ހިތާމައިގެ ފުން އަނދިރިކަމާއި، ވަކިވުމުގެ ވޭން އަދި ތައުބާގެ ފެށުން

މަރިޔަމް ގެއިން ނުކުމެގެން ދިޔަ ވަގުތު ޖެހުނު ދޮރުގެ އަޑު، ރައްޔާންގެ މުޅި ދުނިޔެ ބިންދައިގެން ދިޔަ ފަދަ ބާރު އަޑަކަށް ވެގެން ދިޔައެވެ. މުޅި އެޕާޓްމަންޓަށް ވެރިވެފައި އޮތީ ބިރުވެރި، ފުން ހަމަހިމޭންކަމެކެވެ. ރައްޔާން އިނީ ސިޓިންގރޫމުގެ ފިނި ތަޅުންގަނޑުމަތީގައި ކަކޫމައްޗަށް ތިރިވެ، ދެއަތުން ބޮލުގައި ހިފަހައްޓައިގެންނެވެ. އޭނާގެ ދެލޮލުން ހޯސްލާފައި ކަރުނަ ފައިބަމުން ދިޔައެވެ.

މަރިޔަމްގެ ކޮންމެ އެއްޗެއް، އޭނާގެ ހެދުންތަކާއި، އަތްދަބަހާއި، ކުދިކުދި ސާމާނުތައް ހުރި ކޮޓަރިއަށް ރައްޔާން ވަނެވެ. އެނދުމަތީގައި މަރިޔަމް ބޭނުންކުރާ ސެންޓުގެ މަޑުމައިތިރި ވަސް އަދިވެސް އެކުލެވިފައި ހުއްޓެވެ. ޑްރެސިންގ ޓޭބަލް މަތީގައި މަރިޔަމް އަޅާ ބުރުގާގެ ދަތިތަކާއި، އޭނާ އަބަދުވެސް ކިޔަން ގެންގުޅޭ ދުޢާ ފޮތް އޮތެވެ. އެ ހުރިހާ އެއްޗަކުން ހަނދާންކޮށްދެނީ މަރިޔަމްގެ މާތްކަމާއި، އޭނާގެ ސާދާ ދިރިއުޅުމެވެ. އެފަދަ އަގުހުރި ޖަވާހިރެއް ފަދަ އިންސާނަކަށް އޭނާ ދިނީ ކޮން އެއްޗެއް ހެއްޔެވެ؟ ޝައްކާއި، ހިތާމައާއި، ފުން ޒަޚަމެކެވެ.

ރައްޔާން ކޮޓަރީގެ މޭޒުމަތީގައި އޮތް އޭނާގެ ފޯނު ނެގިއެވެ. އަތް ތުރުތުރުއަޅާ ޙާލު، އޭނާ އެންމެ ފުރަތަމަ ވެސް ހުޅުވައިލީ ޒީނިޔާގެ ޗެޓް ލޮގްތަކެވެ. އެ މެސެޖުތަކަށް ބަލަހައްޓައިގެން ހުރިއިރު، އޭނާއަށް އަމިއްލަ ނަފްސުދެކެ އިންތިހާއަށް ފޫހިވެ، ރުޅިއާދެވުނެވެ. މާޒީގެ ބޭކާރު ހަނދާންތަކެއްގައި ތާށިވެގެން، ޙަޤީޤީ ދިރިއުޅުން އަންދާލެވުނީ ކިހާ މޮޔަކަމަކުން ހެއްޔެވެ؟ ރައްޔާން ވަގުތުން ޒީނިޔާގެ ނަންބަރު ބްލޮކްކޮށް، ސޯޝަލް މީޑިއާގެ ހުރިހާ އެކައުންޓަކުން އޭނާ ފޮހެލިއެވެ. އަދި ލެޕްޓޮޕްގައި ހުރި މާޒީގެ ހުރިހާ ފޮޓޯތަކާއި ލިޔުންތައް އެއްކޮށް ޑިލީޓްކޮށް، ރީސައިކަލް ބިން ވެސް ހުސްކޮށްލިއެވެ.

