ނުތަނަވަސްކަމާއި ބިރުވެރިކަން
ވަޝިއްޔާ ވަރަށް ފަރުވާތެރިކަމާއެކު މިރުޒާއަށް ބަލަހައްޓައިގެން އިނެވެ. މިއީ އަމިއްލަ ނަފްސަށް އިތުބާރުކުރާ، ނުރައްކާތަކާ ކުރިމަތިލާ، އަދި ކޮންމެ ކަމެއްވެސް ހައްލުކުރެވޭނެކަމަށް ޤަބޫލުކުރާ މިރުޒާ ގަފޫރު ފަދަ މީހެއްގެ ފަރާތުން އޭނާ އުންމީދުކުރި ފަދަ ޖަވާބެއް ނޫނެވެ.
މިރުޒާ އޭނާ ގާތު ހިތްވަރުގަދަވާކަށް ނުބުނެއެވެ. އޭނާގެ ބިރުވެރިކަމަކީ ބޭކާރު ކަމެއް ކަމަށް ބުނެ އެކަން ދޫކޮށެއް ނުލައެވެ. އަދި އާދައިގެ ހާލަތަކަށް ރުޖޫޢަވުމަކީ ހިތްވަރުގެ އިމްތިހާނެއް ކަމަކަށްވެސް ނުހަދައެވެ.
އެކަމަށްޓަކައި ވަޝިއްޔާ ޝުކުރުވެރިވިއެވެ.
“ޝުކުރިއްޔާ.” އޭނާ މަޑުމަޑުން ބުންޏެވެ.
އެ ބަހުން މިރުޒާއަށް އެހާ ބޮޑު އަސަރެއް ކުރީ ކީއްވެގެންކަން ބުނެދޭން ނޭނގިގެން އޭނާ މޫނު އަނބުރާލިއެވެ.
އޭނާ ކުރީކީ މާ ބޮޑު ކަމެއް ނޫނެވެ. އޭނާ ހަމައެކަނި އެހީތެރިއެއްގެ ގޮތުގައި މަޑުކޮށްލީއެވެ. ނަމަވެސް، ކުޑަދޮރު ކައިރީގައި އިން ވަޝިއްޔާގެ ވަރުބަލިވެފައިވާ މޫނާއި، ކޮނޑުމައްޗަށް ފެތުރިފައިވާ ދިގު އިސްތަށިގަނޑު ފެނުމުން، އޭނާގެ ހިތުގައި ވަޝިއްޔާއަށްޓަކައި އޮތް ލޯތްބާއި ޤަދަރު އިޙުސާސްވިއެވެ.
އޭނާ ބޭނުންވީ ވަޝިއްޔާ ރައްކާތެރިކުރާށެވެ. އޭނާގެ ގާތުގައި ބަހައްޓާށެވެ. އޭނާ ކައިރީގައި ހުންނަ ކޮންމެ ވަގުތަކު ވަޝިއްޔާއަކީ އަމާންކަންމަތީގައި ހުރި މީހެއްކަން ޔަގީންކުރާށެވެ. އަދި މި ހުރިހާ އިޙުސާސްތަކެއްގެ ތެރޭގައި، ވަޝިއްޔާއަށް ބަލާ ކޮންމެ ފިރިހެނަކަށް، އޭނާއަކީ ފަސޭހައިން ގާތްވެވޭނެ މީހެއް ނޫންކަން އަންގައިދިނުމުގެ ބާރުވެރިކަމުގެ އިޙުސާސެއްވެސް އުފެދުނެވެ.
އެ ޚިޔާލު އޭނާގެ ސިކުނޑިއަށް އައީ އޭނާއަށް ހުއްޓުވުމުގެ ކުރިންނެވެ.
“އޭނާ ރައްކާތެރިކުރުމަކީ އަހަރެންގެ ޒިންމާއެއް.”
