މީހަކުދެކެ ލޯބިވެވިދާނެއެވެ. ނަމަވެސް، ކައިވެންޏަކީ މުޅި އާއިލާއަކާ ގުޅުން ބަދަހިކޮށްދޭ ކަމެކެވެ. އަދި އެ ގުޅުމަކީ ދިރިއުޅުމުގެ ހުރިހާ ކަމަކަށް އޭގެ އަސަރު ފޯރުވާނޭ ކަމެކެވެ.

ތިމާ ލޯބިވާ މީހަކާ ކައިވެނިކުރުމަކީ ނިޢުމަތެކެވެ. ނަމަވެސް، އިޙްތިރާމާއި، ޤަބޫލުކުރުމާއި، ހެޔޮހިތުން މަރުޙަބާ ކިޔާ އާއިލާއަކާ ގުޅުމަކީ ލިބޭނޭ މާ ބޮޑު ނަސީބެކެވެ.

ކައިވެންޏަކީ ހަމައެކަނި ދެމީހަކު ވަޢުދުތަކެއްވެ، އައު ދިރިއުޅުމެއް ފެށުމެއް ނޫނެވެ. ޚާއްސަކޮށް ދިވެހި މުޖުތަމަޢުގައި، މީގެ މާނައަކީ އަނެކާގެ އާއިލާގެ އާދަކާދަތަކާއި، އުުންމީދުތަކާއި، އަދި އާއިލީ ގުޅުންތަކުގެ ބަޔަކަށް ވުމެވެ. ބައެއް ފަހަރު، މި ބަދަލަކީ ހީކުރާ ވަރަށްވުރެ ގޮންޖެހުން ބޮޑު ކަމަކަށް ވެދެއެވެ.

ބައެއް މީހުންނަށް ދެފަރާތުގެ އާއިލާއަކީ އެހީތެރިކަމާއި އޯގާތެރިކަން ފޯރުކޮށްދޭ ދެވަނަ އާއިލާއެކެވެ. ނަމަވެސް އަނެއްބަޔަކަށް، އާއިލާއަކާ ގުޅުމަކީ މުޅި އުމުރަށް ދެމިގެންދާ އިމްތިޙާނެއްގައި ބައިވެރިވުން ކަހަލަ ކަމެކެވެ. ކޮންމެ ނިންމުމަކަށް ސުވާލު އުފައްދައި، ކޮންމެ ޚިޔާލުތަފާތުވުމަކީ އާއިލީ ސިޔާސީ ކަމަކަށް ހަދައި، ގޭތެރޭގެ ކުދިކުދި ކަންތައްތަކަކީ މުޅި ރަށުތެރޭގައި ދެކެވޭ ޚަބަރަކަށް ވެގެންދެއެވެ.

ޤަބޫލުކުރަންޖެހޭ ހަޤީޤަތަކީ، ކައިވެންޏަކީ އަމިއްލަ ޒާތުގައިވެސް ދަސްކުރަންޖެހޭ ގިނަ ކަންތައްތަކެއް ހިމެނޭ ކަމެކެވެ. އެއީ އާއިލީ ސިޔާސީ ކުޅިވަރުތަކުގެ ތެރެއަށް ވަންނަންޖެހޭ ސަބަބަކަށް ވެގެންނުވާނެއެވެ.

ލޯތްބަކީ މުބާރާތެއް ނޫން

ކައިވެނީގެ އެންމެ ނާޒުކު އެއް ގުޅުމަކީ ފިރިމީހާއާއި، އޭނާގެ މައިންބަފައިންނާއި، އަދި އަނބިމީހާއާ ދެމެދު އޮންނަ ގުޅުމެވެ.

ދަރިފުޅު އަމިއްލަ ދިރިއުޅުމެއް ފަށައިގަންނައިރު، އެކަމަށް ހޭނުމަށް މަންމައަކަށް ވަގުތު ބޭނުންވުމަކީ ޤަބޫލުކުރެވޭ ކަމެކެވެ. ހަމައެފަދައިން، ފިރިމީހާގެ ދިރިއުޅުމުގައި އަނބިމީހާއަށް ޚާއްސަ އަދި ރައްކާތެރި މަޤާމެއް އޮތްކަމުގެ އިތުބާރު އަނބިމީހާއަށް ބޭނުންވާނެއެވެ.

