މާޒީ
އަޙްމަދުގެ ހިތް ވަގުތުން ތެޅިގަތެވެ. ނަމަވެސް އިރުކޮޅެއް ފަހުން، އެތެރެއަށް ވަނީ ބީރައްޓެހި ބައެއް ނޫނެވެ. އެއީ ބަޓްލަރެވެ.
އެ އަންހެންމީހާ އަލުން ޚަދީޖާއަށް އެނބުރުނެވެ. “ކަލޭގެ ދަރިން.” އޭނާ ބުންޏެވެ.
ހިމޭންކަން ފެތުރުނެވެ. ފުން، ބަދަލެއް ނުވާ ހިމޭންކަމެކެވެ.
“އެކުދިންނަކީ އާއިލާއަކަށް ނިސްބަތްވާ ބައެއް.. ނަސަބެއް.. މަސްއޫލިއްޔަތުތަކެއް އޮތް ނަމެއް އޮތް ބައެއް.”
ޚަދީޖާގެ މޫނުމަތީގެ ކުލަވަރު ބަދަލެއް ނުވެއެވެ. “އެކުދިން އެންމެ ފުރަތަމަ ނިސްބަތްވަނީ ﷲ އަށް.” އޭނާ މަޑުމައިތިރިކަމާއެކު ޖަވާބުދިނެވެ. “އަދި ދެން އަހަންނަށް.”
ކޮޓަރި ތެރޭގައި ތިބި އެންމެން ނޭވާ ހިފަހައްޓާލައިގެން ތިއްބެވެ. އެ އުމުރުން ދުވަސްވީ އަންހެންމީހާ ޚަދީޖާއަށް ވަރަށް ފަރުވާތެރިކަމާއެކު ބަލާލިއެވެ. އެއީ ރުޅިވެރިކަމަކާއެކުގައެއް ނޫނެވެ. ނަމަވެސް ކަމެއް ވަޒަންކުރާ ފަދަ ނަޒަރަކުންނެވެ.
“ކަލޭ ހުރިހާ އެއްޗެއް ދޫކޮށްފައި އައީ.” އޭނާ ބުންޏެވެ. “ރައްކާތެރިކަމާއި، ހަމަޖެހުމާއި، އަދި ކަލެއަށްޓަކައި ކުރިން ބިނާކޮށްފައި އޮތް ދިރިއުޅުމެއް ދޫކޮށްލާފައި.”
ޚަދީޖާގެ އަޑު ސާބިތެވެ. “އަހަރެން ދޫކޮށްލީ އަހަރެންގެ ހިތުގެ ރުހުން ނެތި، އެހެން ބަޔަކު ނިންމާފައި އޮތް ދިރިއުޅުމެއް.”
އެއް ދަރިއަކު ކުރިއަށް ޖެހިލިއެވެ. “ކަލެއަށް ހީވަނީ މިއީ.. މި ރަށާއި.. މި ދިރިއުޅުން މާ ރަނގަޅު ކަމަށްތަ؟”
ޚަދީޖާ ފުރަތަމަ ފަހަރަށް އޭނާއަށް ބަލާލިއެވެ. “އާނ.”
އެއްވެސް ޖެހިލުންވުމެއް ނެތެވެ. މައާފަށް އެދުމެއް ނެތެވެ. އޭނާގެ އެ ކުރު ޖަވާބުގައި އެއްވެސް ބަހުސަކަށްވުރެ ބޮޑު ބާރެއް ހުއްޓެވެ.
އެ އުމުރުން ދުވަސްވީ އަންހެންމީހާ ގޮނޑީގައި ލެނގިލިއެވެ. އަދި ފުރަތަމަ ފަހަރަށް އޭނާގެ މޫނުމަތީގެ ކުލަވަރު ބަދަލުވިއެވެ. އެއީ ބަލިވުމެއް ނޫނެވެ. ޤަބޫލުކުރުމެއްވެސް ނޫނެވެ. އެއީ ވިސްނުމެކެވެ.
“ކަލޭގެ މަންމަގެ ގޮތްދޫނުކުރުން ކަލޭގެ ކިބައިގައި އެބަހުރި.” އޭނާ މަޑުމަޑުން ބުންޏެވެ.
ޚަދީޖާ ޖަވާބެއް ނުދެއެވެ. ސަބަބަކީ އެއީ ފާޑުކިޔުމެއްތޯ ނުވަތަ ބަލައިގަތުމެއްތޯ އޭނާއަށް ނޭނގޭތީއެވެ.
