ކުރުކޮށް ފޮނިކޮށް:

– ވިޓަމިން ޑީގެ ސަބަބުން ހަށިގަނޑުން ‘މެލަޓޯނިން’ އުފައްދާ މިންވަރަށް ބަދަލު އައިސް، ނިދުމަށް އަސަރުކޮށްފާނެއެވެ.
– ސަރުބީ އެކުލެވޭ ކާނާއަކާއެކު ވިޓަމިން ޑީ ބޭނުންކުރުމުން ހަށިގަނޑަށް އެ މާއްދާ ނަގައިގަންނަން ފަސޭހަވެއެވެ.
– ގިނަ މީހުންނަށް ދުވާލުގެ ކޮންމެ ވަގުތެއްގައިވެސް ވިޓަމިން ޑީ ބޭނުންކުރުމަކީ ރައްކާތެރި ކަމެކެވެ.

ވިޓަމިން ޑީ އަކީ ހަށިގަނޑުގެ ދިފާއީ ނިޒާމު ވަރުގަދަކުރުމަށާއި، ކަށިތައް ރައްކާތެރިކުރުމަށާއި، އަދި ނިދުމުގެ އާދަތައް ތަރުތީބުކުރުމަށް ވަރަށް މުހިންމު މާއްދާއެކެވެ. ހަށިގަނޑުގައި ވިޓަމިން ޑީ މަދުނަމަ، ސަޕްލިމަންޓް ބޭނުންކުރުމުން އެ މިންވަރު އިތުރުކޮށްދެއެވެ. ނަމަވެސް، މި ބޭނުންކުރާ ވަގުތުގެ ސަބަބުން ނިދުމަށް އަސަރުތަކެއް ކޮށްފާނެއެވެ.

ވިޓަމިން ޑީގެ ސަބަބުން ނިދުމަށް ބުރޫއަރާފާނެތަ؟
ބައެއް ދިރާސާތަކުން ދައްކާގޮތުގައި ރޭގަނޑު ވިޓަމިން ޑީ ބޭނުންކުރުމުން، ހަށިގަނޑުން ‘މެލަޓޯނިން’ އުފެއްދުމަށް ހުރަސްއެޅިދާނެއެވެ. މެލަޓޯނިން އަކީ އަނދިރިވުމުން ސިކުނޑިން އުފައްދާ ހޯރމޯންއެކެވެ. މިއީ ނިދަންވީ ވަގުތު ހަށިގަނޑަށް އަންގައިދީ، ނިދުމާއި ހޭލުމުގެ ގުދުރަތީ ނިޒާމު ހަމަޖައްސައިދޭ މާއްދާއެވެ.

އާންމުގޮތެއްގައި ވިޓަމިން ޑީ ލިބޭ މައިގަނޑު ވަސީލަތަކީ އިރުގެ އަލިކަމެވެ. އެހެންކަމުން، ބައެއް ދިރާސާތަކުން ބުނާގޮތުގައި ދުވާލު ގަޑީގައި ވިޓަމިން ޑީގެ މިންވަރު މަތިކޮށް ހުރެފައި، ރޭގަނޑު ދަށްވުމަކީ ނިދުމުގެ ނިޒާމަށް އެންމެ ރަނގަޅު ގޮތެވެ. އެހެންކަމުން، ރޭގަނޑަށްވުރެ ބޮޑަށް ދުވާލުގެ ވަގުތެއްގައި ވިޓަމިން ޑީ ބޭނުންކުރުން ފައިދާ ބޮޑުވެދާނެއެވެ.

