ވިހެއުމަށްފަހު ބަރުދަން ލުއިކުރުމަށް ސެމަގްލޫޓައިޑް — އޮޒެމްޕިކް އަދި ވެގޯވީ ފަދަ ޖީއެލްޕީ-1 ބޭސްތަކުގެ މައިގަނޑު ބައި ބޭނުންކުރުމަށް އަންހެނުންގެ ޝައުގުވެރިކަން ބޮޑުވަމުން އަންނައިރު، ގާތުންދޭ ދުވަސްވަރު މި ބޭސް ބޭނުންކުރުމުގެ ރައްކާތެރިކަމާ މެދު ޑޮކްޓަރުންގެ މެދުގައި ޚިޔާލު ތަފާތެވެ.
# ޝައުގުވެރިކަން ބޮޑުވަނީ، ދިރާސާ މަދު
މާބަނޑު ދުވަސްވަރު ސެމަގްލޫޓައިޑް ބޭނުންކުރުން ރައްކާތެރި ނޫންކަން ސާފެވެ. ބަނޑުބޮޑުވާން ރާވާ ނަމަ މަދުވެގެން ދެ މަސް ކުރިން ބޭސް ހުއްޓާލަން ޖެހެއެވެ. ނަމަވެސް ގާތުންދޭ ދުވަސްވަރާ ބެހޭ ގޮތުން އެނގޭ މިންވަރު ވަރަށް ކުޑައެވެ. ވެގޯވީ ނުވަތަ އޮޒެމްޕިކް މައިމީހާގެ ކިރުގެ ތެރެއަށް ދޭތޯ، ދަރިފުޅަށް އަސަރެއް ކުރޭތޯ، ނުވަތަ ކިރު އުފެއްދުމަށް ބަދަލެއް އާދޭތޯ ޔަގީންކޮށް ބުނެވޭ ވަރަށް ދިރާސާ ހެދިފައެއް ނެތެވެ.
ޓެކްސަސް ޓެކް ޔުނިވާސިޓީގެ އިންފޭންޓް ރިސްކް ސެންޓަރުން ބުނާ ގޮތުގައި ގާތުންދޭ އަންހެނުން ސެމަގްލޫޓައިޑާ ބެހޭ ގޮތުން ގުޅާ މިންވަރު 2021 އިން 2024 އަށް 500 އިންސައްތައަށް ވުރެ ބޮޑަށް އިތުރުވެފައިވެއެވެ. “ވިހެއުމުގެ ކުރީގެ ހަށިގަނޑު އަނބުރާ ބޭނުންވާ މައިންގެ ވާހަކަ އަބަދުވެސް އަޑު އިވޭ” ކަމަށް އެ ސެންޓަރުގެ ޑައިރެކްޓަރު ޑރ. ކެއިޓްލިން ކްރަޗް ވިދާޅުވެއެވެ.
2024ގެ ނޮވެމްބަރުގައި ޖާމާގައި ޝާއިޢުކުރި ދިރާސާ ސިޓީއަކުން ދައްކާ ގޮތުގައި ޑެންމާކުގައި ވިހެއުމަށްފަހު ހަ މަސް ތެރޭ ޖީއެލްޕީ-1 ބޭސް ނެގި މައިންގެ އަދަދު 2022 އިން ފެށިގެން އިތުރުވެ، 2024 ގައި ވަރަށް ބޮޑަށް މައްޗަށް ޖެހިލިއެވެ. އެ ދިރާސާގައި ބޭސް ބޭނުންކުރި ގިނަ މައިންނަކީ މާބަނޑުވުމުގެ ކުރިން ބަރުދަން ހެޔޮވަރަށް ވުރެ ބޮޑު މީހުން ކަމަށާއި، އެންމެ 23 އިންސައްތައިގައި ހަކުރުބަލި ހުރިކަން ފާހަގަކޮށް، ބޭސް ބޭނުންކުރީ މައިގަނޑު ގޮތެއްގައި ބަރުދަން ލުއިކުރުމަށް ކަމަށް ދިރާސާވެރިން ލިޔެފައިވެއެވެ.