އޭނާ އަމިއްލަ ނަފްސު ހުއްޓުވިއެވެ. ނޫނެކެވެ. ވަޝިއްޔާއަކީ އޭނާގެ މިލްކެއް ނޫނެވެ. އަދި އޭނާގެ ނިކަމެތި ހާލަތަކީ އޭނާގެ މައްޗަށް ބާރު ފޯރުވޭނެ ސަބަބެއްވެސް ނޫނެވެ. އޭނާގެ މައްޗަށް ބާރު ނުފޯރުވައިވެސް، އޭނާއަށް އޯގާތެރިވެ، ލޯބިވެ، އަދި އެހީތެރިވެވިދާނެއެވެ. އެހެންނަމަވެސް، އެހެން މީހުންގެ ކިބައިން އޭނާ ރައްކާތެރިކުރުމަށް ހިތުގައި އުފެދުނު ޖަޒުބާތު ކޮންޓްރޯލްކުރުން ދަތިވިއެވެ. އެހެން ފިރިހެނުން އޭނާގެ ރީތިކަމަށްޓަކައި ބަލަމުންދިޔަ ގޮތް މިރުޒާއަށް ވަނީ ފެނިފައެވެ. އެފަދަ ރެއަކަށްފަހު، އެއިން މީހަކު އޭނާއާ ގާތްވުމުގެ ޚިޔާލުންވެސް މިރުޒާގެ ރުޅިގަނޑު ކެކިގަތެވެ.
މީހަކު ރައްކާތެރިކުރުމާއި، އެމީހެއްގެ ދުނިޔެ ކޮންޓްރޯލްކުރަން އުޅުމާ ހުރި ތަފާތު ދަސްކުރަން މިރުޒާއަށް ޖެހޭނެއެވެ. މިރުޒާ ފަދަ މީހަކަށް އެ ތަފާތު ދެނެގަތުމަކީ ފަސޭހަ ކަމަކަށް ނުވާނެއެވެ.
*****
ވަޝިއްޔާ އެޕާޓްމަންޓަށް އެނބުރި އައިއިރު، އެ އާދަވެފައިވާ މާހައުލު އިޙުސާސްކުރެވުނީ ބީރައްޓެހި ތަނެއްގެ ގޮތުގައެވެ. ދޮރުގެ ފަރުދާތައް ހުރީ އެއްބައި ކަހާލެވިފައެވެ. މޭޒުމަތީގައި ރޭގެ ސައިބުއިމުގެ ނިޝާންތައް ހުއްޓެވެ. އަދި ރަހުމަތްތެރިއަކު ވަނީ އޭނާގެ އެނދު ކައިރީގައި ތާޒާ ފެންތަށްޓެއް ބަހައްޓާފައެވެ. ހުރިހާ އެއްޗެއްވެސް ހުރީ ހުންނަންޖެހޭ ތަނުގައެވެ. އެހެންނަމަވެސް، އާދައިގެ މާހައުލަކީ އަބަދު ރައްކާތެރިކަން ކަށަވަރުކޮށްދޭނެ ތަނެއް ނޫންކަން ދެނެގަނެވިފައިވާ މީހަކު ފަދައިން، އޭނާ އެތަނުގައި ހަރަކާތްތެރިވަމުން ދިޔައީ ވަރަށް ސަމާލުވެ ހުރެގެންނެވެ.