އެއަށްފަހު އޭނާ ވުޟޫކޮށްގެން މުސައްލަމައްޗަށް އެރިއެވެ. އެރޭ މުޅި ރޭ އޭނާ ހޭދަކުރީ ތައުބާގެ ސަޖިދައިގައެވެ. އަމިއްލަ ނަފްސަށް ވެވުނު ޚިޔާނާތާއި، އަނބިމީހާއަށް ދެވުނު އަނިޔާއަށްޓަކައި ﷲ ގެ ޙަޟްރަތުގައި ކަރުނައަޅައި ދެންނެވިއެވެ.

އަނެއްކޮޅުން، މަންމަ ފާޠިމަތުގެ ގޭގެ ކުޑަ ކޮޓަރީގައި އޮތް މަރިޔަމްގެ ޙާލަތަކީ ވެސް ހިތްފަޅައިގެންދާ ފަދަ ޙާލަތެކެވެ. އެނދުގައި ބޯއަޅައިގެން އޮތްއިރު، އޭނާގެ ލޮލުން ކަރުނަ ހުހެއް ނުވެއެވެ. މަންމަ ފާޠިމަތު އެތައް ފަހަރަކު ކޮޓަރިއަށް ވަދެ، ދަރިފުޅަށް ހިތްވަރު ދިނުމަށް ވާހަކަދެއްކިއެވެ.

“ދަރިފުޅާ މަރިޔަމް.” ފާޠިމަތު މަރިޔަމްގެ ކައިރީގައި އިށީނދެ، އޭނާގެ ބުރަކަށީގައި ފިރުމައިލިއެވެ. “މަންމައަށް އެނގޭ ދަރިފުޅުގެ ހިތުގައި އަޅާނެ ވޭން. އެކަމަކު އަމިއްލަ ނަފްސު ހަލާކުގެ ތެރެއަށް ވައްޓާނުލާ. ދަރިފުޅު އެއްޗެއް ކައިގެން އަރާމުކޮށްލަން އުޅޭ.”

“މަންމާ.” މަރިޔަމް ގިސްލަމުން ވާހަކަދެއްކިއެވެ. “އަހަރެން ރައްޔާނަށް ކިހާ އިތުބާރެއް ކުރިން. އަހަރެން ހީކުރީ އަހަރެމެންގެ ދެމެދުގައި އޮތީ ހަމައެކަނި އަހަރެމެން ދެމީހުންގެ ދުނިޔެ ކަމަށް. އެކަމަކު އޭނާގެ ހިތުގައި އަހަންނަށް އޮތީ ހަމައެކަނި ހަމްދަރުދީ. އަހަރެން ކިހިނެއް އެ ހިތާމައަށް ކެތްކުރާނީ؟”

ފާޠިމަތު ދަރިފުޅުގެ ކަރުނަތައް ފޮހެދިނެވެ. “ދަރިފުޅާ. ދިރިއުޅުމަކީ އިމްތިޙާނުތަކެއްގެ ފުންޏެއް. ބައެއް ފަހަރު އެންމެ ބޮޑު އިމްތިޙާނު އަންނާނީ އެންމެ ލޯބިވާ މީހުންގެ ފަރާތުން. ދަރިފުޅު ކެތްތެރިވޭ. ﷲ އަށް ހުރިހާ ކަމެއް ވަކީލުކުރޭ. ވަގުތަކީ ހުރިހާ ޒަޚަމަކަށް ފަރުވާ ދޭނެ އެއްޗެއް.”

ފުރަތަމަ ދެ ހަފުތާ ވޭތުވެގެން ދިޔައީ ވަރަށް ހިތްދަތިކޮށެވެ. މަރިޔަމް އޮފީހުން ޗުއްޓީ ނަގައިގެން ގޭގައި އިނެވެ. އޭނާ ގިނަ ވަގުތު ހޭދަކުރީ ޤުރުއާން ކިޔެވުމުގައާއި ދުޢާކުރުމުގައެވެ. މަޑުމަޑުން އޭނާގެ ހިތަށް ކެތްތެރިކަން ލިބެން ފެށިއެވެ.

