ވަރިވުމަކީ ފައިސާއާއި ނުފޫޒު ފޯރުވުމުގެ ހަނގުރާމައަކަށް ވާއިރު، އޭގެ ހަޤީޤީ އަގަކީ ހަމައެކަނި ޤާނޫނީ ފީތަކެއް ނޫނެވެ. އޭގެ ސަބަބުން ދެމަފިރިންނާއި އާއިލާތަކުގެ ނަފްސާނީ ދުޅަހެޔޮކަމަށް ފޫނުބެދޭވަރުގެ ބޮޑެތި ގެއްލުންތަކެއް ލިބެއެވެ.
ކައިވެނީގެ ތެރޭގައި އެކަށީގެންވާ ވަގުތާއި، ލޯތްބާއި، އަޅާލުން ދިނުމަށް ފަސްޖެހުނު ބައެއް ފިރިހެނުން، އަނބިމީހާ ވަރިވާން ނިންމުމުން އެކަމާ ދެކޮޅަށް ހަނގުރާމަކުރަން ކުއްލިއަކަށް އަތްފައި ހިއްލާލަނީ ކީއްވެގެން ހެއްޔެވެ؟ މިއީ އަމިއްލަ އެދުމާއި، ނުރުހުމާއި، މާލީ މައްސަލަތަކާއި، އަދި ގުޅުން ނިމުމަކަށް އައުމުން އެކަން ޤަބޫލުކުރަން އުނދަގޫވުމާ ގުޅިފައިވާ ނުތަނަވަސް ސުވާލެކެވެ.
ހަޤީޤަތުގައި، ކައިވެނީގެ އުފާވެރިކަމަށް ޚަރަދުކުރުމަކީ ބޮޑު އިސްރާފަކަށްވެ، ނަފްސާނީ އެހީތެރިކަން ދިނުމަކީ ކުރެވޭނެ ކަމަކަށް ނުވެ، އަދި އަސާސީ އިޙުތިރާމް އަދާކުރުމަކީ ބުރަ މަސައްކަތަކަށް ވީއިރު، ވަރީގެ މައްސަލަ ފެށުމާއެކު ވަކީލުންނަށް ދޭނެ ފައިސާ ކުއްލިއަކަށް ހޯދައި، މުދަލުގެ މައްސަލައިގައި ބަހުސްކޮށް، މޮޅުވުމަށްޓަކައި ނުހަނު ބޮޑު ހިތްވަރެއް ނެރެއެވެ. ކައިވެނި ސަލާމަތްކުރަން އޮތްއިރު މި ހަކަތަ ބޭނުންކުރިނަމަ ކިހާ ރަނގަޅުވީސް ހެއްޔެވެ؟
އެހެންނަމަވެސް، ވަރީގެ ކޮންމެ މައްސަލައަކީ ބަދަލުހިފުމުގެ ރޫޙުގައި ކުރާ ކަމެއް ނޫނެވެ. މާލީ ކަންކަމުގައި ދެބަސްވުން އުފެދުމަކީ ހަމަޖެހޭ ކަމެކެވެ. އަދި ދެފަރާތަށްވެސް އިންސާފުވެރިކޮށް ކަންކަން ހަމަޖެހެން ޖެހެއެވެ. ނަމަވެސް، ވަކިވުމަކީ އަމަލީ ކަންކަން ހައްލުކުރުމުގެ ބަދަލުގައި ކުރީގެ ބައިވެރިޔާއަށް ތަކުލީފު ޖެއްސުމަށް ކުރާ ކަމަކަށް ވާނަމަ، އެއީ އަމިއްލަ ނުފޫޒު ފޯރުވުމާއި ޒިންމާދާރުކަމާމެދު ސުވާލު އުފެދޭ ކަމެކެވެ.