އަނބިމީހާއަކީ މަންމަގެ ބަދަލުގައި އަންނަ މީހެއް ނޫނެވެ. އަދި މަންމައަކީ ދަރިފުޅުގެ އަނބިމީހާއާ ވާދަވެރިވާންޖެހޭ މީހެއްވެސް ނޫނެވެ. ލޯތްބަކީ ބަހާލުމުން ހުސްވާނޭ އެއްޗެއް ނޫނެވެ.

ހަރުދަނާ އާއިލާއަކުން ޤަބޫލުކުރާނީ، ފިރިއަކަށް އޭނާގެ އަނބިމީހާއަށް ވަފާތެރިވާ ހާލު، މައިންބަފައިންނަށް ކަމޭހިތާ ހެޔޮލަފާ ދަރިއެއްގެ ގޮތުގައި ދެމިހުރެވޭނެ ކަމެވެ. އޭނާގެ މަސްއޫލިއްޔަތަކީ އެއް ގުޅުން އިޚްތިޔާރުކޮށް އަނެއް ގުޅުން ދޫކޮށްލުމެއް ނޫނެވެ. އޭގެ ބަދަލުގައި، އެންމެންނަށް އިންސާފުން ކަންތައްކޮށް، ބޭރުގެ ނުފޫޒުތަކުން ކައިވެނި ރައްކާތެރިކުރުމެވެ.

އާދަކާދައަކީ އިޙްތިރާމް ކުޑަކުރުމަށް އޮތް އުޒުރަކަށް ވެގެން ނުވާނެ

ރާއްޖޭގެ ރަށްފުށުގެ މުޖުތަމަޢުތަކުގައި އާއިލީ ގުޅުންތަކަކީ ވަރަށް ވަރުގަދަ ގުޅުންތަކެކެވެ. ތިމާގެ މީހުންނަކީ އަވަށްޓެރިންނެވެ. ބައްދަލުވުންތައް ގިނައެވެ. އަދި ގޭތެރޭގެ ސިއްރުތައް ދަތުރުކުރާލެއް ބައެއް ފަހަރު ފެރީއަށްވުރެވެސް އަވަހެވެ.

މުސްކުޅިންނަށް އިޙްތިރާމްކުރުމާއި، އާއިލީ ގުޅުން ދެމެހެއްޓުމާއި، ތިމާގެ މީހުންނަށް އެހީތެރިވުމަކީ ދަމަހައްޓަންޖެހޭ ރީތި އާދަކާދަތަކެވެ. ނަމަވެސް، އާދަކާދައަށް އިޙްތިރާމްކުރުމާއި، އާދަކާދައިގެ ނަމުގައި ނުޙައްޤު ކަންކަން މަޖުބޫރުކުރުވުމާ ދެމެދު ތަފާތެއްވެއެވެ.

ތިބާ ކައިވެނި ކުރި މީހަކީ އުޖޫރައެއްނެތި މަސައްކަތްކުރަން ގެންނަ މީހެއް ނޫނެވެ. އޭނާއަކީ ރަނގަޅު އަނތްބެއްކަން ސާބިތުކޮށްދިނުމަށްޓަކައި، އޭނާގެ އަމިއްލަ މިނިވަންކަމާއި، އަމިއްލަވަންތަކަން ނުވަތަ އަމިއްލަ އާއިލާއާ އޮންނަ ގުޅުން ޤުރުބާންކުރަން ޖެހިގެން ނުވާނެއެވެ.

