެ.

“ޢިމްރާން، ދަރިފުޅާ، ކޮބައިތަ؟ ހަބަރެއް ނުވެގެން މަންމަ މި ހުންނަނީ ވަރަށް ކަންބޮޑުވެފަ،” މަންމަގެ އަޑު އިވުމުން އިމްރާންގެ ލޮލުން ކަރުނަ ފޭދުނެވެ.

“މަންމާ… އަހަރެން ސަލާމަތެއް ނުވާނެ. އަހަރެން މިކުރާ ކަމަކީ ރަނގަޅު ކަމެއްބާއޭ މިހާރު ހިތަށް އަރާ،” އިމްރާން މަޑުމަޑުން ބުންޏެވެ.

ޒައިދު އެތަނަށް އައިސް އިމްރާންގެ ފޯނު އަތުލައި، ތަޅާލިއެވެ. “ހިތްވަރު ދޫނުކުރޭ! އަހަރެމެން މިތިބީ ސުވަރުގެ ދިއުމުގެ މަގުމަތީގަ!” ޒައިދު ހަޅޭއްލަވައިގަތެވެ.

—

ހަނގުރާމަވެރިންނަށް އެނގުނެވެ. ސިފައިން އެތެރެއަށް ވަދެއްޖެކަމެވެ. އެމީހުން ނިންމީ ހޮޓަލުގެ ބައެއް ތަންތަނުގައި ގޮވާތަކެތި ހަރުކުރުމަށެވެ. “އަހަރެމެން މިތަނުން ނުކުންނާނީ މުޅި މިތަން ގޮއްވާލާފަ،” ޒައިދު އޭނާގެ ބައިވެރިންނަށް ބުންޏެވެ.

އާދަމްއަށް މި މަންޒަރު ފެނުނީ ސެކިއުރިޓީ ކެމެރާގެ މޮނިޓަރުންނެވެ. “ވާފިރުބޭ، އެމީހުން އެ އުޅެނީ މުޅި ހޮޓާ ގޮއްވާލަން. އަހަރެމެން ޖެހޭނެ އެމީހުން ހުއްޓުވަން ނުވަތަ މީހުން ހުސްކުރަން!”

“އާދަމް، ސިފައިންނަށް ތި މައުލޫމާތު ދީ. އަހަރެން މިދަނީ މައި ކޮންޓްރޯލް ރޫމަށް، ކަރަންޓާއި ގޭސް ކަނޑާލަން،” ވާފިރުބޭ ނިންމިއެވެ.

އާދަމް އޭނާގެ ފޯނުން ފުލުހުންގެ ހޮޓްލައިނަށް ގުޅިއެވެ. “އަޅުގަނޑަކީ މި ހޮޓަލުގެ ސްޓާފެއް…. އަޑުއަހާ، ހަނގުރާމަވެރިން މިހާރު ތިބީ ހަތަރުވަނަ ފަންގިފިލާގައި ގޮވާތަކެތި ހަރުކުރަން. އަވަސްކުރޭ!”

އެވަގުތު، ހަނގުރާމަވެރިއަކު ސެކިއުރިޓީ ރޫމުގެ ދޮރު ވައްޓާލިއެވެ. އާދަމްއަށް ފިލޭނެ އެއްވެސް މަގެއް ނެތެވެ.

“ކާކާ ތިޔަ ވާހަކަދައްކަނީ؟” ހަނގުރާމަވެރިޔާ އާދަމްގެ ބޮލަށް ބަޑި ދިމާކުރަމުން އެހިއެވެ.

ނުނިމޭ