ހިމޭންކަން ދެމިގެން ދިޔައެވެ. ދެން އެ އަންހެންމީހާ އަލުން ވާހަކަދެއްކިއެވެ. “އަހަރެމެން މިއައީ ކަލޭގެ ދަރިން ގެންދާކަށް ނޫން.”
އަޙްމަދު މަޑުމަޑުން ނޭވާ ދޫކޮށްލިއެވެ. އޭނާގެ ހިތުގައި އޮތް ބޮޑު ބިރުވެރިކަން ކުޑަވެގެން ދިޔައެވެ.
“އަހަރެމެން މިއައީ އަހަރެމެންނަށް އިވުނު ވާހަކަތަކަކީ ތެދެއްތޯ ބަލަން.”
ޚަދީޖާ ކުޑަކޮށް ބުމަގާތްކޮށްލިއެވެ. “ކޮން ވާހަކައެއް؟”
“ކަލޭގެ އަތުގައި އެއްވެސް އެއްޗެއް ނެތް ކަމާއި.. ކަލޭ އުޅެނީ ވަރަށް ހާލުގައި ކަމާއި.. އަދި ކަލޭގެ ދިރިއުޅުން ހަލާކުވެފައިވާ ކަމަށް.”
އޭނާ ކުޑަކޮށް މަޑުޖެހިލިއެވެ. އޭނާގެ ނަޒަރު ކޮޓަރި ތެރެއަށް ހުއްޓުނެވެ. “އެކަމަކު އަހަންނަށް މި ފެންނަނީ އެ މަންޒަރެއް ނޫން.”
ޚަދީޖާގެ ދެލޯ މަޑުވިއެވެ. ސަބަބަކީ އެ ވަގުތު ކަންތައްތައް ބަދަލުވީތީއެވެ. އެއީ ބާރުގެ ގޮތުންނެއް ނޫނެވެ. ނަމަވެސް ފެންނަ ފެނުމުގެ ގޮތުންނެވެ.
“އަހަރެންގެ ދިރިއުޅުމެއް ހަލާކެއް ނުވޭ.” އޭނާ އޯގާތެރިކަމާއެކު ބުންޏެވެ. “އަހަރެން މިއީ މި ދިރިއުޅުން ބިނާކުރި މީހާ.”
އެ އުމުރުން ދުވަސްވީ އަންހެންމީހާ ވަރަށް ގިނައިރު ވަންދެން އޭނާއަށް ބަލަން އިނެވެ. އަދި މަޑުމަޑުން ބޯޖަހާލިއެވެ. އެއީ ކުޑަ ހަރަކާތެއް ނަމަވެސް، އޭގެ މާނަ ވަރަށް ބޮޑެވެ.
“އަހަރެމެން މާދަމާ ފުރާނަން.” އޭނާ ބުންޏެވެ. އެއްވެސް ބަހުސެއް ނެތެވެ. އިތުރު ދައުވާއެއް ނެތެވެ. އެއީ ހަމައެކަނި ނިންމުމެކެވެ.
އޭނާގެ ފިރިހެން ދަރިންނަށް ލިބުނީ ހައިރާންކަމެވެ. ނަމަވެސް އެއްޗެއް ނުބުނެއެވެ. ސަބަބަކީ ހުރިހާ ކަމެއް ކޮންޓްރޯލްކޮށްގެން ކާމިޔާބު ނުކުރެވޭނެކަން އެމީހުންނަށްވެސް އެކުދިންނަށް ވެސް ވިސްނޭތީއެވެ. ބައެއް ކަންކަމަކީ ހިތުން ރުހުމުން ޤަބޫލުކުރަންޖެހޭ ކަންކަމެވެ.
ޚަދީޖާ އެތަނުން ދާން އެނބުރިލި ވަގުތު، އެ އަންހެންމީހާ އަލުން ވާހަކަދެއްކިއެވެ.
“ތިޔަ ދިރިއުޅުމަކީ ޚުދު ތިބާ އިޚްތިޔާރުކުރި ގޮތް.”
ޚަދީޖާ މަޑުޖެހިލިއެވެ.”އާނ.”
އެ އަންހެންމީހާގެ އަޑު ކުޑަކޮށް މަޑުމޮޅިވެލިއެވެ. “އެހެންވީމާ، ތިޔަ ދިރިއުޅުން ހެޔޮގޮތުގައި ވޭތުކުރޭ.”
