ޕާކިސްތާނުގެ މަޝްހޫރު ޓީވީ ޗެނަލް، ހަމް ޓީވީން ގެނެސްދޭ އާ ޑްރާމާ ސިލްސިލާ “ބޮމްބޭ ޓެއިލާސް” މިރޭ ދައްކަން ފަށާނެއެވެ. ރޮމެންޓިކް ކޮމެޑީ އަދި ޑްރާމާގެ މައްޗަށް ބިނާކޮށް އުފައްދާފައިވާ މި ސިލްސިލާއަކީ އިންސާނާގެ ހުވަފެންތަކާއި، ނަސީބާއި، ލޯބީގެ ކަންތައްތައް ދިމާވާގޮތުގެ މައްޗަށް ބިނާކޮށް ތައްޔާރުކޮށްފައިވާ އުފެއްދުމެކެވެ.
މި ޑްރާމާ ދެއްކުމަށް ހަމަޖެހިފައިވަނީ ކޮންމެ ހަފުތާއެއްގެ ހޯމަ އަދި އަންގާރަ ދުވަހުގެ ރޭ ރާއްޖެ ގަޑިން 8:00 ގައެވެ. މި ސިލްސިލާއަކީ މޫމަލް ޕްރޮޑަކްޝަންސް އާއި އެމް.ޑީ ޕްރޮޑަކްޝަންސް (މޫމިނާ ދުރައިދު ޕްރޮޑަކްޝަން) ގުޅިގެން އުފައްދާފައިވާ މަސައްކަތެކެވެ. މި ޑްރާމާގެ ޑައިރެކްޓަރަކީ މަޒްހަރު މުއީން ކަމަށްވާއިރު، ސްކްރިޕްޓް ލިޔެފައިވަނީ އަމްތުލް ޝާހިދާއެވެ.
“ބޮމްބޭ ޓެއިލާސް” ގެ ވާހަކަ ބިނާވެފައިވަނީ ސައިފް އަދި މަހްރޫޚްގެ އިޙުސާސްތަކާއި ދިރިއުޅުމުގެ ދަތުރުގެ މައްޗަށެވެ. މީގެ ތެރެއިން ސައިފްގެ ކެރެކްޓާއިން ފެންނާނީ އާއިލީ ޒިންމާތަކާއި އުއްމީދުތަކުގެ ސަބަބުން އޭނާ ބޭނުންވާ ދާއިރާއިން ކުރިއަށް ނުދެވި، އާއިލީ ފަހާ ފިހާރައިގައި މަސައްކަތްކުރަން ޖެހުމުން ކުރިމަތިވާ ގޮންޖެހުންތަކެވެ. އަދި އާއިލާއިން މަޖުބޫރުކޮށްގެން ކުރަން އުޅޭ ކައިވެންޏާއި، އަމިއްލަ އުފަލާއި ލޯބި ހޯދުމަށް ކުރާ މަސައްކަތްތައް މި ޑްރާމާއިން ފެނިގެންދާނެއެވެ.
މި ސިލްސިލާގެ މައިގަނޑު ރޯލުތަކުން ފެނިގެންދާނީ އަލީ އަންސާރީ، އަނީކާ ޒުލްފިގާރު، އަލީ ސަފީނާ އަދި އަލީޒާ އީޖާޒްއެވެ. މި ޑްރާމާ އަކީ ޒުވާނުންގެ އުއްމީދުތަކާއި އާއިލީ ނިންމުންތަކުގެ މެދުގައި އޮންނަ ފުށުއެރުންތައް ވަރަށް ފުރިހަމައަށް ދައްކުވައިދޭނެ އުފެއްދުމެއް ކަމަށް ބެލެވެއެވެ.
