ހަދިޔާ
އޭގެ ތެރޭގައި އޮތީ ހެދުމެކެވެ. ފަށުވި ފޭރާމުގެ ވަރަށް ރީތި ރަތްކުލައިގެ ހެދުމެކެވެ. އެއީ މާ ގަދަ ރަތެއް ނޫނެވެ. އަލި އެޅޭ ގޮތަކުން އޭގެ ކުލަ ބަދަލުވާ ފަދަ، ޝާހީ ރަތްކުލައެކެވެ.
ކިޔާރާ އޭގެ ފޮތީގައި އަތް ހާކާލިއެވެ. އެއީ އާދަޔާ ޚިލާފަށް މަޑު ފޮއްޗެކެވެ. އޭނާ އެ ފޮށިން ހެދުން ނެގިއެވެ. އެއީ މާ މުއްސަނދި ގޮތެއް ނެތް ނަމަވެސް، ވަރަށް ފުރިހަމަ އަދި ރީތި ހެދުމެކެވެ. އެ ކުލައިގެ ސަބަބުން އޭނާގެ ސިފަ މުޅިން ބަދަލުވެދާނެ ކަމަށް އޭނާއަށް ހީވިއެވެ.
“ނޫން.” އޭނާ ބޯ ހޫރާލިއެވެ. “އޭނާ ހީކުރަނީ އަހަރެން މި ލާނެ ކަމަށްތަ؟”
އޭނާގެ ލޯ ދެން އަމާޒުވީ ފޮށީގެ ތެރޭގައި އޮތް ސެންޓު ފުޅިއަށެވެ. ކިޔާރާ އެ ފުޅި ނަގައި އޭނާގެ އަތުކުރިއަށް ކުޑަ އެތިކޮޅެއް ޖަހާލިއެވެ. އެއިން ދުވަން ފެށީ ވަރަށް މީރު، ހިތްގައިމު ވަހެކެވެ. އެ ވަހުން އޭނާގެ ހަނދާނަށް އައީ ބަހުގެ ތެރެއިން ޒިމާންގެ ގައިން ދުވި ވަހެވެ.
އޭނާގެ ލޯ ބޮޑުވިއެވެ. “މިއީ ހަމަ ގަސްދުގައި ކޮށްފައި ހުރި ކަންތައް.” އޭނާއަށް އެނގުނެވެ. ޒިމާން އެ ސެންޓު ޚިޔާރުކުރީ ގަސްދުގައެވެ. އެކަމުން އޭނާގެ ހަށިގަނޑަށް ތަފާތު އިޙުސާސެއް ކުރެވުނެވެ.
ފޮށީގެ އެންމެ ތިރީގައި އޮތީ ރީތި ދައްޗެކެވެ. މުތީތަކަކުން ފަރުމާކޮށްފައިވާ ކުޑަ ފިނިފެންމަލެއްގެ ބައްޓަމަށް އޮތް ދައްޗެކެވެ. ކިޔާރާ އެ ދަތި އަތަށް ނެގިއެވެ. މި ހަދިޔާތަކަކީ ހަމައެކަނި އަގުބޮޑު އެއްޗެހިތަކެއް ނޫނެވެ. އެއީ ވަރަށް ވިސްނުންތެރިކަމާއެކު ޚިޔާރުކޮށްފައިވާ އެއްޗެހިތަކެކެވެ.
ޒިމާން ވަނީ ކިޔާރާގެ ކޮންމެ ކަމަކަށް ސަމާލުކަން ދީފައެވެ. އޭނާގެ އިސްތަށިގަނޑާއި، އޭނާގެ ސްޓައިލާއި، އޭނާގެ މަޑުމައިތިރިކަމެވެ. އޭނާ އެ ހަދިޔާތައް ހޯދީ ހަމައެކަނި ފިހާރައަކަށް ގޮސް ފެނުނު އެންމެ އަގުބޮޑު އެއްޗެއް ގަނެގެންނެއް ނޫނެވެ. އެއީ ސީދާ ކިޔާރާއަށްޓަކައި ޚިޔާރުކުރި އެއްޗެހިތަކެކެވެ.
ކިޔާރާ ގޮނޑީގައި އިށީނދެލިއެވެ. އޭނާގެ އުނގުމަތީގައި އެ ރީތި ހެދުން އޮތްއިރު، އަތުގައި އެ ދަތި އޮތެވެ. ކުއްލިއަކަށް މުޅި ކޮޓަރިތެރެ ހިމޭންވިހެން އޭނާއަށް ހީވިއެވެ. އޭނާ އަނެއްކާވެސް އެ ނޯޓު ކިޔާލިއެވެ. “އަހަރެމެންގެ ދެން އޮތް ބައްދަލުވުމުގައި..”