މީގެ އިތުރުން، ވިޓަމިން ޑީގެ ސަބަބުން ‘ސެރޮޓޯނިން’ އަށްވެސް ބަދަލު އާދެއެވެ. މިއީ މީހާގެ މިޒާޖަށާއި މެލަޓޯނިން އުފެއްދުމަށް އަސަރުކުރާ ހޯރމޯންއެކެވެ. ވިޓަމިން ޑީ ހުންނަންޖެހޭ މިންވަރަށް ހުރުމުން ސެރޮޓޯނިން އުފެއްދުމަށް އެހީތެރިވެދެއެވެ. ނަމަވެސް، މާ ގިނައިން ވިޓަމިން ޑީ ބޭނުންކުރުމުން ސެރޮޓޯނިން މަދުވެ، އޭގެ ސަބަބުން މެލަޓޯނިންގެ މިންވަރުވެސް ދަށްވެދާނެއެވެ.

މިސާލަކަށް، 2013 ވަނަ އަހަރު ކުރެވުނު ދިރާސާއަކުން ދެއްކިގޮތުގައި، ތިން މަސް ދުވަސް ވަންދެން ކޮންމެ ދުވަހަކު މަތީ މިންވަރަކަށް ވިޓަމިން ޑީ ބޭނުންކުރި މީހުންގެ ހަށިގަނޑުގައި ރޭގަނޑު މެލަޓޯނިން އުފެދޭ މިންވަރު ދަށްވެފައިވެއެވެ.

ނުވަތަ ވިޓަމިން ޑީގެ ސަބަބުން ނިދަން ފަސޭހަވޭތަ؟
ވިޓަމިން ޑީގެ ސަބަބުން ނިދުމަށް ބުރޫއަރާފާނެ ކަމަށް ބެލެވުނު ކަމުގައިވިޔަސް، އޭގެ ސަބަބުން ނިދީގެ ފެންވަރު ރަނގަޅުވާކަމުގެ ހެކިތައްވެސް އެބަހުއްޓެވެ. ހަށިގަނޑުގައި ވިޓަމިން ޑީ މަދުވުމަކީ ނިދުމުގެ މައްސަލަތައް ކުރިމަތިވުމާއި، ނިދި މަދުވުމާ ގުޅުންހުރި ކަމެކެވެ. އާންމު ގޮތެއްގައި ކަށިތަކާއި ސިއްހަތަށް އެންމެ ރަނގަޅު މިންވަރަކީ މިލިލީޓަރަކަށް 20 ނެނޯގްރާމަށްވުރެ މަތީގައި ހުރުމެވެ.

ވިޓަމިން ޑީ މަދުވުމުން ނިދުމަށް އަސަރުކުރާ ސަބަބު އަދި މުޅިން ސާފުނުވި ކަމުގައިވިޔަސް، މިއީ މާބަނޑު މީހުންނާއި، ފެކްޓްރީތަކުގައި މަސައްކަތްކުރާ މީހުން އަދި ކިޑްނީގެ ބަލިތަކަށް ފަރުވާ ހޯދާ މީހުންގެ ފަރާތުން ފާހަގަކުރެވިފައިވާ ކަމެކެވެ.

އަދި ވިޓަމިން ޑީ މަދުވުމުން ހަށިގަނޑުގައި އިންފްލެމޭޝަން (ދުޅައުފެދުން) އިތުރުވެ، އޭގެ ސަބަބުންވެސް ނިދުމަށް އުނދަގޫވެދާނެއެވެ. އެހެންކަމުން، ވިޓަމިން ޑީގެ މިންވަރު މާ ދަށްނުވެ އަދި މާ މަތިނުވެ ހިފެހެއްޓުމަކީ އަރާމު ނިއްޖަކަށް މުހިންމު ކަމެކެވެ.

ސަރުބީ އެކުލެވޭ ކާނާއާއެކު ވިޓަމިން ޑީ ބޭނުންކުރުން
ވިޓަމިން ޑީ އަކީ ސަރުބީއަށް ގިރޭ ވިޓަމިންއެކެވެ. އެހެންކަމުން، އެންމެ ރަނގަޅަށް ހަށިގަނޑަށް މި މާއްދާ ނަގައިގަނެވޭނީ ސަރުބީ އެކުލެވޭ ކާނާއަކާއެކު ބޭނުންކުރުމުންނެވެ. ހެނދުނުގެ ނާސްތާއަކީ މިއަށް ރަނގަޅު ވަގުތެކެވެ. މީގެ ތެރޭގައި ކިރުގެ ބާވަތްތަކާއި، އެވަކާޑޯ، ތަރުކާރީ ތެޔޮ، އަދި އެކި ބާވަތުގެ ބަދަން ނުވަތަ ‘ނަޓްސް’ ހިމެނެއެވެ.