# ޑޮކްޓަރުންގެ ޚިޔާލު ތަފާތު
މެސެޗޫސެޓްސް ޖެނެރަލް ހޮސްޕިޓަލުގެ އޮބީސިޓީ މެޑިސިން ފިޒިޝަން އަދި ހާވާޑް މެޑިކަލް ސްކޫލުގެ އެސޯސިއޭޓް ޕްރޮފެސަރު ޑރ. ފާތިމާ ކޯޑީ ސްޓެންފޯޑް ވިދާޅުވާ ގޮތުގައި ގާތުންދޭ ދުވަސްވަރު ސެމަގްލޫޓައިޑް ބޭނުންކުރުން “ކަނޑައެޅިގެން ރައްކާތެރިއެއް ނޫނެ”ވެ. “ބޭނުން ނުކުރާށޭ” ސްޓެންފޯޑް ވިދާޅުވެއެވެ. “ކިރު މެދުވެރިކޮށް މި ބޭސް ދަރިފުޅަށް ފޯރައިފި ނަމަ ވާނެ ގޮތެއް އެނގޭ އެއްވެސް ޑޭޓާއެއް ނެތް. އެހާ ތުއްތު ކުދިންގައި މި ބޭސް ޓެސްޓް ކުރެވިފައެއް ނެތް” ކަމަށް އެކަމަނާ ވިދާޅުވެއެވެ. ސްޓެންފޯޑަކީ އޮޒެމްޕިކް އަދި ވެގޯވީ އުފައްދާ ނޯވޯ ނޯޑިސްކުގެ މުސާރަ ލިބޭ ކޮންސަލްޓެންޓެކެވެ.
ނަމަވެސް ކްރަޗް ވިދާޅުވާ ގޮތުގައި އެކަމަނާގެ ދިރާސާ ދައްކާ ގޮތުން ސެމަގްލޫޓައިޑް ކިރުގެ ތެރެއަށް ނުދެއެވެ. އެއީ ބޮޑު މޮލެކިއުލެއް ކަމުން “ކިރުގެ ތެރެއަށް ސެމަގްލޫޓައިޑް ވަނުމަކީ ބަދިގޭ ކުޑަދޮރުން އެތެއް ވައްދަން އުޅުން ފަދަ ކަމެއް” ކަމަށް ކްރަޗް ވިދާޅުވެއެވެ. ގާތުންދޭ އަށް އަންހެނެއްގެ ކިރު ތަހުލީލުކުރި 2024ގެ ދިރާސާއިން އެއްވެސް ސާމްޕަލަކުން ސެމަގްލޫޓައިޑް ފެނިފައެއް ނުވެއެވެ. ނަމަވެސް ސްޓެންފޯޑް ވިދާޅުވީ އެ ދިރާސާ “ވަރަށް ކުޑަ” ކަމަށެވެ. “އެންމެ އަށް އަންހެނުން. މިލިއަނުން މީހުން މި ބޭސް ބޭނުންކުރޭ. ރެންޑަމައިޒްޑް ކޮންޓްރޯލްޑް ޓްރައިލެއް ހެދިފައެއް ނެތް” ކަމަށް ވިދާޅުވެއެވެ.
ފްލޮރިޑާގެ އެޑްވެންޓް ހެލްތުގެ ޑރ. ޖީން ވެލް ވިދާޅުވާ ގޮތުގައި ދިރާސާގެ ނަތީޖާ ހިތްހަމަޖައްސައިދޭ ކަމަށާއި ދަރިފުޅަށް އޮތް ނުރައްކާ ކުޑަ ކަމަށް ބެލެވޭ ކަމަށެވެ. ނަމަވެސް ދިރާސާ އަދި ކުރީ މަރުހަލާގައި ކަމަށް ވެލް ފާހަގަކުރައްވައެވެ.