އޭނާގެ ކޯތާފަތް ރަތްވިއެވެ. “ދެން އޮތް ބައްދަލުވުން”، “ވެދާނެ” ނޫނީ “އުންމީދު ކުރަން” އެފަދަ ބަހެއް ނޫނެވެ. އޭނާ ބުނެފައި އެވަނީ ކަނޑައެޅިގެން ބައްދަލުވާނެ ކަމަށެވެ. އެމީހުންގެ މި ގުޅުން މިހިސާބުން ނިމޭކަށް އޭނާ ބޭނުމެއް ނުވެއެވެ.
ކިޔާރާ އޭނާގެ ފޯނު ނެގިއެވެ. އޭނާ ޒިމާނަށް ގުޅާކަށް ބޭނުމެއް ނޫނެވެ. އޭނާ ބޭނުންވީ ހަމައެކަނި ނޯޓު އަނެއްކާވެސް ބަލާލުމަށެވެ. އެވަގުތު އޭނާގެ ލޮލުގައި އަޅައިގަތީ ނޯޓުގެ ފަހަތުގައި ލިޔެފައިވާ އެއްޗެކެވެ. އެއީ ފޯނު ނަންބަރެކެވެ. އަމިއްލަ ނަންބަރެކެވެ. އަދި އޭގެ ކައިރީގައި ކުޑަ ހިނިތުންވުމެއް ކުރަހާފައި އޮތެވެ.
ކިޔާރާގެ ލޯ ބޮޑުވިއެވެ. “ޔާ ﷲ! އޭނާ ހަމަ އަސްލަށްވެސް އޭނާގެ އަމިއްލަ ނަންބަރު ދިނީތަ؟”
އޭނާ ހިނިތުންނުވާން މަސައްކަތް ކުރިއެވެ. ނަމަވެސް އޭނާގެ ތުންފަތަށް ހިނިތުންވުމެއް އައެވެ. “ނޫން، ކިޔާރާ.” އޭނާ އަމިއްލަ ނަފުސަށް ބުންޏެވެ. އަދި ދެއަތުން މޫނު ނިވާކޮށްލިއެވެ. “މިއީ ހަމަ މޮޔަކަމެއް.”
އޭނާ ދުވަހަކުވެސް މިހެން އުޅެފައެއް ނުވެއެވެ. އޭނާއަކީ ފަންސަވީސް އަހަރުގެ، އަމިއްލަ ފައިމައްޗަށް ތެދުވެހުރި، ނުރައްކާތެރި ހާލަތްތަކުގައި ކެތްތެރިކަމާއެކު މަސައްކަތްކުރާ ނަރުހެކެވެ. މީހުން ބިރުގަންނަ ވަގުތުތަކުގައި ކެތްތެރިވާން އޭނާއަށް އެނގެއެވެ. ނަމަވެސް މިހާރު، އެ ނުރައްކާތެރި، ބަލާލަން ރީތި، އަދި އިތުބާރު ހުރި ހިނިތުންވުމެއްގެ ސަބަބުން އޭނާ މިވަނީ ފުރާވަރުގެ ކުއްޖެއް ފަދައިން ފޯނު ނަންބަރަކަށް ބަލަހައްޓައިގެން ހުންނަވަރަށް ބަދަލުވެފައެވެ.
އޭނާ ފޯނު ނަގައި، ނަންބަރު ސޭވްކުރަން އުޅުނެވެ. އެވަގުތު ކުއްލިއަކަށް ފޯނު ތެޅިގަތެވެ. ކިޔާރާ ބިރުން ފޯނު ވައްޓާނުލީ ކިރިޔާއެވެ. ބަލާލިއިރު އެއީ ނުދަންނަ ނަންބަރެކެވެ.
އޭނާ ފޯނު ނެގިއެވެ. “ހަލޯ؟”
ހަމަހިމޭންކަމެކެވެ. “ހަލޯ؟”
ދެން އިވުނީ އޭނާގެ އަޑެވެ. ބަރު، މަޑުމައިތިރި އަޑެކެވެ. “ހަދިޔާ ފެނިއްޖެ ދޯ؟”
ކިޔާރާގެ ލޯ ބޮޑުވިއެވެ. “ކަލޭ.. ކަލެއަށް ކިހިނެއް އެނގުނީ އަހަރެން ގެއަށް އައިކަން؟”
ފޯނުން އިވުނީ މަޑު ހިނިތުންވުމެއްގެ އަޑެވެ. “ކަލޭ ތިޔަ ކުރަނީ ނުބައި ސުވާލެއް.”
