ވޯލްޑް ކަޕްގެ ގަދަ 16 ގެ ބުރުގައި ވާދަވެރި ސްޕެއިން އާއި ޕޯޗުގަލް ބައްދަލުކުރާ ފޯރިގަދަ މެޗާއެކު، މުބާރާތުގެ ފޯރިގަދަވެ “އަސްލު ވޯލްޑް ކަޕް” މިހާރު ފެށުނީ ކަމަށް ގިނަ ބަޔަކު ދެކެން ފަށައިފިއެވެ.
ޓެކްސަސްގައި ހޯމަ ދުވަހު ކުޅުމަށް ހަމަޖެހިފައިވާ މި މެޗަކީ މުބާރާތުގެ ކުއާޓާ ފައިނަލުން ޖާގައެއް ހޯދުމުގެ އިތުރުން، ޕޯޗުގަލްގެ ތަރި ކްރިސްޓިއާނޯ ރޮނާލްޑޯގެ ބައިނަލްއަގުވާމީ ކެރިއަރުގެ ކުރިމަގު ވެސް ކަނޑައެޅިގެންދާނެ މުހިންމު ކުރިމަތިލުމެކެވެ. އެމެރިކާގެ އެން.އެފް.އެލް ޓީމެއް ކަމަށްވާ “ޑަލަަސް ކައުބޯއީސް”ގެ އެއާކޮންޑިޝަން ކުރެވިފައިވާ ޒަމާނީ ދަނޑުގައި ކުޅޭ މި މެޗަކީ ގަދަ 16ގެ ބުރުގައި އެންމެ ފާހަގަކޮށްލެވޭ އަދި އުތުރު އެމެރިކާގައި މިވަގުތު ތިބި އެންމެ ހުނަރުވެރި ދެ ޓީމުގެ ކުރިމަތިލުމެކެވެ.
ޔޫރަޕްގެ ޗެމްޕިއަން ސްޕެއިން ވަނީ ފުރަތަމަ ނޮކްއައުޓް ބުރުގައި އޮސްޓްރިއާގެ މައްޗަށް 3-0 އިން ކުރިހޯދައި، އެ ޓީމުގެ ނުރައްކާތެރިކަން ދައްކާލާފައެވެ. ލޮސް އެންޖެލިސްގައި ކުޅުނު މި މެޗުގައި މިކޭލް އޮޔަރްޒަބަލް ޖެހި ދެ ލަނޑާއި ޕެޑްރޯ ޕޯރޯގެ ބޮލުން ކާމިޔާބުކުރި ލަނޑާއެކު ސްޕެއިން ފެނުނީ ވަރަށް ވަރުގަދަކޮށެވެ. މުބާރާތުގެ ފުރަތަމަ މެޗުގައި ކޭޕް ވާޑްއާ ވާދަކޮށް 0-0 އިން އެއްވަރުވި ނަމަވެސް، އޮސްޓްރިއާ އަތުން ހޯދި މޮޅާއެކު ސްޕެއިން އަކީ މުބާރާތުގެ ތަށި އުފުލާލެވޭނެ ފަދަ ވަރުގަދަ ޓީމެއްކަން މިހާރު ވަނީ ސާބިތުކޮށްދީފައެވެ.
ސްޕެއިންގެ ކޯޗު ލުއިސް ޑެ ލަ ފުއެންޓޭ ބުނި ގޮތުގައި އެ ޓީމުން ކުޅުނީ ވަރަށް ފުރިހަމަ މެޗެކެވެ. ނަމަވެސް، އޭނާ ވަނީ ސްޕެއިންގެ ޓީމު އަދިވެސް އިތުރަށް ކުރިއަރައި ވަރުގަދަވާނެ ކަމުގެ އިންޒާރު އެހެން ޓީމުތަކަށް ދީފައެވެ.