ބޭރަށް ނުކުމެވުމުން، މުޅި ރަށުތެރެއަށް ލުއިކަމެއް ލިބިފައިވާ ފަދަ އިޙުސާސެއް ކުރެވުނެވެ. ހީވަނީ ފެންނަން ނެތް ބަރުދަނަކުން މުޅި މާހައުލު މިނިވަންވިހެންނެވެ. އަޙްމަދު އެއްވެސް އެއްޗެކޭ ނުބުނެ ޚަދީޖާއާއެކު ހިނގަމުން ދިޔައެވެ. އިރުކޮޅަކުން އޭނާ މަޑުމައިތިރިކަމާއެކު ބުންޏެވެ. “ކަލެއަށް އެނގޭ ދޯ؟”
ޚަދީޖާ ބޯޖަހާލިއެވެ. “އެއީ އަހަރެންގެ ދޮންމާމަ.”
އަޙްމަދު އޭނާއަށް ބަލާލިއެވެ. “ދެން؟”
ޚަދީޖާ މަޑުމައިތިރި ހިނިތުންވުމަކާއެކު، އުޑުމަތީގައި ފާޅުވާން ފަށާފައިވާ ފުރަތަމަ ތަރިތަކަށް ބަލާލިއެވެ. “އަދި ކިތަންމެ ފަހަރަކު ފުރުސަތު ލިބުނަސް، އަހަރެން އިޚްތިޔާރުކުރާނީ ހަމަ މި ދިރިއުޅުން.”
އެރޭ، އެމީހުންގެ ހުރިހާ ކަމެއް ފެށުނު އެ ފެންޑާގައި އަލުން އިށީނދެލައިގެން ތިބިއިރު، މާހައުލަށް ތަފާތު ބަދަލެއް އައިސްފައިވާކަން އިޙުސާސް ކުރެވުނެވެ. އެއީ އެމީހުންގެ ދިރިއުޅުމަށް ބަދަލެއް އައުމަކުން ނޫނެވެ. ނަމަވެސް، ހިތުގައި އުފެދިފައިވާ އުނދަގޫތަކަށް ހައްލެއް ލިބުމުންނެވެ. އެ ހައްލު ހޯދީ ހަނގުރާމައަކުން ނޫނެވެ. ނުވަތަ ކާމިޔާބީއަކުން ވެސް ނޫނެވެ. އެއީ ހަޤީޤަތް ޤަބޫލުކުރުމުން ލިބުނު ހަމަޖެހުމެކެވެ.
ގެސްޓް ހައުސްއިން އެނބުރި އައި ހިނދު، މާހައުލު އާދަޔާ ޚިލާފަށް އަމާންވެފައި ހިމޭނެވެ. އެއީ ބަރުދަސްތު ކުރަން އުނދަގޫ ނުވަތަ ނުތަނަވަސް ހިމޭންކަމެއް ނޫނެވެ. އެހެނަސް، އެ ހިމޭންކަމުގެ ތެރޭގައި ފާޅުނުކޮށް ހުރި އެތައް ވާހަކަތަކެއް ފޮރުވިފައިވާ ފަދައެވެ.
އަޙްމަދު ހިނގަމުން ދިޔައީ ޚަދީޖާގެ ގާތުގައެވެ. އޭނާގެ ހިތުގައި ކުރިން ދުވަހަކުވެސް ނާހާ ސުވާލެއް އެނބުރެމުން ދިޔައެވެ. އެއީ އެކަން އޮޅުންފިލުވަން ބޭނުން ނުވާތީއެއް ނޫނެވެ. ނަމަވެސް، ޚަދީޖާ ހަނދާން ނައްތާލަން ބޭނުންވި މާޒީގެ ޒަޚަމްތަކެއް އަލުން އާކުރަން އޭނާ ބޭނުން ނުވާތީއެވެ. އެހެނަސް.. މިއަދުގެ ހާދިސާތަކުން ކަންތައްތަކަށް ބަދަލެއް އަތުވެއްޖެއެވެ.
“ދޮން މާމަތަ؟” މާތްކަމާއެކު، އެންމެ ފަހުން އަޙްމަދު ސުވާލުކުރިއެވެ.
ޚަދީޖާ ވަގުތުން ޖަވާބެއް ނުދެއެވެ.
“އަހަރެން ކަލޭގެ އަމިއްލަ ދިރިއުޅުމަށް އިޙުތިރާމްކުރަން، އަހަރެންގެ ލޯބިވާ އަނބިމީހާ.” އަޙްމަދު މަޑުމައިތިރިކަމާއެކު ބުންޏެވެ. “ކަލެއަށް ދެރައެއް ނުވަތަ ހިތާމައެއް ލިބިދާނެ އެއްވެސް ކަމަކާ ބެހޭގޮތުން ސުވާލުކުރާކަށް އަހަރެން ދުވަހަކުވެސް ބޭނުމެއް ނުވޭ.”