# ކިރު އުފެއްދުމަށް އަސަރު ކޮށްފާނެ
ޖަވާބު ނުލިބި އޮތް އެއް ސުވާލަކީ ސެމަގްލޫޓައިޑް ބޭނުންކުރުމުން ކާ މިންވަރު މަދުވެ ބަރުދަން ލުއިވާ ނަމަ، ކިރު އުފެއްދޭ މިންވަރަށް ބަދަލެއް އައިސްދާނެތޯއެވެ. “ކެލޮރީ މަދުވުމުން ހަށިގަނޑުން ފެން މަދުވެ، ކިރު އުފެއްދުމަށް އަސަރު ކޮށްފާނެ” ކަމަށް ވެލް ވިދާޅުވެއެވެ. ކެއުން މާ ބޮޑަށް މަދުކޮށްފި ނަމަ ކިރުގައި ހުންނަ ނިއުޓްރިއެންޓްސް މަދުވެ ދަރިފުޅުގެ ހެދިބޮޑުވުމަށް ހުރަސް އެޅިދާނެ ކަމުގެ ކަންބޮޑުވުންވެސް ކްރަޗް ފާހަގަކުރައްވައެވެ.
# ކިހިނެއް ހަދަންވީ؟
ބޭސް އުފައްދާ ފަރާތުގެ އިރުޝާދުގައި ބުނެފައިވަނީ ގާތުންދޭ ނަމަ ނުވަތަ ދޭން ރާވާ ނަމަ ޑޮކްޓަރަށް އެންގުމަށެވެ. ސްޓެންފޯޑް ވިދާޅުވާ ގޮތުގައި ގާތުންދިނުން މުޅިން ހުއްޓާލައި ޑޮކްޓަރުގެ ހުއްދަ ލިބުމުން ނޫނީ ބޭސް އަލުން ނުފެށުން ރަނގަޅެވެ. ކްރަޗް ލަފާ ދެއްވަނީ ދަރިފުޅަށް މަދުވެގެން ނުވަ މަސް ވަންދެން މަޑުކުރުމަށެވެ. އެ އުމުރުގައި ދަރިފުޅު ކިރުގެ އިތުރުން އެހެން ކާނާވެސް ކާނެތީ، ތަފާތު މަސްދަރުތަކުން ނިއުޓްރިއެންޓްސް ލިބޭނެ ކަމަށެވެ. ގާތުންދޭ މައިން ކޮންމެ ދުވަހަކު މަލްޓިވިޓަމިން ނުވަތަ ޕޯސްޓްނޭޓަލް ވިޓަމިން ގުޅައެއް ކެއުމަށްވެސް ކްރަޗް ލަފާ ދެއްވައެވެ.
ވެލް ވިދާޅުވާ ގޮތުގައި ބޭސްވެރިކަމުގައި ކޮންމެ ކަމެއްވެސް ގޮސް ހުއްޓެނީ ނުރައްކާ އާއި ފައިދާ ކިރައިލުމަށެވެ. މާބަނޑު ދުވަސްވަރު ބަރުދަން މާ ބޮޑަށް އިތުރުވެ، ހިތުގެ ބަލި، ހަކުރުބަލި އަދި ކެންސަރުގެ ނުރައްކާ ބޮޑުވާ ހާލަތުގައި “ގާތުންދޭ ދުވަސްވަރު ސެމަގްލޫޓައިޑް އަލުން ފެށުމަކީ އެކަށީގެންވާ ކަމެއް” ކަމަށް ވެލް ވިދާޅުވެއެވެ. ނަމަވެސް އެއީ ޑޮކްޓަރާއި ބަލިމީހާ ގުޅިގެން ނިންމާ ނިންމުމަކަށް ވާންޖެހޭ ކަމަށް ވެލް ފާހަގަކުރައްވައެވެ.
