ދިވެހި ފިލްމީ އުފެއްދުންތަކަށް ލޯބިކުރާ ފަރާތްތަކަށް އުފާވެރި ޚަބަރެކެވެ. މިދިޔަ ޖުލައި މަހުގެ 12 ވަނަ ދުވަހު އިފްތިތާހުކުރި “ހައުސް އޮފް ސްޓޯރީޓެލަރޒް”ގެ ފުރަތަމަ އުފެއްދުން ކަމަށްވާ “ބޭނުން” އޯގަސްޓް މަހުގެ 6 ވަނަ ދުވަހު މީޑިއާނެޓްގެ ވީޑިއޯ ކްލަބުން ސްޓްރީމްކުރަން ފަށަން ތައްޔާރުވެއްޖެއެވެ.
މީޑިއާނެޓް އޮރިޖިނަލްއެއްގެ ގޮތުގައި ގެނެސްދޭ މި ސީރީޒަކީ ކާމިޔާބު ލިޔުންތެރިޔާ އަދި ޑައިރެކްޓަރު ޝަހުދާ މަހުމޫދު ލިޔެ، ޑައިރެކްޓްކޮށްފައިވާ ލޯބީގެ މަޖާ (ރޮމް-ކޮމް) އުފެއްދުމެކެވެ. މި ސީރީޒްގެ ޓްރެއިލާ މިހާރު އާންމުކޮށްފައިވާއިރު، ޓްރެއިލާއިން ފެނިގެންދަނީ ވަރަށް މަޖާ އަދި ޝައުގުވެރި ހާދިސާތަކެކެވެ.
“ބޭނުން” ގެ ލީޑް ރޯލުތަކުން ފެނިގެންދާނީ މަގުބޫލު ފަންނާނުން ކަމަށްވާ ޝަރަފުއްދީން އަބްދުﷲ (ޝަރަފް) އަދި ވާޝިޔާ މުހައްމަދު (ޝިޔާ) އެވެ. މީގެ އިތުރުން އާމިނަތު ޝުހާ އާއި ހާޒިފްގެ އިތުރުން، މި ސީރީޒްއިން އަލަށް ތައާރަފުވާ ތުއްތު ފަންނާނު މާއިޝް ވެސް ފެނިގެންދާނެއެވެ.
މި ސީރީޒްގައި ޝަރަފް ކުޅެނީ “ސައިފް” ނަމަކަށް ކިޔާ މީހެއްގެ ކެރެކްޓަރެވެ. ސައިފަކީ ދިރިއުޅުމުގައި އަބަދުވެސް ހަމަޖެހުމާއި އަމާންކަން ބޭނުންވާ، މަޑުމައިތިރި މިޒާޖެއްގެ މީހެކެވެ. ނަމަވެސް އޭނާ ލޯބިވާ މީހުންގެ ދިފާއުގައި ކޮންމެ ފަދަ ގުރުބާނީއެއް ވާންވެސް ފަސްނުޖެހޭނެ ވަރުގަދަ ޝަހުސިއްޔަތެއްގެ ގޮތުގައި މި ކެރެކްޓަރ ވަނީ ސިފަކޮށްފައެވެ.
ފަންނީ ގޮތުން ބަލާއިރު، މި ސީރީޒްގެ ސިނަމަޓޯގްރަފީ ތައްޔާރުކޮށްފައިވަނީ އަހުމަދު ޒިފާފް އެވެ. އަދި ސީރީޒްގެ ރީތި ޕޯސްޓަރުތައް ފަރުމާކޮށްފައިވަނީ ހޫދު އިބްރާހިމް އެވެ.
ދިވެހި އުފެއްދުންތަކަށް ލޯބިކުރާ ފަރާތްތަކަށް “ބޭނުން” ވެގެންދާނީ އާއިލާއާ އެކު ބަލާލެވޭނެ، ހިތްހަމަޖެހުން ގެނެސްދޭނެ ފެންވަރު ރަނގަޅު އުފެއްދުމަކަށެވެ. މީޑިއާނެޓް ވީޑިއޯ ކްލަބް މެދުވެރިކޮށް 2026 އޯގަސްޓް 6 އިން ފެށިގެން މި ސީރީޒް ބަލާލެވޭނެއެވެ.
@muniavas Beynun – #HouseOfStoryTellers @Medianet @Shahudha Mahmoodh ♬ original sound – MUNIAVAS