ގިނަ އަންހެނުން ކައިވެނި ރޫޅާލަނީ ކުއްލިއަކަކަށް ނޫނެވެ. އެކަނބަލުން އަހަރުތަކެއް ވަންދެން ލޯތްބާއި، މުއާމަލާތްކުރުމާއި، އިޙުތިރާމަށް އެދި އާދޭސްކޮށްފާނެއެވެ. ނަމަވެސް އެކަންކަމަށް ދެވޭ ޖަވާބަކީ އެއީ މާ ބޮޑުވަރު ކުރުން ކަމަށް ނުވަތަ ރުއްސަން އުނދަގޫ މީހެއް ކަމަށް ބުނެ އިހުމާލުވުމެވެ. އެންމެ ފަހުން ކައިވެނި ދޫކޮށް ދިއުމަކީ ފިރިމީހާއަށް އަދަބު ދިނުމަށްވުރެ ބޮޑަށް، އޭނާގެ ފަރާތުން ނުލިބުނު ހިތްހަމަޖެހުމާއި ހަމަޖެހުން ހޯދުމަށް ކުރާ ކަމެކެވެ.
އެހެންނަމަވެސް، ބައެއް އަންހެނުންނަށް ފެންނަނީ ވަކިވާން ނިންމާ ހިސާބުން ގުޅުމުގެ ސިފަ މުޅިން ބަދަލުވާ ތަނެވެ. އެކަނބަލުންގެ ނިންމުންތަކަށް ހުރަސްއަޅައި، މާލީ ކަންކަމަކީ ހަނގުރާމައިގެ މައިދާނަކަށް ހަދައި، ކުރިއަށް ދިއުމަށް އުނދަގޫތައް ކުރިމަތިކުރުވައެވެ. ކައިވެނި ސަލާމަތްކުރުން އެހާ މުހިންމުވިނަމަ، ކައިވެނި ދެމިއޮތްއިރު މި ހިތްވަރާއި ސާބިތުކަން ކޮބައިހެއްޔެވެ؟
ނަފްސާނީ ގޮތުން ބަލާއިރު، ވަރިވުމަކީ ދޫކޮށްލެވުމާއި، ރުޅިވެރިކަމާއި، ނުތަނަވަސްކަމާއި، އަދި ކޮންޓްރޯލް ގެއްލުމުގެ އިޙުސާސްތައް އުފައްދާ ކަމެކެވެ. ބައެއް މީހުންނަށް ގުޅުން ނިމުމަކަށް އައިކަން ޤަބޫލުކުރުމަށްވުރެ، އޭގެ ނަތީޖާތަކާމެދު ހަނގުރާމަކުރުން މާ ފަސޭހަވެއެވެ. ކަންކަން ގޯސްވި ސަބަބާމެދު ވިސްނުމުގެ ބަދަލުގައި، އެމީހުން މަސައްކަތްކުރަނީ އަނެކާގެ ކުށް ސާބިތުކުރުމަށެވެ.
ބައެއް ހާލަތްތަކުގައި، މާލީ ގޮތުން ދަތިކުރުމާއި، މައްސަލަ ދިގުދެންމުމާއި، ނުވަތަ ޙައްޤުވާ އެހީތެރިކަން ގަސްތުގައި ހިފެހެއްޓުމަކީ އަނެކާގެ މައްޗަށް ނުފޫޒު ފޯރުވުމަށް ބޭނުންކުރާ ހަތިޔާރަކަށް ވެއެވެ. މީގެ ސަބަބުން ވަކިވާ ބައިވެރިޔާއަށް އަމިއްލަ ފައިމައްޗަށް ތެދުވުމާއި ނަފްސާނީ ހަމަޖެހުން ހޯދުމަށް ހުރަސްއެޅެއެވެ. އެހެންނަމަވެސް، ކޮންމެ މައްސަލައެއްގެ ހާލަތަށް ނުބަލައި އެއީ ގޯސް ނިޔަތެއްގައި ކުރާ ކަމެއް ކަމަށް ނިންމައިގެން ނުވާނެއެވެ.