އޭނާގެ ނޯޓުފޮތް އޮތީ އެނދު ކައިރީގައި ހުރި މޭޒުމަތީގައެވެ. އެ ފޮތް ނެގުމުގެ ކުރިން ވަރަށް ގިނައިރު ވަންދެން އޭނާ އެއަށް ބަލަހައްޓައިގެން އިނެވެ. ވޭތުވެދިޔަ ހަފުތާތަކުގައި އޭނާ ލިޔަމުން ދިޔައީ އާ ކަންތައްތައް ހޯދައި ބެލުމުގެ މަރުކަޒެއްގެ ގޮތުގައި ސްރީލަންކާއާ ބެހޭގޮތުންނެވެ. އެއީ އާދަކޮށް ކުރާ ކަންކަމާއި އާ ތަޖުރިބާތައް ބައްދަލުވާ، ހީނުކުރާ ފަދަ ދީލަތިކަން މީހުންގެ ފަރާތުން ފެންނަ، އަދި އާދައިގެ ދުވަސްތަކުން އެންމެ ފުރިހަމަ މަޢުލޫމާތުތައް ލިބޭ ޤައުމެއްގެ ގޮތުގައެވެ.
އޭނާ ލިޔެފައިވަނީ އެ ޤައުމުގެ މާރުކޭޓުތަކާއި، މަގުތަކާއި، ބައްދަލުވި މީހުންނާއި، އެކުގައި ކޭ ކެއުންތަކާއި، އަދި ރާއްޖޭން ބޭރުގައި އުޅޭ އުޅުން އަމިއްލަ ޤައުމާ ތަފާތުވާ ކުދިކުދި ކަންކަމާ ބެހޭގޮތުންނެވެ.
ނަމަވެސް މިހާރު، ކަންތައް ވީގޮތާ ބެހޭގޮތުން ލިޔާނެ ގޮތެއް އޭނާއަކަށް ނޭނގުނެވެ. އަމިއްލަ ހަށިގަނޑުގެ މައްޗަށް އޮތް ބާރު ކެނޑިގެން ދިޔަ އިޙުސާސް ސިފަކޮށްދޭނީ ކިހިނެއް ހެއްޔެވެ؟ ކޮންމެވެސް ގޯހެއް އުޅޭކަން އެނގި ހުރެވެސް، އެއީ ކޮން ކަމެއްކަން ދެނެގަންނަން ނޭނގުމުން ކުރެވުނު ބިރުވެރިކަން ކިޔައިދޭނީ ކިހިނެއް ހެއްޔެވެ؟ އޭނާ އަމިއްލަ ފައިމައްޗަށް ކޮޅަށް ހުރުމަށް ހަނގުރާމަ ކުރަމުން ދިޔައިރު، އެއްވެސް ކަމެއް ނުވާ ފަދައިން ނަށަމުން ދިޔަ މީހުންނާ ބެހޭގޮތުން ލިޔާނީ ކިހިނެއް ހެއްޔެވެ؟
އޭނާ ފޮތުގެ އާ ސަފުހާއެއް ހުޅުވާލިއެވެ. މިނެޓުތަކެއް ވަންދެން އޭނާ އެއްވެސް އެއްޗެއް ނުލިޔެ މަޑުކޮށްލިއެވެ. އެއަށްފަހު، މަޑުމަޑުން ލިޔަން ފެށިއެވެ.
ރޭގަނޑުގެ އެ ވަގުތަކީ އަމިއްލަ ހަށިގަނޑަށް އަންނަ ބަދަލުތަކުގެ ސަބަބުން، ތިމާގެ އަމިއްލަ ނަފްސަށް އޮންނަ އިތުބާރު ގެއްލުމުން ކުރެވޭ އިޙުސާސްތައް ކިހާ ބިރުވެރިކަން އަހަންނަށް އިޙުސާސްވި ރެޔެކެވެ.
އެ ރޭ ފެނުނު އަލިތަކާއި، އިވުނު މިއުޒިކް އަދިވެސް ހަނދާން އެބަހުއްޓެވެ. ހުރިހާ ކަމެއް އާދަޔާ ޚިލާފަށް ފުރިހަމަކަމަށް ފެނުނު ހަނދާންވެސް އެބަހުއްޓެވެ. ނަމަވެސް، އެ ފެންނަ ފެނުމަށް އިތުބާރު ނުކުރެވުނީ ކީއްވެގެންބާވައޭ އަހަރެންގެ ހިތަށް އެރި ހަނދާންވެސް އެބަހުއްޓެވެ.
