އާދައިގެ ވަހަކުން ސިކުނޑި މަސައްކަތްކުރާ ގޮތް ބަދަލުކޮށްލާފާނެ ކަމަށް ގަބޫލުކުރަން އުނދަގޫވެދާނެއެވެ. އެކަމަކު ދިރާސާކުރާ ފަރާތްތަކުން ބުނާގޮތުގައި އަހަރެމެން ކޮންމެ ދުވަހަކު ބޭނުންކުރާ އެއްޗެއްގެ ވަހުން ސިއްރުވެރި ގޮތަކަށް ސިކުނޑި ވަރުގަދަކޮށްދޭނެއެވެ. މީގެ އެންމެ ހައިރާންކުރުވަނިވި ކަމަކީ މިއީ ހޯދަން އުނދަގޫ ފަތްޕިލާވެއްޔެއް ނޫން ކަމާއި ލެބެއްގައި ތައްޔާރުކޮށްފައިވާ އެއްޗެއް ނުވަތަ އަގުބޮޑު ސަޕްލިމެންޓެއްވެސް ނޫންކަމެވެ. މިއީ އަހަރެމެންގެ ތެރެއިން ގިނަ ބަޔަކަށް ވަރަށް ގިނައިން ފެނިފައިވާ އެކަމަކު މާ ބޮޑު ސަމާލުކަމެއް ދެވިފައިނުވާ އެއްޗެކެވެ. އެއީ ފިނި ހިތްގައިމު “ކުދީނާ ފަތް (ޕެޕަމިންޓް)”ގެ ވަހެވެ! ސައިންސްވެރިން ބުނާގޮތުގައި ޕެޕަމިންޓަކީ ހަމައެކަނި މީރު ވަހެއް ހުންނަ އެއްޗެއް ނޫނެވެ. މީގެ ސަބަބުން ސިކުނޑި ހަރަކާތްތެރިކޮށްދީ ކަންކަމަށް ދޭ ސަމާލުކަން އިތުރުކޮށްދީ ހަނދާންވެސް ވަރުގަދަކޮށްދޭނެއެވެ.
* ވަހުގެ ފަހަތުގައިވާ ސައިންސްގެ ޢިލްމު
ޕެޕަމިންޓްގައި “މެންތޯލް” އަދި “މެންތޯން” ފަދަ ބައޮއެކްޓިވް މާއްދާތައް ހިމެނެއެވެ. މީގެ ވަސް ބަލާލުމުން ނޭފަތުގެ ނާރުތައް މެދުވެރިކޮށް ސިކުނޑިއަށް ބާރުދެއެވެ. މި މާއްދާތަކުގެ ސަބަބުން ހޭލުންތެރިކަމާއި ސަމާލުކަމާއި މަސައްކަތްތައް ހަނދާން ބެހެއްޓުމާ ގުޅުންހުރި ސިކުނޑީގެ ބައިތައް ހަރަކާތްތެރިކޮށްދޭނެއެވެ. ދިރާސާތަކުން ދައްކާގޮތުގައި ޕެޕަމިންޓްގެ ސަބަބުން ސިކުނޑީގެ ނިއުރޯޓްރާންސްމިޓަރުތަކަށް އަސަރުކޮށް މައުލޫމާތު އަވަހަށް ދެނެގަތުމަށް އެހީތެރިވެދޭނެއެވެ.
* ޕެޕަމިންޓްގެ ވަހުން ހަނދާން ވަރުގަދަކޮށްދީ ހޭލުންތެރިކަން އިތުރުކޮށްދޭ
ޔުނިވަރސިޓީ އޮފް ނޯތަމްބްރިއާ އިން ކުރި ދިރާސާއެއްގައި 144 މީހަކަށް ޕެޕަމިންޓްގެ ވަސް ދީގެން ސިކުނޑީގެ މަސައްކަތްތަކެއް ކުރުވިއެވެ. މީގެ ނަތީޖާއިން ދެއްކީ:
– ބައިވެރިންގެ ހަނދާން ކުރިއަށްވުރެ ރަނގަޅުވިކަން.
– އެމީހުން ކުރިއަށްވުރެ ހޭލުންތެރިވެ ކަންކަމަށް ސަމާލުކަން ދެވުނުކަން.
– ޕެޕަމިންޓްގެ ވަސް ނުލިބޭ މީހުންނާ އަޅާބަލާއިރު މައުލޫމާތު ދެނެގަތުމުގެ ދުވެލި އަވަސްވިކަން.