“އެހެންވީމާ އަހަރެން ކުރަންވީ ކޮން ސުވާލެއް؟”
“އެ ހެދުން ކަމުދޭތޯ.”
ކިޔާރާ އެ ހެދުމަށް ބަލާލިއެވެ. “ވަރަށް ރީތި.”
“އަހަރެންނަށް އެނގޭ.”
“އެކަމަކު ކަލެއަށް އެނގޭތަ އެ އަހަރެންގެ ގަޔަށް ހެޔޮވަރުވާނެ ކަމެއް؟”
“އަހަރެން އެ ހެދުން ނެގީ ކަލޭގެ ސައިޒު ބަލާފައި.”
ކިޔާރާ ހައިރާންވެގެން އެއްޗެއް ބުނަން ނޭނގިފައި ހުއްޓެވެ. “ކީކޭ؟”
“އުފާވެރި ރޭގަނޑަކަށް އެދެން، ކިޔާރާ.”
“މަޑުކޮށްބަލަ..” ފޯނު ކަނޑާލައިފިއެވެ.
ކިޔާރާ ފޯނަށް ބަލަހައްޓައިގެން ހުރީ ބުނާނެ އެއްޗެއް ނޭނގިފައެވެ. އަނގަ ހުޅުވުނު ގޮތަށް ލައްޕަންވެސް ހަނދާން ނެތިފައެވެ.
“މި މީހާގެ ހުންނަ ނުލަފާކަމެއް..” އޭނާ ފޯނު މޭޒުމަތީގައި ބާއްވާލުމަށްފަހު ގޮނޑީގެ ލެނގޭބަޔަށް ލެނގިލިއެވެ. ހިތުގެ ތެޅުން އަދިވެސް ހުރީ ވަރަށް އަވަސްވެފައެވެ. ނަމަވެސް އާދަޔާ ޚިލާފު ކަމަކީ، އޭނާގެ ތުންފަތްމަތީގައި ހިނިތުންވުމެއް ވީކަމެވެ.
އޭނާ އަނެއްކާވެސް އެ ރަތް ހެދުމަށް ބަލާލިއެވެ. ދެން އެ ސެންޓު ފުޅިއަށެވެ. އަދި އެ ކުޑަ މުތީ ދައްޗަށެވެ. ވަރަށް ގިނަ ދުވަސްތަކަކަށްފަހު، ފުރަތަމަ ފަހަރަށް ކިޔާރާ އަމިއްލަ ނަފުސާމެދު ތަފާތު ގޮތަކަށް ވިސްނާލަން ފުރުސަތު ދިނެވެ. އެއީ އޭނާގެ ސިފަ ބަދަލުކުރުމެއް ނޫނެވެ. ނުވަތަ އެހެން ދިރިއުޅުމަކަށް އުންމީދު ކުރުމެއްވެސް ނޫނެވެ. ހަމައެކަނި އޭނާ ހުރި ގޮތަށް، އޭނާގެ އަމިއްލަ ޒާތުގައިވެސް ރީތިކަން ހުރިކަން ޤަބޫލުކުރުމެވެ.
މި ޚިޔާލު އޭނާގެ ހިތަށް އައީ ވަރަށް މަޑުމަޑުންނެވެ. ހީވަނީ ހިތުގެ ފުންމިނުން އިވުނު ސިއްރެއްހެންނެވެ. ފަހަރެއްގައި އޭނާއަކީ ރީތިކަން މަދު މީހެއް ނޫނެވެ. އެކަމަކު އޭނާގެ ރީތިކަން ދެނެގަންނަން ނޭނގޭ މީހުންގެ މެދުގައި އޭނާ މާ ގިނަ ދުވަހު އުޅުނީއެވެ.
އޭނާ އަނެއްކާވެސް އެ ފަށުވި ފޮތީގައި އަތްހާކާލިއެވެ. އޭނާގެ ހިތް މަޑުވިއެވެ. އަދި އޭނާގެ ރޫހުގެ ތެރޭގައި އެ އާދަޔާ ޚިލާފު ރިހި އަލިކަމެއް ކުރިއަށްވުރެ ގަދަވިހެން ހީވިއެވެ.
ޒިމާން އޭނާ ގެންދަނީ ކޮންތާކަށް ކަމެއް އޭނާއަކަށް ނޭނގެއެވެ. ޒިމާން އުޅެނީ ކޮން ކަހަލަ ދުނިޔެއެއްގައި ކަމެއްވެސް ނޭނގެއެވެ. ނުރައްކާތަކުގެ މެދުގައި އުޅޭ އެފަދަ ބާރުގަދަ މީހަކު، އެއްވެސް މީހެއްގެ ސަމާލުކަން ނުލިބި އުޅެން ބޭނުންވާ އާދައިގެ ނަރުހަކަށް މިހާ ބޮޑު ޝައުޤުވެރިކަމެއް ދެނީ ކީއްވެގެން ކަމެއްވެސް އޭނާއަކަށް ނޭނގެއެވެ. ނަމަވެސް އެއް ކަމެއް އޭނާއަށް ޔަގީނެވެ. އޭނާގެ އާދައިގެ ދިރިއުޅުން މިހާރު އެހާ އާދައިގެ ކަމަކަށް ނުވެއެވެ.