ކަމެއް ގޯސްވެއްޖެކަން މީހަކަށް ކިޔައިދޭން އުޅުނު ހަނދާން ވެއެވެ. ނަމަވެސް އެކަން ރަނގަޅަށް ބުނެދޭން ނޭނގުމުން ކުރެވުނު ލަދުވެތި އިޙުސާސްތައްވެސް ހަނދާން އެބަހުއްޓެވެ. އަހަރެން ބުނާ ވާހަކަ އެކަކުވެސް ޤަބޫލުނުކޮށްފާނެތީ އެކަމާ ބިރުގަތް ހަނދާންވެސް ވެއެވެ.
އޭނާ ގަލަން ކަރުދާހުގައި ޖައްސާލައިގެން އިރުކޮޅަކު މަޑުކޮށްލުމަށްފަހު އަލުން ލިޔަން ފެށިއެވެ.
އަހަންނަށް އެރޭވީ ގޮތެއް އަދިވެސް ނޭނގެއެވެ. މީހަކު ގަސްތުގައި އަހަރެންގެ ބުއިމަށް އެއްޗެއް އެއްކުރީ ކަމެއްވެސް ނޭނގެއެވެ. އެހެންކަމުން ހެއްކެއް ނެތި އެއްވެސް މީހަކަށް އަހަރެން ތުހުމަތެއް ނުކުރާނަމެވެ. އެކަމަކު އަހަންނަށް އެ ކުރެވުނު އިޙުސާސްތަކަށް މަގުފަހިވާނެ ފަދަ އެއްވެސް އެއްޗެއް އަހަރެން ގަސްތުގައި ބޭނުންކޮށްފައި ނުވާނެކަން ޔަގީނެވެ.
އަހަރެން އެންމެ ބިރުގަންނަނީ އެއީ ހާދަ އާދައިގެ ރޭގަނޑެއްގެ ގޮތުގައި ފެށުނު ރެޔަކަށް ވީތީއެވެ. އަހަރެން ބޭރަށް ދިޔައީ ރައްޓެހިންނާ އެކުގައެވެ. އުންމީދު ކުރީ މިއުޒިކާއި، ވާހަކަދެއްކުމާއި، ހިނިތުންވުމާއި، ނެށުމުގެ ވަގުތުކޮޅަކަށެވެ. އަމިއްލަ ހަށިގަނޑަށް ވީގޮތެއް ނޭނގި، މުޅި ރޭ އެކަމާ ހާސްވެ ކަންބޮޑުވުމުގައި ހޭދަކުރަން ޖެހިދާނެ ކަމަކަށް ދުވަހަކުވެސް ހީއެއް ނުކުރަމެވެ.
އަހަރެމެން ނުރައްކަލާ ބެހޭގޮތުން ވާހަކަދައްކާއިރު، އެއީ ހަމައެކަނި އަހަރެމެން ނުދާ ތަންތަނުގައި ނުވަތަ އަހަރެމެންނާ ގުޅުމެއް ނެތް ބައެއްގެ ފަރާތުން ދިމާވާ ކަމެއް ކަމަށް ހީކުރެވެއެވެ. ގޯސް ކަންތައްތައް ކުރިމަތިވުމުގެ ކުރިން އެކަމުގެ އިންޒާރު ލިބޭނެ ކަމަށާއި، ވަގުތު ފާއިތުވުމުގެ ކުރިން އެކަން ދެނެގަނެވޭނެ ކަމަށް އަހަރެމެން ގަބޫލުކުރަމެވެ.
ނަމަވެސް ބައެއް ފަހަރު، އެންމެ ބިރުވެރި ހާދިސާތައް ފެށެނީ ވަރަށް އާދައިގެ ވަގުތުތަކުގައެވެ. ހީނސަމާސާކޮށް، މަޖާކޮށް، އުފަލުގައި އުޅޭ މީހުންގެ ތެރޭގައި ހުއްޓައެވެ.