ހަމައެފަދައިން، ކައިވެނިކޮށްގެން އަންނަ މީހާވެސް ޤަބޫލުކުރަން ޖެހޭނީ އޭނާ އެ ގުޅެނީ އަމިއްލަ މިޒާޖަކާއި ދިރިއުޅުމެއް އޮތް، އިޙްސާސްތަކެއް ހުރި އާއިލާއަކާ ކަމެވެ. އިޙްތިރާމާއި އޯގާތެރިކަމަކީ ދެފަރާތުންވެސް އޮންނަން ޖެހޭނޭ ކަމެކެވެ. ހަނދާން ބަހައްޓަންޖެހޭ ކަމަކީ، ތިމާގެ އާއިލާއާ ގުޅުނު އަންހެނަކީވެސް ކޮންމެވެސް ބައެއްގެ ލޯބިވާ ދަރިއެއް ކަމެވެ.

އިސްލާމްދީނުގައި މިކަމަށް އޮތީ ކޮން ގޮތެއް؟

އިސްލާމްދީނުގައި ކައިވެންޏަށާއި، އޯގާތެރިކަމަށާއި، އާއިލީ ގުޅުންތަކަށާއި، އަދި އެކަކު އަނެކަކަށް އަދާކުރަންޖެހޭ މަސްއޫލިއްޔަތުތަކަށް ވަރަށް ބޮޑު އަހައްމިއްޔަތެއް ދީފައިވެއެވެ.

ސޫރަތުއް ނިސާގެ 19 ވަނަ އާޔަތުގައި ﷲ ތަޢާލާ ވަނީ އަނބިންނާއެކު ހެޔޮގޮތުގައި އަދި އޯގާތެރިކަމާއެކު ދިރިއުޅުމަށް ފިރިންނަށް އަމުރުކުރައްވާފައެވެ. މީހުންގެ ތެރެއިން އެންމެ ހެޔޮ މީހަކީ އެމީހެއްގެ އާއިލާއަށް އެންމެ ހެޔޮ މީހާކަމަށް އިރުޝާދު ދެއްވާފައިވެއެވެ.

މައިންބަފައިންނަށް ކަމޭހިތުމަކީ އިސްލާމީ ބޮޑު މަސްއޫލިއްޔަތެކެވެ. ނަމަވެސް އެއީ ބައިވެރިޔާއަށް އިޙްތިރާމް ކުޑަކުރުމަށް ލިބޭ ހުއްދައެއް ނޫނެވެ. ހަމައެފަދައިން، ކައިވެނި ރައްކާތެރިކުރުމަކީ މައިންބަފައިންނަށް އިޙްތިރާމް ކުޑަކުރުމަށް އޮތް ބަހަނާއެއްވެސް ނޫނެވެ.

ސަޤާފީ އުއްމީދުތަކާއި ދީނީ ވާޖިބުތަކަކީ އަބަދަކު އެއްކަމެއް ނޫނެވެ. ގޭގޭގައި ހުންނަ ކޮންމެ އާދަކާދައަކީ ދީނީ ގޮތުން ލާޒިމްކަމެއް ނޫނެވެ. އިސްލާމްދީން ބާރުއަޅަނީ އާއިލާގައި ކޮންމެ މަޤާމެއްގައި ހުރި މީހަކަށްވީނަމަވެސް، ރަޙުމާއި، އިންސާފާއި، އަދި ރީތި އަޚްލާޤަށެވެ.

ފިރިމީހާއަކީ ހަމައެކަނި ބަލަން ހުންނަންޖެހޭ މީހެއް ނޫން

އާއިލީ ހަމަޖެހުން ދެމެހެއްޓުމުގައި ފިރިމީހާގެ ދައުރު ވަރަށް ބޮޑެވެ. އޭނާއަކީ ވާހަކަދައްކައި، ރަނގަޅު އިންތަކެއް ކަނޑައަޅައި، އަދި ކުށްހީތަކުގެ ސަބަބުން އާއިލާ ރޫޅުނަނުދީ ހިފަހައްޓަންޖެހޭ މީހާއެވެ.

އަނބިމީހާއަށް ބޭއިންސާފުން ކަންތައް ކުރެވޭއިރު އޭނާ އެކަނިކޮށްލައިގެން ނުވާނެއެވެ. އަދި އަމިއްލަ މިނިވަންކަމުގެ ނަމުގައި މައިންބަފައިންނަށް އިހުމާލުވެގެންވެސް ނުވާނެއެވެ.