މީގެ ނޭދެވޭ އަސަރު ދަރިންނާއި އާއިލާގެ މެންބަރުންނަށް ފޯރައި، އެމީހުން މި ހަނގުރާމައިގެ ތެރޭގައި ތާށިވެއެވެ. ރާއްޖެ ފަދަ ގާތް ގުޅުންތަކެއް އޮންނަ މުޖުތަމައުތަކުގައި، މީހުންގެ ފާޑުކިޔުމާއި ދައްކާ ވާހަކަތަކުގެ ސަބަބުން ވަރިވުމުގެ މަރުހަލާ އިތުރަށް އުނދަގޫވެއެވެ. ވަރިވެފައިވާ އަންހެނުންގެ އަޚުލާޤާއި، އެކަނބަލުންގެ ނިންމުންތަކާއި، އަދި މާލީ ޙައްޤުތަކާމެދު ސުވާލު އުފައްދާ ފަހަރު އާދެއެވެ.
އަންހެނަކު ކައިވެނީގައި ދެމިހުރެއްޖެނަމަ އެކަމަށް ފާޑުކިޔައި، ވަކިވެއްޖެނަމަ ގޯސްކޮށް، އަދި އިންސާފުވެރި މާލީ ހައްލަކަށް އެދިއްޖެނަމަ ދަހިވެތިކަމުގެ ތުހުމަތު އަޅުވައެވެ. ކޮންމެވެސް ގޮތަކުން އޭނާގެ ކިބައިން އުންމީދު ކުރެވެނީ ކައިވެނި ދަމަހައްޓައި، އާއިލާގެ އަބުރު ރައްކާތެރިކޮށް، އެއްވެސް މީހަކަށް އުނދަގުލެއް ނުވާނެހެން ހިމޭނުން ވަކިވެގެން ދިއުމަށެވެ.
އެހެންނަމަވެސް، އިންސާފަށް އެދުމަކީ ބަދަލުހިފުމެއް ނޫނެވެ. އަދި ވަރިވުމަށްފަހު އަންހެނަކު އުފަލުގައި އުޅުމަކީ ކުރީގެ ފިރިމީހާއަށް ކުރެވޭ އިހާނެތިކަމެއް ވެސް ނޫނެވެ.
ވަރިވުމަކީ އިޤުތިސާދީ ގޮތުން ބޮޑެތި ގެއްލުންތަކެއް ކުރިމަތިވެދާނެ ކަމެކެވެ. ޚާއްސަކޮށް ދަރިން ބެލުމާއި ގޭތެރޭގެ ކަންކަން ބެލެހެއްޓުމަށްޓަކައި އަމިއްލަ ވަޒީފާގެ ފުރުސަތުތައް ޤުރުބާންކުރި މީހަކަށް މި ގެއްލުން ބޮޑުވާނެއެވެ. ގޭތެރޭގައި އަންހެނުން ކުރާ މަސައްކަތަކީ އާއިލީ ދިރިއުޅުމަށް ދެވޭ ބޮޑު ޚިދުމަތެކެވެ. އެއީ މުސާރައެއް ލިބޭ މަސައްކަތަކަށް ނުވުމަކީ އެ މަސައްކަތުގެ އަގު ވަޒަންނުކުރަންޖެހޭ ސަބަބެއް ނޫނެވެ. ހަމައެފަދައިން، ކޮންމެ ބައިވެރިޔަކަށްމެ އެމީހެއްގެ ޤާނޫނީ އަދި މާލީ މަސްލަހަތު ހިމާޔަތްކުރުމުގެ ޙައްޤު ލިބިގެންވެއެވެ.
މުސްލިމް އާއިލާތަކަށް ބަލާއިރު، ކައިވެނި ނިމުމަކަށް އަންނަ ހިނދުވެސް އިންސާފާއި ރިތި އަޚުލާޤު ދެމެހެއްޓުމަކީ ކޮންމެހެން ބޭނުންތެރި ކަމެކެވެ. ސޫރަތުލް ބަގަރާގެ 231 ވަނަ އާޔަތުގައި، އަންހެނުންނަށް ގެއްލުން ދިނުމުގެ ގޮތުން ކައިވެނީގައި ހިފަހައްޓައިގެން ނުތިބުމަށް އަންގަވާފައިވެއެވެ. އަދި ސޫރަތުއްޠަލާޤުގެ 2 ވަނަ އާޔަތުގައި، ވަކިވާއިރުވެސް ހެޔޮގޮތުގައި ކަންކަން ކުރުމަށް ބާރުއަޅުއްވާފައިވެއެވެ. ވަރިވުމަކީ އަނެކާއާމެދު އިންސާފުވެރިކޮށް ކަންތައް ކުރުމުގެ ޒިންމާއިން ބަރީއަވާ ކަމެއް ނޫނެވެ.