އޭނާ ކުޑަކޮށް މަޑުޖެހިލުމަށްފަހު، ކުރިއަށްވުރެ މަޑުން ބުންޏެވެ.
“އެކަމަކު އަހަރެން ހީކުރީ.. ކަލޭގެ އާއިލާގެ އެއްވެސް މީހަކު ދުނިޔޭގައި ނެތް ކަމަށް.”
ދެމީހުންނަށް ގެއާ ހަމައަށް ފޯރަން ކައިރިވެފައި ވަނިކޮށް، ޚަދީޖާގެ ހިނގުން މަޑުޖައްސާލިއެވެ. އަދި ހުއްޓުނެވެ. ގެއާ ދިމާލަށް އެނބުރުމުގެ ބަދަލުގައި އޭނާ ބަލާލީ މޫދާ ދިމާލަށެވެ.
“ކުޑަ ވަގުތުކޮޅަކަށް އިށީނދެލަމާ ހިނގާ.” އޭނާ ބުންޏެވެ. އަޙްމަދު ބޯޖަހާލިއެވެ.
އެމީހުން ދިޔައީ ގޮނޑުދޮށުގައި ހުންނަ، އަބަދުވެސް އިށީނދެ އުޅޭ ހިޔާގަނޑަށެވެ. އެއީ އެމީހުންގެ ދިރިއުޅުމުގެ އެތައް ހަނދާންތަކެއް ފޮރުވިފައިވާ ތަނެކެވެ. ކުރިމަތީގައި ފެންނަން އޮތީ އިންތިހާއެއް ނެތް ކަނޑެވެ. ބޯދަމާލާފައި އައިސް ރާޅުތައް އަތިރިމައްޗަށް ބިންދާލަނީ، ނިމުމެއް ނެތް ނޭވާލުމެއް ފަދައިންނެވެ.
އެމީހުންގެ އެއްމާބަނޑު ދެކުދިން ތިބީ ނިދާފައެވެ. ދުނިޔާ އޮތީ ޚަދީޖާގެ މޭމަތީގައި، ހަމަޖެހިލައިގެންނެވެ. ދާއިން ނިދާފައި އޮތީ އަޙްމަދުގެ މޭމަތީގައެވެ. އޭނާގެ ކުޑަކުޑަ އަތްތިލަ އޮތީ ބައްޕަގެ ގައިގައި ބާރަށް ހިފަހައްޓާލައިގެންނެވެ.
ޚަދީޖާ ކުޑަވަގުތުކޮޅަކަށް އެކުދިންނަށް ބަލަން އިނެވެ. އަދި ސަމާސާވެރި ހިނިތުންވުމަކާއެކު އަޙްމަދަށް ބަލާލިއެވެ.
“އަހަރެންގެ ލޯބިވާ ފިރިމީހާ.” އޭނާ މަޑުމައިތިރިކަމާއެކު ބުންޏެވެ. “އަހަންނަށް ކުރުނބައެއް ގެނެސްދީ.. އޭރުން އަހަރެން ހުރިހާ ވާހަކައެއް ކިޔައިދޭނަން.”
އަޙްމަދު ހައިރާންވެފައި، އެހެނަސް ހިނިތުންވެ ހުރެ ބުންޏެވެ.
“ހުރިހާ ވާހަކައެއް؟” އޭނާ އެހިއެވެ.
ޚަދީޖާ ބޯޖަހާލިއެވެ. “ހުރިހާ ވާހަކައެއް.”
އަޙްމަދުގެ ތުންފަތްމައްޗަށް ހިނިތުންވުމެއް އަތުވެއްޖެއެވެ. އޭނާ ވަރަށް ސަމާލުކަމާއެކު ތެދުވެގެން ގޮސް، އިރުކޮޅެއްގެ ތެރޭގައި އެނބުރި އައީ ކުރުނބައެއް ހިފައިގެންނެވެ. ޚަދީޖާ އޭގެއިން ފޮދެއް ބޯލިއެވެ. ލަސްލަހުންނެވެ. ވިސްނުންތެރިކަމާއެކުގައެވެ. އެއީ އެ ރަހައިގެ ސަބަބުން، ގިނަ ދުވަސްތަކެއް ވަންދެން ބަންދުކޮށްފައި ހުރި ދޮރުތަކެއް ހުޅުވެމުންދާ ކަހަލައެވެ.
“އަހަރެން ކަލެއަށް ދޮގެއް ނަހަދަން.” އޭނާ މަޑުމަޑުން ވާހަކަ ދައްކަން ފެށިއެވެ.