އޭނާގެ އަތް ކުޑަކޮށް ތުރުތުރުލަމުން ދިޔައެވެ. އޭނާ ގަލަން ބޭއްވިއެވެ. ސްރީލަންކާއަށް އައި ފަހުން، ވަޝިއްޔާ އޭނާގެ ތަޖުރިބާ މީހަކަށް ކިޔައިދޭ ވާހަކައަކަށް ހަދާކަށް ބޭނުމެއް ނުވިއެވެ. އޭނާ ބޭނުންވީ އެކަން އަމިއްލައަށް ދެނެގަންނާށެވެ. އެއްވެސް މީހެއްގެ މަޖުބޫރުކަމެއް ނެތި، އަމިއްލަ މިނިވަންކަމާއެކު އެ ހާދިސާއިން އަރައިގަންނާށެވެ.
“ދެން އެކަން ހަނދާން ނައްތާލާށޭ” މީހަކު ބުނުމުގެ ކުރިން، އަލުން އަމާންކަން އިޙުސާސްކުރަން އޭނާ ބޭނުންވިއެވެ. އަދި އޭނާ ބޭނުންވީ ހަޤީޤަތެވެ. އެއީ ކޮންމެ ފަދަ ހަޤީޤަތަކަށް ވިޔަސްމެއެވެ.
*****
އެރޭ މިރުޒާ އޭނާގެ އެޕާޓްމަންޓަށް އެނބުރި ދިޔަ ނަމަވެސް، ނިދުމަކީ އޭނާއަށް ފަސޭހަ ކަމަކަށް ނުވިއެވެ. ކުޑަދޮރު ކައިރީގައި އިށީނދެލައިގެން، ސިޓީގެ އަލިތަކަށް ބަލަން އިނދެ، އޭނާ ވިސްނަމުން ދިޔައީ ކުއްލިއަކަށް އޭނާގެ ދިރިއުޅުމުގެ ތެރެއަށް އައި އެ އަންހެން ކުއްޖާއާ މެދުގައެވެ.
މީގެ ހަފުތާތަކެއް ކުރިން މީހުން ގިނަ ކްލަބެއްގެ ތެރެއިން އޭނާ ފެނުނު ހަނދާން މިރުޒާ އާވިއެވެ. އެހެން މީހުންގެ ސަމާލުކަން ހޯދުމުގެ ބަދަލުގައި، ވަށައިގެންވާ ކަންކަމަށް ޝައުޤުވެރިކަމާއެކު ބަލަން ހުރި އޭނާގެ އެ ބޮޑު ދެލޯ މިރުޒާގެ ހަނދާނުން ފިލައި ނުދެއެވެ. އެކުގައި ފުރަތަމަ ދެއްކި ވާހަކަތަކާއި، ސައިބޯން ތިބި ހަވީރުތަކާއި، އޭނާ ބަލިކޮށްލުމުގެ ނިޔަތެއް ނެތި އޭނާގެ ޖަވާބުތަކަށް ވަޝިއްޔާ ކުރިމަތިކުރި ގޮންޖެހުންތައް މިރުޒާ ހަނދާން ކުރިއެވެ.
ރޭގައި ވަޝިއްޔާގެ ދެލޮލުން ހާސްކަން ފެނުމުގެ ކުރިން، ނެށުމުގެ ތެރޭގައި އޭނާ ހީނލި ގޮތްވެސް މިރުޒާ ހަނދާން ހުއްޓެވެ. އަދި ކަން ވަމުންދާ ގޮތް އޮޅުންނުފިލައިގެން އޭނާ މިރުޒާގެ އެހީތެރިކަމަށް އެދުނު ގޮތް އަބަދުވެސް އޭނާގެ ހަނދާނުގައި ހުންނާނެއެވެ.
(ނުނިމޭ)