އަދި މާލޭގެ ކޮންމެވެސް ހިސާބެއްގައި، ބާރާއި ސިއްރުވެރިކަމުގެ މައްޗަށް ދިރިއުޅުން ބިނާކޮށްފައިވާ އެ ފިރިހެން މީހާ، އަނދިރީގެ ތެރޭގައި އިށީނދެގެން އިނދެ ވިސްނަމުންދާނީ، ބަހެއްގެ ތެރެއިން އޭނާގެ ކޮނޑުގައި ބޯ އަޅައިގެން ނިދި އެ އަންހެން ކުއްޖާއަށް، އޭނާ ހޮވި ހަދިޔާ ކަމުދިޔަބާއޭ ހިތައެވެ.
އެ ދެމީހުންނަށްވެސް އަދި ނޭނގޭ ކަމަކީ، އެމީހުންގެ ރޫހުތަކުގެ މެދުގައިވާ އެ ރިހި ފަށް މިހާރު ވަނީ ގޮށްޖެހިފައި ކަމެވެ. ރިހި ރޫހަކަށް އޭގެ އަލި ދެނެގަންނަން އެނގޭ އެހެން ރޫހެއް ފެނިއްޖެނަމަ.. ފަހަރެއްގައި ބައެއް ބައްދަލުވުންތަކަކީ ހަމައެކަނި އިއްތިފާޤެއް ނޫނެވެ.
އިއްތިފާޤުތަކާއި، ހިތުގެ ތެޅުމާއި، އަދި ސިކުނޑިއަށް ޤަބޫލުކުރަން ތައްޔާރު ނުވެވިގެން އުޅެނިކޮށް ރޫހަށް އިޙުސާސްވާ އާދަޔާ ޚިލާފު ކަންތައްތަކާމެދު ވިސްނަމުން ގޮސް، ކިޔާރާ އެނދުގައި އޮށޯވެ ލޯ މަރާލިތާ މާގިނައިރެއް ނުވެ އޭނާއަށް ނިދިއްޖެއެވެ.
އޭނާ ހުރީ ވަރަށް ބޮޑަށް ވަރުބަލިވެފައެވެ. ޖިސްމާނީ ގޮތުން މުޅިން ވަރުބަލިވެ ހަކަތަ ހުސްވެފައެވެ. ނަމަވެސް އޭނާގެ ސިކުނޑި އެ ވަރުބަލިކަމަށް ދޫދޭކަށް ބޭނުމެއް ނުވިއެވެ. ހޮސްޕިޓަލުގެ ކޮރިޑޯތަކާއި، ހުއްޓުމެއް ނެތް އެލާމްތަކުގެ އަޑާއި، ފްލޮރެސެންޓް ބޮކިތަކުގެ އަލިގަދަކަމާއި، ދިގު ޑިއުޓީއަކަށްފަހު ހަށިގަނޑުގައި އުފެދޭ އާދަވެފައިވާ ރިހުމުގެ ބަދަލުގައި، އޭނާގެ ޚިޔާލުތައް އޭނާ ގެންގޮސްދިނީ މާ މަޑުމޮޅި، މާ އުންމީދީ މާހައުލަކަށެވެ. މީގެ ކުރިން ދުވަހަކުވެސް އަމިއްލަ ނަފުސަށް ދިޔުމުގެ ހުއްދަ ނުދޭ ފަދަ އަމާން ތަނަކަށެވެ.
އޭނާ ހުވަފެނެއް ދުށްޓެވެ. އެއީ މާ ބޮޑު ކަންތައްތަކެއްގެ ހުވަފެނެއް ނޫނެވެ. މުއްސަނދިކަމާއި، ރީތި ގަނޑުވަރުތަކާއި ނުވަތަ އަގުބޮޑު ހަދިޔާތަކުގެ ހުވަފެނެއް ނޫނެވެ. އޭނާ ދުށް ހުވަފެނަކީ އޭނާގެ އަގު ވަޒަންކުރެވޭ މަންޒަރެވެ. ހަޤީޤީ މާނައިގައި އޭނާއަކީ ކާކުކަން އެނގި ހާމަވާ ހުވަފެނެކެވެ.
(ނުނިމޭ)
