ދިވެހި މީޑިއާ އެންޓަޓެއިންމަންޓް ޕްލެޓްފޯމް، ވީޑިއޯކްލަބުން ގެނެސްދޭ އާ ވެބް ސީރީޒް “ޖުންޖުލާ” ގެ ލަވަ “ހުވަފެނީ ތަސްވީރު” މިރޭ ރަސްމީކޮށް ބެލުންތެރިންނަށް ދޫކޮށްލައިފިއެވެ.
ކްރިއޭޓިވް ނެޓްވޯކްގެ ޕްރޮޑަކްޝަނެއްގެ ގޮތުގައި ގެނެސްދިން މި ހިތްގައިމު ލަވައިން ފެނިގެންދަނީ ދިވެހި ފިލްމީ ދާއިރާގައި ފާހަގަކޮށްލެވޭ ތަރިން ކަމަށްވާ މުޙައްމަދު އިޝްފާން އަދި ވާޝިޔާ މުޙައްމަދު (ޝިޔާ) އެވެ. ލަވައިން އިޝްފާން އާއި ވާޝިޔާގެ ވަރަށް ފުރިހަމަ ކެމިސްޓްރީއެއް ފެނިގެންދާއިރު، ލާމު އަތޮޅުގެ ޤުދުރަތީ ރީތި މާހައުލުތަކުގައި ޝޫޓްކޮށްފައިވާ މި ލަވައަކީ ގިނަ ބަޔަކު ދިގު އިންތިޒާރެއް ކޮށްފައިވާ އުފެއްދުމެކެވެ.
“ހުވަފެނީ ތަސްވީރު” ގެ އަޑުގެ ވެރިންނަކީ މަޝްހޫރު ލަވަކިޔުންތެރިން ކަމަށްވާ މުޙައްމަދު ނަސޫހު ބިން ނަސްރުއްދީން އަދި ޢާއިޝަތު މާއިން ރަޝީދެވެ. މި ލަވައިގެ ފުން އަސަރުތަކެއް އެކުލެވޭ ޅެން ހަދާފައިވަނީ މަޝްހޫރު ޅެންވެރިޔާ ޢީސާ ޝަރީފެވެ. އަދި ލަވައިގެ ރާގާއި މިއުޒިކް ތައްޔާރުކޮށްދީފައިވަނީ ހުސައިން ތައުފީޤެވެ.
މި ލަވައިގެ ޑައިރެކްޝަން އަދި ކޮރިއޯގްރަފީގެ އިތުރުން އެޑިޓިންގ އަދި ކަލަރ ގްރޭޑިންގ ހަދާފައިވަނީ އަޒްހާން އިބްރާހީމެވެ. ލަވައިގެ ސިނެމަޓޯގްރަފީ ހަދާފައިވަނީ ލައިޓްސްއައުޓްގެ ސަމާޙް އިބްރާހީމް (ގޯގޯ) އެވެ.
މީގެ އިތުރުން، މި ލަވައިގައި ފެންނަ ތަރިންގެ މޭކަޕް އަދި ހެއަރ ސްޓައިލް ޖަސްޓިން ފުރިހަމަކޮށްދީފައިވާއިރު، ހެދުންތައް ފަރުމާކޮށްފައިވަނީ އައްމުޑިޒައިންސް އިންނެވެ.
މާދަމާ ރޭ ވީޑިއޯކްލަބުން “ޖުންޖުލާ” ސީރީޒް ފަށަން ތައްޔާރުވެފައިވާއިރު، މި ލަވަ ރިލީޒްކުރުމާއެކު ސީރީޒަށް އިންތިޒާރުކުރަމުންދާ ފަރާތްތަކުގެ ޝައުޤުވެރިކަން ވަނީ އިތުރަށް ބޮޑުވެގެން ގޮސްފައެވެ.
10 އެޕިސޯޑްގެ މައްޗަށް އެކުލެވޭ މި ސީރީޒްގައި މައިގަނޑު ގޮތެއްގައި ފެނިގެންދާނީ ޕޮލިސް އިންސްޕެކްޓަރު ޒާރާ އާއި އޭނާގެ ބައިވެރިޔާ ޒުހައިރު ގުޅިގެން މައްސަލަތައް ހައްލުކުރުމަށް ކުރަމުންދާ މަސައްކަތްތަކެވެ. ކޮންމެ އެޕިސޯޑެއްގައި ވަކި މައްސަލައެއް ގެނެސްދޭ މި ސީރީޒްގައި ވާޝިޔާ މުޙައްމަދު (ޝިޔާ)، ސާމީ ޙުސައިން ދީދީ، މުޙައްމަދު އިޝްފާން، މަރިޔަމް ޝިފާ އަދި މަރިޔަމް ނިޝާ ފަދަ ކުޅަދާނަ ގިނަ ތަރިންތަކެއް ފެނިގެންދާނެއެވެ.