އިންތައް ކަނޑައެޅުމަކީ އާއިލާތައް ވަކިކުރުމަށްލާ ފާރެއް ނޫނެވެ. އެއީ އެކަކު އަނެކަކަށް އަނިޔާވެރިނުވެ، ގުޅުންތައް ދެމެހެއްޓުމަށް އެހީތެރިވެދޭ އުޞޫލުތަކެކެވެ. އަދި މިއީ ހަމައެކަނި ޅީދަރިންނަށް އޮތް ކަމެއް ނޫނެވެ. ފިރިހެންދަރިންނަށްވެސް އިޙްތިރާމާއި، ޤަބޫލުކުރުމަކީ ދެފަރާތުން އޮންނަން ޖެހޭނޭ ކަމެކެވެ.

އުފާވެރި އާއިލާއަކީ ކޮންމެ ބަހުސަކުން މޮޅުވާންޖެހޭ އާއިލާއެއް ނޫން

އާއިލާގެ ތެރޭގައި ދިމާވާ ކޮންމެ އުނދަގޫ މީހަކީ ނުބައި މީހެއް ނޫނެވެ. އަދި ކޮންމެ ޅީދަރިއަކީ އަބަދު ރަނގަޅު މީހަކަށްވެސް ނުވެދާނެއެވެ. އާއިލާއެއްގެ ތެރޭގައި ތަފާތު މިޒާޖުގެ، ތަފާތު އުމުރުގެ، އަދި ތަފާތު އުއްމީދުތައް ހުންނަ މީހުން އުޅޭނެއެވެ. ބައެއް ފަހަރު، ކެތްތެރިކަމާއި ވާހަކަދެއްކުމުން ހައްލުވާ ކަންތައްތައް، ކުށްހީތަކާއި ދޭތެރެޖެއްސުމުން ގޯސްވެގެންދެއެވެ.

ނަމަވެސް، ދުޅަހެޔޮ އާއިލާއަކުން ޤަބޫލުކުރާނޭ ހަޤީޤަތަކީ، އާއިލާގެ ތެރެއަށް އަލަށް ގުޅޭ މީހަކަށް، އޭނާގެ އަމިއްލަވަންތަކަން ނުގެއްލި، މިނިވަންކަމާއެކު އުޅެވޭނޭ ޖާގަ ދޭންޖެހޭނެ ކަމެވެ.

ފަހަރުގައި، އާއިލާއަށް މީހަކު އިތުރުވާއިރު އަހަންޖެހޭ ސުވާލަކީ، އެމީހަކީ އަހަރެމެންގެ ދަރިފުޅަށް އެކަށީގެންވާ މީހެއްތޯ ބެލުމުގެ އިތުރުން، އަހަރެމެންނަކީ އެމީހާއަށް އެކަށީގެންވާ ހެޔޮލަފާ އާއިލާއަކަށް ވެވޭނެތޯއެވެ.

ކޮންމެއަކަސް، ކައިވެންޏެއް ދެމިއޮތުމަށް ބޭނުންވަނީ އެކަކު އަނެކަކަށް އިތުބާރުކުރާ ދެ ބައިވެރިންނެވެ. ކޮންމެ ނިންމުމެއް ނިންމާއިރު މުޅި އާއިލާގެ “ކޮމިޓީއަކުން” އެކަން ބަލައި ފާސްކުރާކަށް ނުޖެހެއެވެ.

ތިމާ ލޯބިވާ މީހަކާ ކައިވެނިކުރުމަކީ ބޮޑު ނިޢުމަތެކެވެ. ނަމަވެސް، އެއްވެސް ހުރަހެއްނެތި އެ ލޯބި ކުރިފަޅައި ހެދުމަށް ފުރުސަތުދޭ އާއިލާއަކާ ގުޅުމަކީ މުޅިން ތަފާތު، މާ މަތިވެރި ނަސީބެކެވެ.