އެންމެ ފަހުން، ކުރީގެ ބައިވެރިޔާއާ ހަނގުރާމަކޮށްގެން ވަގުތީ މޮޅެއް ލިބުނު ކަމުގައިވިޔަސް، އޭގެ ސަބަބުން ގެއްލިފައިވާ ލޯތްބެއް އަނބުރާ ނުހޯދޭނެއެވެ. ނުވަތަ ވޭތުވެދިޔަ އަހަރުތަކުގެ ނުތަނަވަސްކަމެއް ފިލައިގެނެއް ނުދާނެއެވެ.
ގިނަ އަންހެނުންނަށް ކުރިއަށް ދިއުމަކީ މާލީ ހަނގުރާމައަކުން މޮޅުވުމެއް ނޫނެވެ. އެއީ އަމިއްލަ ނަފްސަށް އޮތް އިތުބާރު އާކުރުމާއި، ދަރިންނަށް އެހީތެރިވުމާއި، މިނިވަންކަން ހޯދުމާއި، އަދި މެދުކެނޑުމެއްނެތް ދެބަސްވުންތަކުން ދުރުގައި އުޅުމެވެ.
ފަހަރުގައި ބައެއް މީހުންނަށް، އަތުން ބީވެފައިވާ އެއްޗަކަށްޓަކައި ހަނގުރާމަކުރުން މާ ފަސޭހައީއެވެ. ކައިވެނި ކާމިޔާބުކުރުމަށް ބޭނުންވަނީ މަޑުމޮޅިކަމާއި، މުއާމަލާތްކުރުމާއި، ޒިންމާ އުފުލުމެވެ. އެކަމަކު ވަރިވުމާ ދެކޮޅަށް ހަނގުރާމަކުރުމަށް ބޭނުންވަނީ ހަމައެކަނި ރުޅިވެރިކަމާއި، ފައިސާއާއި، އަދި މައްސަލަ ދިގުދަންމާލުމުގެ ނިޔަތެވެ.
އެހެންކަމުން، ހަޤީޤީ ސުވާލަކީ ކުރީގެ ފިރިމީހާއަށް އިތުރު ބަހުސަކުން މޮޅުވެވިދާނެތޯއެއް ނޫނެވެ. އެކަމަކު، ގުޅުން ކެނޑިގެން ދިޔުމަށްފަހު މިހާ ބޮޑު ހިތްވަރެއް ކުއްލިއަކަށް ފެންނަންވީ ސަބަބަކީ ކޮބައިތޯއެވެ.
ކުރީގެ އަނބިމީހާއާ ހަނގުރާމަކުރާ ވަރުގަދަކަމަކުން، ތިބާއީ ރަނގަޅު ފިރިއެއްކަން ސާބިތެއް ނުކޮށްދެވޭނެއެވެ. ތިބާގެ އަސްލު އިންސާނިއްޔަތުކަން ހާމަވަނީ، އޭނާއަކީ ތިބާގެ އަނބިމީހާ ކަމަށް ނުވާ ހިނދުވެސް، އޭނާއާމެދު ތިބާ އިންސާފުވެރިކޮށް ކަންތައް ކުރާ މިންވަރަކުންނެވެ.
ބައެއް ފަހަރު، ރޫޅިފައިވާ ކައިވެންޏެއްގެ އެންމެ އަގުބޮޑު ބަޔަކީ ވަރީގެ މަރުހަލާއެއް ނޫނެވެ. ނަމަވެސް، ކައިވެނީގެ ތެރޭގައި އޮތްއިރު އެދި އާދޭސްކުރި ހަމަޖެހުމާއި އަމާންކަން، ކައިވެނި ނިމުމުންވެސް ދިނުމަށް އަނެކާ އިންކާރުކުރާކަން އިޙުސާސްވުމުން ކުރާ ހިތްދަތި އަސަރެވެ.
