އިންޑިއާގެ ޓީވީ ތާރީޚުގައި އެންމެ ބޮޑު މަޤްބޫލުކަމެއް ހޯދި ކްރައިމް ސީރީޒް “ސީއައިޑީ” އާއި ބިރުވެރި ސިލްސިލާ “އާހަޓް” އުފެއްދި ތަޖުރިބާކާރު ޕްރޮޑިއުސަރު އަދި ޑައިރެކްޓަރު ބްރިޖެންދުރަ ޕާލް ސިންގް (ބީ.ޕީ ސިންގް) އުމުރުން 77 އަހަރުގައި މަރުވެއްޖެއެވެ. މިމަހު 27 ވަނަ ދުވަހު އޭނާ މަރުވީ ކުއްލިއަކަށް ޖެހުނު ވަރުގަދަ ހާޓްއެޓޭކަކާ ގުޅިގެންނެވެ.
އިންޑިއާގެ ޓީވީ އިންޑަސްޓްރީއަށް ބޮޑެތި އިންގިލާބީ ބަދަލުތަކެއް ގެނެސްދިން ބީ.ޕީ ސިންގް މަރުވި ޚަބަރު ހިއްސާކުރަމުން، މަޝްހޫރު ފިލްމްމޭކަރު އަޝޯކް ޕަންޑިތު އިންސްޓަގްރާމްގައި ބުނީ، މިއަދު (27 އޮކްޓޫބަރު 2026)ގެ ހެނދުނުގެ ވަގުތެއްގައި ހާޓްއެޓޭކެއް ޖެހިގެން ބީ.ޕީ ސިންގް ވަކިވެދިޔަ ޚަބަރު އެހީ ވަރަށް ފުން ހިތާމައާއެކު ކަމަށެވެ. އަދި އޭނާއަކީ ކުޅަދާނަ ފިލްމްމޭކަރެއްގެ އިތުރުން ވަރަށް ގާތް ރަހުމަތްތެރިއެއް ކަމަށްވެސް އަޝޯކް ފާހަގަކުރިއެވެ.
އިންޑިއަން ފިލްމް އެންޑް ޓެލެވިޜަން ޑައިރެކްޓާސް އެސޯސިއޭޝަން (އައިއެފްޓީޑީއޭ) ގެ ރައީސްކަންވެސް ކުރިން ކުރައްވާފައިވާ ބީ.ޕީ ސިންގްގެ ހަނދާންތައް އައުކުރަމުން އަޝޯކް ބުނީ، “ސީއައިޑީ” އަދި “އާހަޓް” ފަދަ ޕްރޮގްރާމްތަކުން އޭނާ މުޅި ޤައުމުގެ ސަމާލުކަން ހޯދި ކަމަށާއި، އޭނާގެ މަސައްކަތްތަކަކީ އަންނަން އޮތް ޖީލުތަކަށްވެސް ނަމޫނާއަކަށް ވާނެ މަސައްކަތްތަކެއް ކަމަށެވެ. އަދި ސިންގްގެ އާއިލާއަށް އަޝޯކް ވަނީ ތައުޒިޔާ ފޮނުވާފައެވެ.
އިންޑިއާގެ ޓީވީ ސްކްރީންތަކުގައި އެންމެ ގިނަ ދުވަސްވީ އެއް ޝޯ ކަމަށްވާ “ސީއައިޑީ” އަކީ ބީ.ޕީ ސިންގްގެ އެންމެ ފާހަގަކޮށްލެވޭ މަސައްކަތެވެ. އޭނާ ވަނީ މި ސިލްސިލާ ޑައިރެކްޓްކޮށް ޕްރޮޑިއުސް ކުރުމުގެ އިތުރުން، ޑީސީޕީ ޝަމްޝޭރް ސިންގް ޗިޓްރޯލޭގެ ރޯލުން ފެނިގެން ގޮސް ބެލުންތެރިންގެ ބޮޑު މަޤްބޫލުކަމެއްވެސް ހޯދާފައެވެ.
ބީ.ޕީ ސިންގް ވަކިވެދިޔުމަކީ އިންޑިއާގެ މުނިފޫހިފިލުވުމުގެ ދާއިރާއަށް ލިބުނު ފޫނުބެއްދޭވަރުގެ ބޮޑު ގެއްލުމެކެވެ.
