ބޮލީވުޑްގެ މަޝްހޫރު އެކްޓަރު ހަރްޝްވަރުދަން ރާނޭ އަކީ އަބަދުވެސް މީހުން ހައިރާންކޮށްލާ ފަދަ ޓްރެންޑްތަކަށްވުރެ ބޮޑަށް، އަމިއްލަ ނަފްސަށް ފަސޭހަ އަދި ސާދާ ހެދުން އެޅުމުގެ ވައްޓަފާޅިއަކަށް ލޯބިކުރާ ތަރިއެކެވެ. ނަމަވެސް، ފިރިހެނުންގެ ގަހަނާގެ ބްރޭންޑަކާ ގުޅިގެން ދާދިފަހުން އޭނާ ދެއްކި ވާހަކަތަކުން މިވަނީ ގަހަނާއާމެދު އޭނާ ދެކޭގޮތް ތަފާތުކަން ހާމަވެފައެވެ.
އިންޑިއާގައި މިހާރު ހިނގަމުންދާ އީދު އަދި ފެސްޓިވަލް ދުވަސްވަރާ ގުޅުވައިގެން، ގަހަނާއަށް އިންވެސްޓް ކުރަންތޯ ކުރެވުނު ސުވާލަކަށް ޖަވާބު ދެމުން ހަރްޝްވަރުދަން ބުނީ، އޭނާ އިންވެސްޓް ކުރަނީ ގަހަނާއަށް ނޫން ކަމަށާއި، އިންވެސްޓް ކުރަނީ އިންސާނީ ގުޅުންތަކަށް ކަމަށެވެ. އަދި އޭނާގެ ހަޔާތުގައި އެންމެ މުހިންމު އެންމެ އަގުބޮޑު “ގަހަނާ” އަކީ އެއީ ކަމަށް ހިނިތުންވުމާއެކު އޭނާ ފާހަގަކުރިއެވެ.
މީގެ އިތުރުން، އޭނާގެ ސަޕޯޓަރުންނަށް ދެވުނު އެންމެ ރޮމޭންޓިކް “ގަހަނާ” އަކީ އޭނާގެ މަޤުބޫލު ފިލްމު “ސަނަމް ތޭރީ ކަސަމް” އަލުން ސިނަމާތަކަށް ގެނައުމާއި “އޭކް ދީވާނޭ ކީ ދީވާނިޔަތު” ކަމަށް ވެސް ހަރްޝްވަރުދަން ބުންޏެވެ.
ގަހަނާއާ ބެހޭގޮތުން ވާހަކަ ދައްކަމުން ހަރްޝްވަރުދަން ބުނީ، އޭނާގެ ވިސްނުމުގައި ގަހަނާ ގުޅިފައިވަނީ ޒަމާނީ ފެޝަނަށްވުރެ ބޮޑަށް ތާރީޚީ “ގްލެޑިއޭޓަރުން” ގެ ޒަމާނާ ކަމަށެވެ. އެ ޒަމާނުގައި އެމީހުން ބޭނުންކުރި ބޮޑެތި މެޓަލްތަކަކީ އެމީހުންގެ ޝުޢޫރުތައް ފާޅުކުރުމަށް އެޅި ގަހަނާ ކަމަށާއި، ނަމަވެސް މިހާރު މުމްބާއީގެ ހޫނުގަދަ މާހައުލުގައި އެފަދަ ބަރު އެއްޗެހި އެޅުމަކީ ދަތިކަމެއް ކަމަށް އޭނާ މަޖާޒީ ގޮތެއްގައި ބުންޏެވެ.
ސެންކޯގެ “އަހަމް” ބްރޭންޑުގެ “Ti22” ސީރީޒްއާ ގުޅުމަށް އޭނާ ޝައުޤުވެރިވީ އިންޑިއާގެ ޓްރެޑިޝަނަލް ރަނާއި އަލިމަހުގެ އިތުރުން، ދުނިޔޭގެ އެންމެ ކުރިއަރާފައިވާ މެޓަލް ކަމަށްވާ ޓައިޓޭނިއަމް ބޭނުންކޮށްފައި ވުމުންނެވެ. ޓައިޓޭނިއަމްއަކީ ވަރުގަދަ އަދި އެހާމެ ލުއި މާއްދާއަކަށް ވުމަކީ ފިރިހެނުންގެ ގަހަނާއަށް ލިބުނު ވަރަށް ތަފާތު ކުރިއެރުމެއް ކަމަށް އޭނާ ފާހަގަކުރިއެވެ.
އިންޑިއާގެ ސަގާފަތުގައި ގަހަނާއަކީ އަބަދުވެސް ވަރަށް ޚާއްސަ އަދި މުހިންމު އެއްޗެއްކަން ފާހަގަކުރަމުން ހަރްޝްވަރުދަން ބުނީ، އިންޑިއާގެ އާއިލާތަކުން ރަނާއި ގަހަނާ ގަތުމަށް ދޭ އަހައްމިއްޔަތުކަން ދުވަހަކުވެސް ފަނޑުވެގެން ނުދާނެ ކަމަށެވެ. އަދި ޒަމާނީ ޓެކްނޮލޮޖީގެ މެޓަލްތަކާއެކު މިފަދަ ގަހަނާތައް އުފެއްދުމަކީ ޒުވާނުންނަށް ވެސް ލިބޭ ވަރަށް ބޮޑު ފަސޭހައެއް ކަމަށް އޭނާ ބުންޏެވެ.