ސަރުބީ އެކުލެވޭ ކާނާއަކާ ނުލައި ބޭނުންކުރިޔަސް ހަށިގަނޑަށް އެ މާއްދާ ލިބޭނެއެވެ. ނަމަވެސް ސަރުބީއާއެކު ބޭނުންކުރުމުން އޭގެ ފައިދާ އިތުރަށް ބޮޑުވެއެވެ.

ގަވާއިދުން ބޭނުންކުރުމުގެ މުހިންމުކަން
ވިޓަމިން ޑީ ބޭނުންކުރަން އެންމެ ރަނގަޅު ވަގުތާ ބެހޭގޮތުން ދިރާސާތަކުގެ ނަތީޖާ ތަފާތެވެ. އެންމެ މުހިންމު ކަމަކީ މެދުކަނޑާނުލައި ގަވާއިދުން ބޭނުންކުރުމެވެ. ބޭސް ބޭނުންކުރަން ހަނދާން ނުހުންނަނަމަ، ކޮންމެ ދުވަހަކުވެސް އެއް ވަގުތެއްގައި ބޭނުންކުރުމުގެ އާދަ އަށަގަންނުވާށެވެ. މިސާލަކަށް ހެނދުނުގެ ނާސްތާ ގަޑީގައި ނުވަތަ ދަތް އުނގުޅާ ގަޑީގައި ބޭނުންކުރެވިދާނެއެވެ. މީގެ އިތުރުން ފޯނުން އެލާމް ނުވަތަ ރިމައިންޑަރ ސެޓްކުރުމަކީވެސް ކުރެވިދާނެ ކަމެކެވެ.

އެހެން ބޭހެއް ބޭނުންކުރާނަމަ، ވިޓަމިން ޑީއާއެކު ބޭނުންކުރުމުގެ ކުރިން ޑޮކްޓަރެއްގެ ލަފާ ހޯދުމަކީ މުހިންމު ކަމެކެވެ.

ވިޓަމިން ޑީ ބޭނުންކުރަން އެންމެ ރަނގަޅު ވަގުތަކީ ކޮބާ؟
ޖުމްލަގޮތެއްގައި، ދުވާލުގެ ކޮންމެ ވަގުތެއްގައިވެސް ވިޓަމިން ޑީ ބޭނުންކުރުމަކީ މައްސަލައެއް ނޫނެވެ. ރޭގަނޑު ބޭނުންކުރުމުން ނިދަން އުނދަގޫވާކަން ފާހަގަކުރެވޭނަމަ، ދުވާލުގެ ކުރީކޮޅަށް ވަގުތު ބަދަލުކޮށްލާށެވެ. ނަމަވެސް ދުވާލު ބޭނުންކުރަން ހަނދާންނެތިއްޖެނަމަ، ރޭގަނޑު ބޭނުންކުރުމަކީ ރައްކާތެރި ކަމެކެވެ. އެންމެ މުހިންމު ކަމަކީ ސަރުބީ އެކުލެވޭ ކާނާއަކާއެކު ގަވާއިދުން ބޭނުންކުރުމެވެ.

ކޮންމެ މީހެއްގެވެސް ހަށިގަނޑުގެ ހާލަތު ތަފާތުވާނެތީ، މިކަމާ ގުޅޭގޮތުން ސިއްހީ މާހިރެއްގެ ލަފާ ހޯދުމަކީ އެންމެ ބުއްދިވެރި ގޮތެވެ.