“އަހަރެންގެ އާއިލާގެ ގާތް އެއްވެސް މީހަކު ނެތް.”
އަޙްމަދު އެއްވެސް ހުރަހެއް އެޅުމެއް ނެތި އަޑުއަހަން އިނެވެ.
“އެކަމަކު އަހަރެން އުޅުނީ އެކަންޏެއްވެސް ނޫން.”
ދުނިޔާ ބާރަށް އުރާލަމުން އޭނާ ކުޑަކޮށް ގަޔަށް ހަމަޖެހިލިއެވެ.
“އަހަރެންގެ ކާފަ ހުރި. އެއީ ވަރަށް ޤަދަރުވެރި މީހެއް. ވަރަށް ބޮޑަށް އިޙުތިރާމް ލިބިގެންވާ މީހެއް.” ކުޑަ ހިނދުކޮޅަކަށް ހުއްޓާލިއެވެ.
“އެކަމަކު އެއީ ދުރުހެލި މީހެއް.” އޭނާ އަނެއްކާވެސް ކުރުނބާ ފޮދެއް ބޯލިއެވެ.
“ކާފަ އަލުން މީހަކާ އިނދެފި. ޒުވާން އަންހެނަކާ.. އާމިނަތުފުޅާ.” އަޙްމަދު މަޑުމަޑުން ބޯޖަހާލިއެވެ.
“އެއީ އަހަރެންގެ ދޮން މާމަ.” ޚަދީޖާގެ ނަޒަރު އުދަރެހަށް ހުއްޓުނެވެ.
“އޭނާއަކީ އަނިޔާވެރި މީހެއް ނޫން.” އޭނާ ބުންޏެވެ. “އެކަމަކު އަހަންނަށް ދުވަހަކުވެސް.. ލޯތްބެއް ނުލިބޭ.” މިހާރު އޭނާގެ ދުލުން ވާހަކަތައް އަންނަނީ ފަސޭހަކަމާއެކުގައެވެ.
“އެގޭގައި އޮންނަނީ ހުސް ޤަވާއިދުތައް. އުންމީދުތަކާއި މީހުންނަށް ދައްކަން ޖެހޭ ސޫރައެއް.” އޭނާ ހިނިތުންވެލިއެވެ.
“އަދި އަހަންނަކީ އެއިން އެއްވެސް ކަމަކަށް ފެތޭ މީހެއް ނޫން.”
އަޙްމަދުގެ ދެލޯ މަޑުމޮޅިވިއެވެ.
“ކަލޭ ތިޔަ ހަނދާންކޮށްދެނީ މީހެއްގެ މަތިން.” އޭނާ އޯގާތެރިކަމާއެކު ބުންޏެވެ.
“އަހަރެންގެ މަންމަގެ؟” ޚަދީޖާ އެހިއެވެ. އޭނާ ބޯޖަހާލިއެވެ.
ޚަދީޖާގެ މޫނުމަތިން ފެނުނީ ހަމަޖެހުމެވެ.
“އެއީ ވަރުގަދަ އަންހެނެއް. ގޮތްދޫނުކުރާ މިޒާޖެއްގެ މީހެއް. އޭނާ ފަސޭހައިން ދުލެއް ނުދޭނެ. އެއްވެސް މީހަކަށްޓަކައެއް ނޫން.” އޭނާގެ އަޑު މަޑުވިއެވެ.
“އަހަރެން ހީކުރަނީ އާމިނަތުފުޅު އެ ބުނި ބަހުގެ މާނައަކީ އެއީ ކަމަށް.”
ކުޑަ ހިނދުކޮޅެއްގެ ހިމޭންކަމަށްފަހު ބުންޏެވެ. “އެކަމަކު މަންމައަށް މާ ގިނަ ދުވަހަކު ނުހުރެވުނު.”
އަޙްމަދުގެ ހިތަށް އަސަރުކުރިއެވެ.
“އަހަރެން ކުޑައިރު، މަންމައާއި ބައްޕަ މިދުނިޔެ ދޫކޮށްފި.”
ރާޅުތަކުގެ އަޑު މުޅި ހިސާބުގައި ގުގުމަމުން ދިޔައެވެ.
“އަހަރެން ބޮޑުވީ އެގޭގައި.” އޭނާ ކުރިއަށް ގެންދިޔައެވެ. “އެކަމަކު އެއީ ދުވަހަކުވެސް އަހަރެންގެ އަމިއްލަ ގެ ކަމުގެ އިޙުސާސެއް ނުކުރެވޭ.”
(ނުނިމޭ)