މަންމަގެ އެދުމުގެ މަތިން، ތިންވަނަ ހަފުތާގައި މަރިޔަމް އަލުން އޮފީހަށް ނުކުންނަން ފެށިއެވެ. މަސައްކަތުގެ ތެރެއަށް ގެއްލި، މީހުންނާ މުޢާމަލާތްކުރަން ފެށުމުން، ސިކުނޑިއަށް ލުއިކަމެއް ލިބުނެވެ. ޖަމްޢިއްޔާގެ އިޖުތިމާޢީ ޙަރަކާތްތަކުގައި އިސްނަގައި، ނިކަމެތިންނަށް އެހީވުމުގައި އޭނާ މަޝްޣޫލުވިއެވެ.

މި ދުވަސްތަކުގައި ރައްޔާން އުޅެމުން ދިޔައީ ދިރިހުރި މައްޔިތެއް ފަދައިންނެވެ. އޭނާގެ މޫނުމަތިން ދިރުމުގެ އެއްވެސް އަސަރެއް ނުފެނެއެވެ. ކެއިންބުއިމަށް ފަރުވާކުޑަވެ، ހަށިގަނޑު ހިކި އަނަރޫފަވަމުން ދިޔައެވެ. ވަޒީފާއަށް ދިޔަ ނަމަވެސް، އޭނާގެ ހުރިހާ ވިސްނުމަކާއި ފިކުރެއް ގުޅިފައިވަނީ ހަމައެކަނި މަރިޔަމާއެވެ. އޮފީހުގެ މޭޒު ދޮށުގައި އިންނައިރު ވެސް އޭނާއަށް އިނދެވެނީ މަރިޔަމްގެ ހަނދާންތަކުގެ ތެރެއަށް ގެއްލިފައެވެ. އޭނާގެ ހިތުގައި އުފެދިފައިވާ ކުށްވެރިކަމުގެ އިޙުސާސަކީ ކޮންމެ ސިކުންތަކު އޭނާގެ ޟަމީރު ކަތިލަމުން ދިޔަ ތޫނު ވަޅިއެއް ފަދަ އެއްޗެކެވެ.

އޭނާ ކޮންމެ ދުވަހަކު މަރިޔަމްގެ އޮފީސް ފެށޭ ގަޑިއަށާއި ނިމޭ ގަޑިއަށް، ދުރުގައި ސައިކަލުގައި މަޑުކޮށްލައިގެން ހުރެއެވެ. މަގުގެ އަނެއް ފަރާތުގައި، ހިޔާވާ ގަހެއްގެ ނިވަލުގައި ހުރެ، މަރިޔަމް ހިނގާފައި އަންނަ މަންޒަރު ބަލަހައްޓައިގެން ހުންނައިރު، އޭނާގެ ދެލޮލުން ކަރުނަ ފައިބައެވެ. މަރިޔަމަށް އެއްވެސް އުނދަގުލެއް ނުވާނެހެން، އަދި އޭނާ ހުރިކަން ނޭނގޭނެހެން، މަރިޔަމް ސަލާމަތުން ގޮސް މަންމަގެ ގެއަށް ވަންނަންދެން ފަހަތުން ބަލަމުން ދެއެވެ. ވާރޭ ވެހޭ ދުވަސްދުވަހު ވެސް، ވިއްސާރައިގެ ތެރޭގައި ތެމިފޯވެގެން ހުރެ ވެސް އޭނާ އެ ވާޖިބު އަދާކުރިއެވެ. އެއީ މަރިޔަމްގެ ރައްކާތެރިކަން ކަށަވަރުކުރުމަކީ އޭނާގެ ޒިންމާއެއް ކަމުގައި ދެކޭތީއެވެ.