ޕެޕަމިންޓަކީ ހަނދާންތައް ހަމައަކަށް އަޅުވައިދޭ އެއްޗެއްގެ ގޮތުގައިވެސް ބެލެވޭ އެއްޗެކެވެ. “ރިސާޗް ގޭޓް” ގައި ޝާއިއުކޮށްފައިވާ ދިރާސާއަކުން ދައްކާގޮތުގައި ސްޓްރެސް ބޮޑު ދަނޑިވަޅެއްގައި ޕެޕަމިންޓްގެ ވަސް ބެލި މީހުންގެ މާޔޫސްކަން ކުޑަވެ ރުޅިގަދަވުން މަދުވެ އަދި އަމިއްލަ އިހުސާސްތައް ކޮންޓްރޯލް ކުރުމުގައި ބޮޑު އެހީއަކަށްވިއެވެ. މީގެ ސަބަބުން ސިކުނޑި “ރިސެޓް” ކޮށްލާ ކަހަލަ އިހުސާސެއް ކުރެވޭ ކަމަށް ގިނަ ބަޔަކު ބުނެއެވެ. މީގެއިން އެނގެނީ ޕެޕަމިންޓްގެ ސަބަބުން ކަންކަމަށް ސަމާލުކަންދީ ހަމަޖެހިގެން ހުރުމަށް އެހީތެރިވެދޭކަމެވެ.
* ހައިރާންކުރުވަނިވި ގުޅުމެއް
ފާހަގަކޮށްލެވޭ އެއް ދިރާސާއަކުން ދެއްކި ގޮތުގައި މީހަކަށް ޕެޕަމިންޓްގެ ވަސް ދެނެގަނެވޭ މިންވަރުން އެމީހެއްގެ ސިކުނޑީގެ މުސްތަގުބަލު އަންދާޒާ ކުރެވޭނެއެވެ. ދިގު މުއްދަތަކަށް ކުރި ދިރާސާއަކުން ދެއްކި ގޮތުގައި ޕެޕަމިންޓްގެ ވަސް ވަކިކުރަން ނޭނގޭ މީހުންނަށް ކުރިއަށް އޮތް އަހަރުތަކުގައި ހަނދާން ބަލިވުމުގެ ބަލި (ޑިމެންޝިއާ) ޖެހުމުގެ ފުރުސަތު ބޮޑެވެ. ތަފާތު އެކި ވަސްތައް ޓެސްޓު ކުރިއިރު ސިކުނޑީގެ ހަނދާން ބަޔާއި މަސައްކަތްތައް ހުރީ ރަނގަޅަށްތޯ ބެލުމަށް އެންމެ ބޮޑު އެހީއަކަށްވީ ޕެޕަމިންޓްގެ ވަހެވެ.
* ސަމާލުކަން އިތުރުކުރުމަށް ޕެޕަމިންޓް ބޭނުންކުރާނެ ގޮތް
ޕެޕަމިންޓަކީ އާންމު ދިރިއުޅުމުގައި ބޭނުންކޮށްލަން ވަރަށް ފަސޭހަ އެއްޗެކެވެ. ކުޑަ މިންވަރަކުންވެސް ސިކުނޑި ސާފުކޮށްދޭނެއެވެ.
– “ޑިފިއުޒަރ” އެއް ބޭނުންކޮށްގެން ޕެޕަމިންޓް އެސެންޝަލް އޮއިލްގެ ތިކިފޮދެއް ޖަހާލައިގެން މުޅި މާހައުލު ތާޒާކޮށްލެވޭނެއެވެ. (މޫނާ މާ ކައިރީގައި ޑިފިއުޒަރ ނުބަހައްޓާށެވެ).
– ހޫނު ޕެޕަމިންޓް ސައި ތައްޓަކުންވެސް ސަމާލުކަން އިތުރުކޮށްދޭނެއެވެ. އެކަމަކު މާ ގިނައިން ބޭނުން ނުކުރުމަށް ސަމާލުކަންދޭން ވާނެއެވެ.
މިއީ އާންމުކޮށް ރައްކާތެރި އެއްޗެއް ނަމަވެސް ހަންގަނޑު ނާޒުކު މީހުންނާއި އެސިޑް ރިފްލަކްސް ނުވަތަ އެލާޖީ ހުންނަ މީހުން މީގެ ބޭނުންކުރުމުގައި ސަމާލުވާންވާނެއެވެ.