“އަހަރެމެން ގަބޫލުކުރަނީ އަދިވެސް އިތުރަށް ރަނގަޅު ކުރެވޭނެ ކަމަށް،” މީގެ ދެ އަހަރު ކުރިން ސްޕެއިން އަށް ޔޫރޯ ކާމިޔާބުކޮށްދިން ކޯޗު ބުންޏެވެ.
މި މެޗުގައި އެންމެ ފާހަގަކޮށްލެވުނީ ބާސެލޯނާގެ އުމުރުން 18 އަހަރުގެ ތަރި ލަމީން ޔަމާލްގެ ކުޅުމެވެ. އަނިޔާއިން ސަލާމަތްވެ، މުބާރާތުގައި އޭނާ ކުޅުނު އެންމެ ދިގު މެޗަށް ފަހު ޔަމާލް ބުނީ، “އަހަރެމެން އެއްވެސް ޓީމެއް ދެކެ ބިރެއް ނުގަނޭ. ވޯލްޑް ކަޕް މިހާރު މި ފެށުނީ،” ކަމަށެވެ.
އަނެއްކޮޅުން، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ހުރީ އޭނާގެ ފަހު ވޯލްޑް ކަޕްގައި ތަފާތު ދައްކަން ތައްޔާރަށެވެ. އުމުރުން 41 އަހަރުގެ ރޮނާލްޑޯ ވަނީ އުޒްބެކިސްތާނާ ދެކޮޅަށް ކުޅުނު މެޗުގައި ދެ ލަނޑު ޖަހައި، އޭނާގެ ފެންވަރާ މެދު ސުވާލު އުފެއްދި މީހުންނަށް ރައްދު ދީފައެވެ.
“އަހަރެން އަދިވެސް މިހުރީ ގަދަކޮށް،” ރޮނާލްޑޯ ބުންޏެވެ.
ޕޯޗުގަލް ގަދަ 16 އަށް ދަތުރުކުރީ ކްރޮއޭޝިއާ 2-1 އިން ބަލިކުރުމަށްފަހުއެވެ. އެ މެޗުގައި ރޮނާލްޑޯ ބަދަލުކުރި ނަމަވެސް، ބަދަލުގައި އެރި ގޮންސާލޯ ރާމޯސް ވަނީ ފަހު ވަގުތު މޮޅުވި ލަނޑު ޖަހައިދީފައެވެ. މިއާއެކު ކޯޗު ރޮބާޓޯ މާޓިނޭޒް އަށް ވަނީ ރޮނާލްޑޯ އާއި ރާމޯސް ބޭނުންކުރުމާ ބެހޭގޮތުން ގިނަ ސުވާލުތަކެއް ކުރިމަތިވެފައެވެ. އެހެންނަމަވެސް، ސްޕެއިންއާ ދެކޮޅަށް ރޮނާލްޑޯ ފުރަތަމަ އެގާރައިގައި ހިމެނޭނެ ކަމަށް ބެލެވެއެވެ.
ޕޯޗުގަލްގެ ކޯޗު މާޓިނޭޒް ބުނި ގޮތުގައި ސްޕެއިން އަކީ ވަރަށް ވަރުގަދަ ޓީމެއް ނަމަވެސް، ޕޯޗުގަލް އަށް ސްޕެއިންގެ ކުޅުން ވަރަށް ރަނގަޅަށް އެނގެއެވެ. ދެ ޓީމުގެ ތާރީޚަށް ބަލާއިރު، 2025 ވަނަ އަހަރުގެ ނޭޝަންސް ލީގުގައި މި ދެ ޓީމު ވާދަކުރި މެޗުތަކުގައި ޕޯޗުގަލް އިން ވަނީ ރަނގަޅު ނަތީޖާތަކެއް ހޯދާފައެވެ. މާޓިނޭޒް ސިފަކުރި ގޮތުގައި މިއީ ދެ ޓީމުން ވެސް ލަނޑު ޖެހުމަށް މަސައްކަތްކުރާނެ، ބަލާލަން ރީތި ފޯރިގަދަ މެޗަކަށް ވާނެއެވެ.