ރައްޔާން މަރިޔަމްގެ ފޯނަށް ކޮންމެ ދުވަހަކު ވެސް މެސެޖެއް ފޮނުވައެވެ. އެ މެސެޖުތަކުގައި އެއްވެސް މަޖުބޫރުކުރުމެއް، ނުވަތަ އަވަހަށް އެނބުރި އައުމަށް އެދި އޮންނަ އަމުރެއް ނޯވެއެވެ. އޮންނަނީ ހަމައެކަނި ޙާލު ބަލައިލުމާއި، އޭނާގެ ހިތުގެ އިޚްލާޞްތެރި ތައުބާގެ ވާހަކައެވެ.

“މަރިޔަމް. މިއަދު ވެސް ވަރަށް ބޮޑަށް ހަނދާންވި. މަރިޔަމް ރަނގަޅަށް ކައިގެން، ބޭސް ކައިގެން އުޅޭތި. އަހަރެންގެ ކުށަށް ދުވަހަކުވެސް މަޢާފު ނުލިބުނަސް، މަރިޔަމްގެ ދުޅަހެޔޮކަމަށް އެދި އަހަރެން އަބަދުވެސް ދުޢާކުރާނަން.” މިފަދަ އެތައް މެސެޖެކެވެ.

މަރިޔަމް އެއިން އެއްވެސް މެސެޖަކަށް ޖަވާބެއް ނުދެއެވެ. ނަމަވެސް ކޮންމެ މެސެޖެއް ވެސް އޭނާ ކިޔައެވެ. ފޯނުގެ ސްކްރީނަށް ބަލަހައްޓައިގެން އިންނައިރު، ރައްޔާންގެ ބަދަލުވަމުން އަންނަ މިޒާޖާއި، އޭނާގެ ހިތުގައިވާ ހަޤީޤީ ރިހުން މަރިޔަމަށް އިޙުސާސްވަމުން ދިޔައެވެ.

މި ޚަބަރު ލިބުމާއެކު، ރައްޔާންގެ މަންމަ ހަލީމާ އައްޑޫން ކުއްލި ގޮތަކަށް މާލެ އައެވެ. މާލެ އައިސް ރައްޔާންގެ ޙާލަތު ފެނިފައި މަންމަގެ ހިތް ފަޅައިގެން ދިޔައެވެ. ގޭތެރެ އޮތީ އަނދިރިވެ، ފަޅުވެފައެވެ. ރައްޔާން އިނީ ސޯފާގައި އިސްޖަހައިގެން، ލޮލުގައި އެއްވެސް ދިރުމެއް ނެތިފައެވެ. އޭނާގެ ހަށިގަނޑު ހިކި، ކޯތާފަތް ވަދެފައިވާ މަންޒަރު ފެނުމުން، މަންމަގެ ލޮލުން ކަރުނަ ފައިބައިގަތެވެ.

“ދަރިފުޅާ ރައްޔާން!” ހަލީމާ އައިސް ދަރިފުޅުގެ ކޮނޑުގައި ހިފައި ތަޅުވައިގަތެވެ. “ތީ ކޮން ޙާލެއްގަ ތި އުޅެނީ؟ ކައިވެނި ރޫޅި، ދިރިއުޅުން މި ހިސާބަށް ދާންދެން މަންމައަށް ނާންގާ ތި ހުރީ ކީއްވެގެން؟”

ރައްޔާން އިސްއުފުލައި މަންމަގެ މޫނަށް ބަލައިލިއެވެ. އޭނާގެ ދެލޮލުގައި ވަނީ ކުށްވެރިކަމާއި ލަދުވެތިކަމުގެ ކަރުނައެވެ. “މަންމާ.. އަހަރެން ކީކޭ ކިޔާފަ މަންމަ ގާތު ބުނާނީ؟ އަހަރެންގެ އަމިއްލަ މޮޔަކަމުން އަހަރެންގެ ޙަޔާތުގައި ވި އެންމެ އަގުބޮޑު ޖަވާހިރު އަހަރެން އަމިއްލައަށް ނަގާލީ. މަރިޔަމް އަހަންނަކަށް ދެރައެއް ނުދޭ. އޭނާ ދިޔައީ އަހަރެންގެ ޚިޔާނާތްތެރިކަމުން.”

ހަލީމާ ފުން ނޭވާއެއް ދޫކޮށްލިއެވެ. ޒީނިޔާގެ މައްސަލައަކީ މާޒީގައި އެ ޢާއިލާއަށް ވެސް ބޮޑު ތަކުލީފަކަށްވި ކަމެކެވެ. ނަމަވެސް އެ މާޒީގެ ހިޔަނި އަދިވެސް ރައްޔާންގެ ދިރިއުޅުމުގައި އެޅިފައި އޮތް މިންވަރު އެނގުމުން ހަލީމާ ދެރަވިއެވެ. އެހެންނަމަވެސް، މަރިޔަމަކީ ކޮންފަދަ މާތް، އަޚްލާޤު ރަނގަޅު ކުއްޖެއްކަން އޭނާއަށް އެނގެއެވެ. އެފަދަ ކުއްޖަކު އެ ޢާއިލާއިން ބީވެގެން ދިޔުމަކީ ހަލީމާއަށް ކެތްކުރެވޭނެ ކަމެއް ނޫނެވެ.

ޖެހިގެން އައި ދުވަހުގެ ހަވީރު، ހަލީމާ އެކަނިމާއެކަނި ދިޔައީ މަރިޔަމްމެންގެ ގެއަށެވެ.

ދޮރު ހުޅުވީ ފާޠިމަތެވެ. ހަލީމާ ފެނުމާއެކު ފާޠިމަތުގެ މޫނުމަތިން ފެނުނީ މަޑުމައިތިރި ހިތާމައެކެވެ. އެއްވެސް ރުޅިވެރިކަމެއް ނެތި، އޭނާ ހަލީމާއަށް ގޭތެރެއަށް ވަނުމަށް މަރުޙަބާ ކިޔެވެ. މަރިޔަމް ކޮޓަރިން ނުކުމެގެން އައީ އެ ވަގުތުއެވެ. ހަލީމާ ފެނުމާއެކު މަރިޔަމްގެ ފިޔަވަޅުތައް މަޑުޖެހުނެވެ.

ހަލީމާ އެއްވެސް ވިސްނުމެއް ނެތި ކުރިއަށް ޖެހިލައި، މަރިޔަމްގެ ދެއަތުގައި ހިފެހެއްޓިއެވެ. އަދި ކުއްލިއަކަށް ރޯން ފެށިއެވެ.

“ދަރިފުޅާ މަރިޔަމް.” ހަލީމާގެ އަޑު ބެދެމުން ދިޔައެވެ. “މަންމަ މިއައީ ރައްޔާންގެ ދިފާޢުގައި އެއްޗެއް ބުނާކަށް ނޫން. އޭނާ ކުރީ މަޢާފު ނުކުރެވޭވަރުގެ ބޮޑު ކުށެއް. އެކަމަކު ދަރިފުޅާ. މަންމަގެ ދަރިފުޅަށް ވިސްނުނުއިރު އޭނާ އެހެރީ މުޅިން ހަލާކުވެފައި. އޭނާ ކެއުމެއް ބުއިމެއް ނެތި، ދުވާލަކު ސަތޭކަ ފަހަރު ދަރިފުޅުގެ ނަން ކިޔައި ރޮނީ.”

މަރިޔަމްގެ ދެލޮލަށް ކަރުނަ ޖަމާވިއެވެ. އޭނާ އިސްޖަހައިލިއެވެ.

“ދަރިފުޅާ. ރައްޔާންގެ ހިތުން އެ މާޒީ މިއަދު އެއްކޮށް ފޮހެވިއްޖެ. އެކަމަކު އެކަން ވީ ދަރިފުޅު ގެއްލުމުގެ އަގުބޮޑު ކައްފާރާއިން.” ހަލީމާ މަރިޔަމްގެ އަތްތިލައިގައި ބޮސްދިނެވެ. “މަންމަ އާދޭސް މިކުރަނީ ދަރިފުޅު ވަގުތުން އެނބުރި އަންނާކަށް ނޫން. އެކަމަކު ދަރިފުޅުގެ ހިތުގައި އޭނާއަށްޓަކައި ކުޑަކުޑަ ލޯތްބެއް ނަމަވެސް ވާނަމަ، އެންމެ ފަހަރަކު އޭނާއާ ވާހަކަދައްކައިލާ. އޭނާގެ ހިތުގެ ތެދުވެރިކަން ދަރިފުޅު އަމިއްލައަށް ވަޒަންކޮށްލާ.”

މަރިޔަމް މަޑުމައިތިރިކަމާއެކު ހަލީމާގެ އަތް އޭނާގެ މޭގައި ޖައްސައިލިއެވެ.

“މަންމާ. އަހަރެން ރައްޔާނަށް ނަފުރަތެއް ނުކުރަން. އަދި މަންމަމެންނާމެދު ހިތުގައި އެއްވެސް ބުރަކަމެއް ނެތް.” މަރިޔަމްގެ ލޮލުން ކަރުނަތިއްކެއް ވެއްޓުނެވެ. “އެކަމަކު އަހަރެންގެ ހިތުގައި އެޅުނު ޒަޚަމަކީ ވަގުތުން ފަސޭހަވާނެ އެއްޗެއް ނޫން. އަހަރެން ބޭނުންވަނީ އަހަރެންގެ އަމިއްލަ ނަފްސަށް އިތުބާރު ހޯދަން. އަދި ރައްޔާންގެ ބަދަލުވުމަކީ ދާއިމީ ކަމެއްތޯ ބަލަން. އަހަންނަށް އިތުރު ވަގުތު ދީ.”

ހަލީމާ ކަރުނަތައް ފޮހެލަމުން ބޯޖަހައިލިއެވެ. މަރިޔަމްގެ އެ ވިސްނުންތެރި، އަދަބުވެރި ޖަވާބުން އޭނާގެ ހިތަށް ވެސް ތަސައްލީއެއް ލިބުނެވެ.

އެ ބައްދަލުވުމަށްފަހު، މަސްތައް އޭގެ ހިމޭން ދުވެލީގައި ކުރިއަށް ދިޔައެވެ.

ރައްޔާން އޭނާގެ ދިރިއުޅުން އިޞްލާޙުކުރުމުގެ މަސައްކަތް ހުއްޓައެއް ނުލައެވެ. އޭނާ ވަޒީފާގައި ކުރިއަށްވުރެ ބޮޑަށް ހީވާގިވެ، މިސްކިތުގެ ޖަމާޢަތަށް ފަރުވާތެރިވިއެވެ. އޭނާ މަރިޔަމަށް ފޮނުވާ މެސެޖުތަކުގައި އެއްވެސް އަމިއްލަ އެދުމެއް ނެތެވެ. އެއީ ދެމަފިރިންގެ ދެމެދުގައި އޮންނަންޖެހޭ ޝަރުޢީ ވާޖިބުތަކާއި، އަޅާލުމުގެ ބަސްތަކެވެ.

މަރިޔަމް މި މަންޒަރުތައް ވަރަށް ގާތުން ބަލަމުން ދިޔައެވެ. ރައްޔާންގެ ކެތްތެރިކަމާއި، އޭނާގެ ތައުބާގެ އިޚްލާޞްތެރިކަން މަރިޔަމްގެ ހިތުގައިވާ ގަނޑުފެން މަޑުމަޑުން ވިރުވަމުން ދިޔައެވެ. އަހަރެއްހާ ދުވަހުގެ މި ދިގު ވަކިވުމަކީ، ދެމީހުންނަށް ވެސް އެކަކު އަނެކަކުގެ އަގު ވަޒަންކުރަން ލިބުނު އެންމެ ބޮޑު ފިލާވަޅެވެ.

އަދި އެ ދިގު އިންތިޒާރަށްފަހު، ދެމީހުންގެ ތަޤުދީރު އަލުން ބައްދަލުވާނެ ދުވަހަކަށް މާތް ﷲ ގެ އިރާދަފުޅާއެކު މަގުފަހިވަމުން ދިޔައެވެ.

(ނުނިމޭ)